CHƆN 3 - Yataa 'a Dɔbɛnɛ Nama

Nikɔdemɔsi‑a chia ɔ bɔɛ chɛ, an fea Chisɔsi a

¹ Mbɛ kaminɛ ni wan nɔ, min tɔ ni Nikɔdemɔsi. Ya ɔ sɔɛ dɔndɔ ni a a, Chu mɔɛ chɛ n tɛ ɔ, a sin, Fayisii dɔndɔ ni to a a.

² Yɛɛ dɔndɔ ma, kamin chɛ na‑a wan Chisɔsi tena, mbɛ a ɔ, “Kan mɔ, nn‑na a ɔ sɔn, mbɛ i ta tichaya, Yataa an‑na i a na. Mɔ ɔ mɔ ee che kamaya koe chɛ n ma‑a, e miin ma ka, mɔɔ ni Yataa ma‑a an mɔɛ chɛ kɔ.”

³ Mbɛ Chisɔsi ɔ, “N ni a ma din i tena, mɔ ɔ mɔ ee don Yataa 'a mansaya kɔɔ, mɔɔ ni a mɔɛ chɛ suun‑da to a nama a.

⁴ Mbɛ kamin chɛ ɔ, “Musu si kai, ɛ kun ka ma to a ni suun, a gba fean bɔɛ ko a? A de ee che kɛn to, a ni a bu ya a nama a, mbɛ a‑a a suun, gba fean bɔɛ ko a.”

⁵ Mbɛ Chisɔsi ɔ, “N ni a ma din to i tena, mbɛ mɔ ɔ mɔ ee che don‑da Yataa 'a mansaya kɔɔ, mɔɔ ni a suun‑da to yii a, an fea Yataa Nyina a.

⁶ Mɔ gbu woo mɔɛ nu, an fan mbe a suun dunya chɛ ɔ. Chɛɛ Yataa Nyina, an mbe a ma, mɔ gbu ni ma Yataa 'a denɛ a.

⁷ Chɛ an‑na a fɔ, a ee che ma‑a i ma kɔndɔ fii‑a, ni n‑na a fɔ, n dɔ, mɔɔ ni wo suun‑da to a nama a.

⁸ Fia toen mu a ni bɔ kaina min, ɛ bɔ nɔ wan. Mɔ ɛ a bɔ kuiɛ a min fan, chɛɛ mɔ ee che a ɔ sɔn‑da, ɛ ka tena kaka min ma. Chɛ an mbe ma mɔ gbu kan kɔ kan bɛɛ a, Yataa Nyina an mbe a ma, mɔ gbu ni suun to a nama a.”

⁹ Chɛɛ Nikɔdemɔsi ɔ, “Yataa Nyina ɛ che ka ma a ma‑a, mɔ gbu ni suun to a nama a?”

¹⁰ Mbɛ Chisɔsi wɛɛ ɔ, “I sin, i ticha wa chɛ Isɔɛɛ mɔɛ n tɛ ɔ, fen mu ee chɛ n dɔ gbɛ?

¹¹ N ni chɛ ma din i tena, mbɛ nn‑na koe miin dɔ sɔn, nn mbe koɔ a si an fan ma. A yɛ to, nn‑na koe miin dɔ yen, nn mbe siiya bɔ a si an fan ma. Chɛɛ chɛ gbɛɛ ɔ, wo dɔndɔ wɛɛ ma ma bɛn ni dan koe a nn 'na siiya a.

¹² Ni n‑na dunya ma koe n dɔ yian wo a, wo ma dan ni n na, wo ee che‑a wo ni dan n na, ni n‑na banda bu ɔ koe n dɔ yian wo a. Chɛ ɛ ma‑a wan?

¹³ A sin ko, mɔ ɔ mɔ ma sɛ nin bɛ banda bu ɔ, mɔɔ dechee n fan, Mɔ Gbu 'a Denɛ. N fan ka‑a nɔ, n yii‑a nɛ dunya chɛ ɔ.

¹⁴ Mosisi ni tima min na suun fuinɛ ma, ka chɛ, min nyandenɛ ni kundu ɔ, a na‑a a dɛn fan kɔnɛ a. A chia dɔndɔ gbe chɛ a, n fan, Mɔ Gbu 'a Denɛ wɛɛ, an mbe n dɛn‑da ka wan.

¹⁵ Chɛ ɛ a ma‑a wan, mɔ ɔ mɔ min kai faen mu n na, an ni kuɔ fɔ fɔɛ ma sɔn.”

¹⁶ Yataa na‑a a 'a Den dɔndɔ gbe be wan, a ɔ yian koe a mɔɛ n na dunya ɔ, koadia min nyɔn sima ɛ a faa ɔ, mɔɛ gbɛɛ ko a. Chɛ an fɛ mu, ni mɔ ɔ mɔ‑a a kai fa a 'a Den chɛ a, a ee fa‑a, a ni to saya ɔ, chɛɛ ɛ kuɔ fɔ fɔɛ ma sɔn‑da wan.

¹⁷ Koe min na mu to, Yataa ma a 'a Den chɛ a na ni dunya ɔ, kaa an na tɛ koe a mɔɛ n ma, a ni an tɔɔ. Chɛɛ a‑a a a na, a ni ma an kun ka mɔɛ a.

¹⁸ Mɔ ɔ mɔ min mbe a kai fa‑a a 'a Den chɛ a, Yataa ee kaa a tɛ‑a a wakoe ma, a ni tɔɔ. Chɛɛ mɔ ɔ mɔ min ma a kai fa ni a a, kaa a bandenɛ mu tɛ‑a a wakoe ma, a tɔɔ koe a, a mu min na, a ma a kai fa ni Yataa 'a Den dɔndɔ gbe a.

¹⁹ Yataa ɛ a 'a kaa a tɛ ka wan mɔɛ n ma. Manɛ na‑a wan dunya chɛ ɔ, min mu tea a si Yataa ma. Chɛɛ mɔɛ n toen mu ma koe a an 'na ko yama n pimbi ɔ, an mbe e na ma man chɛ ɔ. Koe min na mu, an chɛ chɛ wai nu, an ma nyin.

²⁰ Mɔ ɔ mɔ min mbe ko yama n ma, a ma to ni man chɛ a, a sin, a e na man chɛ ɛ ma kaina min. Koe min na mu, a ma to ni, man chɛ ni a 'a ko yama n na bɔ ya a ma.

²¹ Chɛɛ mɔ ɔ mɔ min mbe ko chɛndɛ ma, an mbe na man chɛ tena. A ɛ chɛ ma, min mbe a ma, man chɛ ni a ɔ yian, mbɛ ɛ kooya be wan Yataa ma, a chɛ chɛ wai n dɔ.

Chɔn‑na bai sa, a si Chisɔsi ma

²² Chɛ gbakɔ, mbɛ Chisɔsi ben‑da nɔ ma, an bɛ a fɛ denɛ n na. Mbɛ an ta‑a Chudia chɛnyɛ ɔ. An‑na tima kundu ɛnden ya wan nɔ, Chisɔsi ɛ ta‑a yii chɛ‑a mɔɛ n kunɛ ɔ, Yataa chia a.

²³ A tima dɔndɔ gbe chɛ kɔɔ, Chɔn bɛɛ, a ni Ainon duu ɔ wan. Ainon chɛ, yii ni nɔ kaka, chɛ an fɛ ni, Chɔn na‑a nɔ, ɛ yii chɛ‑a mɔɛ n kunɛ ɔ, Yataa chia a, miin ni na an mbe a tan. A sin, Ainon chɛ tɛ ɔ nii ma yansan Sadin duu ɔ a.

²⁴ Chɛ n ma‑a pɛn, an mbe e na to Chɔn sa‑a pimbi chenɛ a.

²⁵ A tima chɛ a, Chɔn fɛ denɛ dɔ nu, kɔɔsa don‑da wan an tɛ, an bɛ Chu mɔ dɔndɔ a. An kɔɔsa chɛ kunɛ ni mɔɛ ɛ a wandi ma ko buɛ min dɔ Yataa ko a.

²⁶ Mbɛ an na‑a Chɔn tena, an dɔ, “Kan mɔ, kaminɛ wɛɛ yen ko pan yii chɛ‑a mɔɛ n kunɛ ɔ, Yataa chia a. Mɔɛ n mbe nyɔndɔn tena wan gbɛ a tena. A to‑a wan i yii ma, wo fea ni kaminɛ min na Chɔdan yii kaka dɔndɔɛ ma, e min chee ka kunka mansa a, an kamin chɛ mu.”

²⁷ Chɔn dɔ, “Ni koe ma‑a ka, Yataa an dɔn‑da a ma.

²⁸ Wo wandi gbu, n 'na siiya n mu wo a, mbɛ n ni a fɔ wan, n dɔ, n fan ma kunka mansa a. Chɛɛ n dɔ, n 'na naen mu dechee a ya ɔ wan, chia ɔ bɛn koe a.

²⁹ Sɛnama tana, musu fuu kai an ta mu a a. Chɛɛ an kai chɛ bɔɛ tana, min mbe ta a ya ɔ, dɔbɛn chɛ koe a, a too an ma sɔenɛ ɛ ma dechee. A bu ɔ dia‑a wan, ni a‑a musu fuu kai gbu kuiɛ a min. N ta buɔdia da faen mu ka wan gbɛ.

³⁰ A nyin a wan ni ma mɔ chenama wa a, n sin tana n ni ma mɔ dɔɔma a.”

Yataa‑a a 'a Denɛ a na, a ka banda bu ɔ

³¹ Mɔɛ chɛ, min ka‑a banda bu ɔ, a benden mu mɔɛ gbɛɛ ma, tea ko a. Mɔɛ chɛ sin tana min mbe dunya chɛ ɔ, ɛ bai sa a si dunya ma koe n fan ma dechee.

³² Mɔɛ min ka‑a banda bu ɔ, a tana, a‑a miin dɔ yen nɔ, a‑a miin na min, ɛ an fan dɔ yian. Chɛɛ chɛ gbɛɛ ɔ, mɔɛ n mbe ee an boo si a 'a sakana bai kɔɔ.

³³ Chɛɛ mɔɛ nu, miin mbe an boo si‑a a 'a sakana chɛ kɔɔ, an mbe ma‑a ka a ɔ yian fan na, mbɛ Yataa 'a bai mu tea an na.

³⁴ Mɔɛ chɛ, Yataa‑a min na na, an mbe a 'a bai sa. Koe min na mu, Yataa‑a a Nyina min na yii, a ni ma a fɛ, a da faen gban.

³⁵ Mmɔ Fa Yataa toen mu a 'a Denɛ a, an‑na a ma, a‑a gbasaya be a ma fen kɔ fen kun ma.

³⁶ Mɔɛ min mbe a kai fa‑a Yataa 'a denɛ a, ɛ kuɔ fɔ fɔɛ ma sɔn‑da wan. Chɛɛ mɔɛ min mbe ee a kai fa‑a a 'a Denɛ a, a ee kuɔ fɔ fɔɛ ma sɔn‑da. Koe min na mu, Yataa faa tɛenɛ an mbe ma‑a a ma.