DUKU 23 - Yataa 'a Dɔbɛnɛ Nama

An ta‑a Chisɔsi a, Kɔfana Padeti chen kɔɔ

¹ A tima chɛ a ni gbɛ, mbɛ chiti tɛ mɔɛ chɛ n gbɛɛ‑a an kɔɔ sɔ, mbɛ an ta‑a Chisɔsi a kɔfana chen kɔɔ, min tɔ ni Padeti.

² Nɔ ni, an‑na a kuu sɔ kunɛ si‑a a kun ma, an dɔ, “Kamin chɛ an mbe ben‑da nn 'na mɔɛ n sɔ‑a chia yama n ma, ɛ ta‑a a fɔ‑a an ye, a ɔ, an ma chɛnyɛ pawa chɛ Domi kun ti wa tena. Mbɛ a yɛ‑a, a‑a a wandi chee Chasi a, min mu mansa a.”

³ Mbɛ Kɔfana Padeti ɔ, “I wan mu Chu mɔɛ n 'na mansa a?” Mbɛ Chisɔsi ɔ, “I‑a an fɔ ka.”

⁴ Mbɛ Kɔfana Padeti‑a a fɔ wan Chu n tɛ mɔɛ nu Yataa a, an 'na mansa n ye, a basan mɔ fanka chɛ a, a ɔ, “N ma ko yama kan kɔ kan yen ni, kamin chɛ‑a min ma.”

⁵ Chɛɛ tima chɛ gbu a ni, an‑na a kɔ din gbasaya wandi gbu a, an dɔ, “Ɛ kanɛ min chɛ tena, ɛ a ma tena wan gbun ba ni gbasi Chudia chɛnyɛ chɛ gbɛɛ ɔ. A‑a a kuu sɔ Kadidi chɛnyɛ ɔ wan, mbɛ sanche gbɛ a che‑a nɛ a 'a kan chɛ‑a.”

Kɔfana Padeti‑a Chisɔsi a ta Mansa Ɛdɔdi tena

⁶ Kɔfana Padeti‑a bai chɛ an na min, mbɛ a‑a mɔɛ chɛ n dɔ tisa, a ɔ, “O, kamin chɛ mu Kadidi mɔɛ an na?”

⁷ Mbɛ a‑a a ɔ gbɛ kɛn, mbɛ Chisɔsi ka‑a Mansa Ɛdɔdi 'a chɛnyɛ ɔ wan, a sin, a wan Mansa Ɛdɔdi ni wan Chuusaɛn duu ɔ a tima chɛ a, a‑a Chisɔsi a ta wan a tena.

⁸ Mansa Ɛdɔdi‑a Chisɔsi yen kɛn, a bu ɔ dia‑a wan kaka. Koe min na mu, tima ɔ yansama ko a, a yen sɔɛ ni wan a a. A na‑a a ma tɔɛ a min fan, a sin ni gbɛ a 'a yiinachii ɔ, mbɛ a ni Chisɔsi yen kamaya koe n ma‑a.

⁹ Chɛ an‑na a ma, Mansa Ɛdɔdi‑a Chisɔsi ɔ tisa tisa sɛsɛ a, chɛɛ Chisɔsi ma bai dɔndɔ wɛɛ fɔ ni a ye.

¹⁰ Chɛ gbakɔ, mɔɛ miin ni Chu n tɛ ɔ Yataa a, an 'na mansa chɛ nu, an bɛ Chu n 'na sawa kan mɔɛ chɛ n na, an bun‑da kun sɛsɛ si‑a to Chisɔsi kun ma.

¹¹ Mbɛ a tima chɛ a, Mansa Ɛdɔdi an bɛ a 'a soya n na, an‑na Chisɔsi ma yɛn fan, mbɛ an‑na mauma mauma koe sɛsɛ sɛ a ma. An‑na doma kai nyima nyima don fan a ma, mbɛ a‑a a a yɛ Kɔfana Padeti tena.

¹² A ka a tee chɛ ma, Mansa Ɛdɔdi n dia‑a wan, an fea Kɔfana Padeti a. Chɛɛ ma nyɔnɛ ni an na a kɔma a.

Kɔfana Padeti‑a kaa a tɛ, Chisɔsi fa koe ma

¹³ An yɛ‑a kɛn to Chisɔsi a, Kɔfana Padeti chen kɔɔ, mbɛ Kɔfana Padeti‑a Chu n tɛ mɔɛ Yataa a, an 'na mansa nu, a‑a an chee kaina dɔndɔɛ, an bɛ kun ti n na, a basan mɔɛ tɔɛ n gbɛɛ a.

¹⁴ Mbɛ a ɔ, “Wo na‑a kamin chɛ a n chen kɔɔ, wo ɔ, ɛ mɔɛ n sɔ‑a chia yama ma. A yen ko gbɛ, n‑na a wakoe kɔɔ gbɛngbɛn wo gbɛɛ ya kɔɔ, chɛɛ n ma ko ɔ ko yen ni, a‑a min ma, min mu ko yama a, yɔ wo‑a a fɔ buɛ min dɔ.

¹⁵ Mansa Ɛdɔdi wɛɛ‑a a ɔ yen fan, mbɛ kamin chɛ ma ko ɔ ko ma ni, min mu ko yama a. Chɛ an fɛ mu, a‑a a a yɛ mmɔ chen kɔɔ. Wo wandi gbu‑a a ɔ yen gbɛ, mbɛ kamin chɛ ma ko yama kan kɔ kan ma ni, min mbe a ma, a ni saya ma sɔn.

^16-17 Chɛ an‑na a fɔ, n mbe a ma‑a wan an ni a pɛndɛn pien, mbɛ n‑na a boo ka, a ni ta.”

¹⁸ Chɛɛ an gbɛɛ‑a a fɔ wan dɔndɔ a, an kuiɛ ma sɛenɛ a, an dɔ, “Kamin chɛ fa, mbɛ i‑a i boo ka Baabasi a nn ye.”

¹⁹ Baabasi chɛ ni mɔɛ an na, an na‑a min sa pimbi chenɛ a, butuin chɛ koe a Domi mansa n na Chuusaɛn duu ɔ. A yɛ to, a na‑a mɔɛ fa wan.

²⁰ Kɔfana Padeti toen ni a ni a boo ka Chisɔsi an na. Chɛ an‑na a fɔ, a‑a mɔ fanka chɛ ɔ tisa to, min mbe a ma, a ni a boo ka Chisɔsi a.

²¹ Chɛɛ an‑na yee tɛ wan to, an dɔ, “A ni gbangban kɔnɛ ma, a ni fa. A ni gbangban kɔnɛ ma, a ni fa.”

²² Mbɛ Kɔfana Padeti‑a a fɔ to an ye a si tena sawan bɔɛ ɔ, a ɔ, “Fen ko a chɛ ɛ ma? Kamin chɛ gbu, a‑a fen ko yama ma? N ma ko ɔ ko yen ni, a‑a min ma, ɛ saya ma sɔn min ko a. N mbe a ma‑a wan, an ni a pɛndɛn pien, mbɛ n‑na a boo ka, a ni ta.”

²³ Chɛɛ a tima gbu a ni, an‑na yee tɛ a sɛmbɛndenɛ a, mbɛ a ni a ma, an ni Chisɔsi gbangban kɔn gbengbandenɛ ma. Mbɛ a danka a, an kun‑da Kɔfana Padeti yiima mun koe ma. Mbɛ an‑na yee tɛ koe min ko a, an to‑a a ma.

²⁴ Mbɛ Kɔfana Padeti dɔn‑da an ni Chisɔsi gbangban kɔn gbengbandenɛ ma, a ni fa nɔ, yɔ an‑na a fɔ buɛ min dɔ.

²⁵ Mbɛ a‑a a boo ka kamin chɛ a, an toen ni min na, kaminɛ min ni pimbi chenɛ a butuin chɛ koe a Domi mansa n na, a basan mɔ fa koe a. Mbɛ a‑a Chisɔsi be a fa mɔɛ n ma, min ni an faa ma koe a.

An‑na Chisɔsi gbangban kɔn gbengbandenɛ ma

²⁶ Mbɛ soya n‑na Chisɔsi bia, mbɛ an ta‑a a a. An to‑a ta tena wan a a, mbɛ an bɛn‑da kamin dɔndɔ a, min tɔ ni Saimɔn. A ni ka tena Sayini duu ɔ wan, ɛ na‑a Chuusaɛn. Soya chɛ n‑na a din fan kamin chɛ ma, a ni ta kɔn gbengbanden chɛ a Chisɔsi gbaa chia a.

²⁷ Mɔ fanka wa‑a a sɔ wan Chisɔsi fɛ. An tɛ ɔ, musu dɔ n ni wan nɔ, miin ni di chɛ‑a a ko a.

²⁸ Chɛɛ Chisɔsi‑a a ya a yɛ wan an ma, mbɛ a ɔ, “Wo wan Chuusaɛn duu ɔ musu nu, wo ma di chɛ n fan ko a, chɛɛ wo di chɛ wo wandi ko a, a basan wo 'a denɛ n na.

²⁹ Koe min na mu, a yen ko, tima ɛ che‑a wan, mɔɛ n ni a fɔ, an dɔ, musu miin gbandayaen mu, an dɔ, miin ma susu be ni den ma, an duaen mu.

³⁰ A tima chɛ a, mɔɛ n mbe a fɔ‑a wan kɔnkɔɛ n ye, an dɔ, an ni bɔn an ma, an dɔ, an ni an na tunɛ.

³¹ A mu min na, ni an mbe kun fan an ni n tɔɔya buɛ chɛ ɔ, n fɛn ma ko yama kan kɔ kan ma ni, wo sin gbɛ, wo wɛn yau ka, an mbe ma‑a ka ma wo a?”

³² A tima chɛ a, soya chɛ n ni wan to ta tena kamin fea dɔ mende a, miin ni mɔ yama n na. An sɔen ni, an ni an bɛɛ fa, an bɛ Chisɔsi a.

³³ An che‑a kɛn kaina chɛ, an ni min chee, an dɔ, Kun Konkon Ma, an‑na Chisɔsi gbangban fan nɔ kɔn gbengbandenɛ ma. An na‑a mɔ yama fea chɛ n bɛɛ gbangban fan to nɔ kɔn gbengbanden fea n ma. An na‑a mɔ yama dɔndɔɛ gbangban fan Chisɔsi boo nyima ɔ, mbɛ an‑na dɔndɔɛ wɛɛ gbangban a man dɔɛ.

³⁴ Mbɛ Chisɔsi ɔ, “Fa Yataa, i boo bɔ mɔɛ chɛ n 'na ko yama n dɔ. A mu min na, an ma a ɔ sɔn, an mbe ka koe min nyɔn sima ma tena.” Chisɔsi gbangbandenɛ gbakɔ, soya chɛ n‑na chɛ fenɛ chɛ wan a 'a koa n ko a, min mbe a ma, an ni a ɔ sɔn, ni mɔ dɔndɔɛ ɛ min ma sɔn.

³⁵ Mɔɛ n ni wan nɔ sɔ ɔ, an mbe koe n dɔ gbɛ‑a miin ni ma tena. Chɛɛ Chu n kun ti n‑na ma yɛn ma koe n sɛ wan Chisɔsi ma. Mbɛ an dɔ, “A‑a mɔ dɔ mende n baun, a ni a wandi baun gbɛ, ni an mu kunka mansa a, Yataa‑a a boo sɔ min ma.”

³⁶ Soya chɛ n bɛɛ‑a a ma yɛn fan. An na‑a wan a tena, mbɛ an‑na gbɛ be a ma,

³⁷ mbɛ an dɔ, “I wandi baun bɛ, ni i wan mu Chu mɔɛ n 'na mansa a.”

³⁸ Kɔn dɛnfɛ ni wan bun dɔ a 'a kɔn gbengbanden chɛ kun ma. A nyɛnden fan ni an kɔn chɛ ma, an dɔ, Chu mɔɛ n 'na mansa an nɛ.

³⁹ Ko yama ma mɔɛ dɔndɔɛ chɛ, min ni ka nɔ dɛn dɔ, an bɛ Chisɔsi n na, a kai‑a wan Chisɔsi a manyinɛ a, a ɔ, “Kunka mansa chɛ mu i wan na, ae? Ni a mu i wan na, mbɛ i wandi baun bɛ, a basan nn bɛɛ a.”

⁴⁰ Chɛɛ a bɔɛ dɔndɔɛ chɛ sin‑na a a gban fan, mbɛ a ɔ, “An‑na ko yawaen dɔndɔ gbe an sa ka mmɔ ma mmɔ bɛ. E ee chian Yataa ma chɛ gbu dechee wɛɛ ko a?

⁴¹ A sin, an teayaen fan mu, an ni ko yawaenɛ sa mɔ ma, koe min na mu, mɔ tana, mɔ ɛ ka nɛ mɔ sɔn yama an ko a. Chɛɛ a tana, a ma ko yama kan kɔ kan ma ni.”

⁴² Mbɛ a ɔ, “Kai Chisɔsi, i yii na chii n na, ni i na‑a tima min na gbasaya ɔ, i 'a mansa wai chɛ koe a.”

⁴³ Mbɛ Chisɔsi ɔ, “N ni a ma din i tena, mbɛ bi tee chɛ a, mɔ fea ɛ ma‑a wan banda bu ɔ.”

An‑na Chisɔsi fa

⁴⁴ Tee kun tɛ a tee chɛ ma, pimbi bun‑da wan chɛnyɛ gbɛɛ ɔ awa sawa ko a.

⁴⁵ Koe min na mu, tee sɛmbɛ‑a wan man koe a. Mbɛ tɛndi min bɛɛ ni ka dɛn dɔ Yataa 'a chenɛ bu ɔ, a tɛ ka‑a fea a.

⁴⁶ Mbɛ Chisɔsi‑a yee tɛ gbankon, a ɔ, “Fa, n‑na n nyina be i ma.” A‑a chɛ fɔ kɛn dechee, mbɛ a fa‑a.

⁴⁷ Domi soya gbakoo chɛ, min ni ka Chisɔsi ma fɛn‑da, a‑a a ɔ yen min ma‑a. Mbɛ a‑a tando be Yataa ma, a ɔ, “Tea gbu ko a, mɔ tandenɛ ni kamin chɛ a.”

⁴⁸ Mɔ sɛsɛ wa chɛ nu, miin na‑a a ɔ yen koe a, an mbe Chisɔsi fa tena buɛ min dɔ, an na‑a ɔ yen fan, koe min ben‑da. Mbɛ an gbɛɛ yɛ‑a wan an baa nu, faayɔn ba ɔ.

⁴⁹ Chɛɛ koe chɛ n gbɛɛ ni ben tena tima min na, Chisɔsi dia nyɔɛ chɛ n bɛɛ ni wan nɔ sɔ ɔ pɔɔ, an mbe an dɔ yen‑da. Musu miin bɛɛ na‑a a ma sɔ ka, a ka Kadidi chɛnyɛ ɔ, an ni wan an tɛ ɔ.

An‑na Chisɔsi sa a kamba ɔ

^50-51 Yatina, a tima chɛ a, kamin dɔndɔ ni wan nɔ min tɔ ni Chosɛfi. A na‑a ka Ayimatia duu ɔ wan, min ni Chudia chɛnyɛ ɔ. A sɔnɛ ni nyin, a yɛ to, mɔ tandenɛ ni a a. A sin, a ya ni tima chɛ an ya ɔ, tima min na Yataa ɛ a 'a mansaya ɔ yian‑da dunya chɛ ɔ. Chu gbakoo dɔndɔ ni a a, miin ni chiti tɛ koe n ma. Chɛɛ a nii ma toa si ni a bɔɛ chɛ n 'na yiinachii kɔɔ, koe chɛ n gbɛɛ ma koe a Chisɔsi a.

⁵² A ta‑a wan Kɔfana Padeti tena, mbɛ a‑a a ɔ tisa, a ɔ, a ni Chisɔsi su be a ma a tɔn koe a.

⁵³ Mbɛ Kɔfana Padeti dɔn‑da a ye. Mbɛ Chosɛfi‑a a ma, an‑na Chisɔsi su a yii kɔn gbengbanden chɛ ma, mbɛ a‑a a ma bɛn fen gbɛ ɔ. Mbɛ a‑a a tɔn kamba ɔ, min sinden ni senɛ ɔ, an nii ma mɔ ɔ mɔ tɔn nin bɛ min dɔ.

⁵⁴ An tee chɛ ma ni, Chu n ni an ma bɛn an 'na suin tee chɛ ko a. A sin dɔ nii ma yansan to, a ni a kuu sɔ.

⁵⁵ Musu miin na‑a a sɔ ka Chisɔsi fɛ a ka Kadidi chɛnyɛ ɔ, an ta‑a wan an bɛ Chosɛfi n na. Mbɛ an‑na kamba chɛ yen, mbɛ an‑na a ɔ sɔn Chisɔsi tɔndenɛ ni buɛ min dɔ.

⁵⁶ Mbɛ an yɛ‑a duu ɔ, mbɛ an‑na tu kunyɛ a diama ɔ bɛn, a fasi fasi koe a Chisɔsi su ma. Chɛɛ suin tee‑a a kuu sɔ, mbɛ an‑na an suin, yɔ an 'na sawa‑a min fɔ.