Gboo Kɔdɔsai Ko A 2 - Yataa 'a Dɔbɛnɛ Nama

¹ N toen mu wo ni a ɔ sɔn, mbɛ n mbe mɔnɛ ɔ bia tena wan pien wo ko a. N‑na a chɛ wan mɔɛ chɛ n bɛɛ ko a, miin mbe Daɔdisia duu ɔ, ni mɔɛ tɔɛ chɛ n gbɛɛ ko a, nn ma nyɔn yen nin bɛ, nn bɛ miin na.

² N‑na chɛ ma, min mbe a ma, wo wan, ni an fan, wo gbɛɛ ni wo faa gbɛa, mbɛ wo ko a dia‑a wo nyɔn ye, wo ni ma kuiɛ dɔndɔya ɔ. Chɛ ɛ a ma‑a wan, yiinatɛ chenama ni ma wo ɔ, koe ɔ gbɛ koe a chɛndɛ, ɛ na min na. An chia chɛ a mu, wo e Chasi wakoe ɔ gbɛ, min mu Yataa 'a koe ɔ nundenɛ a tee.

³ Chasi an mu mɔɛ a, min mbe a ma, mɔ gbu ni Yataa 'a yiimatɛ gbɛɛ ɔ gbɛ, min maen mu yɔ nyan fenɛ min nundenɛ ɛ.

⁴ N mbe chɛ fɔ tena, min mbe a ma, mɔ ɔ mɔ ma na wo bun, an 'na daɔdia bai ma kawaenɛ n na, an mbe miin dɔ yian‑da.

⁵ N mbe wɛɛ nɛ pɔɔ, chɛɛ n faa ɛ wo tena. N bu ɔ diama mu, koe min na mu, wo e chia chɛndɛ ma, wo ma ka ni ɛnden bɛɛ a wo gba ɔ, wo kai fa koe a Chasi a.

Pɔɔ ɔ te, mmɔ ma mmɔ kan kɔ sɔ Chasi a

⁶ Chɛ an fɛ mu, wo‑a Chisɔsi Chasi ma sɔn ka buɛ min dɔ, wo kun ka mansa a, wo ma‑a ka buɛ min dɔ mɔ dɔndɔɛ a, wo tachɛ buɛ ma ka a ta fɛ.

⁷ Wo ban‑da wo kai fa‑a a a gban. Chɛ an fɛ mu, wo a a tun wo kai fa koe ma a a, wo ma yɛ kuu kɔ. A sin, wo‑a wo kai fa ka buɛ min dɔ a a, wo ma yɛ to kuu kɔ, yɔ a fɔen mu buɛ min dɔ wo ye. Tima ɔ tima ko a, wo Yataa wai bɔ.

⁸ Wo wo kun ma fɛn, wo ma na ma yɔnɛ a, mɔ dɔ mende n 'na yiinachii ɔ yansama boo ɔ. An ma na wo bun, wo ni bea mɔ gbu ta manda n fɛ, wo ni bea dunya chɛ ma nyina n fɛ. An mbe ee ma‑a Chasi ta chia fɛ.

⁹ Koe min na mu, Chasi ni mɔ gbu gboo an dɔ nɛ dunya ma, chɛɛ Yataa ni a a, chia ɔ chia a.

¹⁰ A wan mu mansa a, mansa kan kɔ kan ko a, maeka kan kɔ kan ko a, ni nyina kan kɔ kan ko a. A sin, wo wɛɛ, wo fɔɛ da fa‑a gban, koe min na mu, wo ma‑a gbɛ mɔ dɔndɔɛ a, wo bɛ Chasi a.

¹¹ Wo ma min chɛ‑a mɔ dɔndɔɛ a, wo bɛ Chasi a, wo a ban‑da kamincha‑a. Mɔ gbu ta da kamincha ma, chɛɛ Chisɔsi ta mu. A sin‑na a ma, mbɛ wo kunɛ bɔ‑a wo 'a ko yama n dɔ, miin ma nyin mɔgbuya chɛ ɔ.

¹² Yii chɛ‑a kɛn wo kunɛ ɔ, Yataa chia a, a tima chɛ a, a ma‑a wan yɔ wo tɔn‑da wan ka, wo bɛ Chasi a. A yɛ to, mbɛ Yataa‑a wo kɔɔ sɔ, a ka saya ɔ, wo bɛ Chasi a to. Danaya ni wan wo ɔ Yataa 'a gbasaya ko a, min‑na Chisɔsi kɔɔ sɔ, a ka saya chɛ ɔ. An danaya chɛ sin fan‑na a ma, chɛ ma‑a.

¹³ Tima ni wan nɔ, wo faenɛ ni wo 'a ko yama n boo ɔ, Yataa tena. A sin, wo kunɛ nii ma bɔ ni wo 'a ko yama n dɔ, miin nii ma nyin mɔgbuya ɔ. Chɛɛ Yataa‑a wo a yɛ to fɔɛ ɔ, wo bɛ Chasi a. Mmɔ gbɛɛ, Yataa‑a a boo bɔ mmɔ 'a ko yama n dɔ.

¹⁴ A‑a mmɔ kun ka wan, a bɔ mmɔ 'a ko yama n dɔ, Yataa ni mmɔ gbɛmbo‑a miin ko a. A‑a saya min chɛ kɔn gbengbandenɛ ma, Yataa‑a a boo bɔ nɔ wan an ko yama chɛ n dɔ.

¹⁵ An kɔn gbengbanden chɛ ma, Chasi‑a a ma wan, nyina yama n 'na gbasaya ban‑da. A‑a an nyina yama chɛ n ma wan tɔmɔsi a, fanka ɔ den, mbɛ a wan Chasi, a kun‑da an ma.

¹⁶ Chɛ an fɛ mu, miin sien mu wo daun fenɛ ma, ni fenɛ min mbe min, mɔ ɔ mɔ ma kaa a tɛ, a si a ma. A yɛ to, kaa a ma tɛ, a si bɛn ba chɛ n ma, wo e miin bia, a a ma tɛ kau nama ma, a a ma tɛ suin tee wɛɛ wakoe ma.

¹⁷ Koe min na mu, koe miin mbe na tena ma‑a, an nininɛ gbama gbama n fan nɛ. Koe kuu ba gbu, a sien mu Chasi an ma.

¹⁸ Wo ma dɔn mɔɛ chɛ n ni a fɔ wo ye, mbɛ wo ee Yataa chia ma. Mɔɛ chɛ nu, miin toen mu chii koe a wo ma, kooya be koe a maeka n ma, mbɛ wo‑a an fai. A yɛ to, an mbe a fɔ, an dɔ, an mbe koe n dɔ yen fan, miin dɔ nunden mu. An mbe ma‑a ka fania an dɔ, an mbe yonka tɛ‑a, mɔgbuya chia a, tea sin mbe ee a ɔ.

¹⁹ An mbe ee Chasi bia‑a an boo fea a, a wɛn mu mmɔ kun ti a. Chasi an mbe na a 'a mɔɛ n gbɛɛ a kaina dɔndɔɛ. Ɛ wan dechee yɔ mɔ gbu gboo, ni a sɔna nu, an gbɛɛ‑a tun tunden mu buɛ min dɔ. Fasa mɛsɛ chɛ nu, miin mbe an dɔ, an tɛ ma tɛ ni, a sin an mbe wai chɛ kuiɛ dɔndɔya an dɔ. An mbe koa wan, yɔ Yataa toen mu an ni koa buɛ min dɔ.

²⁰ Wo bɛ Chasi a, wo wan fa‑a dɔndɔ a, mbɛ nyina yama n 'na gbasaya ee to wo kun ma dunya ɔ. Chɛ an fɛ mu, ko ɔ ko ma a ma to, wo ni bea dunya chɛ ɔ fɔɛ fɛ, ko ɔ ko ma a ma, wo ni bea a ɔ sawa n fɛ.

²¹ Sawa chɛ nu, miin‑na a fɔ, an dɔ, “Wo ma tu daun fen chɛ a, wo ma chɛ bia, wo gbu ma chɛ n ma fɛn.”

²² Mɔ gbu n fan‑na sawa chɛ n sa, mbɛ an‑na mɔɛ n kan an ma. Chɛɛ ni mɔɛ ban‑da dechee daun fen chɛ n daun‑da, ko ɔ ko ee to chɛ gbakɔ, an mbe tui wan.

²³ Ni mɔɛ‑a sawa chɛ n gbu ma fɛn, a maenɛ mu yɔ tea ɛ koe miin dɔ. Koe min na mu, an mbe a din fan mɔɛ n ma, samunɛ ɛ chɛ buɛ min dɔ. A yɛ to, an mbe an fandi ma yii buɛ min dɔ, a basan koe n na, an mbe miin si an gboo a. Chɛɛ chɛ n gbɛɛ, tea ee an dɔ. An gbɛɛ ma fen kɔ fen na, ni mɔɛ gbu‑a a yii na chii chia n ma, mɔɛ ɛ kun buɛ min dɔ, a ni a gboo bia, Yataa chia a.