MAKI 16 - Yataa 'a Dɔbɛnɛ Nama

Chisɔsi‑a a kɔɔ sɔ, a ka saya ɔ

¹ Mbɛ suin tee chɛ ben‑da kɛn, bɔɔɛ Mɛi, min ka‑a Makadaa duu ɔ, an fea Chimisi de Mɛi a, ni bɔɔɛ Sadome, an ta‑a, an‑na tu kunyɛ a diama san. Musu chɛ n toen ni, an ni tu kunyɛ a diama chɛ fasi fasi Chisɔsi su chɛ ma.

² Mbɛ sayi ma, Tɛnɛ kan kɔ dɔɛ ma, tee kainɛ a, an ta‑a wan Chisɔsi kamba ma.

³ An ni kɛn ta tena, an‑na an nyɔn dɔ tisa wan, an dɔ, “Sen ba dɛgbɛ chɛ, nyɔn mbe a ka‑a kamba chɛ da a, mmɔ ye?”

⁴ Chɛɛ an‑na an kunɛ kɔɔ sɔ kɛn, mbɛ an‑na a yen, mbɛ sen ba gbu chenchendenɛ ɛ, a ka kamba gbu da a.

⁵ Mbɛ an don‑da kɛn kamba gbu bu ɔ, an‑na kamin tɔngbɔɛ yen nɔ. Kamin chɛ ni si ɔ an boo nyima ɔ wan. A sin, doma kai min ni a ma, a gbɛen fan ni. Chɛ‑a an kɔndɔ fii wan.

⁶ Mbɛ a ɔ, “Wo kɔndɔ ma fii. N‑na a ɔ sɔn fan, mbɛ wo e Chisɔsi an yan tena, min ka‑a Nasaɛti duu ɔ, an‑na min gbangban kɔn gbengbandenɛ ma. A ee nɛ. Wo a yen, a ni sa ɔ kaina. Yataa‑a a kɔɔ sɔ, a ka saya ɔ.

⁷ Chɛɛ wo ta gbɛ, wo ni a ɔ yian a fɛ denɛ n na. Wo a ɔ yian Pita wɛɛ a, wo ɔ, ɛ sɔ ɔ wo ya ɔ, a ta Kadidi chɛnyɛ ɔ, wo ɔ, nɔ mu wo e a yen‑da, yɔ a na‑a a fɔ buɛ min dɔ tee wo ye.”

⁸ Mbɛ an ben‑da bui‑a, a bɔ an kamba chɛ ɔ. Koe min na mu, masamba basan kɔndɔfii a, a ni koo an dɔ. Chɛ sin‑na a ma wan, an ma che ni koɔ‑a mɔ ɔ mɔ tena, an chianden ba ɛ. [

GBOO CHƐ A BAN‑DA BUƐ MIN DƆ, GBOO KƆMA SƐSƐ N DƆ Chisɔsi‑a a wandi yian, a fɛ denɛ n na

⁹ Mbɛ Chisɔsi na‑a a kɔɔ sɔ kɛn, Tɛnɛ kan kɔɔ dɔɛ ma, a‑a a wandi yian mɔɛ min pɛn na, an nɛ Mɛi a, min ka‑a Makadaa duu ɔ. A na‑a nyina yama wɔnfea chɛ n gbain an Mɛi chɛ an fɛ.

¹⁰ Mbɛ Mɛi ta‑a, a‑a a fɛ mɔɛ kɔma chɛ n tan, an mbe sanka di chɛ‑a. Mbɛ a‑a a ɔ yian an na.

¹¹ Chɛɛ an nii ma che ni dan‑da a a, an‑na a a min kɛn, mbɛ a wan Mɛi‑a a yen fan, a ɛ fɔɛ ɔ.

¹² Chɛ gbakɔ, a fɛ den fea nu, an ni wan ta‑a konko dɔndɔ ɔ. Mbɛ Chisɔsi‑a a wandi yian an na pɛnɛnɛ mɔ ya dɔ mende ɔ.

¹³ Mbɛ an yɛ‑a, an‑na a ɔ yian an bɔɛ tɔɛ n na, chɛɛ an bɛɛ ma dan ni an da a bai chɛ a.

¹⁴ Chɛ gbakɔ, Chisɔsi fɛ den tan kun ma dɔndɔɛ chɛ nu, an ni wan si ɔ tebu ma, daun chɛ tena. Mbɛ Chisɔsi‑a a wandi yian an gbɛɛ a. A‑a an ma tɔɔ, a ɔ, an faa a kɔɔen mu, a sin, danaya ee an dɔ. A ɔ, koe min na mu, an ban‑da dan koe a mɔɛ saa an na, miin na‑a a wan Chisɔsi yen, a kɔɔ sɔenɛ gbakɔ saya ɔ.

¹⁵ Mbɛ a ɔ an ma, “Wo ta dunya chɛ gbɛɛ ɔ, wo ni sakana bai chɛndɛ chɛ ɔ yian mɔ ɔ mɔ a.

¹⁶ Mɔɛ miin mbe an kai fa‑a n na, yii ni chɛ an kunɛ ɔ Yataa chia a, an mbe bauncha ma sɔn‑da wan. Chɛɛ mɔɛ miin mbe ee an kai fa‑a n na, Yataa ɛ kaa a tɛ‑a wan an bakoe ma, an ni ma tɔɔya ɔ.

¹⁷ Mbɛ a sin, chɛ an mbe ma‑a tɔmɔsi a, tee ɔ tee a, chɛ n ko a miin kai faen mu n na. An mbe nyina yama n gbain‑da wan mɔɛ n fɛ, n tɔɛ ɔ, an ni koɔ chɛnyɛ koɛ n dɔ, miin mbe fɔ chɛnyɛ dɔ mende n dɔ.

¹⁸ Ni an‑na ka n bɛɛ bia, a ee ko ma‑a an na. Chɛ ma, an ni bɔɛɛ wɛɛ min, a ee ko ɔ ko ma‑a an na. An mbe an boo bun‑da wan gbandi mɔɛ n ma, mbɛ an baun‑da.”

Yataa‑a Chisɔsi ya, a sɛ banda bu ɔ

¹⁹ Mbɛ Mansa Chisɔsi ban‑da kɛn koɔ‑a a fɛ den chɛ n tena, Yataa‑a a ya wan, a sɛ banda bu ɔ, mbɛ Chisɔsi si‑a a boo nyima ɔ.

²⁰ Mbɛ a fɛ denɛ n ta‑a kan kɔ kan, an mbe ben‑da sakana bai chɛndɛ chɛ ɔ yian‑da mɔɛ n na. Mansa Chisɔsi sin basan‑da wan an ma, an 'na wai gbɛɛ ɔ. A sin, a‑a a ɔ yian tɔmɔsi n dɔ, miin ni yen an 'na sakana bai gbaa chia a, mbɛ an mbe tea chia an na.]