DUKU 12 - Yataa 'a Dɔbɛnɛ Nama

Chisɔsi‑a a fɛ denɛ n na si

¹ A tima chɛ a, mɔ wu sɛsɛ a kan‑da wan Chisɔsi tena. Mɔɛ n da a ni koo, an ni ka wan tɛn tɛn‑da an nyɔn ma. Mbɛ Chisɔsi‑a a kuu sɔ a fɔ‑a a fɛ denɛ n pɛn ye, a ɔ, “Mmɔ 'a Chu mɔɛ chɛ nu, miin mu Fayisii n na, yisinɛ ɛ wan an boo ɔ. Wo wo kun ma fɛn an yisinɛ chɛ boo ɔ. Yisin chɛ mu an 'na nɛnɛn feaya an na.

² Koe min na mu, boo kundu ee to doma kɔɔ, ɛ bɔ wan ya a ma tee dɔndɔ a.

³ Chɛ an‑na a fɔ, wo e bai kan kɔ kan min fɔ‑a wo dechee a, mɔɛ n mbe a a min‑da wan baa kun tɛ. A sin, wo dechee ɛ wɛwɛɛ min fɔ‑a, dunya ɛ a a min‑da wan chɛndɛ chɛ.

⁴ “N dia nyɔɛ nu, n ni a ma din wo tena, mbɛ wo ma chian mɔ gbu ma wo fa ko a. Ɛ wo fa‑a wan, chɛɛ a ee ko ɔ ko dɔ mende ma‑a chɛ gbakɔ.

⁵ Chɛɛ wo e chian min ma, n mbe a yian‑da wan wo a. Wo chian Yataa dɔndɔ gbe an ma. An mbe mɔ gbu fa, mbɛ a‑a a a ta ta ɔ, ɛ minda kaina. Wo dan chɛ a, mbɛ wo ni chian Yataa ma.

⁶ “Baa ee soenɛ ma mɔ gbu ya a. Chɛɛ chɛ gbɛɛ ɔ, Yataa ee nyina an dɔndɔ wɛɛ ma.

⁷ Wo sin benden mu kaka soenɛ n ma. Wo kundi nan fan bɛɛ wo kun ma, Fa Yataa‑a a danɛ sɔn fan. Chɛ an‑na a fɔ, wo ma chian mɔ gbu ma.

⁸ “N ni a ma din wo tena, mbɛ ni mɔ ɔ mɔ min mbe dɔn‑da fanka ɔ, mbɛ n fɛ mɔɛ mu a a, n bɛɛ, n fan Mɔ Gbu 'a Denɛ, n mbe dɔn‑da wan an mɔɛ chɛ wakoe ma maeka n ya kɔɔ.

⁹ Chɛɛ ni mɔ ɔ mɔ‑a a fɔ fanka ɔ, mbɛ n fɛ mɔ ma a a, n bɛɛ n mbe a fɔ‑a wan maeka n ya kɔɔ, mbɛ n fɛ mɔ ma a a.

¹⁰ “A sin, n fan, Mɔ Gbu 'a Denɛ, ni mɔ ɔ mɔ‑a n main, Yataa ɛ kun fan a ni a boo bɔ a ɔ. Chɛɛ ni mɔ ɔ mɔ‑a Yataa Nyina main, a ee a boo bɔ‑a a mɔ sima chɛ 'a main chɛ ɔ.

¹¹ “Ni an na‑a wo a wo gbɛmbo koe a mmɔ 'a samun chɛ chenɛ n na, ni an na‑a wo a ya ɔ sɔɛ n chen kɔɔ, ni an na‑a wo a kun ti n bɛɛ chen kɔɔ, wo ma wo faa gbaa wo fɔ bai ko a, ni a fɔ buɛ ko a.

¹² A mu min na, Yataa Nyina ɛ wo kan‑da wan a tima chɛ a, wo e bai min fɔ‑a.”

Chisɔsi‑a tai tɛ, a si nyanɛ ma

¹³ Mbɛ kamin dɔndɔ fanka chɛ ɔ, a‑a a fɔ Chisɔsi ye, a ɔ, “Ticha, nn fa 'a fenɛ min to nn ko a, a fɔ n kɔɔ kaima ye, a ni a du nn ma.”

¹⁴ Mbɛ Chisɔsi ɔ, “Mɔ ɔ mɔ ma gbasaya be ni n ma, wo fa chɛ du koe a, wo tɛ wo fea i kɔɔɛ a.”

¹⁵ Mbɛ a‑a a fɔ an ye, a ɔ, “Wo wo kun ma fɛn, fen koya yama min kɔ min boo ɔ. Koe min na mu, mɔ gbu ni nyan boo ɔ boo, chɛ an mbe ee a ma i ni fɔɛ chɛndɛ ma sɔn.”

¹⁶ Mbɛ a‑a tai chɛ tɛ an tena, a ɔ, “Nyan tɔ dɔndɔ ni wan nɔ, sɛnɛ ni min boo ɔ. Chin fen sɛsɛ na‑a ma wan a a, an sɛnɛ chɛ ɔ.

¹⁷ Chɛ ko a, a‑a a yii na chii wan, a ɔ, ‘Kaina ɔ ma koo, n mbe n 'na chin fen chɛ n gbɛɛ a sɔn kaina. N mbe fen ma gbɛ sanche?’

¹⁸ Mbɛ a ɔ, ‘N yii puin‑da, n mbe bea kɔma chɛ n fasan‑da wan, mbɛ n‑na a chenama n sɔ. Ni n‑na chɛ ma, n mbe chin fen chɛ n gbɛɛ, ni fen dɔ mende nu, n ta mu miin na, n mbe an gbɛɛ chɛ‑a wan nɔ.

¹⁹ Mbɛ n mbe a fɔ‑a wan n fandi ye, n dɔ, “Nɛma tɔɛ, fen chɛndɛ gbɛɛ, n toen mu miin na fɔɛ chɛ ɔ, an mbe wan n boo ɔ. An sin mbe san sɛsɛ ya‑a wan n na. N faa ma gbaa ni to fɔɛ chɛ ɔ fen kan kɔ kan ko a. Chɛɛ n mbe daunɛ chɛ‑a wan, n ni minɛ chɛ, mbɛ n yɛ‑a, n‑na buɔdia bɔ.” ’

²⁰ Chɛɛ Yataa‑a a fɔ wan a ye, a ɔ, ‘I wooen mu. Yɛɛ chɛ ma, e fa tena wan. Ni i sin fa‑a, fen chɛ n gbɛɛ, i‑a miin na sɔn ka i wandi ko a, i wan ta ee ma‑a an na.’ ”

²¹ Mbɛ Chisɔsi ɔ te gbɛ, “Chɛ n bɛɛ mbe ka wan, miin mbe nyanɛ a sɔn an fandi ko a, chɛɛ an ma nyan ni Yataa ta chia a.”

Chisɔsi‑a kanɛ chɛ, a si mɔ gbu 'a faagbaa ma

²² Mbɛ Chisɔsi‑a a fɔ a fɛ denɛ n ye, a ɔ, “Chɛ an‑na a fɔ, n ni a ma din wo tena, mbɛ wo ma wo gbɔsɔ wo da daun fenɛ ko a, ma koe a fɔɛ ɔ. N mbe ee baa, wo ni wo gbɔsɔ wo gboo ko a, wo e fen chii.

²³ Koe min na mu, mɔ gbu fɔɛ ma daun fenɛ dechee an na, a yɛ to, koa dechee an ma koe a mɔ gbu gboo ko a.

²⁴ Wo ŋaŋaa n yen bɛ, an mbe ee chin fen chin, n mbe ee baa, an ni a a sɛ bea a. Chɛɛ chɛ gbɛɛ ɔ, Yataa ɛ an da kɔ wan. Wo nan gbu sin benden mu kaka ŋaŋaa n ma.

²⁵ Wo dɔndɔ wɛɛ, faa ni gbaa boo ɔ boo a 'a fɔɛ ko a, chɛ ee a ma tima kundu ɛnden bɛɛ ni sa a kun ma.

²⁶ Koe ɛnden chɛ, wo ee che ka buɛ min dɔ a ma‑a, wo ma wo faa gbaa koe tɔɛ chɛ n ko a.

²⁷ Wo fia ɔ kɔn chɛ n yen bɛ, miin mbe fu, an mbe koa buɛ min dɔ. An mbe ee wai chɛ, an sin mbe ee koa nyan an fandi ko a. Chɛɛ n ni a ma din wo tena, mbɛ mansa Sɔɔmon nyanden ni wɛɛ boo ɔ boo, koa nii a ma, min ni nyin a ni che kɔn fu chɛ n dɔ.

²⁸ Yataa an mbe kɔnɛ chɛ n ma chii, kɔnɛ min mu ɛ nɛ bi, mbɛ sinan a tɛ‑a, mbɛ wo‑a a minda. Ni ɛ ka wan, wo ma chii koe a boo ɔ, a mu a ma gbɔsɔɛ an na. Wo 'a danaya ɔ dɔɔ gba.

²⁹ “Chɛ an‑na a fɔ, wo faa ma gbaa wo daun fen ko a, a basan wo min fen na.

³⁰ A mu min na, wo Fa Yataa‑a a ɔ sɔn fan, mbɛ wo gbɔsɔen fan mu chɛ n gbɛɛ ko a. Yataa sɔn bai n fan faa ɛ gbaa tima ɔ tima fen chɛ n ko a.

³¹ Chɛɛ wo e min ma, wo a ma wo ma gbɔsɔɛ a don koe a Yataa 'a mansaya kɔɔ. Ni wo‑a chɛ ma, ɛ to‑a wan nɔ a ni fen chɛ n gbɛɛ be wo ma, miin ma gbɔsɔɛ ɛ wo ma.”

Chisɔsi‑a kanɛ chɛ, a si banda bu ɔ nyanɛ ma

³² Chisɔsi ɔ, “Wo wɛn mbe n fɛ, wo ma kɔkoo, chɛɛ wo ma chian. A a di wan Fa Yataa ye, na koe a wo a, a 'a mansaya kɔɔ.

³³ Wo wo boo fenɛ n ma tachɛ kɔpɔɛ a, mbɛ wo‑a a kɔpɔɛ chɛ n be yɔn tɔɛ n ma. Ni wo‑a chɛ ma, wo e ma‑a ka nyanɛ an na sɔn‑da wo wandi ko a banda bu ɔ. Kɔpɔ sa basachi nu, miin mbe banda bu ɔ, an mbe ee taa, an sin mbe ee pumbɔ. Wo 'a nyan fen chɛ nu banda bu ɔ, an mbe ee ban kuɔ fɔ ko a. Kanka ee che an kanka‑a. Chisi sin mbe ee che an yɔn‑da.

³⁴ A mu min na, wo 'a nyanɛ ɛ ma‑a sa ɔ kaina, wo faa ɛ ma‑a nɔ wan tima ɔ tima.”

Chisɔsi ɔ te, an ni an ma bɛn a na koe a

³⁵ Chisɔsi ɔ, “Wo wo ma bɛn, mbɛ wo‑a wo 'a dambo a man wai chɛ koe a.

³⁶ Wo ma‑a yɔ bɔi denɛ nu, miin mbe an kun ti ma kɔn tena a na koe a chenɛ a, a ka musu si tɔmbɔɛ ɔ. Min mbe a ma, ni a na‑a, a ni chenɛ da tu, an mbe chenɛ da a ka‑a wan a ye bui chɛ a.

³⁷ Ɛ ma‑a wan bɔi den chɛ n ma buɔdia a, miin mbe ee chinɔ‑a, aan an kun ti ni yɛ. N ni a ma din wo tena, mbɛ kun ti chɛ ɛ a ma bɛn‑da wan, mbɛ a‑a a 'a bɔi den chɛ n chee, mbɛ a wandi gbu‑a daun fenɛ ya, a‑a a be an ma a daun koe a.

³⁸ Ni a na‑a su tɛ wɛɛ, ni a na‑a sayi ma pimbi wɛɛ ɔ a, ɛ miin tan‑da an ya a, ɛ ma‑a an ma buɔdia wa an na.

³⁹ Chɛɛ n ni a ma din wo tena, mbɛ ni chen ti ɛ a ɔ sɔn fan tima min na kanka ɛ na‑a a kanka koe a, a ee dɔn kanka ni a 'a chenɛ te, a ni don nɔ.

⁴⁰ A sin wo wɛɛ, wo wo ma bɛn, koe min na mu, n fan, Mɔ Gbu 'a Denɛ, n mbe na‑a wan tima ɔ tima, wo yii n mbe ee na‑a ma‑a min dɔ n na koe a.”

⁴¹ Mbɛ Pita ɔ, “Fa, i‑a tai chɛ tɛ nn fan ko a, nn fɛn mu i fɛ denɛ n na, kɔ i‑a a tɛ mɔɛ gbɛɛ an ko a?”

⁴² Mbɛ Mansa Chisɔsi ɔ, “Wo ma yɔ wai chɛ mɔɛ, danaya ni min dɔ, a basan yiimatɛ a. Ni a kun ti ma‑a ta‑a tachɛ ɔ, ɛ a to wan a bɔɛ n kun ma, daun fenɛ be koe a an ma, tima ma.

⁴³ Ni a kun ti yɛ‑a, a ni a tan, ɛ koe chɛ n ma‑a, yɔ a‑a a fɔ buɛ min dɔ a ye, ɛ ma wan ko chɛndɛ a a ko a.

⁴⁴ N ni a ma din wo tena, mbɛ kun ti chɛ ɛ gbasaya be‑a wan a ma, ma koe a a 'a chenɛ gbɛɛ kun ma.

⁴⁵ Chɛɛ ni wai chɛ mɔɛ chɛ‑a a fɔ, a ɔ, mbɛ kun ti chɛ ee fua tena yɛ‑a, mbɛ a bun‑da a bɔɛ n gbasi‑a, kai nu a basan musu n na. Ɛ ma‑a gbɛ daun chɛ an na, ni gbɛ min ba a, min mbe a bia‑a a ɔ bendenɛ a.

⁴⁶ Chɛɛ a kun ti chɛ ɛ yɛ‑a wan tee dɔndɔ a, a yii n mbe ee ma‑a a yɛ koe ɔ tima min na. Kun ti chɛ ɛ wai chɛ mɔɛ chɛ a tɔɔya‑a wan a yama yama boo a, mbɛ a‑a a bia, yɔ mɔɛ chɛ nu, a ee che a fa‑a miin na.

⁴⁷ “Mbɛ ni wai chɛ mɔɛ‑a a ɔ sɔn, a kun ti toen mu a ni fen ma a ye, chɛɛ a ma a ma ni, yɔ a kun ti toen mu min ni ma, ɛ gbasi sɛmbɛndenɛ ma sɔn‑da wan.

⁴⁸ Chɛɛ ni wai chɛ mɔɛ ma a ɔ sɔn a kun ti toen mu fen na, mbɛ a‑a ko dɔ mende ma, ɛ gbasi ma sɔn min ko a, ɛ gbasi ɛndenɛ an ma sɔn‑da. Ni a chenama ma‑a mɔ ɔ mɔ boo ɔ, a ni a wai chenama chɛ. I boo ɛ che‑a buɛ min dɔ a ma sɔn koe a, i ni a chɛ ka a buɛ chɛ ɔ, a ma sɛenɛ a.”

Chisɔsi ɔ te, a na‑a ta an sɔ koe a dunya a

⁴⁹ Chisɔsi ɔ, “N na‑a ta an sɔ koe a dunya chɛ a. Ɛ ma‑a wan n ma buɔdia a, ni an ta chɛ ma‑a bia‑a gbɛ.

⁵⁰ Chɛɛ chɛ e na to ma‑a, n mbe tɔɔya ɔ bia‑a wan a ɔ benden ba a. N mbe ma‑a wan faayɔn ba ɔ aan an tɔɔya chɛ danka a ni si.

⁵¹ A ma ma wo yii ma, mbɛ n na‑a dunya chɛ ɔ, min mbe a ma, kuiɛ a kanɛ ni ma mɔɛ n tɛ ɔ. N ma na ni an na, chɛɛ n na‑a dɔfasanɛ an na an tɛ ɔ.

⁵² A ka gbɛ sanche ma, suun ma nyɔ duu n tɛ ɛ du‑a wan, mɔ sawa n mbe yɛ‑a wan kaka dɔndɔɛ ma, mbɛ mɔ fea n yɛ‑a kaka dɔndɔɛ ma.

⁵³ Fa n bɛ an 'na denɛ kaima n na, an mbe sɔ‑a wan an nyɔn na kan. Den suun musu n bɛɛ mbe sɔ‑a ka wan an nyɔn na an bɛ an 'na denɛ musuma n na. Mbɛ de mɔɛ n bɛ an 'na den 'na musu n na, an bɛɛ sɔ‑a an nyɔn na kan.”

Chisɔsi‑a kanɛ chɛ, a si ko ɔ gbɛ waiya ma

⁵⁴ Mbɛ Chisɔsi‑a a fɔ to mɔ fanka fanka chɛ ye, a ɔ, “Ni wo‑a dingbii yen ka‑a tee bea tena, wo e a fɔ wan dɔndɔ gbe, mbɛ sona ɛ na tena wan, a sin ɛ na wan.

⁵⁵ Mbɛ ni wo‑a fia a tinsɔn ɛ bɔ‑a a ka dunya denkɔɛ, wo e a fɔ wan to, mbɛ kaina ɛ na tena wan win‑da, a sin mbe ma wan.

⁵⁶ Wo wan nɛnɛn fea ti nu, wo e banda ma fɛn fan, an fea duu gboo a, mbɛ wo‑a a ɔ sɔn ni banda ɛ na tena wan nyan‑da. Wo e a ɔ sɔn fan to ni a ee nyan tena. Chɛɛ wo ee che koe chɛ n sin fasai‑a, miin mbe ma tena sanche.

⁵⁷ “A nyin fan wo wandi ni a ɔ sɔn, koe min nyin a ma koe a wo boo ɔ.

⁵⁸ Ni mɔ ɔ mɔ‑a i ma siibia, a ma i ma gbɔsɔɛ a bai chɛ ni sa wo tɛ ɔ. I ma dɔn wo ni ta kuti ɔ, min mbe a ma, wo ni sɔ chiti tɛ mɔɛ n chen kɔɔ. Ni chɛ ma‑a, chiti tɛ mɔɛ n bɛɛ mbe i be‑a wan sawa kun ma fɛn mɔɛ n ma, mbɛ sawa kun ma fɛn mɔɛ n bɛɛ‑a i sa pimbi chenɛ a.

⁵⁹ N ni a ma din i tena, mbɛ e ee bɔ‑a pimbi chen chɛ a aan, kɔpɔɛ chɛ dankama gbɔdɛ, an mbe i a bɔnɔ‑a min na, i ni a be.”