CHƆN 19 - Yataa 'a Dɔbɛnɛ Nama

¹ Mbɛ Kɔfana Padeti‑a a ma, an‑na Chisɔsi boan chɛndɛ chɛ.

² Mbɛ soya chɛ nu, an‑na mansa banfua nyan wai a sen sendenɛ ɔ, mbɛ an‑na a si Chisɔsi kunɛ a. Mbɛ doma kai kɔ yawaenɛ, an‑na a don a ma mansa doma a.

³ Mbɛ an‑na an yuu sɔ na koe a a tena, an mbe ta‑a ma yɛn ma bun‑da a ma, an dɔ, “Chu mɔɛ n 'na mansa chɛ ni mɛ.” Mbɛ dɔndɔ dɔndɔɛ a, an‑na a gbasi.

⁴ Mbɛ Kɔfana Padeti bɔ‑a to baa ma, mbɛ a‑a a fɔ mɔ fanka chɛ ye, a ɔ, “Wo wo too ma sɔ, n mbe a ma‑a wan, an ni bɔ a a nɛ wo wandi tena. An mbe a ma‑a, wo ni a ɔ yen, mbɛ n ma chia kan kɔ kan yen ni, kaa a tɛ koe a a fa koe ma.”

⁵ Mbɛ an bɔ‑a Chisɔsi a, wai mansa banfua chɛ, a sienɛ ɛ a kun na, doma kai kɔ yawaen chɛ wɛɛ dondenɛ ɛ a ma. Mbɛ Kɔfana Padeti ɔ, “Wo 'a mɔna gbu yen ko.”

⁶ Mɔɛ miin mbe Chu n tɛ Yataa a, an 'na mansa chɛ nu, an bɛ Yataa 'a kata kun ma fɛn poesi chɛ n na, an gbɛɛ‑a Chisɔsi yen kɛn sɔ ɔ an ya kɔɔ, an‑na yee tɛ wan gba fea, an dɔ, “A ni gbangban kɔnɛ ma, a ni fa. A ni gbangban kɔnɛ ma, a ni fa.” Chɛɛ Kɔfana Padeti ɔ, “Wo wandi wo a bia, mbɛ wo‑a a fa a buɛ ɔ. N tana, n ma chia kan kɔ kan yen ni, kaa a tɛ koe a a fa koe ma.”

⁷ Chɛɛ mɔ fanka chɛ ɔ, “Nn 'na sawa ɛ wan nɔ, min‑na a fɔ, mbɛ mɔna chɛ ɛ fa wan. Koe min na mu, a ɔ, Yataa 'a denɛ mu a a.”

⁸ Kɔfana Padeti‑a chɛ a min kɛn, a 'a chiandia gbu kun ma chɛ‑a kaa a tɛ koe a Chisɔsi fa koe ma.

⁹ Mbɛ a yɛ‑a to Chisɔsi a kata chɛ ɔ, mbɛ a‑a a ɔ tisa, a ɔ, “I ta bɔ tena gbu mu mende a?” Chɛɛ Chisɔsi ma a tɛ ni a ma gbukuu wɛɛ.

¹⁰ Mbɛ Kɔfana Padeti ɔ a ma, a ɔ, “E yen ko ban‑da koɔ koe a n tena. A ni ma i yii ma, mbɛ gbasaya ɛ wan n boo ɔ, i kun bɔ koe a saya chɛ ɔ. Gbasaya ɛ wan to n boo ɔ, a ma koe a, an ni i fa kɔn gbengbandenɛ ma.”

¹¹ Chɛɛ Chisɔsi ɔ, “Gbasaya ee che ma‑a i boo ɔ n kun ma, ni Yataa an ma a be ni i ma. Chɛ an fɛ mu, mɔɛ min‑na a ma, an na‑a nɛ chɛ n na i chen kɔɔ, a ta ko yama benden mu i ta ma.”

¹² Kɔfana Padeti‑a chɛ a min kɛn, a‑a chia yan fan Chisɔsi boo ka koe a, a bɔ koe chɛ ɔ. Chɛɛ fanka chɛ‑a yee tɛ to, an dɔ, “Ni i‑a mɔna chɛ boo ka, mbɛ i ma to ni Domi kun ti wa a. Mɔɛ min mbe a wandi ya mansa a, ɛ ma‑a ka a kaa sa‑a Domi kun ti wa chɛ an na.”

¹³ Kɔfana Padeti‑a an da a bai chɛ n na min kɛn, mbɛ a‑a a ma an bɔ‑a Chisɔsi a. Mbɛ a si‑a a 'a kaa tɛ sea a. Sea chɛ ni kaina min, a tɔ ni kaina min nyanden mu senɛ a. Chu mɔɛ n ni nɔ chee, an dɔ, Kabata.

¹⁴ Tee min ma, Chu n ni an ma bɛn suin tee ko a, tee che‑a a kun tɛ. An wichi chɛ ni kun bɔ a ɔ bɛnɛ an ko a. Mbɛ Kɔfana Padeti ɔ an ma, a ɔ, “Wo 'a mansa gbu yen ko.”

¹⁵ Mbɛ an‑na yee tɛ to, an dɔ, “A ni ka ka, a ni ka ka. A ma a ni fa kɔn gbengbandenɛ ma.” Chɛɛ Kɔfana Padeti ɔ, “Wo 'a mansa, wo toen mu n ni a ma, an ni a fa kɔn gbengbandenɛ ma, ae?” Chu n tɛ mɔɛ nu Yataa a, an 'na mansa n dɔ, “Nn 'na mansa mu Domi kun ti wa an na dechee.”

¹⁶ Mbɛ a danka a, Kɔfana Padeti‑a Chisɔsi be soya chɛ n ma nɔ, an ni a fa kɔn gbengbandenɛ ma. Mbɛ Chisɔsi ni gbɛ an fan ko a, an ta‑a a a.

Soya n‑na Chisɔsi gbangban kɔn gbengbandenɛ ma

¹⁷ Chisɔsi wandi an to‑a a 'a kɔn gbengbandenɛ chɛ suun‑da aan an bɔ‑a an duu chɛ ɔ. Mbɛ a‑a a fo kaina, an ni min chee, an dɔ, Kun Konkonɛ Ma. Chu mɔɛ n ni nɔ chee, an dɔ, Kɔkɔta.

¹⁸ An kaina chɛ ni, an‑na Chisɔsi gbangban kɔn gbengbandenɛ ma, a basan kamin fea dɔ mende n bɛɛ a. Chisɔsi an ni dɛn dɔ an kamin fea chɛ n tɛtɛ ma.

¹⁹ Mbɛ Kɔfana Padeti‑a a ma, bai kundu nyɛn‑da gbembe kundu ma, min gbangban‑da kɔn gbengbandenɛ chɛ ma. An bai kundu chɛ ɔ, “Chisɔsi an nɛ, min ka‑a Nasaɛti, Chu n 'na mansa.”

²⁰ Chu mɔ sɛsɛ na‑a a kan fan, koe min na mu, Chisɔsi gbangban‑da ka kaina min, a ɔ nii ma yansan duu a. An bai kundu chɛ nyɛn‑da gba sawa. A nyɛn‑da Chu mɔɛ n da a kuiɛ pɛn dɔ, mbɛ a a mun‑da Domi mɔɛ n ta ɔ, a danka a, a nyɛn‑da Kiisi mɔɛ n ta ɔ.

²¹ Mbɛ Chu n tɛ mɔɛ nu Yataa a, an 'na mansa n dɔ Kɔfana Padeti ma, an dɔ, “I nii a fɔ, i ɔ, Chu n 'na mansa, chɛɛ i ni a fɔ wan, i ɔ, mɔna chɛ, an‑na a fɔ, a ɔ, Chu n 'na mansa mu a a.”

²² Chɛɛ Kɔfana Padeti ɔ, “N‑na a ma ka, an‑na min nyɛn, an mbe to tena nɔ.”

²³ Soya chɛ n‑na Chisɔsi gbangban kɛn kɔn gbengbanden chɛ ma, mbɛ an‑na a ma koa n ya, mbɛ an‑na a ɔ du si tena naanin. A si tena dɔndɔ, soya mɔ dɔndɔ. A 'a gbansan doma an na‑a to gbɛ, mbɛ an‑na a wɛɛ ya.

²⁴ A nɛnɛ wakoe, an nyɔn tɛ ɔ, an dɔ, “Mmɔ ma a a panda. Mmɔ chɛ fenɛ chɛ a ko a, mmɔ ni a ɔ yen mɔɛ min mbe a ma sɔn‑da.” An sin na‑a a ma ka wan. Chɛ ma‑a, min mbe a ma, Yataa 'a gboo na‑a bai min fɔ, a si Chisɔsi ma, a ni bɔ a a. Yataa 'a gboo‑a a fɔ wan, a ɔ, “An‑na n 'na koa n du wan an nyɔn tɛ ɔ, mbɛ an‑na chɛ fenɛ chɛ n 'na gbansanɛ sin ko a.”

²⁵ Chɛ gbɛɛ ɛ chɛ a ɔ tima min kɔɔ, Chisɔsi de ni wan nɔ sɔ ɔ a 'a kɔn gbengbandenɛ chɛ baima. A de dɔ musuma wɛɛ ni wan nɔ. Kai Kopasi 'a musu Mɛi wɛɛ ni wan nɔ, a basan Mɛi dɔndɔɛ chɛ wɛɛ a, min ka‑a Makadaa duu ɔ.

²⁶ Chisɔsi fɛ den chɛ, min ko a ni di a ye gbeden, a wɛɛ ni wan nɔ sɔ ɔ Chisɔsi de baima. Chisɔsi‑a an fea chɛ yen kɛn sɔ ɔ, mbɛ a ɔ, “N de, i 'a denɛ an nɛ gbɛ.”

²⁷ Mbɛ a ɔ an fɛ den chɛ wɛɛ ma, a ɔ, “N bɔ, i de an nɛ gbɛ.” A sin, a ka gbɛ a tima chɛ ma, aan a ta, an fɛ den chɛ ta‑a bɔɔɛ chɛ a a waa a, a‑a a bia yɔ a de.

Chisɔsi fa‑a ka wan

²⁸ Chisɔsi na‑a a ɔ sɔn fan, mbɛ tima chɛ a gbɛ, a ban‑da a 'a wai gbɛɛ chɛ‑a, a ni min chɛ. A sin, min mbe a ma Yataa 'a gboo‑a bai min fɔ, a ni bɔ a a, mbɛ a ɔ, “N kanɛ a gbaa‑a.”

²⁹ A tima chɛ a, gbɛ konama wa ni wan nɔ si ɔ da ɔ. Mbɛ soya chɛ n‑na fen yɔfu yɔfu don a ɔ, a chima‑a dɔgbɔ. Mbɛ an‑na fen chɛ bɔ gbɛ chɛ ɔ kɔnɛ bonɛ a, mbɛ an‑na a a sɛ Chisɔsi da tena.

³⁰ Mbɛ Chisɔsi‑a gbɛ chɛ susu fen yɔfu yɔfu chɛ ɔ, mbɛ a ɔ, “N ban‑da n 'na wai chɛ‑a.” Mbɛ a‑a a kunɛ a bun, a fa‑a.

³¹ Tee chɛ ni Anyima tee an na. Chu n ni an ma bɛn tee chɛ an ma suin tee ko a. Chɛ ko a, an nii ma to ni, su chɛ n ni ma dɛn dɔ kɔn gbengbandenɛ ma an tee chɛ ma. A bɛbɛɛ suin tee min nɛnɛ ni na tena ka, min ni tee wa a. Chɛ na‑a a ma wan, Chu n ya ɔ sɔɛ n‑na Kɔfana Padeti ɔ tisa, a ni a ma, an ni mɔɛ chɛ n chenɛ n dɔ kai kai, an ni fua fa‑a, mbɛ an‑na an su bɔ dɛn dɔ kɔn gbengbandenɛ chɛ n ma.

³² Mbɛ soya chɛ n ta‑a, mbɛ an‑na kaminɛ saa chenɛ n dɔ kai. Mbɛ an yɛ‑a, an‑na kaminɛ dɔndɔɛ wɛɛ chenɛ n dɔ kai kai, an na‑a miin gbangban ka kɔn gbengbandenɛ ma, an bɛ Chisɔsi a.

³³ Chɛɛ an che‑a kɛn Chisɔsi ma, an nii ma a chenɛ n dɔ kai ni. Koe min na mu, an na‑a a ɔ yen fan, mbɛ a faenɛ ni gbɛ.

³⁴ Chɛɛ chɛ gbɛɛ ɔ, soya chɛ n dɔndɔ, a‑a tamba a sendenɛ ya wan, a‑a Chisɔsi kaa fɛ sɔɔ a a. A sin, a ya kɔɔɛ a, wii bɔ‑a wan nɔ, a basan yii a.

³⁵ N fɛn na‑a koe chɛ ɔ yen ma‑a, n fan mbe ka a ɔ yian‑da. N‑na min dɔ yian, tea mu a a, a sin, n‑na a ɔ sɔn fan, mbɛ n mbe tea an fɔ. Chɛ ɛ a ma wan, wo ni a a tun wo kai fa koe a Chisɔsi a.

³⁶ Chɛ na‑a ma, min mbe a ma, Yataa 'a gboo‑a min fɔ, a ni bɔ a a. A‑a a fɔ wan, a ɔ, “An mbe ee a kuu dɔndɔ wɛɛ ɔ kai‑a.”

³⁷ Yataa da a bai dɔndɔ to a 'a gboo ɔ, a ɔ, “Mɔɛ n mbe mɔɛ chɛ ma fɛn‑da wan, an‑na min sɔɔ tamba a.”

An‑na Chisɔsi sa a kamba ɔ

³⁸ Koe chɛ n gbɛɛ maenɛ gbakɔ, Chosɛfi, min ka‑a Ayimatia duu ɔ, a‑a Kɔfana Padeti ɔ tisa wan Chisɔsi su ko a. Chosɛfi chɛ ni Chisɔsi fɛ denɛ an na, chɛɛ nun dɔ ni. A nii ma bɔ ni ya a ma, a mu min na, a chianden ni Chu gbakoo n fan ma. Kɔfana Padeti dɔn‑da kɛn su chɛ be koe a, a ni tɔn, mbɛ Chosɛfi‑a su chɛ a yii, a ta‑a a a.

³⁹ Nikɔdemɔsi wɛɛ na‑a a sɔ wan Chosɛfi fɛ. Nikɔdemɔsi chɛ, an na‑a ta a saa a Chisɔsi tena su ɔ. A ta‑a wan buii a a boo ɔ, min kunyɛ a ni di kaka, su chɛ ko a. An buii chɛ nyandenɛ ni fen fea an na, an ni fenɛ miin chee, an dɔ, maa, ni adosi. Ni mɔ na‑a an buii chɛ sa sechee a, a dɛnɛ ni paun bi wɔnfea kun ma duu ya wan.

⁴⁰ Mbɛ mɔ kaima fea chɛ n‑na Chisɔsi su ya. Mbɛ an‑na fen gbɛ mendemende su chɛ a, an mbe ta‑a buii kunyɛ a diama chɛ yuyu‑a pien a ma. Chu mɔɛ n ni su ma bɛn ka wan, an mbe e na to a sa‑a kamba ɔ.

⁴¹ An na‑a Chisɔsi gbangban ka kaina min kɔn gbengbandenɛ ma, a fa‑a, yadi ni wan nɔ baima. An yadi chɛ ɔ, fanɛ nama ni wan nɔ, an nii ma mɔ su sa nin bɛ min dɔ a kɔma a.

⁴² Mɔ fea chɛ n na‑a Chisɔsi su sa an dɔ, a tɔn kamba a, a mu min na, an ni an baima. A sin to, an tee chɛ bea ma, a ni Chu n 'na suin tee kuu sɔɛ an na.