GBOO IBU MƆƐ N KO A 7 - Yataa 'a Dɔbɛnɛ Nama

Bai ɔ yian‑da, a si Mɛchisɛdɛki ma

¹ Mɛchisɛdɛki chɛ, mansa ni an na, Saden duu ɔ. A sin to, tɛ mɔɛ ni a a, Yataa Wa tena. Tima dɔndɔ a, Ebeami ni wan ka tena chɛɛ ɔ. An na‑a mansa naaninɛ n 'na chɛɛ chɛ mɔɛ n kun tɛ an chɛɛ an dɔ. Mɛchisɛdɛki na‑a an tan fan. A sin, a wan Mɛchisɛdɛki na‑a Ebeami dua wan.

² A sin, fenɛ gbɛɛ, Ebeami ka‑a miin na an chɛɛ chɛ ɔ, a na‑a an du wan, si tena tanɛ a, mbɛ a‑a si tena dɔndɔ be Mɛchisɛdɛki chɛ ma. An mu mɔɛ saa a, ni mmɔ‑a mmɔ yii na chii a tɔɛ fasai ma, mbɛ an mu mansa a, min tanden mu. An mu kɛn to mansa a, Saden, min fasaien mu, faa chima mansa.

³ A fa ee, a de ee, mɔ sin mbe ee che a fɔ‑a, mbɛ a bɔ kɔnkɔɛ an nɛ. Mɔ ɔ mɔ ma a fɔɛ kuu sɔ tena sɔn, mɔ ma a fɔɛ a ban tena sɔn. Chɛɛ a bɔen mu Yataa 'a denɛ an na, ɛ ma‑a wan tɛ mɔɛ a, kuɔ fɔ ko a.

⁴ Wo a ɔ yen gbɛ, a mu mɔ chenama min nyɔn sima a. Mmɔ bɔ kɔnkɔɛ, Ebeami, a na‑a miin gbɛɛ ma sɔn chɛɛ ɔ, a na‑a wan si tena tanɛ a, mbɛ a‑a si tena dɔndɔɛ be Mɛchisɛdɛki chɛ ma.

⁵ A sin, Yataa na‑a miin gbɛɛ ma to tɛ mɔɛ a, Difai cheeya n ni. Sawa min be‑a Mosisi ma, a na‑a a fɔ wan an ye, mbɛ an ni boo fenɛ n kain mɔɛ n boo ɔ, Isɔɛɛ chɛnyɛ ɔ. A dinden fan ni an ma, an boo fenɛ n gbɛɛ, du koe a si tena tanɛ a. Mbɛ an‑na a si tena dɔndɔɛ be. An ni chɛ kain ka an fandi gbu ta mɔɛ n fan ma, Ebeami cheeya ni an bɛɛ a.

⁶ Chɛɛ Mɛchisɛdɛki chɛ nii ma bɔ nin bɛɛ Difai dambi ɔ, chɛ gbɛɛ ɔ, Ebeami na‑a boo fenɛ si tena dɔndɔɛ be an ma. Mbɛ a dua‑a Ebeami ye, Yataa na‑a too ɔ dia chɛ min na.

⁷ Mɔɛ sin, min mbe mɔɛ dua, a benden mu mɔɛ chɛ ma, ɛ min dua ka. Kɔɔsa bia kan kɔ kan mbe ee chɛ ma.

⁸ Chu mɔɛ n tɛ mɔɛ nu Yataa a, ni an ta ɔ mu, boo fenɛ si tena dɔndɔɛ chɛ ɛ be an fan mɔ gbu n fan ma, miin mbe fa. Chɛɛ Mɛchisɛdɛki chɛ benden mu an ma. Koe min na mu, a fɔen fan mu mmɔ ye, mbɛ ɛ ma‑a wan fɔɛ ɔ.

⁹ Mmɔ ɛ a fɔ wan, mbɛ Difai wandi gbu, boo fenɛ si tena dɔndɔɛ an ni be a ma. Mbɛ a wɛɛ‑a a be Ebeami ma, a be koe a Mɛchisɛdɛki ma.

¹⁰ Koe min na mu, Ebeami na‑a Mɛchisɛdɛki tan tima min na, Difai ni wɛ a woo mɔɛ Ebeami gboo kɔɔ wan, a nii ma suun nin bɛ.

¹¹ Mɔɛ chɛ nu, miin na‑a bɔ Difai 'a dambi ɔ, an sin ni mɔɛ n tɛ Yataa a, a ta nii ka sawa chɛ wakoe ma, min na‑a be Mosisi ma. Ni mɔɛ n tɛ mɔɛ chɛ nu Yataa a, an 'na wai na‑a Yataa faa chima wan, mbɛ tɛ mɔ ko dɔ mende nii ma‑a to nɔ. Tɛ mɔɛ dɔ mende na‑a na wan, yɔ Mɛchisɛdɛki. An sin, a nii ka yɔ Eyɔn.

¹² Koe min na mu, tɛ mɔɛ kan kɔ kan min mbe na, ɛ sawa wɛɛ ka wan a gba ɔ.

¹³ Chisɔsi chɛ sin, bai chɛ nu, an mbe sa tena a si min ma, a bɔ‑a dambi dɔ mende an dɔ. A sin, an dambi chɛ ɔ, mɔ ɔ mɔ ma tɛ mɔya chɛ nin bɛ, gbengbe ma Yataa 'a kata ɔ.

¹⁴ Koe min na mu, a ɔ sɔnden fan mu chɛndɛ chɛ, mbɛ mmɔ 'a mansa Chisɔsi bɔ‑a Chuda 'a dambi an dɔ. A sin, min sien mu an dambi chɛ ma, Mosisi nii ma bai ɔ bai sa ni, a si tɛ mɔɛ koe ma.

¹⁵ Mɔɛ ɛ chɛ gbu yen fan sa ɔ den, kɛn tɛ mɔɛ dɔ mende‑a a kɔɔ sɔ, min ni yɔ Mɛchisɛdɛki.

¹⁶ Mbɛ a ma‑a tɛ mɔɛ a, sawa ta fɛ chia a ma, min sien mu a bɔ dambi ma. Chɛɛ a bɔ‑a gbasaya chɛ an dɔ, fɔɛ min mbe ee che kasaa‑a, an mbe a ɔ.

¹⁷ Koe min na mu, Yataa 'a gboo‑a a fɔ wan, a si a ma, a ɔ, “Kuɔ fɔ ko a, e ma‑a wan mɔɛ n tɛ Yataa a. E ma‑a wan, yɔ Mɛchisɛdɛki ni buɛ min dɔ.”

¹⁸ Chia dɔndɔɛ a, sawa kɔma ee to wai tena. Koe min na mu, an sawa chɛ kɔ ma gbɛ, sawa a tenden gbu nii ma.

¹⁹ Koe min na mu, chia dɔndɔɛ wɛɛ a, sawa gbu nii ma a ma ni, ko kan kɔ kan ni sɔ a chia ma chɛndɛ chɛ. Yiinatɛ chɛndɛ yian‑da wan mmɔ a, min mbe mmɔ ma sawan Yataa tena.

²⁰ A sin, chɛ nii ma ma ni gbama a. Yataa na‑a a kai wan. Yataa nii ma a kai ni, tima min na mɔ dɔ mende chɛ n ni ma tɛ mɔɛ a.

²¹ Chɛɛ chɛ nɛnɛ tana, Yataa na‑a a kai wan a 'a gboo ɔ, a ɔ, “N fan, Mansa Yataa, n‑na n kai, n sin mbe ee n da a kuiɛ yɔn. N dɔ, ‘Kuɔ fɔ ko a, e ma‑a wan mɔɛ n tɛ n fan Yataa a.’ ”

²² Chɛ ɛ a ɔ yian fan, mbɛ Chisɔsi an mbe a ma, dɔbɛn nama chɛ mmɔ tɛ Yataa a, a ee yɔn. Chɛ an mbe a ɔ yian, mbɛ dɔbɛn nama chɛ nyin a ben a kɔma ma.

²³ A sin, tɛ mɔɛ nu, an kɔ ni koo, an dan koe a. Koe min na mu, saya an ni a ma, an nii che wai chɛ‑a, aan a ta.

²⁴ Chɛɛ Chisɔsi tana, a 'a tɛ mɔya, a danka ee. Koe min na mu, ɛ ma‑a wan fɔɛ ɔ, kuɔ fɔ ko a.

²⁵ A sin fan fɛ mu, mɔɛ miin mbe na Yataa tena, a 'a gbasaya ɔ, ɛ an mɔɛ chɛ n kun bɔ wan tima ɔ tima an 'na ko yama n dɔ. Koe min na mu, tima ɔ tima ko a, ɛ wan nɔ, Yataa ma nande koe a, an mɔɛ chɛ n ko a.

²⁶ Chɛ an fɛ mu, ko ma bɛndenɛ mu, tɛ mɔ wa chɛ, mɔ gbu n tɛ Yataa a, a sima ma sɔn koe a. A wɛn ma ko yama kan kɔ kan ma ni, ɛ tenchen Yataa ko a. A sin to, mabɔ ee a ma, an tɛ duenɛ ɛ, an bɛ ko yama ma mɔɛ n na. A ya‑a, a sɛ banda bu ɔ.

²⁷ A ta nan gbu sin, a ee ka, yɔ tɛ mɔ wa tɔɛ chɛ nu, miin ma gbɔsɔɛ ni yasi bɔ koe a, tima sɛsɛ ko a. Koe saa ni min na, an ni yasi chɛ n bɔ tee ɔ tee a, an fandi gbu ta ko yama maenɛ n fan ko a. Mbɛ an yɛ‑a, an‑na a bɔ, mɔɛ tɔɛ n ko a. Chɛɛ Chisɔsi tana, a na‑a chɛ ma gba dɔndɔ gbe an ko a, tima min na a na‑a a wandi fɔɛ be.

²⁸ Sawa min be‑a Mosisi ma, an mbe mɔ gbu n yian, dɔndɔ dɔndɔɛ a, ma koe a tɛ mɔ wa a, mɔ gbu n tɛ Yataa a. An ni a fɔ wɛɛ, an mɔɛ chɛ n gbu, wai chɛ gbasaya ee an ye. Chɛɛ Yataa sin mbe a kai wan a wandi ɔ, a ee na koe ma. A sin, a na‑a sawa chɛ be pɛn Mosisi ma, a ee na a boo sɔ a 'a denɛ ma. A den chɛ sin na‑a koe gbɛɛ ma wan tima ɔ tima, Yataa toen ni miin na.