GBOO IBU MƆƐ N KO A 12 - Yataa 'a Dɔbɛnɛ Nama

Bai nu, a si mmɔ Fa Yataa ma

¹ Chɛ gbɛɛ an fɛ mu, mmɔ wɛɛ, mɔɛ chɛ n gbɛɛ mbe wan nɛ mmɔ tɛ ɔ, miin na‑a a ɔ yian an chɛ chɛ wai n dɔ, mbɛ an kai faen fan mu Yataa a. Chɛ ko a, mmɔ ni mmɔ boo bɔ ko ɔ ko ɔ, miin mbe mmɔ ɔ chɛ chɛ. Chɛ n mu ko yama n fan na, miin mbe mmɔ bia gban. A sin, mmɔ ni mmɔ ma bɛn koe n ma koe a a chia ma, fɔɛ ɔ min mbe ya ɔ ma. Mmɔ an ma mmɔ sɔɛ gbɛɛ a, yɔ mɔɛ ɛ bui chɛ buɛ min dɔ, bui chɛ bɛnɛ ɔ.

² Mmɔ ni mmɔ yii sɔ Chisɔsi ma, tima ɔ tima ko a. A wan mbe a ma, mmɔ ɛ mmɔ kai fa Yataa a, a ka fɔɛ kuu sɔ tena ma, a ta a danka a. An‑na a gbangban tima min bɛɛ a kɔn gbengbandenɛ ma, a nii ma a boo bɔ ni mmɔ wakoe ɔ. Koe min na mu, a na‑a a ɔ sɔn fan, mbɛ chia dɔndɔɛ a, buɔdia wa an mbe a ya ɔ. A nii ma a ya ni mauma ko kan kɔ kan na, fa koe a kɔn gbengbandenɛ ma. A sin mbe sanche gbɛ si ɔ wan, basɔmaya ɔ Yataa 'a mansaya sea boo nyima ɔ.

³ Wo wo yii na chii a mɔnɛ‑a buɛ min dɔ. A yɛ to, a‑a toomaya min dɔ bia, ko yama ma mɔɛ n boo ɔ. Chɛ an fɛ mu, wo ma a ma wo faa ni yɔn, wo ni sɛmbɛ wo kai fa koe a Yataa a.

⁴ Koe min na mu, wo e butuinɛ min dɔ, ko yama a, wo ma sɔ nin bɛ gban, an ni a fɔ, wo fa koe wɛɛ mu.

⁵ Wo ma nyina Yataa 'a bai ma, a na‑a min fɔ, wo faa ma nande koe a, a 'a denɛ mu buɛ min dɔ wo a. A na‑a a fɔ wan a 'a gboo ɔ, a ɔ, “N 'na denɛ nu, wo wo too ma sɔ, ni n fan Mansa Yataa ma‑a wo sɔ‑a chia ma. A sin, wo faa ma yɔn, ni n ma‑a wo ma tɔɔ‑a.

⁶ Koe min na mu, n toen mu mɔɛ miin gbɛɛ a, n mbe an sɔ wan chia ma. A sin, n mbe mɔ ɔ mɔ tɔɔ wan, n‑na min ya n 'na denɛ a.”

⁷ Wo wo bia tɔɔya a, wo ta yiima ɔ, min mu wo Fa 'a tɔɔya a. Wo 'a tɔɔya chɛ ɛ a ɔ yian tena wan, mbɛ Yataa ɛ wo ya tena a 'a denɛ n fan na. Den mbe ee wɛ nɔ, kɛn gba, min mbe a fɔ, a ɔ, a fa ma tɔɔya si ni a a.

⁸ Ni a ma wo tɔɔ ni, yɔ a 'a denɛ n gbɛɛ, mbɛ a 'a denɛ chɛndɛ chɛndɛ ma wo a, ko tɛ denɛ mu wo a.

⁹ Min sien mu mmɔ fa n ma, dunya chɛ ɔ, an‑na tɔɔya si wan mmɔ a, mmɔ sin‑na baa be wan an ma. Fen mbe a ma gbɛ, mmɔ ee don mmɔ Fa kɔɔ, min mbe banda bu ɔ, mmɔ ni kuɔ fɔ fɔɛ ma sɔn.

¹⁰ Mmɔ fa nu dunya chɛ ɔ, an mbe mmɔ tɔɔ tima kunduenɛ an ko a, yɔ an ta yiima ɛ a fɔ buɛ min dɔ an ye. Chɛɛ Yataa tana, ɛ a ma basan koe an na mmɔ ma, min mbe a ma, mmɔ wɛɛ sɔnɛ ni ma, yɔ a ta ɛ buɛ min dɔ.

¹¹ Ni mmɔ ma‑a tɔɔya kɔɔ, a tima chɛ a, mmɔ ɛ a yen koe an na, min mbe mmɔ faa yɔn, a ee mmɔ bu ɔ dia‑a. Chɛɛ chɛ gbɛɛ ɔ, chɛ gbakɔ, an tɔɔya chɛ ɛ miin koo‑a, an mbe faa chima ma sɔn‑da wan, a bɔ tea koe n dɔ, an mbe miin ma‑a.

¹² Chɛ an fɛ mu, wo ɔ ni gbɛa, mbɛ wo faa sɔ‑a. Wo wo chenɛ n dɔ tan, an dɔ ni gbɛa gbau.

¹³ Wo wo tachɛ buɛ ma mɛn, wo gboo ɔ ma na fa wo 'a fɔɛ ɔ. Chɛɛ wo ɔ ni gbɛa gbau.

Dasi, a si mmɔ too ma sɔ koe ma, Yataa ma

¹⁴ Wo butuin chɛ, ma koe a faachima ɔ mɔ ɔ mɔ a. A sin to, wo ni ma tenchen Yataa ko a. Koe min na mu, mɔ ɔ mɔ ee Mansa Yataa yen‑da, ni a ee ka.

¹⁵ Wo tima ya, wo ma na wo kan kɔ sɔ koadia demanɛ a, Yataa ɛ min be. Wo dɔndɔ wɛɛ ma ma yɔ kɔn konama. Ni a koa‑a dechee, ɛ ma kɔn yama an na, a bɔɛ n tɛ ɔ.

¹⁶ Mɔ ɔ mɔ ma ko tɛ ma a ma gbɔsɔɛ a, wo tɛ ɔ. Mɔ ɔ mɔ ma ma wo tɛ ɔ, Yataa wakoe ee min faa ɔ, yɔ Isɔ. Den saa ni a a, chɛɛ a tana, daun fen dɔndɔ gbe ko a, a‑a an tea ma tachɛ wan.

¹⁷ Wo‑a a ɔ sɔn fan, mbɛ chɛ gbakɔ, a toen ni a fa ni a dua, chɛɛ chɛ nii bɛn to. Koe min na mu, a na‑a chia yan fan boo ɔ boo, dua chɛ ma sɔn koe a, chɛɛ a nii ma a ma sɔn ni. A na‑a di chɛ wɛɛ, chɛɛ a nii ma che ni, ko ɔ ko ka‑a a gba ɔ.

¹⁸ Wo ma na ni ka yɔ Isɔɛɛ mɔɛ nu, miin na‑a an mbe koe a tisɔn kaina min. An na‑a wan Saina kɔnkɔɛ kɔɔ, ta man ba ni kaina min, a yɛ to, pimbi wa bundenɛ ɛ. Fia fichi fichi wa wɛɛ ni bɔ tena wan nɔ,

¹⁹ buu kuiɛ, a basan kuiɛ wɛɛ a min na min‑da. Mɔɛ chɛ n‑na kuiɛ chɛ a min kɛn, an‑na disa chɛ wan, an ma na bai dɔ mende a min to,

²⁰ koe min na mu, an nii che an kun bɔ‑a Yataa da a bai chɛ kɔɔ, a na‑a min fɔ a 'a gboo ɔ, a ɔ, “Ni soe nan fan bɛɛ tu‑a kɔnkɔɛ chɛ a, a ma ɛ bon bon fan senɛ a, aan a ni fa.”

²¹ An koe ma chianden ni sai ma, min‑na a ma, Mosisi‑a a fɔ, a ɔ, “N mbe samba tena wan, chiandia a.”

²² Chɛɛ wo‑a min ma gbɛ, wo na‑a Sayɔn kɔnkɔɛ kɔɔ, wo na‑a duu wa chɛ ɔ Yataa tena, min mbe ee fa kuɔ fɔ ko a. Wo na‑a Chuusaɛn, min mbe banda bu ɔ, maeka wu sɛsɛ n mbe kaina min, buɔdia ɔ.

²³ Wo na‑a gbɛ Yataa 'a mɔɛ n 'na chɔchi ɔ, a 'a denɛ saa nu. A sin, an tɔɛ nyɛndenɛ mu banda bu ɔ gboo ɔ. Wo na‑a gbɛ Yataa tena, min mbe mɔ gbu gbɛɛ gbɛmbo‑a. Wo na‑a gbɛ fuɛ n tena, mɔɛ chɛ nu, Yataa na‑a miin ya mɔ tandenɛ n na, a chen kɔɔ, an fuɛ nu. A yɛ to, a‑a an ma yɔ a toen mu an ni ma buɛ min dɔ, banda bu ɔ.

²⁴ Wo na‑a Chisɔsi tena, min ni wo tɛ wo bɛ Yataa a, dɔbɛn nama chɛ chɛ koe a. Wo na‑a a wii tena, min bɔn‑da, wo too ɔ dia koe a fen chɛndɛ a, a ben Ebɛɛ wii ta ma.

²⁵ Wo a ma wo ma gbɔsɔɛ a, wo too ma sɔ koe a Yataa ma, ni a ma‑a koɔ‑a. Mɔɛ miin na‑a ban an too ma sɔ koe a, tima min na a ni dasi be tena an ma dunya ɔ, an na‑a tɔɔya ɔ bia wan. Ni a ma‑a koɔ‑a, a ka banda bu ɔ, mbɛ mmɔ‑a mmɔ kan kɔ sɔ, mmɔ wɛɛ ɛ tɔɔya ɔ yen‑da wan.

²⁶ A kuiɛ na‑a duu gboo ɔ samba wan, a tima chɛ a. Chɛɛ sanche chɛ ɔ, a‑a tooɔdia chɛ mmɔ a, a ɔ, “A to‑a to dɔndɔ, dɔ samba chɛ koe a. Duu gboo dechee ma chɛ nɛnɛ ɔ, chɛɛ banda gbu wɛɛ a.”

²⁷ Bai chɛ ɛ a fɔ tena wan, mbɛ fenɛ gbɛɛ miin mbe samba, an mbe ban‑da wan dunya ma. Chɛɛ fen chɛ n sin gbɛɛ, miin mbe ee samba, an fan mbe to‑a an gba n dɔ.

²⁸ Chɛ an fɛ mu, mmɔ Yataa wai bɔ. Koe min na mu, a‑a gbasaya be mmɔ ma, ma koe a mansaya ɔ a waa a, a sin mbe ee che yɔn‑da. Mmɔ a wai bɔ, mmɔ ni a fai chiandia ɔ, min mbe ma faachima a a tena.

²⁹ Koe min na mu, mmɔ 'a Yataa ɛ wan yɔ ta min mbe fenɛ n minda fion.