MAKI 5 - Yataa 'a Dɔbɛnɛ Nama

Chisɔsi‑a mɔ kaima baun, nyina yama n ni min fɛ

¹ Chɛ gbakɔ, mbɛ Chisɔsi che‑a Kadidi yii wa tindi dɔndɔɛ ma, an bɛ a fɛ denɛ n na. Chɛnyɛ chɛ nɛnɛ, a tɔ ni Kɛyasa.

² An che‑a kɛn nɔ, mbɛ Chisɔsi bɔ‑a dɛndɛ ɔ. Ɛ bɔ‑a dechee a ɔ, mɔ kaima dɔndɔ na‑a a tan, min na‑a ka bɛnkuɛ ɔ. Nyina yama, an ni an kamin chɛ fɛ.

³ A sin, a ni chi bɛnkuɛ ɔ wan. Mɔ ɔ mɔ nii kun, a ni a sa yɔɔɛ a.

⁴ Tima sɛsɛ ko a, an na‑a a sa wan yɔɔɛ a. Chɛɛ a ni yɔɔɛ chɛ ɔ tɛ wan, a chenɛ ma, a basan a boo a. A ɔ ni gbɛɛ gbeden, mɔ ɔ mɔ nii kun a ma.

⁵ Su ɔ tee a, kamin chɛ ni ma wan sɔ ɔ, a chenɛ a, ben‑da bɛnkuɛ ɔ, a basan kɔnkɔɛ n dɔ a. Ɛ yee tɛ‑a, ɛ a wandi ma tɛ tɛ senɛ n na.

⁶ A ni pɔɔ, a‑a Chisɔsi yen, mbɛ a‑a bui sa a a. A na‑a, mbɛ a‑a a kumbai gbangban, Chisɔsi chen kɔɔ.

⁷ Mbɛ a‑a yee wa tɛ, a ɔ, “Chisɔsi, Yataa Wa 'a denɛ! I toen mu i ni fen ma n na? I dimu, I ma n tɔɔya. A chɛ Yataa ko a.”

⁸ A‑a chɛ fɔ, koe min na mu, Chisɔsi na‑a a kuu sɔ wan gbɛ a fɔ‑a nyina yama chɛ ma, a ɔ, a ni ka mɔ kaima chɛ fɛ.

⁹ Mbɛ Chisɔsi ɔ, “I tɔɛ?” Mbɛ a ɔ, “N tɔ mu Fanka Wa. Koe min na mu, nn kɔkoo kaka.”

¹⁰ Mbɛ a‑a Chisɔsi disa pien, a ɔ, a ma nyina yama chɛ n gbain an tanda chɛ ɔ.

¹¹ A tima chɛ a, kɔɛnya man sɛsɛ ni wan an baima, an mbe daun chɛ‑a kɔnkɔɛ kaa fɛ.

¹² Mbɛ nyina yama chɛ n‑na Chisɔsi disa, an dɔ, “Nn na ta kɔɛnya chɛ n tena, nn ni bea an fɛ.”

¹³ A dɔn‑da wan an ta koe ma. Mbɛ nyina yama chɛ n bɔ‑a kamin chɛ fɛ, an ta‑a, an bea‑a kɔɛnya chɛ n fɛ. Kɔɛnya chɛ n gbɛɛ, wu fea da faenɛ ɛ gban, an yii‑a bui chɛ‑a kɔnkɔɛ kaa fɛ, an dɛ‑a yii wa chɛ ɔ, an to‑a a ɔ.

¹⁴ Mbɛ mɔɛ chɛ nu, miin ni ka kɔɛnya chɛ n kun ma fɛn tena, an ben‑da bui‑a. An ta‑a duu ɔ, mbɛ an‑na a gbɛɛ ɔ yian, min chɛ‑a a ɔ. Mbɛ an‑na a ɔ yian ben‑da an tanda chɛ ɔ. Mɔ sɛsɛ n na‑a wan, min mbe a ma, an ni a ɔ yen min ma‑a.

¹⁵ A sin, an che‑a kɛn, nyina yama chɛ n ni ka kaminɛ min fɛ, an‑na a tan fan, ɛ si ɔ nɔ. A ma chiienɛ ɛ, a sin, a yiima tɛenɛ ɛ. Chɛ‑a a ma wan, an gbɛɛ chian‑da.

¹⁶ Mɔɛ miin ni ka nɔ ko ɔ ko ma‑a, an fan‑na a gbɛɛ ɔ yian gbɛ an bɔ n na. An‑na a ɔ yian, Chisɔsi na‑a nyina yama chɛ n gbain buɛ min dɔ kamin chɛ fɛ, a basan kɔɛnya chɛ n bakoe a.

¹⁷ Mbɛ mɔɛ chɛ n‑na Chisɔsi disa, an dɔ, a ni bɔ an 'na chɛnyɛ ɔ.

¹⁸ Chisɔsi ɛ kɛn dɛ‑a dɛndɛ chɛ ɔ, mbɛ a na‑a nyina yama gbain ka kaminɛ min fɛ, a‑a disa chɛ wan, a ɔ, Chisɔsi ni a ma an bɛ ni ta.

¹⁹ Chɛɛ Chisɔsi ma dɔn ni. Chɛɛ a‑a min fɔ, a ɔ, “Ta i waa a. I ni a ɔ yian i 'a mɔɛ n na, Mansa Chisɔsi‑a koe min chɛ i ye, a chinchin‑da buɛ min dɔ i ma.”

²⁰ Mbɛ kamin chɛ wɛɛ ta‑a wan, a ben‑da Duu Tan dɔ gbɛɛ, ɛ a ɔ yian‑da mɔɛ n na, Chisɔsi na‑a min chɛ a ye. A sin, an mɔɛ n gbɛɛ da ɔ gbaa‑a wan, an koe chɛ a min koe a.

Chisɔsi 'a baun chɛ, a basan a 'a fɔɛ be a

²¹ Mbɛ Chisɔsi yɛ‑a yii wa chɛ kaka dɔndɔɛ, a ka‑a kaina, an bɛ a fɛ denɛ n na. Mɔ fanka wa an na sɔn‑da nɔ a ma, yii chɛ da a.

²² Mɔ dɔndɔ ni wan nɔ, min tɔ ni Chayɔsi. A ni mɔ chenama dɔndɔ an na, Chu n 'na samun chɛ chenɛ a. Mbɛ a na‑a Chisɔsi tan. A‑a Chisɔsi tan kɛn, mbɛ a bea‑a a chen na.

²³ A‑a a disa, a sɔɛ gbɛɛ a, a ɔ, “N 'na den musuenɛ e na fa‑a. I dimu, na i ni i boo bun a ma, a ni baun, a fɔɛ ni yɛ to a ma.”

²⁴ Mbɛ Chisɔsi bea‑a Chayɔsi fɛ, an bun‑da ta‑a. Mɔ sɛsɛ ta‑a wan an na saan‑da, an findi findienɛ ɛ a ma, a ka kaka kan kɔ kan ma.

²⁵ Musu dɔndɔ ni wan fanka chɛ tɛ ɔ, musu n 'na kau ma gbandi ni min ma, san tan kun ma fea ko a.

²⁶ A na‑a tɔɔ wan bui ti sɛsɛ ye. A‑a a boo fenɛ gbɛɛ ma tachɛ wɛɛ, chɛɛ chɛ gbɛɛ ɔ, a ma gboo ɔ bɔɛ ma sɔn ni, gbandi gbu ta‑a wan ya ɔ ma.

^27-28 A na‑a Chisɔsi ma tɔɛ a min fan, a kɔma a. Chɛ ko a, a na‑a wan a gbaa chia a, fanka chɛ ɔ. A ni wan a fɔ‑a, a yiima ɔ, a ɔ “Ni n tu‑a a ma doma a dechee, n mbe baun‑da wan gbandi chɛ ɔ.” Mbɛ a tu‑a Chisɔsi 'a doma a.

²⁹ A ya kɔɔɛ a, a 'a kau ma gbandi chɛ sɛmbɛ‑a. Mbɛ a‑a a gboo gbu a tinsɔn, mbɛ a baun‑da gbɛ.

³⁰ A ya kɔɔɛ a, Chisɔsi‑a a ɔ sɔn, mbɛ gbasaya, min ni a ɔ mɔɛ n baun koe a, dɔ bɔ‑a a ɔ. Mbɛ a‑a a ya a mun, fanka chɛ ma, a ɔ, “Nyɔn tu‑a n ma doma a?”

³¹ A fɛ denɛ n dɔ, “I‑a a ɔ yen tena wan, mɔɛ n mbe i 'a tindanɛ, an mbe tindi‑a i ma. I ni tisa chɛ to, mɔɛ tu koe a i a?”

³² Chɛɛ Chisɔsi ma sɛmbɛ ni, a ya a ben ben koe a, a ɔ gbɛ koe a, ni mɔɛ min tu‑a a a.

³³ Chɛɛ musu chɛ ban‑da a ɔ sɔn‑da, a gboo ɔ ɛ gbɛ buɛ min dɔ. Chɛ ko a, a bɔ‑a ya a ma, ɛ samba‑a chiandia a. Mbɛ a‑a a kumbai gbangban Chisɔsi chen kɔɔ, mbɛ a‑a tea gbu gbɛɛ ɔ yian a a.

³⁴ Chisɔsi ɔ te a ma, “N 'na den, ta i faa chimaenɛ a don. I 'a danaya‑a i baun. Baun i 'a gbandi chɛ ɔ.”

³⁵ Chisɔsi to‑a koɔ tena wan musu chɛ tena, mbɛ sɔ mɔɛ na‑a, a ka Chayɔsi 'a chenɛ a. Mbɛ a ɔ, a 'a den musuenɛ gbu fa‑a, a ma na sɔ to ticha tɔɔya‑a ta koe a nɔ.

³⁶ Chɛɛ Chisɔsi ma a too ma sɔ ni an bai chɛ ma. A‑a a fɔ wan Chayɔsi ye, a ɔ, “I ma chian, dan dechee n na.”

³⁷ Chisɔsi ma dɔn ni mɔ dɔ gbɛɛ n ni bea a fɛ. A‑a Pita an ya dechee, ni Chimisi, an fea a dɔɛ Chɔn na.

³⁸ Mbɛ an che‑a Chayɔsi 'a chenɛ a. An che‑a kɛn, Chisɔsi‑a a ɔ yen, sɔnkɔ sɔnkɔɛ ni buɛ min dɔ nɔ, a basan di chɛ a, ni yee tɛ.

³⁹ A don‑da chenɛ bu ɔ, mbɛ a ɔ an ma, “N ma a ɔ sɔn ni fen sɔnkɔ sɔnkɔ e nɛ. Wo sɛmbɛ di chɛ‑a. Den chɛ ma fa ni, ɛ sa ɔ chinɔɛ ɔ wan dechee.”

⁴⁰ An bun‑da a yɛn‑da a da a kuiɛ chɛ ma. Mbɛ a‑a an gbɛɛ a bɔ chen chɛ a. Mbɛ Chisɔsi fɛ den sawa chɛ nu, miin na‑a a fɛ, ni den chɛ fa an fea a de a, a‑a an ya. Mbɛ an don‑da chen chɛ dumu gbu ɔ, den su chɛ ni kaina min sa ɔ.

⁴¹ Chisɔsi‑a denɛ gbu ya ka wan a boo ma, mbɛ a ɔ, “Den den, n dɔ, i ni i a sɔ.”

⁴² Den chɛ ni yɛ‑a a ɔ, a‑a a kɔɔ sɔ wan dɔndɔ gbe, mbɛ a bun‑da tachɛ‑a, nɔ a 'a tindanɛ. (Den chɛ sanɛ ni tan kun ma fea). Chɛ ma‑a kɛn, an gbɛɛ da ɔ gbaa‑a wan nɔ.

⁴³ Chɛɛ Chisɔsi‑a an na si wan gbau gbau, a ɔ, an ma a fɔ mɔ ɔ mɔ ye. Mbɛ a ɔ, “Wo daun fenɛ be a ma, a ni a daun.”