GBOO IBU MƆƐ N KO A 10 - Yataa 'a Dɔbɛnɛ Nama

A ɔ yian‑da, mbɛ Chasi be‑a gba dɔndɔ gbe

¹ Sawa chɛ nu, miin be‑a Mosisi ma, an mbe bai sa tena wan, a si fen chɛndɛ n ma, miin mbe banda bu ɔ. Chɛɛ an sawa chɛ n mbe wan dechee, yɔ banda bu ɔ fen chɛ n nininɛ gbama nu. An mbe ee koe chɛ n dɔ yian, tea chia a, ɛnden bɛɛ a. An mbe yasi dɔndɔ gbe an bɔ, san kɔ san na. Chɛ sin mbe ee a ma, mɔɛ miin mbe bea sawa chɛ n fɛ, an ni ma yɔ Yataa toen mu an ni ma buɛ min dɔ.

² Ni a ni kun fan chɛ ma‑a, mɔɛ chɛ n ni sɛmbɛ‑a wan, yasi chɛ n bɔ koe a. A nii ma‑a to an yii ma, ɛnden bɛɛ a, mbɛ an 'na ko yama ma wan.

³ Chɛɛ an mbe yasi miin bɔ ka, a puin koe mu an yii ma, san kɔ san na, mbɛ ko yama ma mɔɛ mu an na.

⁴ Koe min na mu, a ee che ma‑a, ɛnden bɛɛ a, ninchi wii basan ba wii a, an ni mɔɛ n ko, a bɔ an 'na ko yama n dɔ.

⁵ Chɛ an fɛ ni, Chasi na‑a tima min na dunya chɛ ɔ, a na‑a a fɔ wan, a ɔ, “Yasi n bɛ mɔɛ n boo fenɛ n na, i wan Yataa ma to ni an fan na. Chɛɛ mɔ gbu gboo, i‑a a be n ma.

⁶ Soe miin mbe minda ka i tena, a basan yasi tɔɛ n na, mɔɛ n mbe miin bɔ an 'na ko yama n ko a, an ma fen na, miin mbe i bu ɔ dia.

⁷ Mbɛ n dɔ, ‘N yen ko nɛ, Mansa Yataa, i faa ma koe ma koe a, yɔ a nyɛnden mu buɛ min dɔ, i 'a gboo chɛ ɔ, a si n ma.’ ”

⁸ A saa a, Chasi‑a a fɔ wan, a ɔ, “Yasi n bɛ mɔɛ n boo fenɛ n na, i wan Yataa ma to ni an fan na. Soe miin mbe minda ka i tena, a basan yasi tɔɛ n na, mɔɛ mbe miin bɔ an 'na ko yama n ko a, an ma fen na, miin mbe i bu ɔ dia.” A‑a chɛ fɔ wɛɛ, chɛɛ chɛ gbɛɛ ɔ, an mbe chɛ n bɔ sawa ta fɛ chia an na.

⁹ Mbɛ a‑a a fɔ, a ɔ, “N yen ko nɛ, Mansa Yataa, i faa ma koe n ma koe a.” A‑a dɔbɛnɛ saa ɔ yɔn, min mbe a ma, a ni a fean bɔɛ kuu sɔ.

¹⁰ Chisɔsi ni Yataa faa ma koe an ma. A sin, a chia chɛ a mu, mmɔ ma‑a tenchen Yataa ko a. Chisɔsi na‑a a wandi gboo min be yasi a, gba dɔndɔ gbe, a ma ma ni to fea, an na‑a a ma chɛ ma‑a.

¹¹ Mɔɛ miin ni mɔɛ n tɛ ɔ Yataa a, an mbe yasi n bɔ wan, tima ɔ tima ko a. Chɛɛ an yasi chɛ nu, an mbe ee an bɔ an 'na ko yama n dɔ.

¹² Chɛɛ Chasi tana, a na‑a a wandi be dɔndɔɛ min chɛ ka, a ma‑a wan yasi a mmɔ 'a ko yama n ko a, tima ɔ tima ko a. A na‑a a sin ma kɛn, a si‑a wan kaina ma bɛndenɛ Yataa boo nyima ɔ.

¹³ A ka gbɛ a tima chɛ ma, ɛ nɔ gbɛ ma kɔn chɛ an na, aan Yataa ni a chɛɛ ma nyɔɛ n don a kɔɔ, a ni an popoya a ya kɔɔ.

¹⁴ Koe min na mu, a na‑a a wandi an ma yasi dɔndɔ gbe a. An yasi chɛ sin, a‑a a ma wan, a ban‑da wai chɛ‑a, an ma koe a tenchen Yataa ko a, kuɔ fɔ ko a.

¹⁵ A sin, Yataa Nyina wɛɛ, a koɔ‑a wan mmɔ tena, a si koe chɛ ma. A na‑a a fɔ ka wan Yataa 'a gboo ɔ, a ɔ,

¹⁶ “Mansa Yataa ɔ, ‘Ni an tee chɛ n ben‑da, N mbe dɔbɛn chɛ an chɛ‑a, nn bɛ an na.’ A ɔ, ‘N mbe n 'na sawa n sa‑a wan an faa ɔ, mbɛ n yɛ‑a, n‑na a nyɛn, an yiima ɔ.’ ”

¹⁷ Mbɛ a‑a a fɔ to Yataa 'a gboo ɔ, a ɔ, “Kuɔ fɔ ko a, an 'na ko yama nu, a basan an 'na sawa yɔnɛ a, an mbe ee puin‑da to n yii ma.”

¹⁸ Chɛ an fɛ mu, Yataa ban‑da kaina a boo bɔ‑a chɛ n dɔ, yasi bɔ ee to nɔ, mmɔ 'a ko yama n ko a.

A nyin mmɔ ni mmɔ faa bia

¹⁹ Chɛ an fɛ mu, n suun ma nyɔɛ nu Chasi ɔ, mmɔ yii sɔen fan mu gbɛ gbae, Chisɔsi wii 'a gbasaya ɔ, don koe a kaina min mbe tenchen Yataa ko a.

²⁰ Chisɔsi‑a a gboo be yasi a, min mbe a ma, a ni chia nama a ka mmɔ ko a, a ta Yataa tena. Mmɔ ɛ kun fan gbɛ, mmɔ ni ben tɛndi chɛ ɔ, a ta Yataa tena. Chisɔsi Chasi, an mu an chia chɛ a, min mbe fɔɛ ɔ.

²¹ A sin, a ka a tima ma, tɛ mɔ wa, mmɔ tɛ Yataa a, an mbe mmɔ boo ɔ. A sin fan mbe Yataa 'a chenɛ kun ma.

²² Chɛ an fɛ mu, mmɔ na Yataa baima, faa chɛndɛ a, a yɛ to, mmɔ kai faenɛ a a gban. Mmɔ faa ɔ gbɛenɛ ni ma, mmɔ yiima a koenɛ ɛ fo, mmɔ gboo wɛɛ ma koenɛ, mmɔ gbɛenɛ fo.

²³ Mmɔ ma a ɔ yian bi, mbɛ mmɔ yii na tɛen mu Chisɔsi an ma, mbɛ sinan, mmɔ‑a yiima dɔ mende ya. Koe min na mu, a wɛn‑na mmɔ too ɔ dia, a ee a da a kuiɛ yɔn.

²⁴ A sin, mmɔ yiinachii chɛ, mmɔ ɛ a ma buɛ min dɔ mmɔ ni mmɔ nyɔn deman, mbɛ mmɔ‑a ko chɛndɛ ma mmɔ nyɔn na.

²⁵ Mmɔ ma ban bɛn koe a kaina dɔndɔ, yɔ mɔɛ dɔ n mbe a ma buɛ min dɔ. Chɛɛ mmɔ ni mmɔ nyɔn faa ma nande, a bɛbɛɛ tima ɔ ma yansan to ka buɛ min dɔ, Mansa Chisɔsi na koe a.

²⁶ Mmɔ ban‑da ka buɛ min dɔ tea ɔ sɔn‑da, a si Chisɔsi ma, mmɔ ma ko yama ma bia to mmɔ boo fea a. Ni mmɔ‑a chɛ ma, yasi kan kɔ kan mbe ee ma‑a nɔ, min mbe a ma, Yataa ni a boo bɔ mmɔ 'a ko yama n dɔ.

²⁷ Chɛɛ ni mmɔ‑a chɛ ma, mmɔ ɛ ma‑a gbɛ ko dɔndɔ an ma kɔn‑da gbɛ dechee, chiandia ɔ. An nɛ gbɛmbo tee a, ni ta wa chɛ min mbe mɔɛ n kasaa‑a, miin mbe ee Yataa ko a.

²⁸ Sawa chɛ min be‑a Mosisi ma, mɔ ɔ mɔ min mbe a yɔn‑da, siiya ɛ bɔ‑a wan a ma. Ni mɔ fea, sawa‑a a fɔ mbɛ tea mu, chinchin mbe ee a ɔ, an mbe an mɔɛ chɛ fa wan.

²⁹ Ni tea mu chɛ a, fen koe ɛ na‑a ma‑a gbɛ mɔɛ chɛ a, min mbe ee a gbɔsɔ‑a Yataa 'a denɛ ko a? Yataa 'a dɔbɛn nama chɛ, Chisɔsi wii min bɔn‑da mmɔ 'a ko yama n ko a, mɔɛ min mbe ee a ya‑a fen kɔ fen na. Fen mbe ma‑a an mɔɛ chɛ a? Yataa Nyina, min mbe koadia demanɛ chɛ, mɔɛ min mbe a main. Fen mbe ma‑a an mɔɛ a? Wo wo yii na chii wɛ, ko yawaen chɛ a, Yataa ɛ min si‑a an mɔɛ chɛ a.

³⁰ Koe min na mu, mmɔ‑a a ɔ sɔn fan, mbɛ Yataa na‑a a fɔ wan a 'a gboo ɔ, a ɔ, “N mbe a ma‑a wan, wo ni tɔɔya ko yama chɛ n ko a, wo‑a miin ma.” A yɛ to, a ɔ, “N fan Mansa Yataa, n fan mbe n 'na mɔɛ n gbɛmbo‑a.”

³¹ Yataa min mbe ee fa kuɔ fɔ ko a, a ma chianden mu, a boo ni sa mɔɛ ɔ.

³² Chɛɛ wo wo yii na chii koe miin na‑a si wo a, a saa a, tima min na wo na‑a manɛ ma sɔn, a si Chisɔsi ma. A tima chɛ a, wo na‑a tɔɔya ɔ gbɛama ɔ bia wan.

³³ Tima dɔsa n na, mɔɛ n ni bai yama n sa wan wo ma fanka ɔ, an mbe faa ma gbaa koe n ma wo a. A yɛ to, tima dɔ gbɛɛ n na to, wo dɔn‑da wan sa koe chɛ n kaa a, an ni miin bia tena chia dɔndɔ gbe chɛ a.

³⁴ Wo chinchin‑da chɛ n ma, miin ni sa ɔ pimbi chenɛ a. A yɛ to, an‑na wo boo fenɛ n bɔ kɛn wo boo ɔ gbasaya a, wo faa nii ma yɔn ni ɛnden bɛɛ a. Koe min na mu, wo na‑a a ɔ sɔn fan, fenɛ ɛ wan wo ko a, min benden mu an ma, fenɛ min mbe ma‑a kuɔ fɔ ko a.

³⁵ Chɛ an fɛ mu, wo gboo ɔ ma fa. Koe min na mu, a dankama a, wo e tɔnɔnɛ ma sɔn‑da wan min koo.

³⁶ Mɔɛ ɛ i faa bia wan, min mbe a ma, i ni che Yataa faa ma koe ma‑a. An mbe a ma, i ni fen chɛ ma sɔn, a na‑a tooɔdia chɛ min be koe a.

³⁷ Koe min na mu, Yataa 'a gboo ɔ te, “Tima ɛnden fan toen mu gbɛ, mɔɛ min mbe na‑a, mbɛ a na‑a. A ee mɛ tena to, na koe a.”

³⁸ A ɔ te to, “N 'na mɔɛ min mbe a kai fa‑a n na, n mbe an ya mɔ tandenɛ a, a sin fan mbe kuɔ fɔ fɔɛ ma sɔn. Chɛɛ ni min kɔ min‑na a kan kɔ sɔ n na, n bu ɔ ee dia‑a a mɔɛ chɛ a.”

³⁹ Chɛɛ mɔɛ ma mmɔ wan na, miin mbe an kan kɔ sɔ, mbɛ an ka‑a Yataa chia ma. Chɛɛ mmɔ kai faen fan mu Chisɔsi a, a sin, mmɔ kun kaen fan mu.