MAKI 3 - Yataa 'a Dɔbɛnɛ Nama

Chisɔsi‑a kaminɛ baun, min boo faenɛ ni a ma

¹ Mbɛ Chisɔsi yɛ‑a to Chu n 'na samun chɛ chenɛ a. A na‑a kaminɛ tan fan nɔ, min boo faenɛ ni a ma.

² Mɔɛ dɔ n ni wan nɔ, miin toen ni an ni Chisɔsi bia a chen kɔ. An ni wan gbɛ a ma fɛn‑da, a ɔ yen koe a, ni ɛ kamin chɛ a baun‑da wan, suin tee wɛɛ ma.

³ Mbɛ Chisɔsi‑a a fɔ kamin chɛ ye, min boo chɛ faen ni ka a ma, a ɔ, “I a sɔ, i ni na sɔ mɔɛ gbɛɛ ya kɔɔ.” Mbɛ a na‑a, a sɔ‑a an ya kɔɔ.

⁴ Mbɛ Chisɔsi ɔ, “A nyin fan mmɔ ni a ɔ sɔn, mmɔ 'a sawa dɔnden mu fen ma suin tee ma. Mmɔ 'a sawa dɔnden fan mu mɔ ni mɔɛ baun, a ben a fa koe ma. Mmɔ 'a sawa dɔnden fan mu to mɔ ni ko chɛndɛ ma, a ben ko yama ma koe ma.” Chɛɛ an ma bai fɔ ni, a si chɛ ma.

⁵ Mbɛ Chisɔsi‑a an gbɛɛ ya kɔɔɛ ma fɛn dɔndɔ dɔndɔɛ a a 'a tindanɛ. A faa tɛenɛ ɛ an ma, a yɛ to, ɛ faamɔnɛ ɔ, a si an 'na faa a kɔɔɛ ma. Mbɛ a ɔ kamin chɛ ma, “I boo ɔ tan.” Mbɛ a‑a a boo ɔ sawan, mbɛ a boo baun‑da, yɔ a dɔndɔɛ ni buɛ min dɔ.

⁶ Mbɛ Fayisii chɛ n bɔ‑a baa ma. Mbɛ an bɛ mɔɛ chɛ n na, miin ni Mansa Ɛdɔdi 'a mɔɛ n na, an bun‑da an kun puin‑da kaina dɔndɔɛ, an mbe ma buɛ min dɔ, an ni Chisɔsi fa.

Chisɔsi‑a mɔ sɛsɛ a baun, Kadidi yii wa fɛ

⁷ Chisɔsi ta‑a wan Kadidi yii wa fɛ, an bɛ a fɛ denɛ n na. A sin, mɔ fanka wa bea‑a wan to nɔ a fɛ. Mɔɛ chɛ n na‑a ka Kadidi chɛnyɛ ɔ wan, a basan Chudia a.

⁸ A yɛ to, an ka‑a wan Chuusaɛn duu ɔ, an ka‑a Idumia tanda ɔ, an ka‑a tee bɔ tena, Chɔdan yii tɔnfɛ dɔndɔɛ, mbɛ an ka‑a to Taya duu wa a a tindanɛ, a basan Sidon duu wa a. Mɔɛ chɛ n gbɛɛ na‑a wan Chisɔsi tena. Koe min na mu, an na‑a koe n na min fan, a ni miin ma tena.

⁹ Fanka wa min na‑a ka, a na‑a a ma wan, Chisɔsi‑a a yii na chii a ma ta koe a, an ma na tindi tindi a ma. Mbɛ a ɔ, a fɛ denɛ n ni dɛndɛ ɔ bɛn, a ko a.

¹⁰ A mu min na, a na‑a mɔ sɛsɛ n baun fan an 'na gbandi n dɔ. Chɛ na‑a a ma wan gbɛ, gbandi mɔɛ tɔɛ n gbɛɛ, an ni wan gbɛ an fandi fɔkɔ fɔkɔ‑a, fanka chɛ ɔ, tu koe a Chisɔsi a.

¹¹ A sin, nyina yama ni ka miin gbɛɛ fɛ, ni an na‑a Chisɔsi yen dechee, an ni bea wan a chen kɔɔ, an mbe yee tɛ. An dɔ, “Yataa 'a denɛ mu i a!”

¹² Mbɛ Chisɔsi‑a dasi gbau gbau be nyina yama chɛ n ma. A ɔ, an ma a fɔ mɔ ɔ mɔ ye, mɔɛ min sima mu a a.

Chisɔsi‑a a fɛ denɛ n ya, an mɔ tan kun ma fea

¹³ Mbɛ Chisɔsi sɛ‑a kɔnkɔɛ ɔ. A to‑a nɔ wan, a‑a mɔ kaima chɛ n chee, a toen ni miin na, bea koe a a fɛ. Mbɛ an gbɛɛ na‑a a tena.

¹⁴ Mbɛ a‑a an mɔ tan kun ma fea n ya, a‑a an chee a 'a sɔ mɔɛ n na. Mbɛ a ɔ, a‑a an ya, an bɛ ni ma. A ɔ, a sin mbe an sɔ‑a wan, a ɔ, an ni ta mɔɛ n kan, a si Yataa ma.

¹⁵ A sin to, a ɔ, ɛ gbasaya be‑a wan an ma, nyina yama n gbain koe a mɔɛ n fɛ.

^16-19 Chisɔsi na‑a mɔ tan kun ma fea miin ya, ma koe a a fɛ, an fan nii nɛ. Saimɔn ni ma, Chimisi, ni a dɔɛ Chɔn. Anduu n fea Fiipi a, ni Batɔɔmiu. Matiu ni Tɔmɔsi. A yɛ to, Chimisi dɔndɔɛ wɛɛ, ni Tadayɔsi. Saimɔn dɔndɔɛ wɛɛ, ni Chudasi Isikayɔti. Saimɔn saa saa, a‑a min ya, a‑a tɔ dɔ gbɛɛ be wan a ma, a ɔ, Pita. Chimisi ni a dɔɛ Chɔn, an fa tɔ ni Sɛbɛdi. Chisɔsi‑a an bɛɛ tɔɛ si wan, a ɔ, banda mɛn kaminɛ nu. (Koe min na mu, an ni kosan koɔ‑a kaka). Chimisi dɔndɔɛ fa tɔ ni Afiɔsi. Saimɔn dɔndɔɛ wɛɛ ni mɔɛ an na, min ni a 'a chɛnyɛ ma chɛɛ chɛ tena. Chudasi Isikayɔti tana, an na‑a danka Chisɔsi ma tachɛ‑a.

An‑na kunɛ si Chisɔsi kun ma, nyina yama n 'na mansa ko a

²⁰ Mbɛ Chisɔsi yɛ‑a chenɛ a, a yiaenɛ ni kaina min. Nɔ wɛɛ to, fanka fanka wa koa‑a wan an ma. Chɛ‑a a ma wan, an bɛ a fɛ denɛ n na, tima nii nɔ daun chɛ koe a.

²¹ Chisɔsi waa mɔɛ n‑na chɛ a min, mbɛ tima ee a boo ɔ, daun chɛ koe a. An ta‑a wan, a ka an baa a, a bia koe a, gbasaya a. Koe min na mu, mɔɛ dɔ n ni a fɔ tena wan, an dɔ, a woo‑a.

²² Chu n 'na sawa kan mɔɛ chɛ dɔ nu, an ni wan nɔ, a ka Chuusaɛn duu ɔ. An ni wan a fɔ‑a, an dɔ, “Nyina yama n 'na mansa chɛ, min tɔ mu Bɛɛsɛbu, an mbe a fɛ. A sin to, an mbe ka gbasaya chɛ be tena a ma, nyina yama n gbain koe a mɔɛ n fɛ.”

²³ Mbɛ Chisɔsi‑a an chee, a koɔ‑a an tena, tai ɔ. A ɔ, “Sitana ee a wandi gbain, mɔɛ n fɛ.

²⁴ Ni chɛɛ ma‑a mɔɛ n tɛ chɛnyɛ kan kɔ kan dɔ, an chɛnyɛ chɛ ɛ yɔn fan.

²⁵ Suunɛ wɛɛ ɛ ka wan, koɛ ɛ a yɔn fan. A yɛ to, ni koɛ ma‑a suun chen kan kɔ kan da a, an suun chɛ ee che sɔ‑a.

²⁶ Chɛ an fɛ mu, ni Sitana fɛ mɔɛ n bɛɛ n dɔ du‑a koɛ ɔ, mbɛ a bea‑a, a wandi gbu 'a mansaya danka che‑a.”

²⁷ A ɔ, “Tea gbu sin ko a, mɔ ɔ mɔ ee don ka dechee kamin gbasayaen ba a chenɛ a, i ni a 'a feanka n punka. Ni a chiienɛ an ma‑a, mbɛ a boo fenɛ n mbe che wan punka‑a, a 'a chenɛ a.”

²⁸ A ɔ, “N ni chɛ ma din wo tena, mbɛ Yataa ɛ mɔɛ n to‑a wan nɔ, an 'na ko yama n ko a, a basan main chɛ n na, an mbe miin chɛ n na.

²⁹ Chɛɛ ni mɔ ɔ mɔ‑a Yataa Nyina main, Yataa ee a boo bɔ‑a a mɔ sima chɛ 'a main chɛ ɔ. Chɛɛ a mɔɛ chɛ‑a ko yama ma, kuɔ fɔ ko a.”

³⁰ Chisɔsi na‑a chɛ fɔ, a tɛ‑a bai chɛ an ma, mɔɛ dɔ n ni min fɔ tena. An dɔ, “Nyina yama, an mbe mɔna chɛ fɛ.”

Chisɔsi de na‑a, an bɛ a dɔ kaima n na

³¹ Mbɛ Chisɔsi de na‑a a tena, an bɛ a dɔ kaima n na. An sɔ‑a baa ma, mbɛ an‑na mɔɛ a ta, a chee‑a.

³² Mɔ fanka ni wan si ɔ, Chisɔsi 'a tindanɛ. Mbɛ an dɔ, “A yen ko, i de ni ma, ni i dɔ kaima nu, an bɛ i dɔ musuma n na, an mbe baa ma sɔ ɔ, an toen mu an ni i yen.”

³³ Mbɛ Chisɔsi ɔ, “Wo a fɔ n ye, n de mu mɔɛ min na. A yɛ to, ni n suun ma nyɔɛ mu miin na.”

³⁴ Mbɛ a‑a mɔɛ n ma fɛn, miin ni ka si ɔ a 'a tindanɛ. Mbɛ a ɔ, “Wo yen bɛ, n de yen ko nɛ, a basan n suun ma nyɔɛ n na.

³⁵ Mɔ ɔ mɔ, min mbe Yataa faa chima koe ma‑a, n de an nɛ, n dɔ musuma an nɛ, n dɔ kaima an nɛ.”