GBOO IBU MƆƐ N KO A 3 - Yataa 'a Dɔbɛnɛ Nama

Chisɔsi benden mu Mosisi ma

¹ Chɛ an fɛ mu, nn suun ma nyɔɛ nu Chasi ɔ, wo wɛn mbe tenchen Yataa ko a, a sin na‑a wo wɛɛ chee wan, wo wo yii na chii wɛ Chisɔsi chɛ a. Mmɔ ɛ a fɔ wan, mbɛ Yataa 'a sɔ mɔɛ mu a a, a sin, tɛ mɔ wa mu a a, mɔ gbu n tɛ Yataa a.

² A danayaen fan ni Yataa tena, min‑na a yian wai chɛ koe a. A ni wan dechee yɔ Mosisi danayaen ni buɛ min dɔ, wai chɛ koe a, Yataa 'a chenɛ a.

³ Chɛɛ Chisɔsi ta basɔmaya, a benden mu Mosisi ta ma. Ɛ ka wan dechee yɔ chen sɔ mɔɛ wɛɛ, baa koo a ma, a ni ben chenɛ wandi ma.

⁴ Koe min na mu, chenɛ kan kɔ kan, mɔɛ an mbe a sɔ. Chɛɛ fen kɔ fen dunya ma, a nyan mɔɛ mu Yataa an na.

⁵ Mosisi ni bɔi denɛ an na, min danayaen ni Yataa 'a chenɛ a. A ni koɔ wan mɔɛ n tena, a si koe n ma, Yataa ni na tena miin fɔ‑a.

⁶ Chɛɛ Chasi tana, Yataa 'a denɛ mu a a, a danayaen mu, a sin mbe Yataa 'a chenɛ an kun ma. A sin, mmɔ wan mu Yataa 'a chenɛ a, ni mmɔ‑a mmɔ faa sɔ, mmɔ ni dan a a, mmɔ yii a ni tɛ a ma.

Dasi, mmɔ ma na mmɔ kan kɔ sɔ Yataa a

⁷ Chɛ an fɛ mu, Yataa Nyina ɛ a fɔ wan Yataa 'a gboo ɔ, a ɔ, “Ni wo‑a Yataa da a kuiɛ a min bi,

⁸ wo ma wo faa sɔ, yɔ wo bemba n ta bemba nu, an na‑a sɔ buɛ min dɔ n na, tima min na an na‑a n dɔ siman fuinɛ ma.

⁹ An na‑a sɔ wan n na kan, an‑na n dɔ siman. A sin, san bi naanin ko a, an na‑a n chɛ chɛ wai yen fan.

¹⁰ Chɛ an fɛ mu, n faa na‑a tɛ wan an mɔɛ chɛ n nɛnɛ ma, mbɛ n‑na a fɔ, n dɔ, ‘An faa ma nyin tima ɔ tima ko a. A sin, an mbe ee dɔn, an ni bea n fɛ.’

¹¹ An faa tɛ chɛ sin ko a, n‑na n kai, n dɔ, ‘Kuɔ fɔ ko a, an mbe ee don‑da suin tena chɛ, n‑na min dɔ bɛn.’ ”

¹² N suun ma nyɔɛ nu Chasi ɔ, wo wo kun ma fɛn, wo dɔndɔ wɛɛ, ko yama ma faa ma na dɛ wo ɔ. A ni a ma, wo ee dan Yataa a. Chɛ ɛ a ma‑a wan, wo ni wo kan kɔ sɔ Yataa a, min mbe ee fa.

¹³ Chɛɛ wo wo nyɔn faa ma nande, tee ɔ tee ko a. Wo chɛ ma bi, tima min na wɛ Yataa ma sɛmbɛ ni deman koe a wo ma. Chɛ ni a ma, ko yama ma na chenɛ sɔ wo kɔɔ, a ni wo bun, wo ni too ɔ gbɛa bɔ Yataa a.

¹⁴ Koe min na mu, mmɔ gbɛɛ, mmɔ bɛ Chasi a, mmɔ ɛ ko dɔndɔɛ an dɔ. Ɛ ma‑a ka wan, ni mmɔ‑a danaya saa chɛ bia gban, aan mmɔ 'a fɔɛ danka a.

¹⁵ Yataa 'a gboo sin mbe a fɔ tena ka wan, a ɔ, “Ni wo‑a Yataa da a kuiɛ a min bi, wo ma wo faa sɔ, yɔ wo bemba n ta bemba nu, an sɔ‑a tima min na Yataa a.”

¹⁶ Nyɔn ni mɔɛ chɛ n na, miin na‑a Yataa da a kuiɛ chɛ a min, chɛɛ chɛ gbɛɛ ɔ, an na‑a an kun si wan Yataa a? An ni mɔɛ chɛ n fan na, Mosisi na‑a sɔ miin ya ɔ, a bɔ Ichipi chɛnyɛ ɔ.

¹⁷ A sin, Yataa faa na‑a tɛ nyɔn ma, san bi naanin ko a? Mɔɛ chɛ nu ni, miin na‑a ko yama ma, a sin, an na‑a bea wan an fuinɛ ma, an fa‑a.

¹⁸ A sin, Yataa nii ma a kai ni mɔ dɔ gbɛɛ tena, mbɛ kuɔ fɔ ko a, an mbe ee don‑da suin tena chɛ, a‑a min dɔ bɛn. Chɛɛ a na‑a a fɔ chɛ n fan ye, miin nii ma an too ma sɔ ni a ma.

¹⁹ Mbɛ mmɔ ban‑da gbɛ a ɔ yen‑da, mbɛ an nii ma dan ni Yataa a. Chɛ an na‑a a ma, an ma che ni don‑da suin tena chɛ.