CHƆN 4 - Yataa 'a Dɔbɛnɛ Nama

Chisɔsi‑a musu dɔndɔ tan Samayia chɛnyɛ ɔ

¹ Chisɔsi na‑a a ɔ sɔn fan, min fɔen ni Chu mɔɛ chɛ n ye, miin ni Fayisii n na. A fɔen fan ni an ye, mbɛ mɔɛ miin mbe bea tena a wan Chisɔsi fɛ, ɛ yii chɛ tena miin kunɛ ɔ, Yataa chia a, an da a koo, an ni ben Chɔn ta n ma.

² Chɛɛ Chisɔsi wandi gbu sin fan nii yii chɛ‑a mɔɛ n kunɛ ɔ, Yataa chia a, a fɛ denɛ n fan ni a ma tena.

³ Chisɔsi‑a a a min kɛn bai min ni sa tena, a si a ma, a bɔ‑a wan Chudia chɛnyɛ ɔ, mbɛ a yɛ‑a Kadidi chɛnyɛ ɔ.

⁴ A ni kɛn ta‑a Kadidi chɛnyɛ ɔ, a ben‑da Samayia chɛnyɛ ɔ chia an na.

⁵ Samayia chɛnyɛ chɛ ɔ, a‑a duu dɔndɔ tan fan, min tɔ ni Sika. Nɔ tena ɔ nii ma yansan duu gboo chɛ a, kai Chekɔpi na‑a min be a 'a denɛ Chosɛfi ma.

⁶ Yii sonɛ wɛɛ, a wan kai Chekɔpi ta ni min na suun, a ni wan bɛ nɔ. Mbɛ Chisɔsi si‑a an yii son chɛ baima, koe min na mu, tachɛ ɔ yansama chɛ na‑a a gboo ɔ fa wan. A tima chɛ a, tee cheenɛ ni gbɛ mɔ kun tɛ.

⁷ A ɔ ma yansan ni, mbɛ Samayia musu dɔndɔ na‑a yii bɔ tena son chɛ ɔ. Mbɛ Chisɔsi ɔ a ma, “N kɔ yii ɔ, n mbe n min.”

⁸ A tima chɛ a, a fɛ denɛ n taenɛ ni duu ɔ, daun fen san tena.

⁹ Mbɛ musu chɛ ɔ, “Chɛɛ Chu mɔɛ mu i a, n sin mu Samayia mɔɛ a. Mmɔ ma to ni mmɔ nyɔn na ɛnden bɛɛ a. E kun kan ma i ni yii fuin n ma?”

¹⁰ Mbɛ Chisɔsi ɔ, “Ni i na‑a Yataa 'a wai nyima sɔn fan mɔɛ n tena, a sin, i na‑a n sɔn fan, n fɛn mbe ka koɔ‑a i tena, i ni tisa dɔ mende an chɛ‑a n na. A sin, n ni yii be‑a wan i ma, min mbe fɔɛ be mɔ gbu ma.”

¹¹ Mbɛ musu chɛ ɔ, “Kai, yii bɔ chiti ee kɛn i boo ɔ, yii son chɛ sin dɔ yansan. E ka‑a gbɛ mende yii chɛ a, min mbe fɔɛ be mɔ gbu ma?

¹² Nn bemba n ta bemba kai Chekɔpi, an‑na yii son chɛ to nn boo ɔ. An bɛ a 'a denɛ n na, an ni yii son chɛ an min. A 'a sɔ fenɛ n bɛɛ, yii son dɔndɔ gbe chɛ ɔ yii, an ni an min. I toen mu i ni a fɔ n ye, mbɛ i benden mu nn bemba Chekɔpi ma, ae?”

¹³ Mbɛ Chisɔsi ɔ, “Mɔɛ miin gbɛɛ, an mbe yii son chɛ min, an kanɛ a ɛ gbaa‑a wan to.

¹⁴ Chɛɛ mɔ ɔ mɔ min mbe yii chɛ min, n mbe min be‑a a ma, a kanɛ a ee gbaa‑a to kuɔ fɔ. N mbe yii chɛ min be‑a a ma, ɛ ma‑a wan a faa ɔ. A sin, an yii chɛ ɔ ee tɛ‑a, ɛ a ma‑a wan, a ni kuɔ fɔ fɔɛ ma sɔn.”

¹⁵ Mbɛ musu chɛ ɔ, “Kai, an yii chɛ be n ma, n mbe a min, min mbe a ma‑a, n kanɛ a ee gbaa‑a to kuɔ fɔ ko a. N mbe ee ma‑a to yii chɛ ɔ chia ma, yii bɔɛ a tee ɔ tee a.”

¹⁶ Mbɛ Chisɔsi ni a fɔ gbɛ a ye, a ɔ, “Ta wɛ, i ni i chɛɛ chee, mbɛ wo fea na‑a a a.”

¹⁷ Mbɛ musu chɛ ɔ, “Chɛɛ kai ee kɛn n boo ɔ.” Mbɛ Chisɔsi ɔ, “I‑a a fɔɛ min chɛ, i ɔ, kai ee i boo ɔ, tea mu a a.”

¹⁸ A ɔ, “Kai duu an fan‑na i si ka gbɛ musu a, a sin, wo fea ɛ ka min bɛɛ a sanche, an ma i fuu ni. Chɛ an‑na a fɔ, i‑a bai min fɔ ka n ye sanche, tea mu.”

¹⁹ Mbɛ musu chɛ ɔ gbɛ, “Kai, n‑na a ɔ yen gbɛ, mbɛ Yataa 'a gbonka chɛ mɔɛ mu i a.

²⁰ Nn bemba n ta bemba nu, Samayia chɛnyɛ chɛ ɔ, an ni Yataa fai kɔnkɔɛ chɛ an dɔ nɛ. Chɛɛ wo wan Chu mɔɛ nu, wo ɔ, mbɛ Yataa‑a a fɔ wan, a ɔ, mɔ ɛ a fai dechee Chuusaɛn duu ɔ wan.”

²¹ Mbɛ Chisɔsi ɔ, “Bɔɔɛ, dan n da a kuiɛ a. Tima ɛ na tena wan che‑a, tima min na, mɔɛ n mbe ee Fa Yataa fai‑a kɔnkɔɛ chɛ ma, an mbe ee a fai‑a Chuusaɛn duu wɛɛ ɔ.

²² Wo wan Samayia mɔɛ nu, wo ma a ɔ sɔn, wo e min gbu fai tena. Chɛɛ nn fan Chu mɔɛ nu, nn‑na a ɔ sɔn fan, nn mbe min fai. Koe min na mu, Yataa‑a nn too ɔ dia wan, a ma koe a, mɔɛ n ni a 'a bauncha ma sɔn.

²³ Chɛɛ tima ɛ che‑a wan, a sin gbu che‑a gbɛ, tima min na, mɔɛ miin mbe Fa Yataa fai, a Nyina ni gbasaya be an ma a fai koe a. A Nyina chɛ, ɛ tea ɔ yian‑da wan to an na a si a wan Fa Yataa wandi ma. An mɔɛ chɛ n fan mbe Yataa fai tea chia a, a sin mbe an fan yan tena a fai koe a.

²⁴ Yataa ma mɔ gbu a. Chɛ an fɛ mu, mɔɛ miin mbe a fai, a nyin Yataa Nyina wandi ni gbasaya be an ma, a fai koe a. A yɛ to, mbɛ a‑a tea ɔ yian an na, a si a wandi ma.”

²⁵ Mbɛ musu chɛ ɔ, “N‑na a ɔ sɔn fan, mbɛ Chasi, kunka mansa ɛ na tena wan. A sin mbe na‑a kɛn, ɛ ko ɔ ko ɔ yian‑da wan mmɔ a.”

²⁶ Mbɛ Chisɔsi ɔ, “N fan gbu mu an mɔɛ chɛ a, n fɛn mbe ka koɔ tena i tena.”

²⁷ Ɛ bai chɛ fɔ‑a dechee, mbɛ a fɛ denɛ chɛ n yɛ‑a, a ka duu ɔ. A sin, an da ɔ gbaa‑a wan, an‑na a tan kɛn chia ɔ bɔɛ ɔ, an fea musu chɛ a. Chɛɛ an dɔndɔ wɛɛ ma musu chɛ ɔ tisa ni, a ni a fɔ, a ɔ, “I toen mu fen na?” Dɔndɔ wɛɛ ma Chisɔsi ɔ tisa ni, a ni a fɔ, a ɔ, “Fen mu e koɔ‑a musu chɛ tena?”

²⁸ Mbɛ musu chɛ‑a a 'a yii chiti to, mbɛ a yɛ‑a duu ɔ. Mbɛ a‑a koe chɛ ɔ yian nɔ mɔɛ n na.

²⁹ Mbɛ a ɔ, “Wo na, wo ni kaminɛ yen, min‑na ko ɔ ko ɔ yian n na, n‑na miin gbɛɛ ma wɛ. A e na ma kunka mansa chɛ an na?”

³⁰ Mbɛ mɔɛ n na‑a Chisɔsi tena, a ka an duu chɛ ɔ.

³¹ Chɛ ɛ ma‑a tima min na, Chisɔsi fɛ denɛ n ni a ma nande tena wan, an dɔ, “Kan mɔ, daun fenɛ sima daun gbɛ.”

³² Chɛɛ a ɔ, “Daun fenɛ ɛ n boo ɔ, wo dɔndɔ wɛɛ ma min bakoe ɔ sɔn.”

³³ Mbɛ a fɛ den chɛ nu, an bun‑da an nyɔn dɔ tisa‑a, an dɔ, “Mɔɛ an mbe na na daun fenɛ a kai chɛ ye?”

³⁴ Mbɛ Chisɔsi ɔ, “Min 'na dɛya mu n na, ni n‑na a faa ma koe ma, n ni a 'a wai a ban, a‑a n sɔ min na, an mu n 'na daun fenɛ a.

³⁵ Wo e a fɔ wan, wo ɔ, a ka a fɛn tima ma, wo ɔ, kau naanin fan mbe ben, wo ɔ, a tɛ koe a. Chɛɛ n ni a ma din wo tena, mbɛ wo ni an sɛnɛ gbu ma mɛn, wo e a ɔ yen‑da wan, mbɛ fen chɛ n gbu, miin fɛndenɛ ɛ ka, an tɛ tima gbu che‑a.

³⁶ A tɛ mɔɛ nu, an mbe wan gbɛ wai‑a, an sin mbe wan gbɛ an 'na tɔnɔnɛ ma sɔn‑da. An sin mbe an fɛn fen chɛ min na sɔn sɔn‑da, an nɛ mɔɛ n na, miin‑na kuɔ fɔ fɔɛ ma sɔn. A fɛn mɔɛ nu, an bɛ a tɛ mɔɛ n na, an 'na buɔdia koo.

³⁷ Chɛ fɛ mu, tea mu tai chɛ a, an mbe min tɛ, an dɔ, ‘A fɛn mɔɛ ɛ gba, a tɛ mɔɛ wɛɛ ɛ gba.’

³⁸ N yen ko, n‑na wo sɔ wo bɔɛ n ta tɔɔ gba tɛ‑a, wo‑a tɔnɔnɛ sɔn an 'na taa sende ɔ.”

³⁹ Samayia mɔɛ chɛ n sɛsɛ nu, an duu chɛ ɔ, an na‑a an kai fa wan Chisɔsi a. Chɛ na‑a ka musu chɛ da a bai an ma, a na‑a a fɔɛ min chɛ, a ɔ, a‑a ko ɔ ko ɔ yian a a, a ɔ, a wan musu chɛ, a ɔ, a na‑a min ma fɔɛ ɔ.

⁴⁰ Chɛ an‑na a fɔ, an na‑a kɛn Chisɔsi tena, an‑na a ɔ bia wan disa a, ma koe a nɔ an tena. Mbɛ Chisɔsi‑a tee fea ben nɔ an tena.

⁴¹ A ka chɛ ma, mɔɛ n sɛsɛ, a‑a sakana bai min sa, an‑na a ma, an‑na an kai fa a a.

⁴² Mbɛ an dɔ musu chɛ ma, an dɔ, “I da a bai dechee an mbe ee a ma tena to, nn mbe nn kai fa tena a a. Chɛɛ koe min na mu, nn fandi gbu, nn‑na a da a bai a min. A sin, nn‑na a ɔ sɔn gbɛ, mbɛ a wan gbu mu dunya chɛ baun mɔɛ a.”

Chisɔsi‑a kɔmende mɔ dɔndɔ 'a denɛ baun

⁴³ Chisɔsi‑a tee fea chɛ ben kɛn nɔ, mbɛ a ben‑da Kadidi chɛnyɛ ɔ.

⁴⁴ A wandi gbu na‑a a fɔ wan, a ɔ, “Baa ee Yataa 'a gbonka chɛ mɔɛ ma, a wandi gbu waa a.”

⁴⁵ A che‑a kɛn Kadidi, nɔ mɔɛ nu, an‑na an boo si wan a kɔɔ. Koe min na mu, an bɛɛ na‑a ta wan Chuusaɛn duu ɔ, kun bɔ a ɔ bɛnɛ kun ma. A tima chɛ a, an na‑a ko ɔ ko yen fan, Chisɔsi na‑a miin ma, an bɛn chɛ ɔ.

⁴⁶ Mbɛ Chisɔsi che‑a Kana duu ɔ, Kadidi chɛnyɛ chɛ ɔ, a na‑a yii ma fan kaina min gbɛ a. Duu dɔndɔ ɔ, min tɔ ni Kapanaun, kɔmende mɔ dɔndɔ 'a den kaienɛ gbandienɛ ni wan nɔ.

⁴⁷ Mbɛ kamin chɛ, a‑a Chisɔsi na koe a min Kadidi, a ka Chudia chɛnyɛ ɔ. A‑a chɛ a min kɛn, mbɛ a na‑a a tan. Kamin chɛ‑a Chisɔsi ɔ tisa wan, disa ɔ, a ɔ, an ni yii Kapanaun, a ni a 'a denɛ a baun, min ni gbɛ sa ɔ dechee saya ma kɔnɛ a.

⁴⁸ Mbɛ Chisɔsi ɔ a ma, a ɔ, “Wo wan, ni wo ma kamaya koe n dɔ yen ni ma‑a, wo dɔndɔ wɛɛ ee wo kai fa n na.”

⁴⁹ Mbɛ kɔmende mɔɛ chɛ ɔ, “Kai, na, mɔ ni ta, n 'na denɛ ma na fa.”

⁵⁰ Chisɔsi ɔ a ma, a ɔ, “Ta dechee, i 'a denɛ ɛ baun tena wan.” Kamin chɛ dan‑da wan Chisɔsi da a bai chɛ a, mbɛ a yɛ‑a.

⁵¹ A to‑a yɛ an na a waa a, mbɛ an bɛn‑da a 'a bɔi denɛ n na. An dɔ, “I 'a denɛ ee fa tena.”

⁵² Mbɛ a‑a an dɔ tisa, ni tima min na ni a 'a denɛ‑a a kuu sɔ fisa‑a. Mbɛ an dɔ, “Chima chɛ bɔ‑a a ɔ kunun fan, tee ben‑da kɛn ɛnden na kun tɛ ma.”

⁵³ Mbɛ a puin‑da den chɛ fa yii ma, mbɛ a tima chɛ a ni kunun, Chisɔsi na‑a a fɔ a ye, a ɔ, a 'a denɛ ɛ baun‑da wan. Mbɛ a wandi ni ma, a basan a 'a chenɛ a mɔɛ n gbɛɛ a, an‑na an kai fa Chisɔsi a.

⁵⁴ A gba fean bɔɛ an nɛ, Chisɔsi ka‑a Chudia chɛnyɛ ɔ, a yɛ‑a Kadidi, mbɛ a‑a kamaya koe ma.