MAKI 15 - Yataa 'a Dɔbɛnɛ Nama

An na‑a Chisɔsi a, Kɔfana Padeti chen kɔɔ

¹ A sau sau chɛ ma, Chu n tɛ mɔɛ nu Yataa a, an 'na mansa nu, ni Chu gbakoo nu, a basan Chu n 'na sawa kan mɔɛ n na, an bɛ Chu kuti wa ɔ mɔɛ n gbɛɛ a, an bɛn‑da kun puinɛ ɔ. Mbɛ an‑na Chisɔsi chii fɔin, an ta‑a a a, mbɛ an‑na a konan Kɔfana Padeti ma.

² Mbɛ Kɔfana Padeti‑a a ɔ tisa, a ɔ, “I wan mu Chu mɔɛ n 'na mansa a?” Mbɛ Chisɔsi ɔ, “I‑a an fɔ ka.”

³ Mbɛ mɔɛ chɛ nu, Chu n tɛ Yataa a, an 'na mansa chɛ nu, an‑na kun sɛsɛ si wan Chisɔsi kun ma.

⁴ Mbɛ Kɔfana Padeti‑a a ɔ tisa to, a ɔ, “Bai ɔ bai ee i da a, e min fɔ? A ɔ yen bɛ, an mbe kun sɛsɛ wa min si tena i kun ma.”

⁵ Chɛɛ chɛ wɛɛ ɔ to, Chisɔsi ma a tɛ ni a ma gbukuu wɛɛ. Chɛ‑a Kɔfana Padeti da a fa wan gban.

Kɔfana Padeti‑a kaa a tɛ, Chisɔsi fa koe ma

⁶ San kɔ san na, kun bɔ a ɔ bɛnɛ kun ma, manda ni dɔndɔ, Kɔfana Padeti ni min na tachɛ. A ni mɔ dɔndɔ boo ka wan, min mbe sa ɔ pimbi chenɛ a, an ni a ɔ tisa min boo ka koe a.

⁷ A san chɛ a, kamin dɔndɔ min tɔ ni Baabasi, a ni wan pimbi chenɛ a, an bɛ a bɔɛ dɔ mende n na. An ni mɔɛ n fan na, an na‑a miin bia butuin chɛ koe a Domi mansa n na. Baabasi chɛ na‑a mɔɛ an fa, yɔ a bɔɛ chɛ dɔ n bɛɛ.

⁸ Kɔfana Padeti ni kɛn Chisɔsi gbɛmbo‑a, mɔ fanka wa a kan‑da a ma. An‑na a ɔ tisa wan, an dɔ, a ni manda chɛ a ben, min‑na ɛ ben tee.

⁹ Mbɛ a ɔ, “Wo toen mu, n ni n boo ka nyɔn na wo ye, Chu n 'na mansa chɛ?”

¹⁰ Kɔfana Padeti na‑a chɛ fɔ, koe min na mu, a na‑a a ɔ sɔn fan, mbɛ toomaya gbama, an na‑a a ma, Chu tɛ mɔɛ nu Yataa a, an 'na mansa n na‑a Chisɔsi a a chen kɔɔ.

¹¹ Chɛɛ a che‑a kɛn an kaina chɛ, Chu n tɛ mɔɛ nu Yataa a, an 'na mansa chɛ n‑na a ma wan, an‑na fanka fanka chɛ a sɛ. An dɔ, an ni yee tɛ Baabasi an boo ka koe a.

¹² Chɛɛ Kɔfana Padeti‑a an dɔ tisa wan to, a ɔ, “Mbɛ wo toen mu gbɛ n ni fen ma kamin chɛ a, wo e min chee, wo ɔ, wo wan Chu n 'na mansa?”

¹³ Mbɛ an‑na yee tɛ to, an dɔ, “A ni gbangban kɔnɛ ma, a ni fa.”

¹⁴ Chɛɛ Kɔfana Padeti ɔ, “Fen ko a chɛ ɛ ma? Kamin chɛ gbu, a‑a fen ko yama ma?” Chɛɛ an‑na yee gbu ma munda wan gbɛ, an dɔ, “A ni gbangban kɔnɛ ma, a ni fa.”

¹⁵ Mbɛ Kɔfana Padeti‑a a boo ka wan Baabasi a, fanka fanka chɛ faa chima koe a. Mbɛ a‑a a ma, an‑na Chisɔsi gbasi bosa a pien, mbɛ a‑a a be, an ni a gbangban kɔn gbengbandenɛ ma, a ni fa nɔ.

Soya n‑na Chisɔsi ma yɛn

¹⁶ Chɛ gbakɔ, soya chɛ nu, miin ni Kɔfana Padeti kɔɔ, an ta‑a Chisɔsi a, mbɛ an don‑da a a Kɔfana Padeti 'a kata chɛ ɔ. Mbɛ an‑na an bɔɛ tɔɛ n gbɛɛ a kan.

¹⁷ Mbɛ an‑na a ma chii mansa doma a, min kɔ yawaen ni. Mbɛ an yɛ‑a wan to, an‑na banfua nyan wai ɔ, mbɛ an‑na a si a kun na. An dɔ, a 'a mansa banfua an nɛ.

¹⁸ Mbɛ an bun‑da mansa kɔndɔnɛ chɛ‑a a a, an dɔ, “Chu mɔɛ n 'na mansa chɛ ni mɛ.”

¹⁹ Mbɛ an bun‑da Chisɔsi kun tɛ gbasi‑a kɔn kundu a. An mbe ta‑a an da yii wɛɛ fasi‑a a ma, mbɛ an mbe ta‑a to an kumbai gbangban‑da a chen kɔɔ.

²⁰ Mbɛ an ban‑da kɛn a ma yɛn‑da, an‑na a ma bɔ wan gbae an ta mansa doma chɛ a, mbɛ an‑na a ta don a ma. Mbɛ an bɔ‑a a a, ta koe a fa a, kɔn gbengbandenɛ ma.

An‑na Chisɔsi gbangban kɔn gbengbandenɛ ma

²¹ An to‑a ta an na Chisɔsi a, mbɛ an bɛn‑da kamin dɔndɔ a. A tɔ ni Saimɔn, a sin na‑a ka Sayini duu ɔ wan, ɛ na‑a Chuusaɛn duu ɔ. A 'a denɛ n fan nii nɛ Adɛsanda a, ni Dufɔsi. Soya chɛ n‑na a yen kɛn dechee, an‑na a din fan a ma, ta koe a kɔn gbengbanden chɛ a, Chisɔsi ko a.

²² Mbɛ an che‑a Chisɔsi a kaina dɔndɔ, an ni min chee, an dɔ, Kɔkɔta, min fasaien mu, kun konkon ma.

²³ Nɔ ni, mbɛ an‑na gbɛ be a ma, min dɔ basandenɛ ni gboo ɔ dumɛ bui a. Chɛɛ Chisɔsi ma dɔn ni a ni a min.

²⁴ Mbɛ an‑na a gbangban kɔn gbengbandenɛ chɛ ma nɔ. Mbɛ an yɛ‑a, an‑na chɛ fenɛ chɛ a ma koa n ko a, an ni a ɔ sɔn, ni mɔɛ ɛ min ma sɔn.

²⁵ Tee kaina kɔɔɛ a ni, kɛn an‑na Chisɔsi gbangban kɔn gbengbandenɛ ma.

²⁶ Mbɛ koe min gbu na‑a a ma, an‑na a gbangban kɔn gbengbanden chɛ ma, an‑na a nyɛn fan kɔn dɛnfɛ ma, an dɔ, Chu mɔɛ n 'na mansa an nɛ.

^27-28 An na‑a a gbangban kɔn gbengbanden chɛ ma kaina dɔndɔɛ wan, an bɛ kanka fea an na. Dɔndɔɛ ɛ a boo nyima ɔ, dɔndɔɛ ɛ a manɛ ɔ.

²⁹ Mbɛ chia a ben mɔɛ n‑na an kunɛ fichi fichi wan. Mbɛ an bun‑da a main‑da, an dɔ, “Wua! O, i wɛn‑na a fɔ, i ɔ, e Yataa 'a chenɛ te wan, mbɛ i‑a a sɔ tee sawa tɛ.

³⁰ Mbɛ puin bɛ kɔn gbengbanden chɛ ma, i ni i wandi kun bɔ saya yuu chɛ ɔ.”

³¹ Mɔɛ miin ni Chu n tɛ ɔ Yataa a, an 'na mansa nu, an bɛ Chu n 'na sawa kan mɔɛ chɛ n bɛɛ a, an‑na mayɛma koe n sɛ wan Chisɔsi ma. An mbe a fɔ an nyɔn ye, an dɔ, “A‑a mɔ dɔ mende n baun, chɛɛ a ee che a ni a wandi baun.

³² Ni a wan mu kunka mansa chɛ a, Chu mɔɛ n 'na mansa, a ni puin bɛ kɔn gbengbanden chɛ ma. Chɛ an mbe a ma‑a, nn ni a wakoe ɔ yen, mbɛ nn dan‑da a a.” An bɛ gbangban‑da ka mɔ fea miin na dɔndɔ a, an bɛɛ, an‑na a main ka wan.

An‑na Chisɔsi fa

³³ Tee che‑a kɛn kun tɛ, an tee chɛ ma, pimbi bun‑da wan chɛnyɛ gbɛɛ ɔ, aan awa sawa ko a.

³⁴ Mbɛ tee kɔ kai ma, Chisɔsi‑a yee tɛ wan gbankon, a ɔ, “N 'na Yataa, n 'na Yataa, fen mu i ban‑da n dɔ?”

³⁵ Mbɛ mɔɛ dɔ nu nɔ sɔ ɔ, an‑na a a min kɛn a‑a min fɔ, an dɔ, “Wo a yen ko, ɛ ka kai Idaicha an chee‑a, Yataa 'a gbonka chɛ mɔɛ chɛ suun.”

³⁶ Mbɛ an dɔndɔ‑a bui sa a a, mbɛ a ta‑a, a na‑a fen yɔfu yɔfu a. Mbɛ a‑a a chima gbɛ a, min baa nii ma gbɛ. Mbɛ a‑a a don kɔnɛ a, a don koe a Chisɔsi da a, a ni a susu, ɛ ta‑a a fɔ‑a a bɔɛ n ye, a ɔ, “Mmɔ a ma kɔn, kɔkɔɛ Idaicha ɛ na‑a wan, a ni a a yii kɔn gbengbanden chɛ ma.”

³⁷ Mbɛ Chisɔsi‑a yee tɛ to gbankon, mbɛ a fa‑a.

³⁸ Mbɛ tɛndi, min ni dɛn dɔ Yataa 'a chen chɛ bu ɔ, a tɛka‑a fea a, a ka a kandɔɛ, aan a yii a denka ɔ.

³⁹ Mbɛ Domi soya gbakoo chɛ, min ni sɔ ɔ nɔ Chisɔsi ya kɔɔɛ, a‑a a ɔ yen kɛn, mbɛ Chisɔsi fa‑a, a‑a a fɔ wan, a ɔ, “Kamin chɛ ni Yataa 'a denɛ chɛndɛ chɛndɛ gbu an na.”

⁴⁰ Musu n bɛɛ, an ni wan nɔ, an mbe sɔ ɔ pɔɔ, an ya bɛndenɛ ɛ a ma. Bɔɔɛ Mɛi min ka‑a Makadaa duu ɔ, a ni wan nɔ. Bɔɔɛ Mɛi dɔndɔɛ wɛɛ ni wan nɔ. A 'a denɛ ni Chimisi dɔɔma a, ni Chosesi. Bɔɔɛ Sadome wɛɛ ni wan nɔ.

⁴¹ Musu chɛ n fan na‑a a sɔ Chisɔsi fɛ, a ni Kadidi chɛnyɛ ɔ tima min na. A sin, an fan ni a deman chia sɛsɛ a. Musu sɛsɛ ni wan to nɔ, miin bea‑a a fɛ, a sɛ‑a tima min na Chuusaɛn duu ɔ.

An‑na Chisɔsi sa a kamba ɔ

⁴² An tee chɛ bea ma, min ni tee a Chu n ni an ma bɛn an 'na suin tee chɛ ko a,

⁴³ kamin dɔndɔ na‑a wan nɔ, a ka Ayimatia duu ɔ. A tɔ ni Chosɛfi, a sin baa ni wan a ma kaka, Chu gbakoo n tɛ, miin ni si Chu kuti wa ɔ. A yɛ to, a ya ni wan tima chɛ ya ɔ, tima min na Yataa ɛ a 'a mansaya ɔ yian‑da. A sin, a na‑a a faa sɔ wan, mbɛ a ta‑a Kɔfana Padeti tena, a‑a Chisɔsi su ɔ tisa a ma.

⁴⁴ Chɛɛ yiinachii ni wan Kɔfana Padeti ɔ, ni Chisɔsi gbu faen fan ni gbɛ. Mbɛ a 'a soya gbakoo chɛ, a‑a a chee, a‑a a ɔ tisa ni Chisɔsi faen fan ni gbɛ.

⁴⁵ Mbɛ soya gbakoo chɛ, a‑a a fɔ, a ɔ, Chisɔsi fa‑a. Kɔfana Padeti‑a chɛ a ɔ gbɛ kɛn, mbɛ a dɔn‑da a su be koe a Chosɛfi chɛ ma.

⁴⁶ Mbɛ Chosɛfi‑a fen gbɛ san. Mbɛ a‑a Chisɔsi su a yii, a‑a a a mendemende fen gbɛ chɛ a. Mbɛ a‑a a sa kamba ɔ, min nyandenɛ ni senɛ ɔ. Mbɛ a‑a faa gban ba tundun kamba chɛ da a.

⁴⁷ Mbɛ Mɛi, min ka‑a Makadaa, ni Mɛi dɔndɔɛ, min ni Chosesi de a, an ya ni wan kaina chɛ a, Chisɔsi na‑a tɔn ka kaina.