MAKI 14 - Yataa 'a Dɔbɛnɛ Nama

An‑na kun puinɛ chɛ, a si Chisɔsi fa koe ma

¹ A to‑a gbɛ tee fea, mbɛ Chu n 'na kun bɔ a ɔ bɛnɛ bia tima che‑a, an 'na biidi dɛnfɛ daun bɛn chɛ. A tima chɛ a, Chu n tɛ ɔ mɔɛ nu Yataa, an 'na mansa nu, an bɛ Chu n 'na sawa kan mɔɛ n na, an toen ni an ni Chisɔsi bia nun dɔ, mbɛ an‑na a fa.

² Chɛɛ an‑na a fɔ wan an nyɔn ye, an dɔ, “Mmɔ ma a ma bɛn chɛ kun ma, mɔɛ n ma na gbunɛ a bea.”

Musu dɔndɔ‑a sɛndi tu chɛ Chisɔsi kunɛ ɔ

³ Mbɛ Chisɔsi yɛ‑a Bɛtani duu ɔ. A ta‑a wan kamin dɔndɔ 'a chenɛ a, min tɔ ni Saimɔn. Saimɔn chɛ ni mɔɛ an na, gbandi yama bɔen ni tee min gboo ma. An fea Chisɔsi a, an ni kɛn si ɔ daun chɛ a, musu dɔndɔ na‑a wan tu kunyɛ a diama wa a an chen chɛ a. Tu chɛ sin ni baa min dɔ, a nyanden ni senɛ ɔ wan. Mbɛ a‑a baa chɛ da tɛ, a‑a a chɛ Chisɔsi kunɛ ɔ.

⁴ Chɛɛ mɔɛ dɔ n ni wan nɔ, miin faa tɛen ni, an bun‑da a fɔ‑a an nyɔn ye, an dɔ, “Musu chɛ‑a tu bonda chɛ gbɛɛ yayi fen ko a ka?

⁵ Koe min na mu, a ni a ma tachɛ wan bɛɛ kɔpɔɛ a, min ni ben san dɔndɔ pawa ma, mbɛ a‑a a be yɔn tɔɛ n ma.” Mbɛ an‑na musu chɛ ma nyin, a yama boo a.

⁶ Chɛɛ Chisɔsi ɔ, “Wo a to nɔ dechee. Fen ko a, wo e a ma nyin tena? A‑a koe min ma ka n na, a ma kawaen mu.

⁷ Koe min na mu, yɔn tɔɛ n tana, wo bɛ an mbe ma‑a an na tima ɔ tima ko a. A sin, ni wo toen mu, wo ni ko chɛndɛ ma an na tima ɔ tima, wo e a ma wan. Chɛɛ n tana, n mbe ee ma‑a wo tɛ ɔ tima ɔ tima ko a.

⁸ Musu chɛ‑a koe an ma ka, ɛ che min chɛ‑a, n ko a. A‑a tu min chɛ ka n kunɛ ɔ, a‑a n ma bɛn fan ka, n tɔn koe a, n fa tima ya ɔ.

⁹ A‑a min chɛ ka, n ni a ma din wo tena, a ee danka‑a nɛ. Chɛɛ kan kɔ kan dunya chɛ ɔ, sakana bai chɛndɛ chɛ ɛ fɔ‑a kaina, musu chɛ 'a ko chɛndɛ chɛ wɛɛ, ɛ fɔ‑a wan nɔ, mɔɛ n gbɛɛ ni a a min.”

Chudasi‑a Chisɔsi ma tachɛ, kɔpɔɛ ko a

¹⁰ Mbɛ Chudasi Isikayɔti, min ni Chisɔsi fɛ den tan kun ma fea chɛ n dɔndɔ a, a ta‑a Chu n tɛ mɔɛ nu Yataa a, an 'na mansa n tena, min mbe a ma, a ni Chisɔsi ma tachɛ an ma.

¹¹ An sin‑na chɛ a min kɛn a da a, an bu ɔ dia‑a wan, mbɛ an dɔn‑da kɔpɔɛ gbu be koe a a ma. Mbɛ a ka gbɛ a tee chɛ ma, Chudasi ni wan gbɛ chia yan‑da, ɛ kun buɛ min dɔ, a ni Chisɔsi ma tachɛ mɔɛ chɛ n ma.

Chisɔsi‑a kun bɔ a ɔ bɛnɛ bia, an bɛ a fɛ denɛ n na

¹² Mbɛ tee saa saa che‑a bɛn chɛ ko a, biidi dɛnfɛ daun bɛn chɛ. A tee chɛ a ni, an ni sa n fa tee min ma, daun fenɛ a, kun bɔ a ɔ bɛn chɛ ko a. Mbɛ Chisɔsi fɛ denɛ n‑na a ɔ tisa, an dɔ, “I toen mu nn ni ta mende, nn ni kaina ɔ bɛn, daun fen chɛ daun koe a, i boo ɔ?”

¹³ Mbɛ Chisɔsi‑a a fɛ denɛ n sɔ, an mɔ fea, ta koe a Chuusaɛn duu ɔ. A ɔ an ma, “Wo e ma‑a wo kunɛ a don‑da duu wa chɛ ɔ, wo e kaminɛ tan‑da wan, ɛ ta‑a yii a da ɔ. Wo bea a fɛ.

¹⁴ A sin, ni a don‑da chen kan kɔ kan na, wo a fɔ chen ti chɛ ye, wo ɔ, ‘Nn kan mɔ‑a nn sɔ, a ɔ, i ni dumu yian nn na. A ɔ, nn ni a ɔ bɛn daun chɛ koe a, kun bɔ a ɔ bɛn chɛ ko a. Dumu gbu ɛ wan nɔ?’

¹⁵ A sin, ɛ dumu ɔ bɛnden ba yian‑da wan wo a, banda a chenɛ banda a. Wo ko ɔ ko ɔ bɛn nɔ, mmɔ ko a.”

¹⁶ Mbɛ a fɛ den fea chɛ nu, an ta‑a duu wa chɛ ɔ. Mbɛ Chisɔsi na‑a bai miin gbɛɛ fɔ an ye, a bɔ‑a wan a a. Mbɛ an‑na daun fen chɛ gbu ɔ bɛn, kun bɔ a ɔ bɛn chɛ ko a.

¹⁷ A sin, yɛɛ ma tee a che‑a kɛn, mbɛ Chisɔsi na‑a, an bɛ a fɛ den tan kun ma fea chɛ n na.

¹⁸ An sin ni kɛn si ɔ tebu ma, daun chɛ‑a, mbɛ Chisɔsi ɔ, “N mbe chɛ ma din‑da wan wo tena, mbɛ wo dɔndɔ, ɛ na tena wan n ma tachɛ‑a. Wo dɔndɔ, mmɔ bɛ, mmɔ ɛ daun chɛ‑a min na.”

¹⁹ Mbɛ an faa bun‑da yɔn‑da, an bun‑da a fɔ‑a a ye, dɔndɔ dɔndɔɛ a, chɛ ɔ, “N gbee ma chɛ a, ae?”

²⁰ Mbɛ Chisɔsi ɔ, “Mɔ dɔndɔ mu, wo mɔ tan kun ma fea chɛ n tɛ. Nn fea gbu, nn mbe daunɛ chɛ tena min na, koen dɔndɔɛ ɔ.

²¹ Koe min na mu, n fan, Mɔ Gbu 'a Denɛ, n mbe na tena wan fa‑a, yɔ a nyɛnden mu buɛ min dɔ Yataa 'a gboo ɔ, a si n ma. Chɛɛ ɛ yaua‑a gba mɔɛ chɛ ko a, min mbe n ma tachɛ‑a. Ni a nii ma suun ni, a ni nyan‑da wan a ko a.”

Chisɔsi‑a daun fenɛ dankama daun, an bɛ a fɛ denɛ n na

²² Mbɛ an ni kɛn daun chɛ chɛ‑a, Chisɔsi‑a biidi dɔndɔ ya. Mbɛ a‑a Yataa ɔ tisa, a ni biidi chɛ dua. Mbɛ a‑a a ɔ kai kai, a‑a a du du an ma, ɛ ta‑a a fɔ‑a, a ɔ, “N fandi gbu, n gboo an nɛ. Wo a bia, wo ni a daun.”

^23-24 Mbɛ a‑a kɔpu wɛɛ ya, gbɛ ni min dɔ. Mbɛ a‑a Yataa wai bɔ, a‑a a be an ma, mbɛ a ɔ, “N wii an nɛ, n mbe na tena min na bɔn‑da mɔ gbu gbɛɛ ko a. N wii chɛ, Yataa ɛ an ya tena, mbɛ a‑a dɔbɛn nama chɛ a 'a mɔɛ n na.” Mbɛ an gbɛɛ, an‑na a bia, an‑na a min.

²⁵ A ɔ, “Ka wɛ, n mbe chɛ ma din wo tena. N mbe ee gbɛ chɛ min‑da to, mɔɔ dechee tima chɛ a, tima min na Yataa ɛ a 'a mansaya ɔ yian‑da. A tima an na mu, n mbe gbɛ nama min‑da, mmɔ bɛ.”

²⁶ Mbɛ an‑na Yataa si sa kɛn, an ta‑a kɔnkɔɛ chɛ ɔ, an ni min chee, an dɔ, Wodifi kɔnkɔɛ.

Chisɔsi ɔ te, Pita ɛ a wakoe kɔɔsa bia chɛ‑a wan

²⁷ Mbɛ Chisɔsi ɔ, “Wo gbɛɛ, wo e na tena wan ka‑a n fɛ. Koe min na mu, a nyɛnden fan mu Yataa 'a gboo ɔ, mbɛ ni Yataa‑a sa kun ma fɛn mɔɛ ya, sa n dɔ ɛ fasan fan.

²⁸ Chɛɛ tima min na Yataa ɛ n kɔɔ sɔ‑a, a ka saya ɔ, n mbe ta‑a wan wo ya ɔ Kadidi chɛnyɛ ɔ.”

²⁹ Chɛɛ Pita‑a a fɔ wan Chisɔsi ye, a ɔ, “N bɔɛ chɛ n gbɛɛ ni ka wɛɛ i fɛ, n tana, n mbe ee ka‑a i fɛ.”

³⁰ Mbɛ Chisɔsi ɔ, “Pita, n ni a ma din i tena, mbɛ tɛ kɔnɛ e na konchee gba fea sayi chɛ ma, e kɔɔsa bia chɛ‑a wan gba sawa, a si n sɔn koe ma i boo ɔ.”

³¹ Chɛɛ Pita chii‑a wan a ma Chisɔsi tena, a ɔ, “I fa tena, n fa tena. N mbe ee kɔɔsa bia chɛ‑a i wakoe ma.” Mbɛ Chisɔsi fɛ denɛ tɔɛ n gbɛɛ, an‑na a fɔ ka wan.

Chisɔsi‑a samunɛ chɛ Kɛsemani

³² Mbɛ an ta‑a kaina chɛ, an ni min chee, an dɔ, Kɛsemani. Mbɛ Chisɔsi‑a a fɔ a fɛ denɛ n ye, a ɔ, “Wo si nɛ, n mbe samunɛ chɛ.”

³³ Mbɛ a‑a Pita ya, ni Chimisi an fea Chɔn na. Mbɛ mɔnɛ koa‑a a ma a ya a, mbɛ a faa yɔn‑da.

³⁴ Mbɛ a ɔ, “Faayɔnɛ min mbe n ma, a da a koo. A toen mu, a ni ta n na faa. Wo ma chinɔ nɛ, wo n ma kɔn.”

³⁵ Mbɛ a ka‑a wan an baima ɛnden na, mbɛ a‑a a wandi ɔ fuin duu ma, a bun‑da samunɛ chɛ‑a. A‑a Yataa ɔ tisa wan, ni ɛ bɛn fan, tima chɛ a, ko yawaen chɛ ni ka a kun ma.

³⁶ A ɔ, “Fa, e kun fan ko ɔ ko ma. A ma ko yawaen chɛ ni ka n teen na. Chɛɛ chɛ gbɛɛ ɔ, n ta faa ma koe, an ma ma. Chɛɛ i ta faa ma koe, an ni ma.”

³⁷ Mbɛ a yɛ‑a, a‑a an tan sa ɔ chinɔɛ ɔ. Mbɛ a ɔ Pita ma, “Saimɔn, e ka chinɔɛ ɔ wan? E ee kun i ni ma i ya a, awa dɔndɔ wɛɛ ko a?

³⁸ Wo wo kɔɔ sɔ, wo ma chinɔ. Wo samunɛ ma ti bia, Sitana ma na a ma, wo ni wo kan kɔ sɔ Yataa a. Wo toen mu wo ni Yataa faa ma koe n ma, chɛɛ a gbasaya ee wo boo ɔ an ma koe a.”

³⁹ Mbɛ a ta‑a to, a‑a samunɛ chɛ, a‑a bai dɔndɔ gbe chɛ an fɔ, a na‑a min fɔ a saa a.

⁴⁰ Mbɛ a yɛ‑a to a fɛ den chɛ n tena. A‑a an tan to chinɔɛ ɔ. Koe min na mu, chinɔɛ ni fanka an ya a kaka. An gbu nii ma a ɔ sɔn, ni an mbe fen fɔ a ye.

⁴¹ Mbɛ a yɛ‑a to, a gba sawan bɔɛ ɔ, a fɛ den chɛ n tena. A ɔ, “Wo e ka sa ɔ chinɔɛ an dɔ tun? Wo e wo suin‑da? A kun‑da gbɛ. Tima che‑a, n fan, Mɔ Gbu 'a Denɛ, n ma tachɛ koe a, ko yama ma mɔɛ n ma.

⁴² Wo wo a sɔ, mmɔ ni bun ta‑a. Wo wo ya a ta pan. Mɔɛ min mbe n ma tachɛ tena, a yen ko na‑a.”

An na‑a Chisɔsi bia‑a

⁴³ Mbɛ a ya kɔɔɛ a, Chisɔsi to‑a koɔ an na, mbɛ mɔ fanka na‑a a tan. Chudasi, a fɛ den tan kun ma fea chɛ n dɔndɔ, an ni sɔ ɔ an ya ɔ. Mɔɛ miin mbe Chu n tɛ, an bɛ Yataa, an 'na mansa nu, ni Chu n 'na sawa kan mɔɛ nu, an bɛ an 'na gbakoo n na, an fan na‑a an sɔ. Kɔn kundu ma tɛenɛ, a basan chɛɛ chɛ mɛ a, ɛ an boo ɔ.

⁴⁴ An mbe e na to na‑a, Chudasi na‑a a fɔ wan mɔɛ chɛ n ye, a ɔ, ɛ mɔɛ min kɔndɔn‑da, a ɔ, an nɛ. A ɔ, an ni dɛ a ma, an ni a bia gban, mbɛ an ta‑a a a.

⁴⁵ Mbɛ an‑na a fo kɛn, Chudasi ta‑a Chisɔsi tan a ya kɔɔɛ a, mbɛ a ɔ, “Kan mɔ,” mbɛ a‑a a kɔndɔn.

⁴⁶ Mbɛ mɔɛ chɛ n dɛ‑a Chisɔsi ma, mbɛ an‑na a bia gban.

⁴⁷ Chɛɛ Chu n 'na tɛ mɔ wa Yataa tena, a 'a bɔi denɛ, a ni wan an mɔɛ chɛ n tɛ ɔ. An‑na Chisɔsi bia kɛn, mbɛ mɔ dɔndɔ, min ni nɔ sɔ ɔ, a‑a chɛɛ chɛ mɛ bɔ a a, mbɛ a‑a bɔi denɛ chɛ too tɛ a a gbeda.

⁴⁸ Mbɛ Chisɔsi ɔ an ma, “Wo nii wo wandi tɔɔ na koe a, chɛɛ chɛ mɛ n na wo boo ɔ, a basan kɔn ma tɛenɛ a, n bia koe. Kanka ma chianden ma n na.

⁴⁹ Mmɔ‑a tee sɛsɛ wa chɛ gbɛɛ ban, Yataa 'a kata chɛ ɔ, n mbe kan chɛ chɛ‑a, wo ma n bia ni. Chɛɛ Yataa 'a gboo‑a min fɔ, a ni bɔ a a.”

⁵⁰ Mbɛ Chisɔsi fɛ denɛ n gbɛɛ, an‑na a dɔndɔ gbe to, mbɛ an ben‑da bui‑a.

⁵¹ Chɛɛ kamin tɔngbɔ dɔndɔ na‑a a sɔ wan Chisɔsi fɛ. Kamin tɔngbɔɛ chɛ, a nii ma a ma chii ni koa dɔ gbɛɛ ɔ, fɔ dechee fen gbɛ, a na‑a min wangban. An toen ni an ni a wɛɛ bia.

⁵² Chɛɛ a‑a a 'a koa chɛ to wan an boo ɔ, mbɛ a ben‑da bui‑a, a ma senɛ a.

An na‑a Chisɔsi a, Chu kuti wa chen kɔɔ

⁵³ Mbɛ an ta‑a Chisɔsi a tɛ mɔ wa chɛ chen kɔɔ, Chu n tɛ mɔɛ nu Yataa a, an kun ti chɛ. A tima chɛ a, Chu n tɛ mɔɛ n gbɛɛ Yataa a, ni an 'na sawa kan mɔɛ nu, an bɛ gbakoo n na, an na kanden fan ni nɔ.

⁵⁴ Pita na‑a a sɔ wan Chisɔsi fɛ. Chɛɛ a ma dɔn ni, a ni gbɛn an ma gbɛdɛn. An ta‑a wan, aan a che an 'na tɛ mɔ wa chɛ 'a kata chɛ ɔ, mbɛ an don‑da nɔ. Pita wɛɛ don‑da wan, mbɛ a si‑a, an bɛ kata chɛ kun ma fɛn mɔɛ n na, ɛ a gbaa‑a ta fɛ.

⁵⁵ Mbɛ Chu n tɛ mɔɛ nu Yataa a, an 'na mansa nu, an bɛ Chu kuti wa ɔ mɔɛ n gbɛɛ a, an bun‑da siiya yan‑da, a si Chisɔsi ma. An toen ni, an ni chia yan, a fa koe ma. Chɛɛ an nii ma chia sɔn ni, a fa koe a.

⁵⁶ Mɔ sɛsɛ na‑a wan, an‑na fania fɔ Chisɔsi ma. Chɛɛ an da a kuiɛ ma bɔ ni a nyɔn na.

⁵⁷ An dɔ nu, an sɔ‑a wan, an‑na fania siiya chɛ, a si a wan Chisɔsi ma. An dɔ te,

⁵⁸ “Nn‑na a a min fan, a‑a a fɔ, a ɔ, ɛ kun fan a ni Yataa 'a chen chɛ, mmɔ‑a min sɔ ka mmɔ boo a, a ni a te, mbɛ a‑a a sɔ tee sawa tɛ ɔ, mɔ gbu boo sin fan mbe ee a sɔ‑a.”

⁵⁹ Chɛɛ chɛ gbɛɛ ɔ, an da a kuiɛ ma bɔ ni a nyɔn na fion.

⁶⁰ Mbɛ Chu n 'na tɛ mɔ wa Yataa tena, a‑a a kɔɔ sɔ, mbɛ a sɔ‑a an gbɛɛ ya kɔɔ. Mbɛ a‑a Chisɔsi ɔ tisa, a ɔ, “A yen ko gbɛ, siiya n‑na bai chɛ gbɛɛ fɔ, a si i ma. Bai ɔ bai ee i da a, e min fɔ, min mbe i kun bɔ koe chɛ ɔ?”

⁶¹ Chɛɛ a na‑a a ma maun fan, a nii ma bai ɔ bai fɔ ni. Mbɛ tɛ mɔ wa chɛ‑a a ɔ tisa to, a ɔ, “I wan mu kunka mansa chɛ a, mɔɛ n mbe Yataa min tando, a 'a denɛ ɛ?”

⁶² Mbɛ Chisɔsi ɔ, “N fan nɛ. A sin, n fan, Mɔ Gbu 'a Denɛ, wo e n yen‑da wan, n mbe si ɔ kaina ma bɛndenɛ Yataa boo nyima ɔ, gbasaya ɔ. A sin to, wo e n yen‑da wan na‑a, banda a dugbu ɔ.”

⁶³ Mbɛ tɛ mɔ wa chɛ‑a bai chɛ a min kɛn Chisɔsi da a, a‑a a ma doma a panda wan. Mbɛ a ɔ, “Mmɔ ɛ to‑a to siiya dɔ mende minan na?

⁶⁴ Wo ban‑da a a min‑da, a‑a Yataa main. Fen bai ɛ wo da a, a fɔ koe a?” Mbɛ kaa tɛ mɔɛ chɛ n gbɛɛ‑a kaa a tɛ wan, mbɛ an‑na Chisɔsi yɛi. An dɔ, a nyin a ni fa.

⁶⁵ Mbɛ an dɔ n bun‑da an da yii chɛ‑a a ma, mbɛ an‑na a ya a chii, an dɔ n sin‑na a tu botani a. An dɔ a ma, “A ɔ yian bɛ, mɔɛ min mbe ka i gbasi tena.” Mbɛ kata kun ma fɛn mɔɛ chɛ n sin, an‑na a gbasi.

Pita‑a kɔɔsa bia chɛ Chisɔsi wakoe ma

⁶⁶ Pita na‑a a a tun fan, si koe a kata chɛ ɔ, denka ɔ chia a. Mbɛ bɔi den musuma tɔngbɔ dɔndɔ, min ni tɛ mɔ wa chɛ 'a chenɛ a, a na‑a.

⁶⁷ A‑a Pita yen kɛn, ɛ a gbaa tena chɛ, a‑a a ma fɛn, mbɛ a ɔ, “I wɛɛ, i ni wan Chisɔsi fɛ, Nasaɛti mɔɛ chɛ.”

⁶⁸ Chɛɛ Pita‑a kɔɔsa bia chɛ wan a ma, a ɔ, “N ma a ɔ sɔn, a yɛ to, n ma a ɔ gbɛ ni, e ka bai min fɔ tena, ni a sien mu min ma.” Mbɛ Pita‑a a a sɔ, mbɛ a bɔ‑a, a sɔ‑a kata chɛ da a. Mbɛ a tima chɛ a, tɛ kɔnɛ konchee‑a.

⁶⁹ Mbɛ bɔi den musuma chɛ‑a a yen to nɔ, mbɛ a‑a a fɔ to mɔɛ chɛ n ye sɔ ɔ, a ɔ, “Kamin chɛ, a mu Chisɔsi fɛ mɔɛ dɔndɔ an na.”

⁷⁰ Chɛɛ Pita yɛ‑a wan to, a‑a kɔɔsa bia chɛ chɛ wɛɛ ma. A ɔ ma yansan ni, mbɛ mɔɛ miin ni ka nɔ sɔ ɔ, an dɔ, “Mɔ dɔndɔ mu i a, min ni Chisɔsi fɛ. Koe min na mu, i wɛɛ ka‑a Kadidi chɛnyɛ ɔ wan.”

⁷¹ Chɛɛ Pita ɔ, “Yataa ni n tɔɔya, ni n mbe ka fania an fɔ tena. N ma kamin chɛ sɔn, wo e ka min bakoe fɔ tena.”

⁷² Mbɛ a ya kɔɔɛ a, tɛ kɔnɛ konchee‑a. A fean bɔɛ an nii nɛ gbɛ, tɛ chɛ‑a chɛ ma. Mbɛ a puin‑da Pita yii ma, mbɛ Chisɔsi na‑a a fɔ wan a ye, a ɔ, “Pita, tɛ kɔnɛ e na konchee, si tena fea, e a fɔ‑a wan yɔ i ma n sɔn, gba sawa ko a.” Chɛ‑a a ma wan, Pita puyɛ‑a di a.