GBOO IBU MƆƐ N KO A 1 - Yataa 'a Dɔbɛnɛ Nama

Yataa koɔ‑a mɔɛ n tena a 'a denɛ an dɔ

¹ Suun, tima sɛsɛ ko a, Yataa na‑a koɔ wan mmɔ bemba n ta bemba n tena, chia sɛsɛ a. A sin, a ni chɛ ma, a 'a gbonka chɛ mɔɛ sɛsɛ n fan dɔ.

² Chɛɛ mmɔ ɛ ka tee dankama nɛnɛ chɛ miin kɔɔ, dunya e na to ban‑da, a koɔ‑a gbɛ mmɔ tena a 'a denɛ an dɔ. A‑a an yian, ma koe a fen kɔ fen kun ma dunya ɔ. A sin gbu ni dunya gbɛɛ a dan tena tima min na, a na‑a a ma a 'a den chɛ an na gbasaya ɔ.

³ An den chɛ sin, Yataa 'a kamaya ɛ yen fan a ɔ. Yataa ɛ buɛ min dɔ dechee, a wɛɛ ɛ ka wan. A da a bai gbasayaen mu, min mbe a ma tena dunya kunɛ a biaenɛ ɛ kaina dɔndɔɛ. A ban‑da kɛn mmɔ ma ko‑a, a bɔ mmɔ 'a ko yama n dɔ, a si‑a kaina ma bɛndenɛ Mansa Yataa boo nyima ɔ, pan banda bu ɔ.

Yataa 'a denɛ benden mu maeka n ma

⁴ Yataa 'a denɛ benden mu maeka n ma, yɔ a tɔɛ gbu wɛɛ, Yataa‑a min si a kun ma, a benden mu buɛ min dɔ maeka n ta ma kaka.

⁵ Koe min na mu, Yataa na‑a min fɔ a 'a denɛ ye, a nii ma a nyɔn fɔ ni maeka kan kɔ kan ye. A‑a a fɔ wan a 'a gboo ɔ, a ɔ, “N 'na denɛ mu i a. N ma‑a i fa a bi.” Chɛɛ a nii ma a fɔ ni a 'a gboo ɔ, maeka kan kɔ kan ma, a ɔ, “N mbe ma‑a wan i fa a, mbɛ i wɛɛ ma‑a n 'na denɛ a.”

⁶ A yɛ to, Yataa e na to a 'a denɛ saa chɛ a na‑a dunya ɔ, a na‑a a fɔ wan a 'a gboo ɔ, a ɔ, “N fan Yataa, n 'na maeka n gbɛɛ, an ni basɔmaya be n 'na den chɛ ma.”

⁷ Min sien mu a 'a maeka n ma, Yataa‑a a fɔ wan a 'a gboo ɔ, a ɔ, “N mbe n 'na maeka n ma wan yɔ fia, n 'na bɔi den chɛ nu, n ni an ma yɔ ta manɛ nu.”

⁸ Chɛɛ a 'a denɛ wakoe tana, Yataa‑a a fɔ wan a 'a gboo ɔ, a ɔ, “Yataa mu i a, i 'a mansaya danka ee ma‑a, kuɔ fɔ ni kuɔ fɔ ko a. A sin, e gbasaya a tachɛ‑a wan i 'a mɔɛ n kun ma, teaya ɔ.

⁹ I toen mu tea an na, i ma to ni sawa yɔnɛ a. Chɛ an fɛ mu, n fan Yataa, i 'a Yataa, n‑na n boo sɔ i ma, ma koe a basɔmaya ɔ, min mu buɔdia a i tena, a ben i bɔɛ n ma.”

¹⁰ Yataa na‑a a fɔ wan to a 'a gboo ɔ, a ɔ, “I wan, Mansa Chisɔsi, i wandi gbu an‑na duu gboo chɛ a dan a saa a. Banda gbu wɛɛ, i wan‑na a wɛɛ a dan.

¹¹ Tima sin mbe che‑a wan, an gbɛɛ ni kasaa, chɛɛ i tana e ma‑a wan nɔ, kuɔ fɔ ko a. An gbɛɛ, an mbe chenancha‑a wan, yɔ doma kai wa ɛ taa‑a buɛ min dɔ.

¹² E an dɔ kandu‑a wan, yɔ doma. A sin, an mbe mun‑da wan, yɔ chii koa ɛ mun buɛ min dɔ. Chɛɛ i tana ee ka i gba ɔ, a sin, e ma‑a wan fɔɛ ɔ kuɔ fɔ ko a.”

¹³ Chɛɛ maeka ee nɔ, Yataa‑a chɛ fɔ min ye, yɔ a‑a min fɔ a 'a denɛ ye a 'a gboo ɔ, a ɔ, “Si nɛ n boo nyima ɔ, aan n ni i chɛɛ ma nyɔɛ n don i kɔɔ, n ni an popoya i ya kɔɔ.”

¹⁴ Chɛɛ maeka chɛ n tana, Yataa‑a an sɔ, an ni na wai chɛ a ko a dunya ɔ. An ni basan mɔɛ chɛ n ma, miin mbe na‑a bauncha ma sɔn‑da.