Gboo Kɔdɔsai Ko A 4 - Yataa 'a Dɔbɛnɛ Nama

¹ Yɔnɛ n mbe wo wɛn boo ɔ, wo kosan wo 'a yɔnɛ n bia‑a, a chia ma. A ni ma wo yii ma, mbɛ wo wɛɛ, wo kun ti ɛ wan banda bu ɔ.

Pɔɔ ɛ dasi be‑a

² Wo ma sɛmbɛ samunɛ chɛ koe a pien. Wo e ma chɛ a, wo wo yii si koe n ma, wo e ta‑a Yataa wai bɔ‑a, tima ɔ tima ko a.

³ A sin, wo samunɛ chɛ nn ko a, min mbe a ma, Yataa ni chia yian nn na, a 'a bai chɛ ɔ yian koe a. Sakana bai chɛ, Yataa‑a min dɔ nun tee mɔɛ n ma, n ni a ɔ yian den mɔɛ n na. Sakana bai chɛ, a si Chasi ma, n mbe ka sa ɔ pimbi chenɛ a min ko a.

⁴ Wo samunɛ chɛ n ko a, min mbe a ma, n ni bai chɛ ɔ yian gbadan, yɔ a nyin n ni koɔ buɛ min dɔ.

⁵ Mɔɛ chɛ nu, miin nii ma an kai fa ni Chisɔsi a, ni wo‑a chia ɔ chia ma sɔn, Chasi wakoe ɔ yian koe a an na, wo wo sɔɛ gbɛɛ chɛ a ɔ.

⁶ Wo da a bai a ni dia mɔɛ n too ɔ, a ma ni kawa an ye. Chɛ ɛ a ma‑a wan, wo ni kosan mɔɛ gbɛɛ da a bai ma yɛman‑da.

Pɔɔ ɛ kɔndɔnɛ chɛ‑a

⁷ Mmɔ suun ma nyɔɛ Tikikɔsi, min ko a di n ye, nn bɛ ɛ wai chɛ tena min na Chasi ko a, ɛ si‑a wan ko ɔ ko ma min ma‑a n na, a ni a ɔ yian wo a. Nn toen mu a a kaka, a sin mbe wai chɛ tena danaya ɔ, Chasi ko a.

⁸ N toen mu, a ni a ma wo ni a ɔ sɔn, nn mbe buɛ min dɔ nɛ, a yɛ to, a ni wo faa ma nande. Chɛ an fɛ mu, n‑na a sɔ wo tena.

⁹ An fea, wo bɔɛ dɔndɔ a, min tɔ mu Wɔnesimɔsi, an fan mbe na tena. A wɛɛ, suun ma nyɔɛ an nɛ Chasi ɔ, nn toen mu min na, a sin mbe wai chɛ tena a faa gbɛɛ a, Chasi ko a. An mbe si‑a wan ko ɔ ko ma, min mbe nɛ, an ni a ɔ yian wo a.

¹⁰ Nn fea ɛ nɛ n bɔɛ min na pimbi chenɛ a, Ayisitakɔsi, a wɛɛ ɛ wo kɔndɔn tena. Maki wɛɛ, Banabasi suun ma nyɔɛ chɛ, ɛ wo kɔndɔn tena. Min sien mu mɔna chɛ ma, n ban‑da a ɔ yian‑da wo a, wo e min ma, ni a che‑a wo ma. Wo wo boo si a kɔɔ chɛndɛ chɛ.

¹¹ Chisɔsi chɛ wɛɛ, min tɔɛ mu ka to Chɔsitɔsi, a wɛɛ ɛ wo kɔndɔn tena. Nn bɛ ɛ wai chɛ mɔɛ miin gbɛɛ a, Yataa 'a mansaya ko a, an sawa chɛ dechee, an fan mu Chu mɔɛ n na. A sin, tima ɔ tima ko a, an bakoe mu buɔdia wa an na n tena.

¹² Wo bɔɛ dɔndɔ wɛɛ to, Ɛpafasi, min mu to Yataa 'a wai chɛ mɔɛ a, ɛ wo kɔndɔn tena. Tima ɔ tima ko a, ɛ samunɛ chɛ tena wan wo ko a, a faa gbɛɛ a. A ɔ, Yataa ni a ma, wo ni sɔ gban a ko a, wo yii na tɛenɛ ɛ gbae Yataa faa ma koe gbɛɛ ma, min mbe wo ko a.

¹³ Koe min na mu, n fandi gbu, n mbe siiya bɔ wan a ko a. N‑na a ɔ yen fan, a‑a wai chɛ buɛ min dɔ a sɔɛ gbɛɛ a, basan koe a wo ma, wo bɛ Daɔdisia a, ni Iyapɔdisi duu ɔ mɔɛ n na.

¹⁴ Kai Duku wɛɛ, mmɔ faa ma danda chɛ mɔɛ, an fea Demasi a, an mbe wo kɔndɔn tena.

¹⁵ Mmɔ suun ma nyɔɛ nu Chasi ɔ, Daɔdisia duu ɔ, wo an kɔndɔn n ye. Bɔɔɛ Nimfa wɛɛ, wo ni a kɔndɔn, a basan chɔchi mɔɛ chɛ n na, miin mbe bɛn a 'a chenɛ a.

¹⁶ Ni wo ban‑da gboo chɛ kan‑da, wo a ma, an ni a kan chɔchi mɔɛ chɛ n bɛɛ tena Daɔdisia chɔchi ɔ. Wo wɛɛ wo gboo chɛ kan, n‑na min na ta chɔchi mɔɛ chɛ n bɛɛ tena Daɔdisia. An mbe a a na tena wo tena.

¹⁷ Wo a fɔ Akipɔsi ye, wo ɔ, a ni a ɔ yen, mbɛ ɛ wai chɛ chɛ tena wan, Mansa Chisɔsi‑a a boo bun a ma, min chɛ koe a.

¹⁸ N fandi gbu, n fan Pɔɔ, n fɛn mbe ka gboo chɛ nyɛn‑da, n ni wo kɔndɔn. A ni ma wo yii ma, mbɛ n mbe sa ɔ pimbi chenɛ a. Yataa ni wo dua.