MAKI 13 - Yataa 'a Dɔbɛnɛ Nama

Chisɔsi‑a Yataa 'a kata yɔn koe kɔɔ fɔ an ye

¹ Chisɔsi ni kɛn bɔ tena Yataa 'a kata chɛ ɔ, a fɛ den dɔndɔ‑a a fɔ wan a ye, a ɔ, “Kan mɔ, i ya a ta, i ni chen nyima wa chɛ n yen, an‑na miin sɔ sen nyima chɛ n na.”

² Mbɛ Chisɔsi ɔ, “I‑a chen nyima wa chɛ n yen, tima ɛ che‑a wan an gbɛɛ ni bea. A dɔndɔ wɛɛ ee to‑a sɔ ɔ, a gbɛɛ a ɛ kan‑da wan duu gboo a.”

Chisɔsi‑a bai sa, a si dunya danka a koe n ma

³ Mbɛ Chisɔsi ni kɛn si ɔ Yataa 'a kata chɛ ya teen ma, Wodifi kɔnkɔɛ kun ma, mbɛ Pita ni ma, Chimisi, Chɔn ni Anduu, an na‑a a tena. An dechee ni, mbɛ an dɔ,

⁴ “I‑a bai min fɔ ka, a ɔ yian nn na, ni sɔyɔ mu koe chɛ n mbe ma‑a. A tɔmɔsi ɛ ma‑a fen na, nn ni a ɔ sɔn mbɛ koe chɛ n gbɛɛ, an mbe ka na tena ma‑a na?”

⁵ Mbɛ Chisɔsi bun‑da a fɔ‑a an ye, a ɔ, “Wo wo kun ma fɛn, an ma na wo woo.

⁶ Mɔ sɛsɛ n mbe na‑a wan n tɔɛ ɔ, an mbe a fɔ‑a wan, an dɔ, an fan mu Chasi a, kunka mansa. A sin, an mɔɛ chɛ n mbe mɔ sɛsɛ sɔ‑a wan chia yama ma.

⁷ Wo e chɛɛ ma tɔɛ a min‑da wan wo a tindanɛ, wo ni chɛɛ ma tɔɛ a min pɔɔ. Koe chɛ n mbe ma‑a wan, chɛɛ wo ma chian. Chɛ ni ma wɛɛ, a ee a ɔ yian, mbɛ tima che‑a dunya ban koe a.

⁸ A yɛ to, chɛnyɛ n mbe butuinɛ chɛ‑a wan an nyɔn na, mbɛ chɛnyɛ mɔɛ dɔndɔɛ n‑na chɛɛ chɛ an bɛ chɛnyɛ mɔ dɔ mende n na. Kɔnkɔ ma chianden ba ɛ ma‑a wan chɛnyɛ sɛsɛ ɔ, a sin to, duu gboo wɛɛ ɛ samba‑a wan chɛnyɛ sɛsɛ ɔ, dɔndɔ dɔndɔɛ a. Ko yawaenɛ saa n fan nɛ ka miin mbe ma‑a. Ko yawaenɛ chenama n mbe gbaa, miin mbe na tena ma‑a chɛ n gbakɔ.

⁹ “Chɛɛ wo wo wandi kun ma fɛn. An mbe wo bia‑a wan, an ni ta wo a, gbakoo n chen kɔɔ. An mbe yɛ‑a wan to, an ni wo gbasi an 'na samun chɛ chenɛ n na. An mbe wo bia‑a wan, an ni ta wo a, chɛnyɛ ti n tena, an mbe ta‑a wan wo a, mansa wa n chen kɔɔ. An mbe chɛ gbɛɛ si‑a wan wo a, a si n bakoe ma. Chɛɛ wo e kun‑da wan Yataa 'a sakana bai chɛndɛ ɔ yian‑da an na.

¹⁰ Chɛ n mbe e na to ma‑a, sakana bai chɛndɛ chɛ pɛn mbe fɔ‑a, mɔɛ n ye chɛnyɛ gbɛɛ ɔ.

¹¹ Ni an na‑a wo a kun ti n tena, wo gbɛmbo koe a, an ni wo be gbae, wo faa ma gbaa, a si bai ma, wo e na tena min fɔ‑a. Chɛɛ bai ɔ bai, wo e min ma sɔn‑da a tima chɛ kɔɔ, wo e an fɔ. Koe min na mu, wo fɔ bai nu ma, wo e miin fɔ‑a, chɛɛ a bai chɛ n mbe ka tena Yataa Nyina an tena.

¹² A sin, mɔɛ ɛ a suun ma nyɔɛ be‑a wan, an ni a fa. A yɛ to, mɔɛ fa ni a 'a denɛ be. Denɛ n bɛɛ gbu sin, an mbe sɔ‑a wan kan, an woo mɔɛ n na, an ni an fa.

¹³ Wo sin, mɔɛ n gbɛɛ, an mbe too‑a wan wo a, a mu min na, n fɛ mɔɛ mu wo a. Chɛɛ i wɛn mbe i faa bia‑a aan a danka a, Yataa ɛ i baun‑da wan.”

Chisɔsi‑a Chuusaɛn yɔn koe kɔɔ fɔ an ye

¹⁴ Chisɔsi ɔ, “Chɛɛ wo e fen ma nyamuienɛ n yen‑da wan, miin mbe fenɛ n yɔn, an mbe sɔ ɔ kaina, an nii ma sɔ ɔ kaina min.” (Wo wɛn mbe gboo chɛ kan‑da, wo ni a ɔ gbɛ chɛndɛ chɛ, bai chɛ fasaien mu fen na). “Ni wo‑a chɛ yen ma‑a, wo wɛn mbe Chudia chɛnyɛ ɔ, wo bui sa a a kɔnkɔɛ chɛ n dɔ, wo fɔɛ ko a.

¹⁵ I wɛn mbe baa ma, i ma don to chenɛ a, i boo fen kan kɔ kan ya koe a.

¹⁶ I wɛn mbe i 'a sɛnɛ ɔ, i ma yɛ to duu ɔ, koa ya koe a.

¹⁷ A tima chɛ a, koe n mbe yaua‑a gba, miin mbe bu ma musu n nan gbu tan‑da, a basan kuinsa n na.

¹⁸ Wo samunɛ chɛ Yataa tena, wo ma na bui chɛ chɛ sama ɔ.

¹⁹ Koe min na mu, an tima chɛ a, ko yawaenɛ miin mbe ma‑a, ɛ ben‑da wan a kɔma ma, miin ma‑a a ka dunya a dan tima ma, a sɔ sanche ma. A sin a nyɔn sima ee ma‑a to kuɔ fɔ.

²⁰ Chɛɛ Mansa Yataa‑a tee chɛ n ma wua, ko yawaen bia tee chɛ nu. Ni a nii ma an ma wua ni, mɔ gbu kan kɔ kan kun nii bɔ‑a a ɔ. Chɛɛ a‑a tee chɛ n ma wua a 'a mɔɛ chɛ n fan ko a, a‑a a boo sɔ miin ma, an ma koe a a 'a mɔɛ n na.

²¹ “Chɛɛ ni mɔ ɔ mɔ‑a a fɔ i ye, a ɔ, i ya a na wɛ, i ni mmɔ kun ka mansa yen nɛ, i ma dan a a. Ni mɔ ɔ mɔ‑a a fɔ, a ɔ, a yen ko pan, i ma dan a wɛɛ a.

²² A mu min na, fania kunka mansa an mbe na‑a wan, a basan fania fɔ mɔɛ n na, miin mbe an fandi ya Yataa 'a gbonka chɛ mɔɛ n na. An mbe kamaya koe n ma‑a wan, an ni koe tɔmɔsi n yian, mɔɛ n woo koe a. Ni an mbe kun fan, an mbe mɔɛ chɛ n bɛɛ woo‑a wan, Yataa‑a a boo sɔ miin ma, ma koe a a 'a mɔɛ n na.

²³ Chɛɛ wo wo kun ma fɛn! N ban‑da wo too kɔ‑a, an mbe e na to ma‑a.”

Chisɔsi‑a bai sa, a si a yɛ koe ma to dunya ɔ

²⁴ Chisɔsi ɔ, “Chɛɛ ni ko yawaen tee chɛ n ben‑da, tee ee na‑a man‑da, mbɛ kau wɛɛ pimbi‑a.

²⁵ Tɔmbuaka n mbe bea‑a wan a ka banda a. Fen kɔ fen min mbe banda a, Yataa ɛ a ɔ samba‑a wan a ka a gba ɔ.

²⁶ A sin, a tima chɛ a, an mbe n fan, Mɔ Gbu 'a Denɛ, an mbe n yen‑da wan na‑a gbasaya wa ɔ dugbu ɔ, a yɛ to, n mbe ma‑a wan man‑da Yataa 'a manɛ a.

²⁷ A sin, n mbe n 'na maeka n na ta‑a wan, an ni mɔɛ chɛ n na sɔn sɔn, n‑na n boo sɔ miin ma, ma koe a n ta mɔɛ n na. N mbe an na sɔn sɔn‑da wan, a ka dunya tɔnkɔnɛ naaninɛ gbɛɛ ɔ, a ka kan kɔ kan dunya gbɛɛ ɔ.”

Chisɔsi‑a tai tɛ, a si kɔnɛ ma

²⁸ Mbɛ Chisɔsi ɔ, “Wo wo yii na chii wɛ kɔnɛ ma. Ni wo‑a a yen pɔmbɔ‑a, a ni ma gbɛ wo yii ma, mbɛ sama ɔ ma yansan to.

²⁹ A chia dɔndɔ gbe chɛ a, ni wo‑a koe chɛ n yen ma‑a, a ni ma wo yii ma, mbɛ tima ɔ ma yansan to, n na koe a.

³⁰ N ni a ma din wo tena, mbɛ koe chɛ n gbɛɛ mbe ma‑a pɛn, wo nyɔn sima chɛ n mbe e na ban dunya ɔ.

³¹ Dunya gbɛɛ ɛ ban‑da wan, chɛɛ n da a bai ee ka‑a a gba ɔ kuɔ fɔ ko a.”

Chisɔsi ɔ te, mmɔ ya ni ma a ya ɔ tee ɔ tee a

³² Chisɔsi ɔ, “Chɛɛ mɔ ɔ mɔ ma a tee gbu sɔn, a basan a tima a, n na koe a. N fan, Yataa 'a denɛ wɛɛ, n ma a ɔ sɔn, ni n mbe na‑a tima min na. Maeka n bɛɛ, banda bu ɔ, an ma a sɔn. Fa Yataa dɔndɔ gbe, an‑na a ɔ sɔn.

³³ Wo wo kun ma fɛn, wo ma bɛndenɛ ni ma. Koe min na mu, wo ma tee sɔn, n na tima ɛ che‑a tee min ma.

³⁴ A ɛ wan yɔ mɔɛ, ɛ ma ta‑a tachɛ ɔ. A ɛ ma a waa boo ka‑a, ɛ a 'a bɔi denɛ n to wan chenɛ kun ma fɛn koe a. A ɛ mɔ ɔ mɔ ta wai be wan a ma, mbɛ a‑a a fɔ a 'a chen ma kɔn mɔɛ n ye, a ɔ, an ni chenɛ kun ma fɛn.

³⁵ Chɛ an‑na a fɔ, wo ma bɛndenɛ ni ma tima ɔ tima ko a. Koe min na mu, wo ma a ɔ sɔn, chen ti chɛ ɛ na‑a tima min na, yɛɛ ma tee a mu, chɛ ma, su tɛ, chɛ ma, tɛ kɔnɛ konchee tima a sayi ma, chɛ ma, sau ma.

³⁶ A ma na na, a ni i tɛnɛ, e sa ɔ chinɔɛ ɔ.

³⁷ A sin, n mbe min fɔ wo ye, n mbe an fɔ mɔɛ gbɛɛ ye. Wo ma bɛndenɛ ni ma.”