Gboo Ɛfisɔsi Ko A 1 - Yataa 'a Dɔbɛnɛ Nama

¹ N fan Pɔɔ, n fan mbe gboo chɛ nyɛn tena. Chisɔsi Chasi 'a sɔ mɔɛ mu n na, yɔ Yataa toen ni buɛ min dɔ a ni ma. N fan mbe ka gboo chɛ nyɛn tena wo tena, wo wɛn mu Yataa 'a mɔɛ n na, wo wɛn mbe a a tun tena wo kai fa koe a Chisɔsi Chasi a, Ɛfisɔsi duu ɔ.

² Mmɔ Fa Yataa, an fea Mansa Chisɔsi Chasi a, an 'na dua ni ma wo ma, a basan an 'na faachima a.

Pɔɔ ɛ a ɔ yian‑da, Yataa‑a mmɔ dua buɛ min dɔ

³ Tando ni be Yataa ma. A wan mu Mansa Chisɔsi Chasi fa a, ni a 'a Yataa. A wan Yataa, a‑a mmɔ dua wan dua chɛ n gbɛɛ a, miin mbe banda bu ɔ. A‑a chɛ ma, koe min na mu, mmɔ ma‑a mɔ dɔndɔɛ a, mmɔ bɛ Chasi a.

⁴ A e na to dunya gbu a dan‑da wɛɛ, a na‑a ban fan gbɛ a boo sɔ‑a mmɔ ma, mmɔ ma koe a a ta mɔɛ n na, mmɔ wɛn mu mɔ dɔndɔɛ a Chisɔsi Chasi a. A na‑a chɛ ma, min mbe a ma, mmɔ ni ma a ko a tenchen, mɔɛ nu, mabɔ kan kɔ kan mbe ee miin ma. Koadia ɔ,

⁵ a ban‑da wan gbɛ a ɔ bɛn‑da suun, mmɔ ma koe a a 'a denɛ n na, Chisɔsi Chasi 'a gbasaya ɔ. Yataa toen ni an ni ma, a‑a a sin dɔ bɛn ka wan.

⁶ Mmɔ Yataa tando kamaya chia chɛ ko a, a‑a a 'a koadia demanɛ ɔ yian mmɔ a min na, a faa gbɛɛ a. A‑a chɛ sin ma, a faa ma denɛ an dɔ.

⁷ Mmɔ mu mɔ dɔndɔɛ a, mmɔ bɛ Chasi chɛ an na. A na‑a mmɔ kun ka wan, a wii chɛ a min bɔ‑a, a fa tima a. Yataa‑a a boo bɔ wan mmɔ 'a ko yama n dɔ. Yataa 'a koadia demanɛ da a ko gba.

⁸ A sin mbe an koadia chɛ, a ɔ yian fan mmɔ a, a ɔ bendenɛ a. Koe min na mu, a 'a yiinachii ɔ yansama ɔ, a 'a ko sɔn ba ɔ,

⁹ a‑a a faa ma koe ɔ yian fan mmɔ a, min dɔ nunden ni tee mmɔ ma. A toen ni chɛ an ni ma, a sin, a‑a Chasi a na, an ma koe a.

¹⁰ Dɔbɛnɛ an nii nɛ, Yataa ɛ min na ban‑da, ni a tima che‑a. A sin, fen kɔ fen, banda bu ɔ, ni duu gboo ma, na koe mu kaina dɔndɔɛ, mbɛ Chasi ma‑a an kun ma.

¹¹ Nn ma min chɛ‑a mɔ dɔndɔɛ a, nn bɛ Chasi a, an fɛ mu Yataa‑a a boo sɔ nn ma gbɔɔ, min mbe a ma, nn ni ma tenchen a ko a. Koe min na mu, a toen ni chɛ an ni ma, a sin‑na chɛ an dɔ bɛn. A sin, kan kɔ kan, ɛ a ma wan, yɔ a‑a a ɔ bɛn buɛ min dɔ.

¹² Nn fan, nn fɛn ma‑a mɔɛ saa n na, nn kai fa koe a Chasi a, Yataa ban‑da gbɛ a boo sɔ‑a nn ma, tando be koe a a ma, basɔmaya wa ɛ a wɛn boo ɔ.

¹³ A sin, a ma‑a ka wan wo wɛɛ a. Wo wan, wo wɛn‑na sakana bai chɛ a min, tea mu min na, min mbe wo baun. Wo sin‑na wo kai fa wan Chisɔsi Chasi a, mbɛ a‑a Yataa Nyina a na, wo too ɔ dia‑a min na, wo kun ma fɛn koe a.

¹⁴ Yataa Nyina ɛ wan mmɔ fɛ. Chɛ ko a, mmɔ yii na tɛenɛ ni ma gbɛ, mbɛ ɛ fen chɛ n be‑a wan mmɔ ma, a‑a mmɔ too ɔ dia miin na. Mmɔ wɛn sin mu ka a ta mɔɛ n na, mmɔ ɛ fen chɛ n ma sɔn‑da wan, tima min‑na, ɛ mmɔ kun ka‑a gbae. Chɛ ɛ a ma‑a wan, Yataa ni tando ma sɔn, basɔmaya wa ɛ a wɛn ma.

Pɔɔ ɛ samunɛ chɛ‑a, Ɛfisɔsi mɔɛ n ko a

^15-16 Chɛ ko a, n ma sɛmbɛ ni, Yataa wai bɔ koe a wo ko a. Koe min na mu, n‑na a a min wo kai faen mu buɛ min dɔ Mansa Chisɔsi a. A yɛ to, wo toen mu buɛ min dɔ Yataa 'a mɔɛ n gbɛɛ a. N mbe n yii na chii wan wo a, tima ɔ tima, ni n ma‑a samunɛ chɛ‑a.

¹⁷ N dɔ, mmɔ 'a mansa Chisɔsi Chasi 'a Yataa a, mmɔ fa min kamayaen mu, a ni a Nyina a yii ma koe a wo fɛ. An Nyina chɛ ni a ma, wo ni yiimatɛ wa ma sɔn, koe n dɔ gbɛ koe a chɛndɛ chɛ. A yɛ to, koe miin dɔ nundenɛ ɛ, a si a ma, wo ni an dɔ gbɛ.

¹⁸ N mbe samunɛ chɛ tena to, Yataa ni a ma, wo ni a 'a manɛ yen, a ɔ sɔn koe a, fen chɛndɛ miin mbe a boo ɔ wo ko a. Wo wan, a‑a wo wɛn chee, ma koe a a ta mɔɛ n na. N mbe samunɛ chɛ tena to, wo ni a ɔ sɔn to, mbɛ wo too ɔ diaen mu dua miin na, an koo kaka.

¹⁹ N mbe samunɛ chɛ tena to, wo ni a ɔ sɔn, mmɔ wɛn kai faen mu Chisɔsi a, mbɛ Yataa 'a gbasaya mmɔ ɔ, a danka ee ɛnden bɛɛ a. An gbasaya wa dɔndɔ gbe chɛ,

²⁰ a‑a a kun tɛ Chasi an dɔ, kɛn a‑a a kɔɔ sɔ, a ka saya ɔ. Mbɛ a‑a a ma, a‑a a si kaina ma bɛndenɛ banda bu ɔ, a boo nyima ɔ.

²¹ Chasi chɛ, a 'a mansaya, a 'a gbasaya, a danka ee. A benden mu fen kɔ fen ma, dunya chɛ ɔ, a basan dunya a, min bɛɛ ɛ na tena. A benden mu nyina yama n 'na mansa n gbɛɛ ma.

²² Yataa sin gbu, a‑a Chasi chɛ si fen kɔ fen kun ma, chɔchi ko a. A‑a fen kɔ fen don Chasi kɔɔ.

²³ Chɔchi gbu sin, an mu Chasi gboo a. An mbe a ma, a da ni fa gban, yɔ a wandi wɛɛ, ɛ a ma buɛ min dɔ, fen kɔ fen da ɛ fa.