Gboo Ɛfisɔsi Ko A 5 - Yataa 'a Dɔbɛnɛ Nama

Pɔɔ ɔ te, mmɔ ni ma manɛ kɔɔ

¹ Chɛ an fɛ mu, wo mu ka buɛ min dɔ Yataa faa ma denɛ n na, a nyin gbu wo ni butuin chɛ, wo ni a sɔnɛ ya.

² Koadia faa ni ma wo ɔ, yɔ Chasi to‑a buɛ min dɔ mmɔ a. A sin, a‑a a wandi fɔɛ be wan mmɔ ko a, a ma‑a yɔ yasi, min mbe Yataa faa chima.

³ Chɛ an fɛ mu, wo ma dɛ waa ma basanɛ ɔ, ni wo ee wɛ fuu ɔ. A yɛ to, maumaya ko tɛ, chɛ ma, fenkoya wa kaka. Chɛ ma nyin Yataa 'a mɔɛ n ko a, miin mbe tenchen a ko a.

⁴ Wo ma maumaya ko ma, wo gbu sin ma kun dɔ ban bai sa. A yɛ to, wo ma damba dambaya koe ma. Koe chɛ n dɔndɔ wɛɛ, a ma ma bɛn ni an ma koe a. Chɛɛ wo e min ma, tima ɔ tima ko a, wo Yataa wai bɔ.

⁵ Wo dan chɛ a, mbɛ mɔ ɔ mɔ, ko yama‑a min dɔ chɛ chɛ, a ee don‑da mansaya kɔɔ, Chasi ɛ min dɔ, an fea Yataa a. Wo ma ma mɔɛ n na, miin mbe waa ma basan, an ma dɛ ni fuu ɔ tima min na. Chɛ ma, wo ni ma mɔɛ n na, miin mbe maumaya koe tɛ, an sin fenkoyaen mu, an mbe an boo fenɛ n ya yɔ Yataa.

⁶ Koe chɛ nu, an fan mbe a ma, Yataa ɛ faatɛ a bɔ mɔɛ chɛ n ma, miin mbe ee a kuiɛ ma. Mɔ ɔ mɔ kan kɔ kan, a ma daɔdia bai gbama n fɔ wo ye, wo bun koe a.

⁷ Chɛ an gbu fɛ mu, wo ma bea an mɔ bonda chɛ n fɛ.

⁸ Koe min na mu, wo ni wan tee pimbi ɔ, chɛɛ sanche gbɛ wo e wan manɛ kɔɔ. Koe min na mu, wo ma‑a mɔ dɔndɔɛ a Mansa Chisɔsi a. A nyin wo tachɛ buɛ ni bɔ mɔɛ n na, miin mbe manɛ kɔɔ.

⁹ Koe min na mu, a ɔ ɛ yen ka wan, mbɛ mɔɛ ɛ wan manɛ kɔɔ. Mɔ ɔ mɔ min mbe manɛ chɛ kɔɔ, ɛ ko chɛndɛ an ma tea tea ɔ, a sin, a tanden mu Yataa tena.

¹⁰ Wo sin, wo a ma wo ma gbɔsɔɛ a, wo ni koe n sɔn, miin mbe Mansa Chisɔsi faa chima.

¹¹ Wo ma wo boo chɛ ko ɔ pimbienɛ ɔ, miin mbe ee den chɛndɛ suun. Chɛɛ an ko bonda chɛ nu, wo a ma mɔɛ n ni a ɔ sɔn, mbɛ an ma nyin.

¹² A gbu sin ma mauen ba mu, mɔɛ ɛ ma bai sa‑a, a si an koe chɛ n ma, an mbe miin ma nun dɔ.

¹³ Ni manɛ sɔ‑a fen kɔ fen na, mbɛ an fen chɛ yen‑da gbadan.

¹⁴ A sin gbu, fen kɔ fen min mbe yen‑da gbadan, an mu manɛ a. Chɛ an fɛ mu, Yataa 'a gboo‑a a fɔ, a ɔ, “Wo wo kɔɔ sɔ, wo wɛn mbe sa ɔ chinɔɛ ɔ, mbɛ wo‑a wo kɔɔ sɔ a ka saya ɔ, a sin, Chasi ɛ a 'a manɛ be‑a wo ma.”

¹⁵ Chɛ an fɛ mu, wo wo tachɛ buɛ ma mɛn. Wo ma koe ma, yɔ mɔɛ miin kunɛ ee nɔ, chɛɛ wo a ma, yɔ mɔɛ miin 'na yiimatɛ da a koo.

¹⁶ Ni wo‑a gbasaya ma sɔn tima ɔ tima ko chɛndɛ ma koe a, wo a ma. Koe min na mu, ko yama ma koa‑a gbɛ sanche.

¹⁷ Chɛ an fɛ mu, wo ma ma woo mɔɛ n na. Chɛɛ wo butuin chɛ, wo ni Mansa Chisɔsi faa ma koe ɔ gbɛ.

¹⁸ A sin, wo wo boo bɔ gbɛ min ba ɔ, a ma na wo wakoe ɔ chɛ chɛ. Chɛɛ Yataa Nyina, an ni tachɛ gbɛ wo a.

¹⁹ Wo ni koe ma ka wo nyɔn tɛ ɔ. Wo si kan kɔ kan sa Yataa ye, a ɛ tando min dɔ. Wo si a diama n na bɔ Yataa tena, wo faa gbɛɛ a.

²⁰ Tima ɔ tima ko a, mmɔ Yataa wai bɔ, mmɔ Fa. Mmɔ a wai bɔ fen kɔ fen ko a. Mmɔ chɛ ma, Mansa Chisɔsi Chasi tɔɛ ɔ.

Pɔɔ ɛ bai sa‑a, a si musu n ma, an bɛ an chɛɛ n na

²¹ Wo chian‑da ka buɛ min dɔ Chasi ma, wo don wo nyɔn kɔɔ.

²² Wo wan fuu musu nu, wo don wo chɛɛ n kɔɔ, yɔ wo donden mu buɛ min dɔ Mansa Chisɔsi kɔɔ.

²³ Koe min na mu, gbasaya ɛ wan mɔ kaima boo ɔ, a 'a musu kun ma, yɔ gbasaya ɛ buɛ min dɔ Chasi boo ɔ, chɔchi kun ma. Chasi wandi gbu sin, an mbe mɔɛ n gbɛɛ baun chɔchi ɔ, miin maen mu yɔ a gboo wandi.

²⁴ Chɛ an fɛ mu, a nyin musu ni don a chɛɛ kɔɔ, chia kan kɔ kan na, yɔ chɔchi mɔɛ n donden mu buɛ min dɔ Chasi kɔɔ.

²⁵ Musu si kai nu, wo to wo 'a musu n na, yɔ Chasi to‑a buɛ min dɔ chɔchi a, mbɛ a‑a a fɔɛ be a ko a.

²⁶ A‑a chɛ ma, min mbe a ma, a ni a ma, mɔɛ miin mbe chɔchi ɔ, an ni ma tenchen Yataa ko a. A ni an ko fion, yii a, mbɛ a‑a a da a bai sa an yii kun ma.

²⁷ Chɛ ni a ma, a ni chɔchi yian a wandi gbu a, a nyandenɛ ɛ chɛndɛ chɛ. Tɔmbɛ ee ma‑a a ma, a wakoe ɔ sisienɛ ee ma‑a, ko kan kɔ kan mbe ee ma‑a a ma. Mɔ ɔ mɔ ma a fɔ, mbɛ ɛ ka wan, chɛɛ ɛ ma‑a tenchen Chasi an ko a.

²⁸ A chia dɔndɔ gbe chɛ a, mɔ kaima n ni to an 'na musu n na chɛndɛ chɛ, yɔ an toen mu buɛ min dɔ an gboo a. Mɔɛ min toen mu a 'a musu a, a toen mu ka a wandi gbu an na.

²⁹ Koe min na mu, mɔ ɔ mɔ ee nɔ, min mbe toomaya sɔ a wandi gboo ma. Chɛɛ ɛ to wan a a, a ni a bia chɛndɛ chɛ, yɔ Chasi ɛ a ma buɛ min dɔ chɔchi ko a.

³⁰ Koe min na mu, mmɔ maen fan mu yɔ a sɔna nu, a gboo chɛ ko a.

³¹ A nyɛnden fan mu Yataa 'a gboo ɔ, mbɛ “Chɛ an ko a mu, mɔ kaima ɛ a de to‑a wan, a ni a fa to, an ni chɛ an nyɔn dɔ, an fea a 'a musu a. A sin, an fea chɛ, an mbe ma‑a wan mɔ dɔndɔɛ a.”

³² Ko wa dɛgbɛ, an dɔ nundenɛ ɛ ka. Chɛɛ n mbe a fɔ tena, mbɛ a sien mu Chasi an ma, an fea chɔchi a.

³³ Chɛɛ chɛ gbɛɛ ɔ, bai chɛ n mbe wan wo wɛɛ ko a. Mɔ ɔ mɔ ni to a 'a musu a, yɔ a toen mu buɛ min dɔ a wandi gbu a. Musu n sin, an ni a ɔ yen, mbɛ chianɛ ɛ wan an dɔ, an chɛɛ n ko a.