GBOO IBU MƆƐ N KO A 4 - Yataa 'a Dɔbɛnɛ Nama

Bai, a si suin tena chɛ ma, Yataa 'a mɔɛ n ko a

¹ Chɛ an fɛ mu, tooɔdia ɛ wɛ ka nɔ tima min na, mmɔ don koe a suin tena chɛ, Yataa‑a min dɔ bɛn, mmɔ chiandenɛ ni ma, kɔkɔɛ mmɔ dɔ nu, mmɔ ee na‑a kun‑da don koe a suin tena chɛ.

² Koe min na mu, sakana bai chɛndɛ chɛ, a che‑a buɛ min dɔ mmɔ ma, a che‑a ka wan an bɛɛ ma. Chɛɛ an sakana bai chɛ, an‑na min na min, an ma tɔnɔnɛ sɔn ni a ɔ. Koe min na mu, a nii ma danaya tan ni an dɔ, min sima ni ma an dɔ.

³ Mmɔ wɛn sin danden mu Yataa 'a tooɔdia chɛ a, mmɔ wan mbe don an suin tena chɛ. A sin, a na‑a a fɔ ka wan, a ɔ, “An faa tɛ chɛ sin ko a, n‑na n kai, n dɔ, ‘Kuɔ fɔ ko a, an mbe ee don‑da suin tena chɛ, n‑na min dɔ bɛn.’ ” A maen mu wɛɛ boo ɔ boo, mbɛ a na‑a ban fan a 'a wai chɛ‑a, a ka dunya a dan tima ma.

⁴ Koe min na mu, a na‑a chɛ an fɔ, Yataa 'a gboo kaka dɔndɔ ɔ, a si tee wɔnfean bɔɛ ma, a ɔ, “A wan Yataa, a na‑a wai gbɛɛ chɛ kɛn, a‑a a suin fan, tee wɔnfean bɔɛ ma.”

⁵ A sin, a yɛ‑a wan to, a kaka chɛ wɛɛ ɔ, a ɔ, “Kuɔ fɔ ko a, an mbe ee don‑da suin tena chɛ, n‑na min dɔ bɛn.”

⁶ Chɛ an fɛ mu, min toen mu gbɛ, an nɛ mɔɛ n don koe a nɔ. A sin, mɔɛ saa nu, miin na‑a sakana bai chɛndɛ chɛ a min, an nii ma kooya be ni, an na‑a a ma, an nii ma don ni nɔ.

⁷ A sin to, Yataa na‑a tee dɔ mende sa wan, a na‑a min chee, a ɔ, “Bi.” Bai chɛ, mmɔ ban‑da gbɛ min na min‑da, a ɔ mɛenɛ gbakɔ, a na‑a a a ben fan a 'a gboo ɔ, Mansa Defidi a, a ɔ, “Ni wo‑a Yataa da a kuiɛ a min bi, wo ma wo faa sɔ.”

⁸ Koe min na mu, ni Chɔsowa na‑a a ma wan, an ni an suin, Yataa nii koɔ‑a a si tee dɔ mende ma.

⁹ Chɛ an fɛ mu, suin tena ɛ wan nɔ, Yataa 'a mɔɛ n ko a.

¹⁰ Koe min na mu, mɔ ɔ mɔ, min mbe don‑da Yataa tena, a suin koe a, a mɔɛ chɛ ɛ a suin‑da wan, wai chɛ koe a. Ɛ ma‑a ka wan dechee, yɔ Yataa wɛɛ na‑a a suin buɛ min dɔ.

¹¹ Chɛ an fɛ mu, mmɔ butuin chɛ, mmɔ ni don an suin tena chɛ. Mmɔ butuin chɛ, mmɔ dɔndɔ wɛɛ ma na bea. Mmɔ ma na bɔ chɛ n gba ɔ, danaya nii miin dɔ.

¹² Koe min na mu, Yataa 'a bai, fɔɛ an mbe a ɔ, a sin gbasa. A ɛ wan dechee yɔ mɛ, min na saen mu kaka. A ɛ kun fan don koe a mɔɛ gboo ɔ chɛndɛ chɛ, a ni che a faa ma. Mbɛ fenɛ min be a ɔ, a yen‑da. Mbɛ mɔɛ chɛ 'a yiinachii, a basan a faa ma koe n na, an dɔ sɔn‑da.

¹³ A sin, Yataa chen kɔɔ, fen kɔ fen mbe ee nɔ, min mbe nun a ma. Chɛɛ ko ɔ ko kan kɔ kan, an mbe wan sa ɔ den, a ya kɔɔ. Mmɔ gbɛɛ sin, mmɔ ɛ mmɔ chɛ chɛ wai ɔ yian‑da a wan na.

Chisɔsi an mu tɛ mɔ wa a, mmɔ ko a, Yataa tena

¹⁴ A ka gbɛ an tima chɛ ma, tɛ mɔ wa, mɔ gbu n tɛ Yataa a, an mbe gbɛ mmɔ boo ɔ, min ta‑a banda bu ɔ. A mu Chisɔsi an na, Yataa 'a denɛ. Chɛ an fɛ mu, mmɔ ni mmɔ boo a chii, mmɔ kai fa koe ma a a.

¹⁵ Koe min na mu, tɛ mɔ wa an nɛ, mmɔ tɛ Yataa a, min mbe chinchin mmɔ ma, koe n dɔ miin mu mmɔ yama chia an na. Mɔɛ mu an na, chia ɔ chia a, Sitana na‑a a yiima yan fan, ko yama ma koe a, yɔ ɛ mmɔ ta yan buɛ min dɔ. Chɛɛ chɛ gbɛɛ ɔ, Chasi ma ko yama ma ni.

¹⁶ Chɛ ko a gbɛ, mmɔ ma sika, mmɔ ma na koe a Yataa 'a mansaya sea tena, koadia demanɛ ma ɛ sɔn kaina min. Chɛ an mbe a ma‑a, a ni chinchin mmɔ ma, mbɛ mmɔ‑a a 'a koadia demanɛ ma sɔn, tima min na mmɔ toenɛ ɛ ma‑a demanɛ a.