CHƆN 2 - Yataa 'a Dɔbɛnɛ Nama

Chisɔsi‑a kamaya koe saa ma, bɛnɛ kun ma Kana duu ɔ

¹ Tee dɔndɔ bendenɛ gbakɔ, a fean bɔɛ ma, Chisɔsi de ni wan daun chɛ bɛnɛ ɔ, Kana duu ɔ, Kadidi chɛnyɛ ɔ. An bɛn chɛ kunɛ ni musu si koe an na.

² Mbɛ Chisɔsi wɛɛ, an ni a chee sonda an na, an bɛn chɛ ɔ, an bɛ a fɛ denɛ n na.

³ Gbɛ min ni bɛn chɛ ko a, sonda chɛ n ban‑da kɛn a min‑da, mbɛ Chisɔsi de koɔ‑a a tena, a ɔ, “Gbɛ gbɛɛ tɛtɛ ban‑da.”

⁴ Mbɛ Chisɔsi ɔ, “Bɔɔɛ, a to n 'na boo ma dechee. Tima ma che nin bɛ n ko a.”

⁵ Mbɛ Chisɔsi de‑a a fɔ bɔi den chɛ n ye, miin ni gbɛ kun ma, min ban‑da ka, a ɔ, “Bai ɔ bai, ɛ min fɔ‑a wo ye, wo a ma.”

⁶ Chu mɔɛ nu, an 'na Yataa fai ɔ, an 'na sawa n kɔkoo, a si an ko buɛ ma. Chɛ an‑na a fɔ, yii si fenɛ n ni wan nɔ si ɔ, an ni wɔdɔ, an sin gbɛɛ ni koo wan. An nyanden ni senɛ ɔ wan, a sin, a dɔndɔɛ, a ni yii ya wan, min mbe kadɔn bi fea tɛ bi sawa a.

⁷ Mbɛ Chisɔsi‑a a fɔ an ye, a ɔ, “Yii si fen chɛ nu, wo an na fa yii a.” Mbɛ an‑na an gbɛɛ a fa gban.

⁸ Mbɛ a‑a a fɔ an ye to, a ɔ, “Wo a sima bɔ yii si fen chɛ n dɔ, wo ni ta a a kai wandi tena, min mbe wo ya ɔ.” Mbɛ an‑na a ma ka.

⁹ Yii chɛ, min fandenɛ ni gbɛ ka gbɛ a, a‑a a ma fɛn. A nii ma a ɔ sɔn, gbɛ chɛ ka‑a kaina min. Chɛɛ bɔi den chɛ n tana, miin na‑a yii chɛ bɔ, an na‑a a ɔ sɔn fan. Mbɛ an ya ɔ sɔɛ chɛ‑a kamin chɛ chee, min‑na musu si bɛnɛ ni a ɔ, mbɛ an sɔ‑a ka wan.

¹⁰ Mbɛ a ɔ, “Ni i bɔ n‑na mɔɛ n chee bɛn bonda chɛ ɔ, an mbe gbɛ chɛndɛ pɛn be mɔɛ n ma. Ni an‑na a ɔ yen, mbɛ gbɛ kun‑da an gboo ɔ, mbɛ an‑na a kuu sɔ gbɛ tafu tafu be‑a. Chɛɛ i tana, i‑a gbɛ chɛndɛ si tena ɔ bɛn fan aan, mbɛ i danka‑a a a bɔ‑a sanche.”

¹¹ Kamaya koe wa saa an nii nɛ, Chisɔsi na‑a min ma. A na‑a a ma Kana duu ɔ wan, Kadidi chɛnyɛ ɔ. A na‑a a ɔ yian nɔ wan, a kamayaen ni buɛ min dɔ, mbɛ a fɛ denɛ n‑na an kai fa a a.

¹² Chɛ gbakɔ, Chisɔsi yii‑a Kapanaun duu ɔ. An fea ni a de a, a basan a suun ma nyɔɛ kaima n na, ni a fɛ denɛ nu. An‑na tee kuunden ben fan nɔ.

Chisɔsi‑a mɔɛ n gbain Yataa 'a kata ɔ, ko ɔ chɛ chɛ a

¹³ Tima ni gbɛ che koe an na, kun bɔ a ɔ bɛnɛ ko a. Chɛ ko a, Chisɔsi sɛ‑a wan Chuusaɛn duu ɔ.

¹⁴ A‑a a fo kɛn nɔ, a‑a mɔɛ n tan fan Yataa 'a kata ɔ, an mbe sɔ fenɛ n ma tachɛ‑a. Ninchi nu, an bɛ sa n na, a basan bugbɔɛ n bɛɛ a. Mɔɛ chɛ n bɛɛ, miin ni kɔpɔɛ sinchi, an ni wan nɔ si ɔ.

¹⁵ Mbɛ a‑a bosa nyan fan yuu ɔ, mbɛ a‑a sɔ fen chɛ n gbɛɛ gbain fan kata chɛ ɔ, sa chɛ nu, a basan ninchi chɛ n na. Mɔɛ chɛ n sin, miin ni kɔpɔɛ sinchi ka, a‑a an 'na tebu n na bɔn fan, mbɛ a‑a an 'na kɔpɔɛ a fasan fasan.

¹⁶ Mɔɛ chɛ n sin, miin ni ka bugbɔɛ ma tachɛ‑a, a ɔ an ma, “Wo bɔ nɛ wo 'a bugbɔɛ chɛ n na. Wo sɛmbɛ Fa 'a chenɛ ma koe a fee fen ma tachɛ chenɛ a.”

¹⁷ Mbɛ a puin‑da a fɛ denɛ n yii ma, mbɛ Yataa 'a gboo‑a a fɔ wan, a ɔ, “Fa Yataa, i 'a chen chɛ 'a koadia koo n faa ɔ, n mbe fa tena wan a ko a.”

¹⁸ Mbɛ Chu mɔɛ nu, an ya ɔ sɔɛ nu, an sɔ‑a a kanɛ ɔ. An dɔ, “I‑a koe min ma ka, nn ma a ɔ sɔn ni a gbasaya chɛ ɛ wan i boo ɔ, a ma koe a. E kamaya koe minan ma‑a, a ɔ yian koe a, mbɛ a gbasaya chɛ ɛ wan i boo ɔ?”

¹⁹ Mbɛ Chisɔsi ɔ, “Yataa 'a chen chɛ, wo a te wɛ. Tee sawa tɛ, n mbe a sɔ‑a wan to.”

²⁰ Mbɛ an dɔ, “I ta yiima ɔ, i‑a a sɔ‑a ka ma tee sawa kɔɔ? San bi naanin, kun ma wɔdɔɛ da faenɛ ɛ gban, an‑na an ya wɛ, a sɔ koe a.”

²¹ Chɛɛ Chisɔsi yii nii Yataa 'a chenɛ an ma, a yii ni a wandi gboo an ma.

²² Chɛ an na‑a a ma, a na‑a a kɔɔ sɔ kɛn, a ka saya ɔ, a puin‑da a fɛ den chɛ n yii ma, a ni min fɔ tee. Mbɛ chɛ ko a, an dan‑da Yataa 'a gboo a, a basan bai chɛ n na, Chisɔsi ni miin fɔ.

Chisɔsi‑a mɔ gbu faa ɔ koe sɔn, yɔ a boo den sunɛ

²³ Chisɔsi ni tima min na Chuusaɛn duu ɔ, kun bɔ a ɔ bɛn chɛ tima a, mɔɛ sɛsɛ na‑a an kai fa wan a a. Koe min na mu, an na‑a a ɔ yen fan, a na‑a kamaya koe miin ma.

²⁴ Chɛɛ Chisɔsi ma nyina ni a wandi ma an boo ɔ, koe min na mu, a na‑a mɔgbuya sɔn fan chɛndɛ chɛ.

²⁵ Chisɔsi ya nii mɔ ɔ mɔ a, a ɔ yian koe a, mɔgbuya ɛ buɛ min dɔ. Koe min na mu, a wandi gbu na‑a a ɔ sɔn fan, koe min gbɛɛ ni an faa ɔ.