DUKU 22 - Yataa 'a Dɔbɛnɛ Nama

An‑na a ɔ bɛn Chudasi a, Chisɔsi ma tachɛ koe a

¹ Mbɛ tima ni gbɛ che an na bɛn chɛ ko a, min tɔ ni biidi dɛnfɛ daun bɛnɛ. An ni an bɛn chɛ chee wan to, an dɔ kun bɔ a ɔ bɛnɛ.

² A tima chɛ a, mɔɛ miin ni Chu n tɛ ɔ Yataa a, an 'na mansa nu, an bɛ Chu n 'na sawa kan mɔɛ n na, an toen ni an ni Chisɔsi fa nun dɔ. Koe min na mu, an chianden fan ni mɔɛ n ma na gbunɛ a bea.

³ Mbɛ Chisɔsi fɛ den tan kun ma fea chɛ n tɛ ɔ, dɔndɔ ni wan nɔ, min tɔ ni Chudasi. A tɔɛ ma sien fan ni to, an dɔ, Isikayɔti. Sitana bea‑a wan an Chudasi chɛ fɛ.

⁴ Mbɛ a ta‑a wan mɔɛ chɛ n tena, miin mbe Chu n tɛ ɔ Yataa a, an 'na mansa chɛ nu, a basan poesi n ya ɔ sɔɛ n na, Yataa 'a kata kun ma. Mbɛ a‑a a kun puin an na, a si Chisɔsi ma tachɛ koe ma.

⁵ An bu ɔ dia‑a wan kaka, mbɛ an dɔn‑da an ni kɔpɔɛ ɛnden be a ma.

⁶ Mbɛ a dɔn‑da dɔbɛn chɛ ma. Mbɛ a bun‑da a ya a kan‑da, ɛ chia chɛndɛ chɛndɛ ma sɔn buɛ min dɔ Chisɔsi ma tachɛ koe a, mɔɛ tɔɛ chɛ n mbe ee kun, an ni min dɔ sɔn.

Chisɔsi‑a a ma bɛn, kun bɔ a ɔ bɛnɛ ko a

⁷ Mbɛ biidi dɛnfɛ daun tee chɛ che‑a. A tee chɛ a ni, an ni sa tɔngbɔɛ n fa, kun bɔ a ɔ bɛn chɛ ko a.

⁸ Mbɛ Chisɔsi‑a Pita sɔ, an fea Chɔn na, a ɔ, “Wo ta, wo ni daun fenɛ ɔ bɛn, mmɔ ɛ min daun‑da, kun bɔ a ɔ bɛn chɛ ko a.”

⁹ Mbɛ an dɔ, “I toen mu nn ni kaina minan dɔ bɛn daun fen chɛ daun koe a?”

¹⁰ Mbɛ a ɔ an ma, “A yen ko, ni wo ma‑a wo kunɛ a don‑da duu ɔ, kaminɛ ɛ wo tan‑da wan, ɛ ta‑a yii a da ɔ. Wo bea a fɛ, wo ni don chen chɛ a, ɛ don‑da min na.

¹¹ Mbɛ wo‑a a fɔ chen ti chɛ ye, wo ɔ, n toen mu n ni a ɔ sɔn, ni dumu gbu ɛ mende, n mbe kun bɔ a ɔ daun fen chɛ daun kaina, mmɔ bɛ wo gbɛɛ a.

¹² Ɛ dumu ɔ bɛnden ba yian‑da wan wo a, banda chenɛ banda a. Wo ko ɔ ko ɔ bɛn nɔ.”

¹³ Mbɛ an ta‑a. Mbɛ Chisɔsi na‑a bai miin gbɛɛ fɔ an ye, a bɔ‑a wan a a. Mbɛ an‑na daun fen chɛ gbu ɔ bɛn, kun bɔ a ɔ bɛn chɛ ko a.

Chisɔsi‑a daun fenɛ dankama daun, an bɛ a fɛ denɛ n na

¹⁴ Mbɛ kun bɔ a ɔ daun chɛ tima chɛ che‑a kɛn, Chisɔsi si‑a wan daun chɛ tena, an bɛ a 'a sɔ mɔɛ n na.

¹⁵ Mbɛ a‑a a fɔ an ye, a ɔ, “Kun bɔ a ɔ daun fen chɛ daun koe a di wan n ye kaka mmɔ bɛ, n mbe na to mɔnɛ ɔ bia‑a.

¹⁶ Koe min na mu, n ni a ma din wo tena, mbɛ n mbe ee daun fen chɛ sima daun‑da to. Ni n‑na a daun to, fɔ dechee tima min na Yataa‑a a 'a mansaya ɔ yian, mbɛ a‑a a 'a mɔɛ n kun ka fion.”

¹⁷ Mbɛ Chisɔsi‑a kɔpu ya, gbɛ ni min dɔ. Mbɛ a‑a Yataa wai bɔ, mbɛ a‑a a fɔ, a ɔ, “Wo kɔpu chɛ bia, mbɛ wo‑a chɛ sima kai kai a a wo nyɔn ma.

¹⁸ Koe min na mu, n ni a ma din wo tena, mbɛ n mbe ee gbɛ chɛ min‑da to, aan Yataa ni a 'a mansaya ɔ yian.”

¹⁹ Mbɛ a‑a biidi chɛ dɔndɔ ya. Mbɛ a‑a Yataa wai bɔ, mbɛ a‑a a ɔ kai kai, mbɛ a‑a a du du an ma, a ɔ, “N gboo an nɛ, n mbe min be tena wo ko a. Wo chɛ ma tima ɔ tima, wo yii na chii koe a n na.”

²⁰ An ban‑da kɛn kun bɔ a ɔ daunɛ chɛ‑a, a‑a an ko dɔndɔ gbe chɛ an ma kɔpu wɛɛ a. A‑a a ya wan, mbɛ a ɔ, “N wii an nɛ, n mbe min na bɔn tena wo ko a. Yataa ɛ an ya tena, mbɛ a‑a dɔbɛn nama chɛ a 'a mɔɛ n na.

²¹ “Chɛɛ wo a yen bɛ, mɔɛ min mbe na tena n ma tachɛ‑a, ɛ nɛ si ɔ daun chɛ‑a mmɔ bɛ an na.

²² N fan, Mɔ Gbu 'a Denɛ, n mbe na tena wan fa‑a, yɔ Yataa‑a a ɔ bɛn buɛ min dɔ. Chɛɛ koe chɛ miin mbe mɔɛ chɛ tan‑da, a yau gba a ko a, mɔɛ min mbe n ma tachɛ‑a.”

²³ Mbɛ a fɛ denɛ n bun‑da an nyɔn dɔ tisa‑a, ni nyɔn mbe na tena ko bonda chɛ sima ma‑a an tɛ ɔ.

Chisɔsi‑a bai sa, a si yaɔsɔya ma

²⁴ Mbɛ an bun‑da an nyɔn kɔɔsa bia‑a, a si mɔɛ ma, min mu mɔ chenama a an tɛ ɔ.

²⁵ Mbɛ Chisɔsi‑a a fɔ an ye, a ɔ, “Mansa nu, mɔɛ chɛ n ko a, miin ma Chu mɔ n na, an mbe an 'na gbasaya yian fan an na. Chɛɛ an mansa chɛ dɔ n sin mbe an fandi chee wan mɔɛ n dia nyɔɛ n na.

²⁶ Chɛɛ wo tana, wo ma ma ka yɔ mɔɛ chɛ nu. Mɔɛ min toen mu a ni ma mɔ chenama a wo tɛ ɔ, a ni ma yɔ den mɛsɛ, mbɛ wo ya ɔ sɔɛ wɛɛ ni ma yɔ bɔi denɛ.

²⁷ Koe min na mu, mɔ fea n yen ko. Dɔndɔɛ ɛ si ɔ, dɔndɔɛ sin mbe na‑a daun fenɛ a a tena, ɛ a be a ma. Nyɔn mu mɔ chenama a an fea chɛ tɛ ɔ? Mɔɛ min mbe ka si ɔ, a bɔɛ ɛ daun fenɛ be‑a a ma, an mu mɔ chenama a. Chɛɛ n mbe wo tɛ sanche wo ma wai n fan chɛ koe a.

²⁸ “Wo to‑a wan n fɛ tima ɔ yansama ko a, n 'na ko yawaenɛ n gbɛɛ ɔ.

²⁹ A sin, Fa‑a gbasaya be buɛ min dɔ n ma ma koe a mansa a, n bɛɛ n mbe an gbasaya chɛ be‑a wo wɛɛ ma.

³⁰ Chɛ‑a a ma wan, tima min na Yataa ɛ n 'na mansaya ɔ yian‑da, mmɔ bɛ ɛ daunɛ chɛ‑a wan to, mmɔ ni mmɔ min, daun chɛ bɛn ba chɛ ɔ. A tima chɛ a, wo wɛɛ wo e ma‑a wan mansa n na, mmɔ 'a Isɔɛɛ dambi tan kun ma fea chɛ n kun ma.”

Chisɔsi ɔ te, Pita ɛ a wakoe kɔɔsa bia chɛ‑a wan

³¹ Mbɛ Chisɔsi‑a a fɔ Pita ye, a ɔ, “Saimɔn, a yen ko, Yataa dɔn‑da Sitana ye, a ni wo gbɛɛ ɔ siman, yɔ sɛnɛ sa mɔɛ ɛ chin fenɛ ɔ fɛ buɛ min dɔ.

³² Saimɔn, chɛɛ n‑na samunɛ chɛ i ko a, i chenɛ ni sɔ gban i 'a danaya ɔ n na. A sin, ni i‑a i ya a yɛ to n ma, a ma i bɔɛ n bɛɛ, an chenɛ ni sɔ gban an 'na danaya ɔ n na.”

³³ Mbɛ Pita ɔ, “Fa, chɛɛ n ma bɛnden fan mu, an ni mɔ fea sa pimbi chenɛ a dɔndɔ a, mbɛ an‑na mɔ fea fa kaina dɔndɔɛ.”

³⁴ Chɛɛ Chisɔsi ɔ, “Pita, n ni a ma din i tena, mbɛ tɛ kɔnɛ e na konchee sayi chɛ ma, e kɔɔsa bia chɛ‑a wan gba sawa, a si n sɔn koe ma i boo ɔ.”

Chisɔsi ɔ te, an ni an ma bɛn

³⁵ Mbɛ Chisɔsi‑a a fɔ an ye, a ɔ, “Wo wo yii na chii tima chɛ a, tima min na n na‑a wo sɔ Yataa 'a bai ɔ yian koe a mɔɛ n na. Wo nii ma ta ni kɔpɔ a wo boo ɔ, wo ma ta ni bɔɔ a, a basan kɔɔwa fean bɔɛ wɛɛ a. Fen kɔ fen ma gbɔsɔɛ‑a wo bia wan a tima chɛ a?” Mbɛ an dɔ, “Fen kɔ fen ma gbɔsɔɛ ma nn bia ni.”

³⁶ Mbɛ Chisɔsi ɔ, “Chɛɛ sanche gbɛ, ni kɔpɔɛ ɛ mɔɛ min boo ɔ, a ni a ya, a basan a 'a chia a tachɛ bɔɔɛ a. A sin, ni chɛɛ chɛ mɛ ee mɔɛ min boo ɔ, a ni a 'a doma kai ma tachɛ, a ni dɔndɔ san.

³⁷ Wo e chɛ ma‑a koe n na, Yataa 'a gboo‑a a fɔ wan, a ɔ, mɔɛ n mbe n bia‑a wan, yɔ an mbe sawa yɔn mɔ wa chɛ n bia buɛ min dɔ. N ni a ma din wo tena, mbɛ chɛ sin fan mbe ma‑a. Koe min na mu, ko ɔ ko min nyɛnden mu, a si n ma, ɛ bɔ‑a wan a a.”

³⁸ Mbɛ an dɔ, “Fa, i ya a na, chɛɛ chɛ mɛ fea n yen ko nɛ.” Mbɛ a ɔ, “A kun‑da gbɛ.”

Chisɔsi‑a samunɛ chɛ Wodifi kɔnkɔɛ ɔ

³⁹ Chisɔsi bɔ‑a wan Chuusaɛn duu ɔ, yɔ a ni a ma buɛ min dɔ tee, mbɛ a ta‑a Wodifi kɔnkɔɛ chɛ ɔ, an bɛ a fɛ denɛ n na.

⁴⁰ An che‑a kɛn nɔ, a‑a a fɔ an ye, a ɔ, “Wo samunɛ ma ti bia, Sitana ma na a ma, wo ni wo kan kɔ sɔ Yataa a.”

⁴¹ Mbɛ a ka‑a wan an baima ɛnden na, mbɛ a‑a a kumbai gbangban, mbɛ a bun‑da samunɛ chɛ‑a.

⁴² A ɔ, “Fa, ni i 'a dɔbɛnɛ mu, a ma ko yawaen chɛ ni ka n teen na. Chɛɛ chɛ gbɛɛ ɔ, n ta faa ma koe, an ma ma. Chɛɛ i ta faa ma koe, an ni ma.”

⁴³ Mbɛ maeka ka‑a banda bu ɔ, mbɛ a bɔ‑a a ya a, mbɛ a‑a faa be a ma.

⁴⁴ A faa yɔn‑da wan a ɔ benden ba a, mbɛ a‑a samunɛ chɛ a sɔɛ gbɛɛ a. Taa min ni bɔ tena a ma, a maen fan ni yɔ wii, ɛ bɔn‑da kaka duu ma.

⁴⁵ A ban‑da kɛn samun‑da, a‑a a kɔɔ sɔ wan, mbɛ a ta‑a a fɛ den chɛ n tena. A‑a an tan fan sa ɔ chinɔɛ ɔ. Koe min na mu, an bɛɛ faa n yɔnden ba ni, min‑na a ma, an gboo ɔ fa‑a.

⁴⁶ Mbɛ a‑a an na kunɛ, a ɔ, “Wo e ka sa ɔ chinɔɛ an dɔ? Wo wo kɔɔ sɔ, wo ni samunɛ ma ti bia, ko ɔ ko ma na wo yiima ɔ chɛ chɛ a si Yataa ma.”

An na‑a Chisɔsi bia‑a

⁴⁷ A yen ko, Chisɔsi to‑a koɔ an na, mbɛ mɔ fanka an na‑a, mbɛ an‑na a tan. A fɛ den tan kun ma fea chɛ n dɔndɔ, min tɔ ni Chudasi, an ni sɔ ɔ mɔɛ chɛ n ya ɔ. Mbɛ a wan Chudasi chɛ na‑a wan Chisɔsi baima gbɛdɛn, min mbe a ma, a ni Chisɔsi kɔndɔn.

⁴⁸ Chɛɛ Chisɔsi ɔ, “Oo, Chudasi, n fan, Mɔ Gbu 'a Denɛ, e n fan ma tachɛ‑a kɔndɔnɛ ɔ?”

⁴⁹ Chisɔsi fɛ den chɛ n‑na a ɔ yen kɛn, koe min ni na tena ma‑a, an dɔ, “Fa, nn ni nn 'na chɛɛ chɛ mɛ n ya, nn ni butuinɛ chɛ an na?”

⁵⁰ Chu n 'na tɛ mɔ wa Yataa tena, a 'a bɔi denɛ, a ni wan an mɔɛ chɛ n tɛ ɔ. Mbɛ Chisɔsi fɛ denɛ dɔndɔɛ, a‑a chɛɛ chɛ mɛ ya, a‑a an bɔi den chɛ boo nyima ɔ too tɛ a a gbeda.

⁵¹ Chɛɛ Chisɔsi ɔ, “Sɛmbɛ, ɛn to ka.” Mbɛ a tu‑a kamin chɛ too a, mbɛ a too chɛ yɛ‑a to a gba ɔ.

⁵² Chu n tɛ mɔɛ nu Yataa a, an 'na mansa nu, an na‑a na wan Chisɔsi bia koe a. An bɛ an na‑a na poesi n ya ɔ sɔɛ n na Yataa 'a kata ɔ, a basan Chu gbakoo n na. Mbɛ Chisɔsi‑a a fɔ an ye, a ɔ, “Wo nii wo wandi tɔɔ na koe a, chɛɛ chɛ mɛ n na wo boo ɔ, a basan kɔn ma tɛenɛ n na, n bia koe a. Kanka ma chianden ma n na.

⁵³ Mmɔ‑a tee sɛsɛ wa chɛ gbɛɛ ban Yataa 'a kata ɔ, wo ma n bia ni. Chɛɛ wo ta tima an che‑a ka wo faa ma koe ma koe a, tima min na Sitana 'a gbasaya ɛ wɛ dunya chɛ kun ma.”

Pita‑a kɔɔsa bia chɛ Chisɔsi wakoe ma

⁵⁴ Mbɛ an‑na Chisɔsi bia, mbɛ an ta‑a a a, Chu n tɛ mɔ wa Yataa a, a 'a chenɛ a. Pita‑a a sɔ wan an fɛ, chɛɛ a ma dɔn ni a ni gbɛn an ma gbɛdɛn.

⁵⁵ A tima chɛ a, mɔɛ n‑na ta sa wan tɛ mɔ wa chɛ 'a chen chɛ kata tɛtɛ ma, mbɛ an si‑a a fɛ. Pita wɛɛ don‑da wan kata chɛ ɔ, mbɛ a si‑a an baima ta chɛ fɛ.

⁵⁶ Mbɛ bɔi den musuma tɔngbɔ dɔndɔ‑a a yen si ɔ ta chɛ fɛ. A‑a a ma fɛn tiin, mbɛ a‑a a fɔ, a ɔ, “Kamin chɛ ni wan Chisɔsi fɛ.”

⁵⁷ Chɛɛ Pita‑a kɔɔsa bia chɛ wan bai chɛ ma, a ɔ, “N bian musu, n ma kamin chɛ sɔn.”

⁵⁸ Tima ɛnden ben‑da, mbɛ kamin dɔndɔ wɛɛ‑a Pita yen. Mbɛ a ɔ, “I wan, a fɛ denɛ dɔndɔ gbu mu i a.” Chɛɛ Pita ɔ, “Mɔna, n fan ma.”

⁵⁹ Awa dɔndɔ bendenɛ gbakɔ, kamin dɔ mende wɛɛ chii‑a wan bai chɛ ma, a ɔ, “Kamin chɛ ni wan gbu Chisɔsi fɛ, a mu min na, Kadidi mɔɛ mu a wɛɛ a.”

⁶⁰ Chɛɛ Pita ɔ, “Mɔna, tea kan kɔ kan mbe ee bai chɛ ɔ, e ka min fɔ‑a. N ma a sɔn.” A to‑a bai chɛ an fɔ‑a, mbɛ tɛ kɔnɛ konchee‑a.

⁶¹ Mbɛ Mansa Chisɔsi‑a a ya a yɛ, mbɛ a‑a Pita ma fɛn. Mbɛ a puin‑da Pita yii ma, mbɛ Mansa Chisɔsi na‑a a fɔ wan a ye, a ɔ, “Pita, tɛ kɔnɛ e na to konchee‑a sayi chɛ ma, e kɔɔsa bia chɛ‑a wan gba sawa, mbɛ i ma n sɔn.”

⁶² Mbɛ Pita bɔ‑a baa ma, mbɛ a puyɛ‑a di a.

⁶³ Mɔɛ miin ni ka Chisɔsi kun ma fɛn tena, an bun‑da a ma yɛn‑da, an mbe ta‑a a gbasi‑a.

⁶⁴ Mbɛ an yɛ‑a wan to, an‑na a ya a chii koa a, an mbe ta‑a a fɔ‑a, an dɔ, “Nyɔn mbe ka i gbasi‑a? A ɔ yian bɛ nn na.”

⁶⁵ Mbɛ an yɛ‑a wan to, an‑na a main chia sɛsɛ a.

An na‑a Chisɔsi a, chiti tɛ mɔɛ n chen kɔɔ

⁶⁶ Banda ɔ ka‑a kɛn, mbɛ Chu gbakoo n bɛn‑da kaina dɔndɔ. Chu n tɛ mɔɛ nu Yataa a, an 'na mansa n bɛɛ ni wan an bɛn chɛ ɔ, a basan Chu n 'na sawa kan mɔɛ n na. Mbɛ an gbɛɛ‑a a ma, an na‑a Chisɔsi a an chen kɔɔ.

⁶⁷ Mbɛ an‑na a fɔ a ye, an dɔ, “A ɔ yian bɛ nn na, ni i wan mu kunka mansa chɛ a.” Mbɛ a ɔ, “Ni a bɔ‑a n fan da a, wo ee dan‑da a a.

⁶⁸ A sin, ni n‑na wo ɔ tisa, wo ee na‑a n yɛman‑da.

⁶⁹ Chɛɛ a ka gbɛ sanche ma, n fan, Mɔ Gbu 'a Denɛ, n mbe ma‑a wan si ɔ Yataa boo nyima ɔ, gbasaya gbɛɛ ɛ min boo ɔ.”

⁷⁰ Mbɛ an gbɛɛ‑a a fɔ, an dɔ, “Mbɛ i wan mu Yataa 'a denɛ a?” Mbɛ a ɔ, “Wo‑a an fɔ ka.”

⁷¹ Mbɛ an dɔ, “Siiya ee to chɛ ma. Mmɔ ban‑da bai a min‑da a wandi gbu da a.”