Gboo Ɛfisɔsi Ko A 4 - Yataa 'a Dɔbɛnɛ Nama

Pɔɔ ɛ din‑da Chisianɛ n ma, ma koe a kuiɛ dɔndɔya ɔ

¹ Chɛ an fɛ mu, n fan, n fɛn mbe ka bia ɔ, Mansa Chisɔsi ko a, n mbe wo disa tena wo ni chɛ ma. Yataa‑a wo chee ka buɛ min dɔ a ta mɔɛ n na, wo ma an fɔɛ ɔ, min ma biaen mu an chee chɛ ko a.

² Tima ɔ tima ko a, wo ni wo wandi ma yii, wo faa ma gbandia, wo sin ni wo faa bia. Wo wo faa bia wo nyɔn na. Wo e kun‑da wan koadia yian‑da.

³ Yataa Nyina‑a wo ma mɔ dɔndɔɛ a, chɛ an‑na a fɔ, wo ko ɔ ko ma, wo e che min ma koe a, wo ni ma faa chima ɔ, tima ɔ tima ko a.

⁴ Mmɔ gbɛɛ, mmɔ dɔndɔɛ mu mmɔ a, yɔ Chasi gboo ɛ buɛ min dɔ. Koe min na mu, Yataa Nyina, min mbe mmɔ fɛ, ɛ dɔndɔ gbe. Ɛ ka wan dechee, yɔ yiinatɛ chɛ wɛɛ, Yataa‑a mmɔ chee min ko a, a sin mbe mmɔ ɔ.

⁵ A yɛ to, mmɔ 'a mansa ɛ dɔndɔ gbe, mmɔ kai fa tena ɛ dɔndɔ gbe, yii chɛ wɛɛ, Yataa chia a, ɛ dɔndɔ gbe.

⁶ A sin, mmɔ gbɛɛ, mmɔ Fa, Yataa ɛ dɔndɔ gbe. A sin, a wan 'na gbasaya ɛ mmɔ gbɛɛ kun ma, a yɛ to, a wan mbe wai chɛ mmɔ ɔ, mbɛ a ma‑a mmɔ gbɛɛ fɛ.

⁷ Chɛɛ mmɔ gbɛɛ, Chasi‑a koadia demanɛ chɛ wan mmɔ a, dɔndɔ dɔndɔɛ a, yɔ ɛ mɔɛ n kɔ buɛ min dɔ a faa ma a.

⁸ Chɛ an fɛ mu, a nyɛnden mu Yataa 'a gboo ɔ, “A sɛ‑a kɛn aan, a sɛ‑a, a na‑a mɔ sɛsɛ chɛ wan bia ɔ, a sɛ‑a an na. A sin, a‑a boo fenɛ sɛsɛ be wan mɔɛ n ma.”

⁹ A fɔ koe chɛ, “a sɛ‑a aan, a sɛ‑a” a ma sɔ ni ko dɔ mende ko a. Chɛɛ a fɔenɛ an nɛ, mbɛ Chasi e na to sɛ‑a, a na‑a yii wan faa mɔɛ n tena, duu gboo kɔɔ.

¹⁰ A wɛn na‑a yii ka duu gboo kɔɔ, a wan sɛ‑a to aan, a sɛ kaina, min dɔ yansan kaina tɔɛ gbɛɛ ma. Chɛ ni a ma, Chasi ni a ma, fen kɔ fen dunya ɔ, a da ni fa.

¹¹ A wan‑na koadia demanɛ chɛ mɔɛ n na, ma koe dama dama. A‑a mɔɛ dɔ n ma a 'a sɔ mɔɛ n na, mbɛ a‑a dɔ n ma Yataa 'a gbonka chɛ mɔɛ n na. Dɔ n sin, a‑a an ma Yataa bai sa mɔɛ n na, mbɛ a‑a gbasaya be dɔ n sin ma, an bɔɛ n sɔ koe a chia ma, a basan an kan koe a Yataa bai a.

¹² A‑a chɛ n ma, min mbe a ma, mmɔ wɛn mu ka Yataa 'a mɔɛ n na, mmɔ ma ni bɛn an wai chɛ koe a. Chɛ ni a ma, mmɔ ɔ ni gbɛa gbau gbau, mmɔ wɛn mu Chasi gboo a.

¹³ Chɛ an mbe ma‑a, aan mmɔ gbɛɛ ni Yataa 'a denɛ wakoe ɔ gbɛ, mbɛ mmɔ‑a mmɔ kai fa a a, mmɔ ma‑a mɔ dɔndɔɛ a. Mbɛ mmɔ 'a mɔgbuya da fa‑a, a ni che Chasi wandi gbu ta ɔ, a da faenɛ ɛ gban.

¹⁴ Chɛ an mbe a ma‑a, mmɔ ee ma‑a yɔ den mɛsɛ nu, an mbe miin woo, fania fania kanɛ kan kɔ kan na. Mɔɛ chɛ nu, miin yaaen mu ka, an fan mbe an bun ka, yaa chia a.

¹⁵ Chɛɛ mmɔ ɛ min ma, mmɔ tea fɔ, koadia ta fɛ chia a. Mmɔ ni koa chia ɔ chia a, Chasi ta chia a, a wɛn mu mmɔ kun ti a.

¹⁶ Chasi an mbe na a 'a mɔɛ n gbɛɛ a kaina dɔndɔɛ. Ɛ wan dechee yɔ mɔ gbu gboo, ni a sɔna nu, an gbɛɛ‑a tun tunden mu buɛ min dɔ. Fasa mɛsɛ chɛ nu, miin mbe an dɔ, an tɛ ma tɛ ni, a sin an mbe wai chɛ kuiɛ dɔndɔya an dɔ. Ni an gbɛɛ ma‑a wai chɛ‑a chɛndɛ chɛ, mbɛ mɔ gbu gboo koa‑a, a ɔ gbɛa‑a gbechen. Mɔɛ n bɛɛ, miin mbe chɔchi ɔ, ni an to‑a an nyɔn na, an ni wai chɛ kuiɛ dɔndɔya ɔ, chɔchi ɛ koa wan Chasi 'a gbasaya ɔ.

Pɔɔ ɛ bai sa‑a, a si fɔɛ nama ma, Chisɔsi Chasi ɔ

¹⁷ Sanche gbɛ, n mbe chɛ an fɔ tena, n ni a kɔ din, Mansa Chisɔsi 'a gbasaya ɔ. Wo ma ma, yɔ mɔɛ chɛ nu, miin ma Yataa sɔn, an mbe koe n ma buɛ min dɔ. An mbe an yii na chii buɛ min dɔ, wooya wa an mbe a ɔ.

¹⁸ An mbe an yii na chii buɛ min dɔ, an mbe pimbi an dɔ, koe ɔ gbɛ koe a ɛnden bɛɛ a. Kuɔ fɔ fɔɛ ee an boo ɔ, Yataa ɛ min be. Chɛ sien mu an 'na ko sɔn baiya an ma. Koe min na mu, an faa a kɔɔen mu kaka.

¹⁹ An ma‑a gbɛ mɔɛ n na, ko ee miin faa gbaa, a sin, an‑na an kunɛ a fuin gbɛ ko yama ma koe a. An ma bɛndenɛ mu, tima ɔ tima ko a, ko yama ma koe a.

²⁰ Chɛɛ wo nii ma kan ni ko bonda chɛ n fan na, a si Chasi ma.

²¹ Wo wandi gbu‑a a ɔ sɔn fan, mbɛ an‑na bai sa wan wo tena, a si a ma. A sin, an‑na wo kan fan, wo ma koe a mɔ dɔndɔɛ a, wo bɛ Chasi chɛ a. Tea chɛ sin, sakana chɛndɛ chɛ, ɛ min fɔ, a sien mu a wan Chisɔsi an ma.

²² Wo kan‑da wan, mbɛ wo ni wo sɔn kɔma chɛ n boo ka. Wo sɔn chɛ nu, miin beaen mu, wo tachɛ buɛ kɔma chɛ n fɛ, fɔɛ ɔ. A tima chɛ a, wo wakoe ni yɔn tena wan gbata gbata. Koe min na mu, wo toen ni ko yama n fan ma koe a, a sin, an ko yama chɛ ni wo bun tena wan.

²³ Wo ma yɔ mɔ nama nu, yiinachii n dɔ, wo e miin chɛ.

²⁴ Wo sɔnɛ nama n ya, yɔ mɔɛ nu, miin nyanden mu Yataa bɔ nyɔɛ n na. A‑a wo nyan wo ni ma mɔ tandenɛ n na, miin mbe tenchen a ko a. Koe chɛ n mbe bɔ tea an dɔ.

²⁵ Chɛ an fɛ mu, wo wo boo bɔ fania fɔɛ ɔ. Wo gbɛɛ, wo tea fɔ wo nyɔn ye. Koe min na mu, mmɔ gbɛɛ, mmɔ mu gboo dɔndɔɛ an na, Chasi ɔ.

²⁶ Wo faa ni tɛ wɛɛ, wo ma ko yama ma. Wo faa gbu sin, a ma tɛ, a ka sauma ma, aan tee ni bea.

²⁷ Wo ma na chia yian Sitana a, wai chɛ koe a.

²⁸ Mɔɛ min mbe kanka chɛ, a ma a chɛ to. Chɛɛ ɛ min ma, a ni a gboo be wai chɛ koe a. A ni wai chɛ tea chia a, a boo fea a. Chɛ an mbe a ma‑a, a bɔɛ chɛ nu, fen mbe ee miin boo ɔ, a ni kun basan koe an ma.

²⁹ Ni wo ma‑a koɔ‑a, bai yama ma bɔ wo da ɔ. Chɛɛ bai miin nyin dechee a fɔ koe a, a tima chɛ kɔɔ, wo e an fan fɔ. Bai chɛ nu, miin mbe mɔɛ n faa ma nande, a yɛ to, miin mbe basan an ma.

³⁰ Wo sin ma a ma, Yataa Nyina faa ni yɔn. An mbe a ɔ yian, mbɛ Yataa an ta mu wo a, aan tee chɛ ko a, wo e bauncha ma sɔn‑da tee min ma.

³¹ Faa yama gbɛɛ, faagbandia gbɛɛ, faatɛ gbɛɛ, wo wo boo bɔ an gbɛɛ ɔ. A yɛ to, gbonyɛ wa gbɛɛ, nyɔn ma bɔ wa gbɛɛ, ni toomaya wa, wo an boo ka.

³² A sin to, wo faa ni nyan wo nyɔn ko a, wo ni ko chɛndɛ ma wo nyɔn na. A yɛ to, wo ni wo boo bɔ ko yama n dɔ, wo bɔɛ n mbe miin ma wo a, yɔ Yataa‑a a ma buɛ min dɔ, Chisɔsi Chasi ɔ, ɛ a boo bɔ wo 'a ko yama n dɔ.