GBOO IBU MƆƐ N KO A 11 - Yataa 'a Dɔbɛnɛ Nama

Koe tɔmɔsi nu, a si mɔɛ kai fa buɛ ma Yataa a

¹ Mɔɛ min yii na tɛen mu fen chɛ n ma, Yataa na‑a a too ɔ dia miin na, a yɛ to, mɔɛ min dandenɛ ɛ koe n na, a ya ma miin dɔ yen ni, a mɔɛ chɛ an kai faen mu Yataa a.

² Suun mɔɛ n na‑a an kai fa min chɛ Yataa a, an na‑a a ma, a faa chimaen ni an na.

³ Kaifa Yataa a, an na‑a a ma, mmɔ‑a a ɔ sɔn, mbɛ a da a bai ɔ mu dechee, dunya gbɛɛ a dan‑da. Chɛ ni a ɔ yian, mbɛ mmɔ ɛ fenɛ miin yen ka sanche, an ma bɔ ni fen kɔ fen dɔ, mɔɛ ɛ miin yen.

⁴ Ebɛɛ na‑a a kai fa wan Yataa a. An na‑a a ma, a‑a yasi be Yataa ma. An yasi chɛ ni nyin Yataa tena, a ben Ken ta ma. Yataa na‑a Ebɛɛ ya wan mɔ tandenɛ a, kaifa ɔ chia a, mbɛ a‑a a boo si a 'a yasi kɔɔ. Ebɛɛ faen mu wɛɛ boo ɔ boo bi tee chɛ kɔɔ, chɛɛ ɛ wɛ koɔ tena mmɔ tena tun. Koe min na mu, a na‑a a kai fa wan Yataa a, a sin mu tɔmɔsi an na mmɔ tena.

⁵ Ɛnoku na‑a a kai fa wan Yataa a, an na‑a a ma, a ma fa ni. Chɛɛ min na‑a ma, a gbafun‑da wan, a sɛ Yataa tena, mɔ ɔ mɔ nii ma a yen ni. Koe min na mu, Yataa wandi an na‑a a ya, a sɛ‑a a a. Yataa 'a gboo ɔ te, mbɛ Ɛnoku e na gbafun, a sɛ banda bu ɔ, a na‑a Yataa faa chima wan.

⁶ Mɔ ɔ mɔ ee che a ma‑a Yataa faa ni chima, ni an mɔɛ chɛ ma a kai fa ni Yataa a. Koe min na mu, mɔ ɔ mɔ min mbe na Yataa chen kɔɔ, fɔ ni a dan‑da a a, mbɛ Yataa ɛ wan nɔ. A sin, mbɛ Yataa ɛ tɔnɔnɛ be wan chɛ n ma, miin mbe na a tena.

⁷ Nowa na‑a a kai fa wan Yataa a, an na‑a a ma, a na‑a a too ma sɔ Yataa 'a dasi ma, a si koe n ma miin ni na tena ma‑a, a nii ma miin sima ɔ yen nin bɛ. A na‑a Yataa da a kuiɛ a min fan, mbɛ a‑a dɛndɛ nyan, min na‑a a baun, an bɛ a 'a mɔɛ n na. Yataa na‑a Nowa ya wan mɔ tandenɛ a, min mbe bɔ dechee a 'a kaifa ɔ Yataa a. An kaifa chɛ sin dɔ, Nowa na‑a koe min ma ka, a na‑a a yian fan, mbɛ dunya ma mɔɛ n yau kaka.

⁸ Ebeami na‑a a kai fa wan Yataa a, min na‑a a ma, Yataa na‑a min fɔ a ye a ma koe a, a‑a a ma. Yataa na‑a a fɔ wan Ebeami ye, mbɛ a ni bɔ a waa a, a ni ta kaina, a nii ma ta ni kaina min tee dɔndɔ wɛɛ. Yataa na‑a a too ɔ dia wan an kaina chɛ be koe a a ma, a ta a. A nii ma a ɔ sɔn, ɛ ta tena kaina min. Chɛɛ chɛ gbɛɛ ɔ, a bɔ‑a wan a 'a chɛnyɛ ɔ.

⁹ A na‑a a kai fa wan Yataa a, min na‑a a ma, a ni ma chɛnyɛ mɔ dɔ gbɛɛ a, chɛnyɛ ɔ, Yataa na‑a a too ɔ dia min na. A ni chi tɛndi kɔɔ wan, yɔ sonda. A 'a denɛ Aisaki wɛɛ, an fea a mama denɛ Chekɔpi a, an ni chi ka wan. An bɛɛ, an na‑a too ɔ dia dɔndɔ gbe chɛ an ma sɔn.

¹⁰ Koe min na mu, Ebeami ni wan tima ma kɔn tena, duu wa chɛ ma sɔn koe a, Yataa na‑a a too ɔ dia min na. Duu wa chɛ, Yataa wandi na‑a min siman, a‑a a sɔ gban, a ee yɔn kuɔ fɔ ko a.

¹¹ A chenanchaen ni boo ɔ boo, a yɛ to, a 'a musu gbandayaen ni, Ebeami na‑a a kai fa wan Yataa a. Chɛ an na‑a a ma, a che‑a denɛ ma sɔn‑da. A na‑a dan fan a a, mbɛ Yataa ee a da a kuiɛ yɔn.

¹² Chɛ an‑na a fɔ, saya ni wɛɛ ka gbɛ a boo kana bia‑a, a mɔ dɔndɔ gbe chɛ cheeya nu, an kɔkoo. An kɔkoo yɔ tɔmbuaka nu banda a, ni yɔ tɛɛ kuu yii ɔ, mɔ ee che min dan‑da.

¹³ Mmɔ bɔ kɔnkɔɛ chɛ n sin, an nii ma sɛmbɛ ni an kai fa koe a Yataa a, aan an fa‑a a nyɔn na. An sin nii ma fen chɛ n ma sɔn ni, Yataa na‑a an too ɔ dia miin na. Chɛɛ an na‑a to pɔɔ wan, an‑na an fen chɛ n yen, mbɛ an bu ɔ dia‑a. An gbu sin dɔn‑da wan a ma den, mbɛ sonda mu an na, dunya chɛ ɔ.

¹⁴ Mɔɛ miin sin mbe bai bonda chɛ n fɔ, an mbe ma ka a fɔ an na gboden, mbɛ an mbe an ya a kan tena an ta chɛnyɛ an na.

¹⁵ An nii an yii na chii to chɛnyɛ chɛ a, an‑na min to an gbaa. Ni an na‑a chɛ ma wan, an ni kun‑da wan to yɛ koe a nɔ.

¹⁶ Chɛɛ an ni min ma gbɛ, an ni an yii na chii gbɛ chɛnyɛ an na, min nyin a ben a ma, banda bu ɔ. Chɛ ko a, mauma ko nii ma Yataa tena, ni an‑na a chee an 'na Yataa a. Koe min na mu, a na‑a duu wa ɔ bɛn fan an ko a.

^17-18 Ebeami na‑a a kai fa wan Yataa a. An na‑a a ma, Yataa na‑a a yiima yan kɛn, a dɔn‑da a 'a den dɔndɔ gbe bɔ koe a yasi a. Yataa sin na‑a a too ɔ dia wan, a ɔ, “I 'a denɛ Aisaki cheeya nu dechee, an fan mbe ya‑a i cheeya chɛndɛ chɛndɛ n na.” Chɛɛ chɛ gbɛɛ ɔ, Ebeami ma bɛnden fan ni a 'a den dɔndɔ gbe be koe a yasi a Yataa ma.

¹⁹ Ebeami yiima a koen fan ni, mbɛ ni a‑a Aisaki fa wɛ, Yataa ɛ a ma‑a wan, a ni a kɔɔ sɔ, a ka saya ɔ. A sin, mɔ gbu ni a fɔ, mbɛ Ebeami na‑a Aisaki fɔɛ ma sɔn fan, a bɔ saya ɔ.

²⁰ Aisaki na‑a a kai fa wan Yataa a. An na‑a a ma, Aisaki na‑a a 'a fɛnɛ n dua wan, Chekɔpi an fea Isɔ a. A danden fan ni a a, mbɛ dua chɛ ee bea‑a duu ma ya ɔ ma.

²¹ Chekɔpi na‑a a kai fa wan Yataa a, an na‑a a ma, a e na to fa‑a, a na‑a Chosɛfi 'a den kaima fea an dua wan, dɔndɔ dɔndɔɛ a. A duuenɛ a 'a tungbɔɛ kun ma, ɛ ta‑a Yataa fai‑a.

²² Chosɛfi na‑a a kai fa wan Yataa a. An na‑a a ma, a na‑a bai fɔ, a si Isɔɛɛ mɔɛ n bɔ koe ma Ichipi chɛnyɛ ɔ. A na‑a bai chɛ fɔ tima min na, a ni gbɛ fa tena wan. A sin, a na‑a a ɔ yian fan Isɔɛɛ mɔɛ chɛ n na, an mbe a tɔn buɛ min dɔ, ni a fa‑a.

²³ Mosisi suun‑da tima min na, a woo mɔɛ n kai faen fan ni Yataa a. An na‑a a ma, a woo mɔɛ n‑na a nun a den toa tɔɛ a, kau sawa ko a. Koe min na mu, an na‑a a yen fan, mbɛ den ma kawaen ba ni a a. Mbɛ an faa gbɛa‑a mansa wa chɛ da a kuiɛ bɔ koe ma a ɔ.

²⁴ Mosisi na‑a a kai fa wan Yataa a, kɛn a koa‑a. Chɛ an na‑a a ma, a nii ma dɔn ni an ni a fɔ, mbɛ Ichipi mansa wa chɛ 'a denɛ musuma chɛ, an‑na a wan Mosisi suun.

²⁵ A na‑a a ma bɛn fan, tɔɔya ɔ bia koe a, an bɛ Yataa 'a mɔɛ n na, a e na ma buɔdia wa ɔ, ko yama ɔ.

²⁶ A na‑a a ma bɛn fan, mbɛ nyanɛ gbɛɛ Ichipi chɛnyɛ ɔ, a ma che ni mainɛ ɔ bia koe a, Chasi ko a. Koe min na mu, tɔnɔnɛ an mbe a ɔ.

²⁷ Mosisi na‑a a kai fa wan Yataa a, mbɛ a bɔ‑a Ichipi chɛnyɛ ɔ. A sin, chian bɛɛ nii a ɔ, a si mansa wa chɛ faa tɛ koe ma. A na‑a ma wan dechee, yɔ Yataa ni wan a ya kɔɔ, mɔ ɔ mɔ ee min yen. A sin na‑a a ma wan, a na‑a a faa bia.

²⁸ A kai faen fan ni Yataa a, min na‑a a ma, a‑a a ma, Isɔɛɛ mɔɛ n‑na a kuu sɔ kun bɔ a ɔ bɛnɛ bia‑a. A na‑a a fɔ wan Isɔɛɛ mɔɛ n ye, a ɔ, an mbe sa tɔngbɔɛ min fa‑a, an ni a wii sin sin an 'na kankanɛ n ma. Chɛ an mbe a ma‑a, maeka min ni na‑a an 'na den kaima saa saa n fa koe a, a ni tin Isɔɛɛ mɔɛ n 'na denɛ n kun ma.

²⁹ Isɔɛɛ mɔɛ n na‑a an kai fa wan Yataa a, an na‑a a ma, an na‑a tachɛ chɛ, an‑na kɔ yii dɔndɔ ɔ tandin, an ni min chee, an dɔ, Yii Yawa, yɔ an ni ka duu gboo gbanda ma wan. Chɛɛ Ichipi mɔɛ n tana, an toen ni kɛn an ni tandin, yii chɛ na‑a ben fan an kun ma, an to‑a a ɔ.

³⁰ Tima dɔndɔ a, Isɔɛɛ mɔɛ n ni Chɛiko duu wa chɛ a bɛn fan, tee wɔnfea ko a. An na‑a an kai fa wan Yataa a, min na‑a a ma, kanda wa min ni an duu chɛ a tindanɛ, a bɔn‑da wuɔn.

³¹ Daabi na‑a a kai fa wan Yataa a. Chɛ na‑a a ma wan, a ni wɛɛ duu dia a, kanda chɛ na‑a bɔn tima min na, a kun ma to ni a ɔ. Koe min na mu, a na‑a a boo si wan mɔɛ chɛ n kɔɔ, miin na‑a na da tɛ chɛ tena. Mɔɛ tɔɛ n tana, miin nii Yataa da a kuiɛ ma, an kasaa‑a wan.

³² Chɛɛ bai ee to n da a, a fɔ koe a. Koe min na mu, tima ee ma‑a nɔ, an gbɛɛ tɔɛ ɔ tɛ koe a dɔndɔ dɔndɔɛ a. Kideɔn ni ma, Baaki, Samisin ni Chɛfata. Mansa Defidi wɛɛ, an fea Samɛɛ a, ni Yataa 'a gbonka chɛ mɔɛ tɔɛ nu,

³³ an 'na kai fa Yataa a, a na‑a a ma wan, an kun‑da chɛnyɛ sɛsɛ n ma chɛɛ ɔ. An na‑a tea din fan mɔɛ n ma. A sin, too ɔ dia na‑a chɛ wan an na, a yɛ to, an‑na a ma wan, yaa n ma che ni bia chɛ‑a.

³⁴ An na‑a ta man ba n na dufɛn fan, mbɛ an bɔ‑a saya yuu a, chɛɛ chɛ boo ɔ. An na faen fan ni, chɛɛ an dɔ gbɛa‑a wan. An fanka ni koo chɛɛ ɔ, an sin na‑a chɛnyɛ dɔ gbɛɛ ɔ soya n bɔ wan chɛɛ ɔ.

³⁵ Musu chɛ n bɛɛ, an na‑a an kai fa wan Yataa a, min na‑a a ma, an‑na an boo si to an suun ma nyɔɛ n kɔɔ. An suun ma nyɔɛ chɛ nu, miin na‑a fa, chɛɛ an kɔɔ sɔ‑a to saya ɔ, a yɛ fɔɛ ɔ. Mɔɛ dɔ n sin, an nii ma dɔn ni an kan kɔ sɔ koe a Yataa a. Chɛ ko a, an fa‑a tɔɔya kɔɔ wan, min mbe a ma, an ni an kɔɔ sɔ, a ka saya ɔ, fɔɛ chɛndɛ ma sɔn koe a.

³⁶ Dɔ n sin, an‑na an ma yɛn fan, an‑na an bosa. Mbɛ an‑na dɔ n chii yɔɔɛ a, an ta‑a an na pimbi chenɛ a.

³⁷ An‑na an ma bon bon fan, an fa koe a, an‑na dɔ n tɛka fea a, mbɛ dɔ n sin, an‑na an fa chɛɛ chɛ mɛ a. An ni ben ben fan, an ma chiienɛ ɛ sa gboo a, chɛ ma, ba gboo. An yɔnden ni, an mbe ko ma gbaaenɛ sa‑a an ma, an mbe an bia yama yama.

³⁸ Mɔ chɛndɛ bonda chɛ nu, an nii ma bɛn ni an dunya chɛ ɔ, ɛnden bɛɛ a. An ni ben ben fan an kun ye, yɔ mɔɛ miin baa ee, an mbe ben fuinɛ n ma, ni kɔnkɔɛ n dɔ. A yɛ to, an ni chi fanɛ n fan na, a basan sonɛ n na, duu gboo ɔ.

³⁹ Tando ni koo, an gbɛɛ na‑a min ma sɔn, an 'na kaifa ko a Yataa a. Chɛɛ chɛ gbɛɛ ɔ, Yataa na‑a an too ɔ dia min na, an nii ma a ma sɔn ni.

⁴⁰ Yataa na‑a chɛ ma, koe min na mu, ko dɔ mende an ni a yii ma mmɔ gbɛɛ ko a, min benden mu an too ɔ dia chɛ ma. Yataa 'a yiima ni min na, an ni chɛ an na. Mbɛ an mbe ee che ma‑a, yɔ Yataa toen mu an ni ma buɛ min dɔ, mɔɔ ni mmɔ bɛ ma‑a an na.