DUKU 18 - Yataa 'a Dɔbɛnɛ Nama

Chisɔsi‑a tai tɛ, a si fuinya musu ma, an fea chiti tɛ mɔɛ a

¹ Tee dɔndɔ a, Chisɔsi‑a tai tɛ wan a fɛ denɛ n tena. Tai chɛ‑a a ɔ yian fan an na, mbɛ a nyin fan an ni samunɛ ma ti bia tima ɔ tima ko a. A yɛ to, an gboo ɔ ma fa samun chɛ a.

² Mbɛ a ɔ, “Chiti tɛ mɔ dɔndɔ ni wan nɔ duu dɔndɔ ɔ, min nii ma chian ni Yataa ma ɛnden bɛɛ a. A yɛ to, a nii ma baa sɔn a fian mɔ gbu kan kɔ kan ma.

³ An duu dɔndɔ gbe chɛ ɔ, fuinya musu dɔndɔ wɛɛ ni wan nɔ. A na‑a mɔɛ ma siibia wan an chiti tɛ mɔɛ chɛ a. Chɛ ko a, a ni na wan chiti tɛ mɔɛ chɛ tena tima ɔ tima a, a ɔ, a ni kaa a tɛ an tɛ an fea a koɔ nyɔɛ a.

⁴ Tima ɔ yansama ko a, chiti tɛ mɔɛ chɛ ma dɔn ni, a ni bai chɛ sa. Chɛɛ a danka a, a‑a a fɔ wan, a ɔ, ‘N mbe ee chian Yataa ma, n sin ma baa be ni n fian mɔ gbu wɛɛ ma.

⁵ Chɛɛ fɔ ni n‑na fuinya musu chɛ 'a tea be a ma. A‑a n na mankan gbɛ kaka. Ni n ma kaa a tɛ ni a 'a bai chɛ ma, n mbe ee na‑a fɔɛ‑a a boo ɔ.’ ”

⁶ Mbɛ Mansa Chisɔsi ɔ te gbɛ, “Wo‑a a a min, chiti yama 'a tɛ mɔɛ chɛ‑a bai min fɔ.

⁷ Ni ɛ chɛ ma wan, mbɛ Yataa ɛ tea be‑a wan a 'a mɔɛ n ma, miin mbe di chɛ‑a a tena su ɔ tee a. A ee wo sa‑a tima ma, tee ɔ tee a.

⁸ N ni a ma din wo tena, mbɛ ɛ a a gbandia‑a wan, a ni tea be an ma. N fan, Mɔ Gbu 'a Denɛ, n mbe yɛ‑a wan to dunya chɛ ɔ. Chɛɛ a tima chɛ a, n mbe na‑a mɔɛ n tan‑da wan to, miin kai faenɛ ɛ ma‑a n na?”

Chisɔsi‑a tai tɛ, a si Fayisii mɔɛ ma, an fea pawa kain mɔɛ a

⁹ Mbɛ Chisɔsi‑a tai chɛ tɛ chɛ n tena, miin yii na tɛen ni an 'na ko chɛndɛ ma an na, min‑na a ma, an‑na an yii na chii, mbɛ an fisa mɔ ɔ mɔ ma Yataa tena.

¹⁰ A ɔ, “Tima dɔndɔ a, kamin fea n ta‑a wan Yataa 'a kata ɔ samun chɛ tena. Dɔndɔɛ ni Fayisii an na, mbɛ dɔndɔɛ sin ni pawa kain mɔɛ an na.

¹¹ “Fayisii chɛ ka‑a wan mɔɛ tɔɛ chɛ n baima, mbɛ a ta‑a a sɔ‑a a dɔndɔ gbe a, mbɛ a‑a a kuu sɔ samunɛ chɛ‑a. A ɔ, ‘Yataa, en wai, n ta n mbe ee ka yɔ mɔ dɔ gbɛɛ nu. N ta, n ma bɛnchɛ, n sin ma kafa tɔ a. A yɛ to, n mbe ee waa ma basan musu a, n ma miin fuu ni. Mɔɛ dɔ n mbe ka wan, chɛɛ n ta, n mbe ee ka. En wai, a mu min na, n mbe ee ka yɔ pawa kain mɔɛ chɛ wɛɛ pande sɔ ɔ.

¹² Wichi kan kɔ kan dɔ, n mbe sunɛ bia tee fea, i fai koe a. N mbe n boo fenɛ n du wan si tena tanɛ a, mbɛ n‑na a si tena dɔndɔɛ be i ma.’

¹³ “Chɛɛ pawa kain mɔɛ chɛ sɔ‑a wan pɔɔ, a 'a ko yama maenɛ koa‑a a ma, a‑a a kunɛ a bun gbudu. Mbɛ a‑a a boo bun a kaa ɔ, a ɔ, ‘Yataa, chinchin n ma. Ko yama ma mɔɛ mu n na.’ ”

¹⁴ Mbɛ Chisɔsi ɔ te gbɛ, “N ni a ma din wo tena, mbɛ pawa kain mɔɛ chɛ e na to yɛ‑a a 'a chenɛ a, Yataa na‑a a ya wan mɔɛ a, min tanden ni a tena. Chɛɛ Yataa ma Fayisii chɛ ya ni mɔɛ a, min tanden ni a tena. Koe min na mu, ni mɔ ɔ mɔ‑a a wandi a sɛ, Yataa ɛ a mɔɛ chɛ a yii‑a wan. Chɛɛ ni mɔ ɔ mɔ‑a a wandi a yii, Yataa ɛ a mɔɛ chɛ a sɛ‑a wan.”

Chisɔsi‑a den mɛsɛ n dua

¹⁵ Mbɛ mɔɛ dɔ n na‑a wan an 'na den toa n bɛɛ a, an dɔ, Chisɔsi ni a boo bun an ma, mbɛ a‑a an dua. A fɛ den chɛ n‑na chɛ ɔ yen kɛn, an‑na mɔɛ chɛ n na gban fan.

¹⁶ Chɛɛ Chisɔsi na‑a a ma wan, an na‑a den chɛ n na a tena, mbɛ a ɔ, “Wo a ma den mɛsɛ n ni na n tena. Wo ma an ma bai. Koe min na mu, mɔɛ miin maen mu yɔ den mɛsɛ chɛ nu, Yataa an mbe ma‑a an 'na mansa a.

¹⁷ N ni a ma din wo tena, mbɛ ni mɔ ɔ mɔ ma dɔn ni, a ni don Yataa 'a mansaya kɔɔ yɔ den mɛsɛ chɛ nu, an mɔɛ chɛ ee ma‑a Yataa ta mɔɛ a.”

Nyan tɔ dɔndɔ‑a Chisɔsi tan

¹⁸ Chu kun ti dɔndɔ na‑a wan Chisɔsi tena, mbɛ a ɔ, “Ticha, i wɛn mu mɔ chɛndɛ a, n mbe fen ma, n ni kuɔ fɔ fɔɛ ma sɔn?”

¹⁹ Mbɛ Chisɔsi ɔ, “E ma ka ma, i ni n chee mɔ chɛndɛ a? Mɔ ɔ mɔ ma mɔ chɛndɛ a, mɔɔ dechee Yataa dɔndɔ gbe.

²⁰ I‑a sawa n sɔn fan, Yataa‑a miin be Mosisi ma. A ɔ, wo ma waa ma basan mɔɛ a, wo ee fuu ɔ min na, a ɔ, wo ma mɔ fa, ni sawa ma min fɔ ni, a ɔ, wo ma kanka chɛ, a ɔ, wo ma fania fɔ mɔ ɔ mɔ ma, a ɔ, wo ni kooya be wo fa ma, a basan wo de a.”

²¹ Mbɛ kamin chɛ ɔ, “N mbe wan sawa chɛ n gbɛɛ bia tena, aan a ka n den mɛsɛ tɔɛ ma a sɔ sanche ma.”

²² Chisɔsi‑a chɛ a min kɛn, mbɛ a ɔ, “Ko dɔndɔ gbe an to‑a, e min ma gbɛ. I boo fenɛ n gbɛɛ ma tachɛ. Mbɛ i‑a a kɔpɔɛ chɛ ya, i‑a a be yɔn tɔɛ n ma. Chɛ‑a a ma wan, i ni nyanɛ ma sɔn banda bu ɔ. Ni i‑a chɛ ma, mbɛ i na‑a i ma‑a n fɛ denɛ a.”

²³ Chɛɛ kɛn kamin chɛ‑a bai chɛ a min, a faa yɔn‑da wan a ɔ benden ba a. Koe min na mu, nyan tɔ wa ni a a.

²⁴ Chisɔsi‑a a ɔ yen kɛn, mbɛ bai chɛ‑a kamin chɛ faa yɔn kaka, mbɛ a ɔ, “A ɔ gbɛ nyan tɔɛ ni don Yataa 'a mansaya kɔɔ.

²⁵ A ɔ gbɛ kaka nyan tɔɛ ko a, a ni don Yataa 'a mansaya kɔɔ, a ni ben ninchi don koe ma miichi woe a.”

²⁶ Mɔɛ miin‑na bai chɛ a min, an dɔ, “Mbɛ nyɔn mbe bauncha chɛ ma sɔn‑da gbɛ?”

²⁷ Mbɛ Chisɔsi ɔ, “Mɔ gbu ee che koe min ma‑a, Yataa ɛ an ma.”

²⁸ Mbɛ Pita ɔ, “A yen ko, nn‑na nn kan kɔ sɔ fen kɔ fen na, mbɛ nn bea‑a i fɛ.”

²⁹ Mbɛ Chisɔsi ɔ, “Chenɛ, musu, suun ma nyɔɛ nu, mɔ woo mɔɛ nu, a basan denɛ n na, an nyin fan. Chɛɛ n ni a ma din wo tena, mbɛ mɔɛ min mbe an dɔndɔ wɛɛ to‑a, Yataa 'a mansaya a ta koe a ya ɔ ma,

³⁰ Yataa ɛ a kɔ‑a wan dunya chɛ ɔ gba sɛsɛ ko a, an fen chɛ a, min ni a boo ɔ a kɔ ma a. A yɛ to, Yataa ɛ kuɔ fɔ fɔɛ be‑a wan a ma dunya nama ɔ, min mbe na tena.”

Chisɔsi‑a a 'a saya kɔɔ fɔ, a gba sawan bɔɛ ɔ

³¹ Mbɛ Chisɔsi‑a a fɛ den tan kun ma fea chɛ n bɔ mɔɛ tɔɛ chɛ n tɛ ɔ, miin na‑a bea ka a fɛ. Mbɛ an dechee ma tɛenɛ to‑a, mbɛ a ɔ, “Mmɔ yen ko ta‑a gbɛ Chuusaɛn duu ɔ. Nɔ mu ko ɔ ko ɛ na tena bɔ‑a a a, Yataa 'a gbonka chɛ mɔɛ n na‑a min nyɛn suun, a si n ma, n fan, Mɔ Gbu 'a Denɛ.

³² An mbe n be‑a wan mɔɛ chɛ n ma, Chu mɔ ma miin na. An mɔɛ chɛ n mbe na‑a n ma yɛn‑da wan, an ni n main, mbɛ an‑na an da yii chɛ n ma.

³³ An mbe n gbasi‑a wan faa a, mbɛ an‑na n fa. Chɛɛ tee fea, a sawan bɔɛ, n mbe n kɔɔ sɔ‑a wan a ka saya ɔ.”

³⁴ Chɛɛ a fɛ den chɛ n nii ma ko ɔ ko ɔ gbɛ ni, a si a 'a bai chɛ ma, koe min na mu, a fasai buɛ ɔ nunden fan ni an ma.

Chisɔsi‑a ya te tɔ dɔndɔ ya a ka

³⁵ Mbɛ Chisɔsi gbɛn‑da Chɛiko duu baima. A tima chɛ a ni, a‑a ya te tɔ dɔndɔ tan si ɔ chia tɔnfɛ, ɛ fen fuinɛ a.

³⁶ Ya te tɔɛ chɛ, a‑a fanka fanka chɛ sɔnkɔ chɛ kuiɛ a min, mbɛ a‑a tisa chɛ, ni fen mbe ka ma‑a.

³⁷ Mbɛ mɔɛ n‑na a fɔ a ye, an dɔ, “Chisɔsi, an mbe ka ben tena, min ka‑a Nasaɛti duu ɔ.”

³⁸ Mbɛ a‑a yee tɛ gbankon, a ɔ, “Chisɔsi, i wɛn bɔ‑a Mansa Defidi 'a dambi ɔ, chinchin n ma.”

³⁹ Mbɛ mɔɛ miin ni ka sɔ ɔ ya ɔ, an sɔnkɔ‑a a ma, an dɔ, a ni a da a tɔn. Chɛɛ a tima gbu a ni gbɛ, a‑a yee tɛ a ben a kɔma ma, a ɔ, “I wɛn bɔ‑a Mansa Defidi 'a dambi ɔ, chinchin n ma.”

⁴⁰ Mbɛ Chisɔsi sɔ‑a, mbɛ a‑a a ma, an na‑a ya te tɔɛ chɛ a a tena. A che‑a kɛn a baima, mbɛ Chisɔsi ɔ,

⁴¹ “I toen mu n ni fen ko chɛ i ye?” Mbɛ a ɔ, “Fa, a ma n ya a ni ka.”

⁴² Mbɛ Chisɔsi ɔ, “I 'a danaya‑a i baun. Kaina yen gbadan.”

⁴³ A ya kɔɔɛ a, kamin chɛ ya a ka‑a, mbɛ a‑a kaina yen gbadan. Mbɛ a‑a a sɔ Chisɔsi fɛ, ɛ ta‑a Yataa tando‑a. Mɔ fanka fanka chɛ‑a koe chɛ ɔ yen kɛn, an gbɛɛ‑a tando be wan Yataa ma.