GBOO IBU MƆƐ N KO A 6 - Yataa 'a Dɔbɛnɛ Nama

¹ Chɛ an fɛ mu, mmɔ koe chɛ n to, Chasi ni mmɔ kan miin na, yɔ den mɛsɛ nu. Mmɔ a kuu sɔ gbɛ mmɔ yii na chii‑a yɔ mɔɛ miin yii kɔɔen mu. Mmɔ sɛmbɛ mmɔ gba ɔ tɛn tɛn koe a, ko mɛsɛ chɛ n kan koe a, a si Chisɔsi ma. Koe chɛ nu, miin mbe a ma, an ni an mun, an ni sɛmbɛ ko yama chɛ n ma‑a, miin mbe a ma, an ni saya ma sɔn. Mmɔ yɛ to, mmɔ ni a ɔ yen, an ni an kai fa Yataa a.

² Mmɔ ma an kan to, a si yii chɛ koe ma mɔɛ n kunɛ ɔ Yataa chia a. A yɛ to, boo bunɛ mɔɛ n ma, an ni dua ma sɔn, ni mɔɛ kɔɔ sɔ koe a, a ka saya ɔ, a basan kaa a tɛ a, min mbe ma‑a nɔ kuɔ fɔ ko a.

³ Chɛ sin, ni Yataa dɔn‑da, mmɔ ɛ a ma wan.

^4-6 Mɔɛ dɔ nu, an ni wan tima dɔndɔ a pimbi ɔ, mbɛ Yataa‑a manɛ be an ma. An na‑a tɔnɔnɛ ma sɔn fan Yataa a, a sin, Yataa Nyina ni wan an bɛɛ fɛ. Mbɛ Yataa 'a bai, ɛ na ko chɛndɛ miin bɛɛ a, an‑na an bɛɛ sima ma fɛn. Fɔɛ chɛ wɛɛ, min mbe ya ɔ ma, gbasaya min mbe a ɔ, an‑na a wɛɛ ma fɛn fan. Chɛɛ chɛ gbɛɛ ɔ, an ka‑a Chasi fɛ. A yɛ to, an mbe da mau koe n sɛ‑a Yataa 'a denɛ ma, fanka ɔ, an mbe a fa‑a to kɔn gbengbandenɛ ma. Chɛ an fɛ mu, chia ee che to sa‑a an ko a, gba fean bɔɛ ɔ, yɛ koe a to Yataa tena.

⁷ Tai chɛ yen ko. Sona ɛ chɛ duu gboo ma wan, mbɛ a‑a a chima dɔgbɔ. A sin, chin fenɛ min mbe chin an duu gboo ma, ɛ gbɔɛ be wan a chin mɔɛ n ma, miin nyin an ko a. Yataa sin mbe an duu gboo chɛ dua wan.

⁸ Chɛɛ ni an duu gboo chɛ, wai nyan‑da a ma, a basan binɛ a, duu gboo a tenden ma. A to‑a ɛnden fan na, Yataa ni a danka, a sin, ta an mbe a kasaa‑a.

⁹ Chɛɛ wo wan, nn dia nyɔɛ nu, miin ko a di nn ye kaka, nn‑na chɛ fɔ wɛɛ boo ɔ boo, nn yii na tɛen fan mu wo ko a. Nn‑na a ɔ sɔn fan, mbɛ wo e chia chɛndɛ an ma, bauncha ko a.

¹⁰ Koe min na mu, Yataa ee kaa yama a tɛ, a ni nyina wai chɛndɛ chɛ ma, wo‑a min chɛ. A yɛ to, wo na‑a Yataa 'a mɔɛ n bia wan chɛndɛ chɛ, wo sin mbe tun an bia‑a a buɛ ɔ. Chɛ‑a a ɔ yian fan Yataa a, mbɛ wo toen mu a a.

¹¹ Nn toen mu wo gbɛɛ, wo ni butuin dɔndɔ gbe chɛ chɛ wo faa gbɛɛ a, aan wo 'a fɔɛ danka a. Chɛ an mbe a ma, wo yii na tɛen mu koe miin ma, wo ni an ma sɔn.

¹² Chɛ ɛ a ma‑a wan, wo ee ma‑a gboo ɔ fa tɔɛ n na. Chɛɛ wo e bea wan mɔɛ chɛ n fɛ, miin‑na an kai fa Yataa a, an‑na an faa bia, mbɛ Yataa na‑a an too ɔ dia min gbɛɛ a, an‑na an ma sɔn.

Yataa ɛ bai min fɔ, a ee yɔn

¹³ Chɛ wɛɛ yen ko. Tima min na Yataa na‑a tooɔdia chɛ Ebeami a, a nii ma a kai ni fen dɔ mende ɔ, fɔ a wandi. Koe min na mu, fen dɔ mende kan kɔ kan mbe ee nɔ, a ben a wandi ma.

¹⁴ Yataa na‑a a fɔ wan a 'a gboo ɔ, a ɔ, “Ko ɔ ko ee a yɔn, n mbe i dua‑a wan. N mbe a ma‑a wan, i ni ma mɔɛ a, min mbe po.”

¹⁵ Chɛ sin ko a, Ebeami na‑a a faa bia wan ko sɛsɛ a, mbɛ a too ɔ dia‑a min na, a‑a a ma sɔn.

¹⁶ Mɔ gbu n mbe an kai fenɛ n fan dɔ, an ta yiima ɔ, fenɛ miin benden mu an ma. A sin fan mbe a ma, koɛ gbɛɛ, an mbe miin chɛ, an mbe danka wan an kai a.

¹⁷ Chɛ an fɛ mu, mɔɛ chɛ nu, tooɔdia chɛen ni miin na, Yataa toen ni a ni a ɔ yian an na, mbɛ ɛ bai min fɔ, an mbe ma. A sɔnɛ chɛ ee a ɔ, bai fɔ koe a bi, mbɛ a‑a a ka a gba ɔ sinan. Chɛ an na‑a a ma, a‑a a kai, a da a bai kun ma.

¹⁸ Chɛ ni a ma, mɔɛ n ni a ɔ yen, chia fea a, miin mbe ee mun, Yataa ɛ koe min ma. Yataa‑a a ɔ yian fan, mbɛ ko ee nɔ, min mbe a ma, a ni a da a kuiɛ yɔn. Chɛ ɛ a ma‑a wan, mmɔ wɛn na‑a bui‑a Chasi tena, mmɔ kun ma fɛn koe a, tooɔdia min mbe mmɔ ko a, mmɔ bu ɔ diama ɛ ma‑a wan, a bia koe a fɔin.

¹⁹ Mmɔ yii sɔen mu an ma, tima ɔ tima, mbɛ an mbe mmɔ fɔɛ si. A ɛ wan yɔ dɛndɛ chii yuu, ɛ a ma buɛ min dɔ ɛ sɔ chidi, a gba ɔ. Yiinatɛ chɛ, an mbe ma mmɔ ɔ, mmɔ ɛ ma don‑da Yataa 'a chenɛ bu ɔ, banda bu ɔ, Yataa chen kɔɔ.

²⁰ Chisɔsi pɛn na‑a ta an kaina chɛ, mmɔ ko a. A sin, a ma‑a wan tɛ mɔ wa a, mmɔ ko a Yataa tena, kuɔ fɔ ko a. A na‑a ma wan, yɔ Mɛchisɛdɛki ni buɛ min dɔ.