DUKU 17 - Yataa 'a Dɔbɛnɛ Nama

Chisɔsi‑a bai sa, a si ko yama an fea ma danaya a

¹ Tee dɔndɔ a, Chisɔsi‑a a fɔ wan a fɛ denɛ n ye, a ɔ, “Koe n mbe ma‑a wan, min mbe a ma, mɔ gbu n ni dɛ ko yama ma ɔ. Chɛɛ a yau gba mɔɛ chɛ ko a, min mbe a bɔ mɔ gbu a dɛ‑a ko yama ma ɔ.

² Ɛ nyan fan a mɔ bonda chɛ ko a, sen kanɛ ni chii a kan na, mbɛ an ni a a dɛ yii wa ɔ. A mɔɛ chɛ e na to a ma‑a, mɔɛ miin dan‑da ka n na sanche, an dɔndɔ wɛɛ ni dɛ ko yama ma ɔ.

³ Chɛ an‑na a fɔ, wo wo kun ma fɛn, ni wo ma‑a ko ɔ ko ma‑a. “Ni wo bɔɛ‑a ko yama ma wo dɔndɔ wɛɛ a, wo a fɔ a ye, mbɛ a‑a ko yama an ma ka. Ni a dɔn‑da a ma, mbɛ a‑a ko yama an ma ka, wo wo boo bɔ a 'a ko yama maen chɛ ɔ wo a.

⁴ Ni a sin‑na ko yama ma wo a, si tena wɔnfea wɛɛ tee ma, mbɛ ɛ wo disa tima ɔ tima a 'a ko yama chɛ ko a, wo wo boo bɔ a 'a ko yama maen chɛ n dɔ wo a.”

⁵ Mbɛ Chisɔsi 'a sɔ mɔɛ chɛ n‑na a fɔ Mansa Chisɔsi ye, an dɔ, “Basan nn ma, nn 'na danaya Yataa a, a ma ni munda.”

⁶ Mbɛ a ɔ, “Ni danaya ɛnden bɛɛ yɔ chin fen kuu dɔma ɛndenɛ, a ni wan wo ɔ Yataa ko a, wo ni kun fan wo ni a fɔ kɔn ba chɛ ye, wo ɔ, a kuu ni bɔ, a ni ta, a ni sɔ yii ɔ. Mbɛ a ma‑a, yɔ wo‑a a fɔ buɛ min dɔ.

⁷ “Mmɔ a ya, mbɛ bɔi denɛ ɛ wo dɔndɔ boo ɔ. Ni a na‑a a ka i 'a fen fɛn tena, chɛ ma, ni a na‑a a ka i 'a sa kun ma fɛn tena, e ee a fɔ a ye, i ɔ, a pɛn ni daunɛ chɛ.

⁸ Chɛɛ e a fɔ‑a wan, i ɔ, a ni daun fenɛ ɔ bɛn i ye. Mbɛ a na‑a fen kɔ fen na, e min daun. Ni i ban‑da daunɛ chɛ‑a, a tima an na mu, ɛ a ta daunɛ chɛ.

⁹ Wai bɔ ee bɔi den chɛ ma, koe min na mu, ɛ nɔ wai chɛ an chɛ koe a, i toen mu a ni min chɛ.

¹⁰ Wo wɛɛ, wo e ka wan. Ni wo ban‑da koe chɛ n gbɛɛ ma‑a, n mbe wo sɔ‑a min chɛ koe a, wo e a fɔ‑a wan, wo ɔ, bɔi den gbama mu wo a. Wo ɔ, wai bɔ ee wo ko a.”

Chisɔsi‑a mɔ kaima tanɛ n baun

¹¹ Mbɛ Chisɔsi bun‑da to a 'a tachɛ ma, a ta Chuusaɛn duu ɔ. A ben‑da wan Samayia chɛnyɛ a sanɛ, a basan Kadidi chɛnyɛ a.

¹² A ni don tena gbɛ konko dɔndɔ an dɔ, mbɛ kamin tanɛ n‑na a tan, gbandi yama yama bɔen ni miin gboo gbɛɛ ma. An sɔ‑a wan pɔɔ,

¹³ mbɛ an‑na yee tɛ, an dɔ, “Chisɔsi, kan mɔ, i dimu, chinchin nn ma.”

¹⁴ Mbɛ Chisɔsi‑a an yen, mbɛ a ɔ, “Wo ta, mɔɛ chɛ n tena, miin mbe mmɔ tɛ Yataa a, an ni wo ma fɛn, ni wo baunden fan mu.” An to‑a ta an na mɔɛ chɛ n gbu tena, mbɛ an baun‑da chia a.

¹⁵ An dɔndɔ‑a a ɔ yen kɛn, mbɛ a baun‑da, a yɛ‑a wan Chisɔsi tena, ɛ ta‑a Yataa tando‑a, a kuiɛ ma sɛenɛ a.

¹⁶ Mbɛ a‑a a wandi ɔ fuin fan duu ma fugbu Chisɔsi chen kɔɔ, mbɛ a‑a a wai bɔ ka. Samayia mɔɛ ni an kamin chɛ a.

¹⁷ Mbɛ Chisɔsi ɔ, “N‑na an mɔ tanɛ n gbɛɛ baun fan. Mɔ kɔnɔntɔɛ chɛ nɛnɛ nu, an ma an ya wɛɛ a yɛ ni to.

¹⁸ Chɛɛ sonda chɛ dɔndɔ gbe an yɛ‑a, Yataa wai bɔ koe a.”

¹⁹ Mbɛ Chisɔsi‑a a fɔ a ye, a ɔ, “I kɔɔ sɔ, i ni ta, i 'a danaya‑a i baun.”

Chisɔsi‑a bai sa, a si Yataa 'a mansaya ɔ yian koe ma

²⁰ Mbɛ mɔɛ chɛ nu miin ni Fayisii n na, an‑na Chisɔsi ɔ tisa, an dɔ, tima minan na mu, Yataa ɛ a 'a mansaya ɔ yian‑da. Mbɛ a ɔ, “Tima min na Yataa ɛ a 'a mansaya ɔ yian‑da, koe n fan mbe ee ma‑a, miin mbe a ɔ yian‑da, mbɛ tima gbu an che‑a ka Yataa 'a mansaya ɔ yian koe a.

²¹ Mɔ ɔ mɔ ee a fɔ‑a, a ɔ, ‘I ya a na nɛ, a yen ko nɛ.’ Mɔ ɔ mɔ ee a fɔ‑a, a ɔ, ‘A yen ko pan.’ A mu min na, Yataa 'a mansaya ɔ yianden fan mu gbɛ wo nan tɛ.”

²² Mbɛ a‑a a fɔ a fɛ denɛ n ye, a ɔ, “Tima ɛ che‑a wan, tima min na mu, n fan, Mɔ Gbu 'a Denɛ, n mbe ee na‑a ma‑a wo tɛ ɔ. A tima chɛ a, wo e na‑a to‑a wan n ni ma wo tɛ ɔ tee dɔndɔ gbe wɛɛ ko a.

²³ Mɔɛ dɔ n mbe a fɔ‑a wan wo ye, an dɔ, ‘Wo wo ya a ta pan, wo ni Mɔ Gbu 'a Denɛ yen.’ Dɔ n sin dɔ, ‘A yen ko nɛ.’ Chɛɛ wo ma bea an mɔɛ chɛ n fɛ ta koe a an kaina chɛ nu.

²⁴ A mu min na, ni banda bea‑a kan kɔ kan, mɔ ɔ mɔ‑a a ɔ yen fan, ni fen ko ma‑a ka. A chia dɔndɔ gbe chɛ a mu, n fan, Mɔ Gbu 'a Denɛ, n mbe na‑a tima min na, mɔ ɔ mɔ ɛ a ɔ yen‑da wan.

²⁵ Chɛɛ chɛ e na to ma‑a, n mbe tɔɔ‑a wan kaka, mbɛ mɔ bonda chɛ siman‑na an kan kɔ sɔ n na.

²⁶ Tima min na, n fan, Mɔ Gbu 'a Denɛ, n mbe yɛ‑a dunya chɛ ɔ to, koe n mbe ma‑a ka wan, yɔ an ni buɛ min dɔ Nowa 'a tima a.

²⁷ Mɔɛ n ni wan ko ɔ ko ma‑a Nowa 'a tima a, mɔ gbu ɛ ko ɔ ko kan kɔ kan min ma. Mɔɛ n ni daun fenɛ n daun fan, a yɛ to, an mbe an min. Mɔɛ n ni musu fuu wan, musu n sin ni be wan kai ma. Chɛ an ni a a, yii nii ma dunya ya ni tima min na, mbɛ Nowa sɛ‑a dɛndɛ wa dɛgbɛ ɔ. Mbɛ yii‑a an 'na dunya gbu gbɛɛ ya, mbɛ a‑a an gbɛɛ ban.

²⁸ Koe n mbe ma‑a ka wan, yɔ an ni buɛ min dɔ Dɔti ta tima wɛɛ a. Mɔɛ n ni daun fenɛ n daun fan, a yɛ to, an mbe an min. An ni fee fenɛ n san fan, an mbe ta‑a an ma tachɛ‑a. An ni chin fenɛ n chin fan, mbɛ an‑na chenɛ n sɔ.

²⁹ Chɛɛ tee min ma Dɔti bɔ‑a Sɔdɔn duu ɔ, Yataa‑a a ma wan ta yii‑a a ka banda a, a basan senɛ n na, miin ni gbandi yɔ ta. An yii‑a wan a ka banda a, yɔ sona ɛ chɛ buɛ min dɔ, mbɛ an‑na mɔɛ chɛ n gbɛɛ fa nɔ an duu chɛ ɔ.

³⁰ Ɛ ma‑a ka wan to an tee chɛ ma, tee min ma, n fan, Mɔ Gbu 'a Denɛ, n mbe n 'na gbasaya ɔ yian‑da.

³¹ “A tee chɛ a, mɔɛ min mbe ma‑a a 'a chenɛ baa ma, a ma na to a don koe a chenɛ a, a boo fenɛ n ya koe a. A tima dɔndɔ gbe chɛ a to, mɔɛ min mbe ma‑a a 'a sɛnɛ ɔ, a wɛɛ ma yɛ to duu ɔ ta koe a a 'a chenɛ a.

³² Wo wo yii na chii, koe min si‑a Dɔti 'a musu a.

³³ Ni mɔ ɔ mɔ‑a a wandi fɔɛ ma sansa, an mɔɛ chɛ ee kuɔ fɔ fɔɛ ma sɔn‑da. Chɛɛ mɔɛ min mbe a yii bɔ‑a a fɔɛ ɔ, an mɔɛ chɛ ɛ kuɔ fɔ fɔɛ ma sɔn‑da wan.

³⁴ N ni a ma din wo tena, mbɛ a tima chɛ a, mɔ fea n mbe ma‑a wan sa ɔ chinɔɛ ɔ sofa dɔndɔɛ ma yɛɛ ma, mbɛ dɔndɔɛ ya‑a, mbɛ dɔndɔɛ sin to‑a nɔ.

^35-36 Musu fea n mbe ma‑a wan tu chɛ‑a mun dɔndɔɛ ɔ, mbɛ dɔndɔɛ ya‑a, mbɛ dɔndɔɛ wɛɛ to‑a nɔ.”

³⁷ Mbɛ a fɛ denɛ n dɔ, “Fa, koe chɛ n mbe ma‑a mende?” Mbɛ Chisɔsi ɔ, “Ni wo ee doa n yen fen su a tindanɛ, mbɛ wo ee an kaina chɛ sɔn‑da.”