Gboo Ɛfisɔsi Ko A 2 - Yataa 'a Dɔbɛnɛ Nama

Pɔɔ ɛ bai sa‑a, a si fɔɛ nama ma

¹ A saa a, wo faenɛ ni, Yataa Nyina ta fɛ chia a. Koe min na mu, wo ni koe n ma wan, miin mbe ee a chia ma, ko yama nu.

² An tima chɛ a, wo ni tachɛ tena wan, wo 'a fɔɛ ɔ, wo beaenɛ ɛ dunya chɛ ɔ mɔɛ n ta chia fɛ. Nyina yama n ya ɔ sɔɛ, dunya chɛ ɔ, gbasaya ɛ min boo ɔ ben‑da banda a, wo beaen ni an fɛ. An nyina chɛ, sanche chɛ ɔ, an mbe wai chɛ tena mɔɛ n na, miin mbe ee dɔn an too ma sɔ koe a Yataa ma.

³ Mmɔ wɛɛ, tima dɔndɔ a, mmɔ bɛ ni wan ben‑da mmɔ bɛ an mɔ bonda chɛ n na, mmɔ ɛ bea mmɔ faa ma koe n fɛ. Mmɔ ni mmɔ yii ma koe n fan na tachɛ, a basan mɔgbuya yama a. A chia chɛ a, tɛ bɔ nii mmɔ ma, mmɔ bɛ an na. Mmɔ ni mɔɛ n fan na, Yataa ni miin tɔɔ‑a.

^4-5 Chɛɛ chinchimaya koo, Yataa boo ɔ. An fɛ mu, mmɔ faen chɛ ni wɛɛ, mmɔ 'a ko yama n boo ɔ, a‑a fɔɛ nama be wan mmɔ ma, mmɔ bɛ Chasi a. A toen mu buɛ min dɔ mmɔ a, a koo. Chɛ an fɛ mu, a 'a koadia demanɛ dechee, an‑na mmɔ baun.

⁶ A sin, Yataa‑a mmɔ kɔɔ sɔ, a ka saya ɔ, mmɔ bɛ Chasi a. Mbɛ a‑a a ma to, mmɔ si‑a banda bu ɔ, mmɔ wɛn mu mɔ dɔndɔɛ a Chasi a.

⁷ Chɛ ni a ma, a ni a ɔ yian, mbɛ ɛ koadia demanɛ min chɛ‑a mmɔ a ya ɔ ma, a danka ee ma a. Chɛ sin mbe bɔ‑a chinchimaya an dɔ, Chisɔsi 'a gbasaya ɔ.

⁸ Koe min na mu, koadia demanɛ ɔ mu, wo‑a bauncha ma sɔn. A sin ma‑a koe min na mu, wo‑a wo kai fa wan Chasi a. Chɛ sin, wo wan ma a ma ni. Chɛɛ Yataa wandi, an‑na a ma wo ko a, gbama gbama a.

⁹ Wo chɛ chɛ wai nu, an fan ma a ma ni, chɛ ni ma, ɛnden bɛɛ a, mɔ ɔ mɔ ma na yonka tɛ, a si a ma.

¹⁰ Koe min na mu, Yataa boo gba mu mmɔ a. A‑a mmɔ a dan, koe min na mu, mɔ dɔndɔɛ mu mmɔ a, mmɔ bɛ Chisɔsi a, mmɔ chɛ chɛ wai chɛndɛ ko a. Mmɔ chɛ chɛ wai chɛ nu, Yataa‑a miin to mmɔ ya ɔ, mmɔ ni tachɛ an chia chɛ n na.

Pɔɔ ɛ a ɔ yian‑da, mbɛ Chasi‑a Chu mɔɛ n gbɛɛ ma mɔ dɔndɔɛ a, an bɛ chɛ n na, miin ma Chu mɔ n na

¹¹ Chɛ an‑na a fɔ, wo wan, wo wɛn ma ka Chu mɔɛ n na, wo wo yii na chii chɛ ma. Chu mɔɛ n ni wo chee, an dɔ, Yataa sɔn bai nu, koe min na mu, wo a nii ma kamincha ni, yɔ Chu mɔɛ nu. Chɛɛ da kamincha chɛ sin, a mu dechee manda an na, mɔ gbu ɛ min na tachɛ a boo a.

¹² Chɛ ni ma wo yii ma, mbɛ a tima chɛ a, wo tɛ duen fan ni wo bɛ Chisɔsi Chasi a. A yɛ to, wo kaen fan ni mɔɛ tɔɛ n kaa a, a bɔ kuiɛ dɔndɔya dɔbɛn chɛ ɔ Isɔɛɛ mɔɛ n tɛ. A sin, wo ma‑a sonda n na, dɔbɛn nama chɛ kɔɔ, Yataa‑a Isɔɛɛ mɔɛ n too ɔ dia min na. Yataa ee wo boo ɔ, dunya chɛ ɔ, wo sin yii na ma tɛ ni fen kɔ fen ma.

¹³ Wo tɛ ɔ ni yansan fan tee Yataa a. Chɛɛ sanche gbɛ, wo ma min chɛ‑a mmɔ dɔndɔɛ a Chasi a, a‑a wo ma sawan Yataa tena. Chɛ bɔ‑a a wii chɛ an dɔ, min bɔ‑a a fa tima a, mmɔ ko a.

¹⁴ Chasi wandi, an na‑a kuiɛ dɔndɔya a mmɔ tɛ ɔ. A‑a a ma, wo bɛ Chu mɔɛ n na, wo ma‑a gbɛ mɔ dɔndɔɛ a. A‑a a ma, kodomaya min ni mmɔ tɛ ɔ, yɔ simɛndi fɛnsi, a ban‑da. A 'a saya‑a a ma,

¹⁵ a‑a Chu sawa n ka wan an gba n dɔ, ni koe chɛ nu, sawa chɛ ni miin din mɔɛ n ma, an ma koe a. A toen ni, a ni Chu mɔɛ n na gbuu, an bɛ mɔɛ n na, miin ma Chu mɔ a, an ni ma mɔ nama dɔndɔɛ a, a wan Chasi ɔ. Chia chɛ a mu, a na‑a kuiɛ dɔndɔya a an tɛ ɔ.

¹⁶ A sin, a 'a saya kɔn gbengbanden chɛ ma, ɛ na‑a wan mmɔ chɛ‑a mmɔ nyɔn dɔ, mmɔ bɛ Yataa a, mmɔ ni ma kuiɛ dɔndɔya ɔ. Chɛ an mbe a ma‑a, kodomaya chɛ ni ban.

¹⁷ A sin, a na‑a wan, a‑a sakana bai chɛndɛ chɛ ɔ yian wo a, wo wɛn nii Yataa baima, a basan chɛ n na, miin gbɛndenɛ ni Yataa ma.

¹⁸ Chasi an‑na a ma, Chu mɔɛ nu, ni miin ma Chu mɔ a, mmɔ bɛ, mmɔ ɛ si mmɔ Fa Yataa chen kɔɔ. Mmɔ‑a chia chɛ ma sɔn Yataa Nyina 'a gbasaya an dɔ.

¹⁹ Chɛ an fɛ mu gbɛ, wo wan, wo wɛn ma ka Chu mɔ a, sonda ma to wo a, ben‑da dechee chia a, Yataa waa a. Chɛɛ wo e wan gbɛ yɔ mɔɛ nu, nn bɛ suun‑da miin na chɛnyɛ dɔndɔ gbe ɔ, Yataa 'a mɔɛ nu.

²⁰ Wo sin, wo kuu sien fan mu gban, yɔ chenɛ. Chisɔsi Chasi 'a sɔ mɔɛ nu, an bɛ Yataa 'a gbonka chɛ mɔɛ n na, an fan‑na a ma, mbɛ wo kuu si‑a. Chen chɛ gbu sin, a sɔ senɛ kuu ba mu Chisɔsi Chasi wandi an na.

²¹ Yataa 'a mɔɛ n gbɛɛ, an mbe wan yɔ chen dɔndɔ gbe, koe min na mu, mɔ dɔndɔɛ mu an na, an bɛ Chasi a. A sin, ɛ koa‑a wan, a ni ma tenchen Mansa Yataa 'a chenɛ a.

²² Wo wandi gbu wɛɛ, mɔ dɔndɔɛ mu wo a, wo bɛ Chasi a. Chɛ ko a, ɛ wo a tun tena wan, wo bɛ Yataa 'a mɔɛ tɔɛ n na, wo ni ma yɔ a 'a chenɛ, ɛ ma kaina min a Nyina 'a gbasaya ɔ.