CHƆN 12 - Yataa 'a Dɔbɛnɛ Nama

Mɛi‑a tu baa gbɛaen ba fasi fasi Chisɔsi chenɛ n ma

¹ Tee wɔdɔ an na‑a to, kun bɔ a ɔ bɛn chɛ ko a, mbɛ Chisɔsi ta‑a Bɛtani duu ɔ, Dasayɔsi waa a. Dasayɔsi chɛ ni, Chisɔsi na‑a a ma, a kɔɔ sɔ‑a, a ka saya ɔ.

² An na‑a yɛɛ ma daun fenɛ ɔ bɛn fan Chisɔsi ko a, Mata ni min dɔ du tena. Dasayɔsi ni mɔɛ dɔndɔ an na, miin bɛ ni daunɛ chɛ tena tebu ma Chisɔsi a.

³ Chisɔsi to‑a daun chɛ chɛ an na, an bɛ gbɛɛ mɔɛ chɛ n na, mbɛ Mɛi‑a tu kunyɛ a diama ya, sani dɔndɔ faa gban. Tu chɛ baa ni gbɛ sai ma, mbɛ a bun‑da a fasi fasi‑a Chisɔsi chenɛ n ma. Mbɛ tu chɛ kunyɛ, a‑a chenɛ gbu gbɛɛ ya. Mɛi yɛ‑a wan, a‑a Chisɔsi chenɛ n ma fian fian a kundi a.

⁴ Chisɔsi fɛ den dɔndɔ min tɔ ni Chudasi Isikayɔti, a ni wan nɔ mɔɛ chɛ n tɛ ɔ. A wan ni na tena Chisɔsi ma tachɛ‑a, chɛɛ ma nyɔnɛ nu ma. Mbɛ a ɔ,

⁵ “A ni nyan‑da wan, sunkun chɛ ni ma‑a tu bonda chɛ ma tachɛ‑a, tee chɛmɛ sawa debea pawa a, mbɛ a‑a a 'a kɔpɔɛ chɛ be yɔn tɔɛ n ma.”

⁶ A nii ma chɛ fɔ ni, a ɔ yian koe a, mbɛ yɔn tɔɛ n bakoe ɛ wan a faa ɔ. Chɛɛ a na‑a a fɔ, koe min na mu, kanka ni a a. A wan ni an 'na kɔpɔɛ kun ma, a bɔɛ n gbɛɛ ko a. A sin, tima sɛsɛ ko a, a ni kɔpɔɛ chɛ dɔ ya wan, ɛ a don a ta faa ma koe ɔ.

⁷ Chɛɛ Chisɔsi ɔ, “A to nɔ dechee. A‑a min ma ka, a‑a n ma bɛn fan ka n tɔn koe a, n fa tima ya ɔ.

⁸ Yɔn tɔɛ n tana, wo bɛ an mbe ma tena an na tima ɔ tima. Chɛɛ n tana, mmɔ bɛ ee ma tena tima ɔ tima.”

⁹ Chɛ ɛ ma‑a tima min na, mɔ fanka wa n‑na Chisɔsi wakoe a min Bɛtani duu ɔ, mbɛ an na‑a wan nɔ. An nii ma na ni, an ni Chisɔsi dɔndɔ gbe an yen. Chɛɛ an na‑a, min mbe a ma, an ni Dasayɔsi wɛɛ yen, Chisɔsi na‑a min kɔɔ sɔ a ka saya ɔ.

¹⁰ Mbɛ a tima chɛ a gbɛ, Chu n tɛ mɔɛ nu Yataa a, an 'na mansa nu, an‑na dɔbɛnɛ chɛ Dasayɔsi wɛɛ fa koe a.

¹¹ A mu min na, an bakoe a ni to, an bɔ Chu mɔɛ n sɛsɛ, an ni ka tena an fɛ, an mbe an kai fa‑a Chisɔsi a.

Chisɔsi don‑da Chuusaɛn duu bu ɔ

¹² Banda ɔ ka dɔndɔɛ ma, fanka wa chɛ, miin na‑a na ka kun bɔ a ɔ bɛn chɛ ɔ, an‑na a a min, mbɛ Chisɔsi ɛ na tena Chuusaɛn duu ɔ.

¹³ Chɛ ko a, mbɛ an‑na gbɛ nyanda an bia an boo ɔ, an mbe ta‑a buɔdia yee tɛ‑a, a ya ɔ chia a. An dɔ, “Mmɔ Yataa tando. Mansa Yataa ni mɔɛ chɛ dua, min na‑a a tɔɛ ɔ. Mansa Yataa ni mansa wa chɛ dua, min mbe na tena ma‑a Isɔɛɛ chɛnyɛ kun ma.”

¹⁴ Mbɛ Chisɔsi‑a sofɛ tɔngbɔ dɔndɔ ma sɔn, a sɛ‑a min kun ma, a bun‑da na‑a Chuusaɛn. Yataa 'a gboo na‑a a fɔ ka wan dechee, a ɔ,

¹⁵ “Chuusaɛn mɔɛ nu, wo ma chian ko ɔ ko ma. Wo 'a mansa yen ko na‑a, ɛ si ɔ sofɛ tɔngbɔɛ kun ma.”

¹⁶ A tima chɛ a, Chisɔsi fɛ denɛ n nii ma koe chɛ n dɔ gbɛ ni. Chɛɛ kɛn Yataa na‑a Chisɔsi kɔɔ sɔ, a sɛ‑a banda bu ɔ manɛ ɔ, mbɛ a puin‑da an yii ma, Yataa 'a gboo na‑a chɛ fɔ wan, a si a ma. A sin, an‑na an chɛ ka a ko a.

¹⁷ Tima min na Chisɔsi na‑a Dasayɔsi chee, mbɛ a bɔ‑a kamba chɛ ɔ, a kɔɔ sɔ‑a saya ɔ, mɔ fanka miin ni nɔ, an na‑a an koe chɛ ɔ yian fan, min na‑a ma ka.

¹⁸ Chɛ an na‑a a ma, mɔ fanka chɛ wɛɛ na‑a a ya ɔ, koe min na mu, an na‑a a a min fan, mbɛ Chisɔsi an‑na kamaya koe wa chɛ ma.

¹⁹ Mbɛ Fayisii chɛ nu, an bun‑da a fɔ‑a an nyɔn tɛ ɔ, an dɔ, “Wo‑a a yen, ko ɔ ko ee bɔ tena ɔ mmɔ boo ɔ. Wo ko bonda chɛ yen bɛ, dunya gbɛɛ ɛ a sɔ tena gbɛ a wan fɛ.”

Chisɔsi ɔ, an mbe na tena wan a fa‑a

²⁰ Mɔɛ chɛ nu, miin na‑a sɛ ka Chuusaɛn bɛn chɛ ɔ, Yataa fai koe a, mɔɛ n ni wan an tɛ ɔ, miin nii ma Chu mɔ a.

²¹ Mbɛ an mɔɛ chɛ nu, mbɛ an ta‑a Fiipi tena, min na‑a ka Besaida duu ɔ, Kadidi chɛnyɛ ɔ. Mbɛ an‑na a fɔ a ye, an dɔ, “Kai, nn toen mu nn ni Chisɔsi an yen ka.”

²² Mbɛ Fiipi ta‑a a ɔ yian Anduu a, mbɛ an fea chɛ ta‑a a ɔ yian Chisɔsi a, mɔɛ chɛ n‑na min fɔ.

²³ Mbɛ Chisɔsi ɔ, “Tima che‑a gbɛ sanche, Yataa ni a ɔ yian, n fan, Mɔ Gbu 'a Denɛ, n kamayaen mu buɛ min dɔ.

²⁴ Ka n mbe chɛ ma din wo tena, mbɛ chin fen kuu, a mu chin fen kuu dɔndɔɛ an na, aan a ni chin, mbɛ a tui‑a. Ni a tui‑a wan, min mbe bɔ gbɛ, mbɛ a‑a gbɔɛ be kaka.

²⁵ Mɔɛ miin gbɔsɔen mu an fandi ko a dechee, an mbe fo‑a wan an fɔɛ a. Chɛɛ mɔɛ miin mbe an fɔɛ be‑a Yataa ma dunya chɛ ɔ, an mbe kuɔ fɔ fɔɛ ma sɔn‑da wan.

²⁶ Mɔ ɔ mɔ min toen mu, a ni ma n kɔɔ, mɔɔ ni a bea‑a n fɛ. Koe min na mu, n 'na bɔi denɛ ɛ ma kaina chɛ wan, n mbe ma‑a kaina min. A sin, Fa Yataa ɛ baa be‑a wan mɔ ɔ mɔ ma, min mbe ma‑a n kɔɔ.

²⁷ “Sanche chɛ ɔ, n faa ɛ mɔnɛ tena. A sin, n ma a ɔ sɔn ni n mbe fen fɔ. N mbe che wan a fɔ‑a, n dɔ, ‘Fa, n kunɛ bɔ koe chɛ ɔ, n ya ɔ.’ Chɛɛ n na‑a chɛ gbu an ko a dunya chɛ ɔ, tima chɛ a.

²⁸ Fa, i 'a kamaya ɔ yian dunya chɛ ɔ.” Mbɛ kuiɛ a min‑da, a ka banda bu ɔ, a ɔ, “N ban‑da a ɔ yian‑da mɔɛ n na, n kamayaen mu buɛ min dɔ, a sin, n mbe na‑a wan to a ɔ yian‑da an na.”

²⁹ Mɔ fanka chɛ miin ni ka nɔ sɔ ɔ, an‑na kuiɛ chɛ a min fan. A sin, an dɔ nu, an dɔ, “Banda an na‑a koɔ ka.” Mbɛ an dɔ n sin, an dɔ, “Maeka an koɔ‑a a tena.”

³⁰ Chɛɛ Chisɔsi ɔ an ma, a ɔ, “Bai chɛ miin na min‑da ka, a ka banda bu ɔ, basan koe ma n ma, chɛɛ basan koe mu wo ma.

³¹ Tima an che‑a ka gbɛ sanche, Yataa ni kaa a tɛ dunya chɛ wakoe ma. Sanche chɛ ɔ, nyina yama min 'na mansaya ɛ dunya chɛ ɔ, a a bea tima an nɛ.

³² Chɛɛ n fan, tima min na an mbe n na sɛ‑a kɔn gbengbanden chɛ ma, n mbe a ma‑a wan, mɔ ɔ mɔ ni na n tena.”

³³ A na‑a chɛ fɔ tima min na, a ni ka a fɔ an na, a ni na tena fa‑a buɛ min dɔ.

³⁴ Mbɛ fanka chɛ koɔ‑a, an dɔ, “Mmɔ 'a sawa‑a a fɔ wan mmɔ ye, mbɛ kunka mansa ɛ ma‑a wan nn tɛ ɔ kuɔ fɔ ko a. Chɛɛ e gbɛ a fɔ‑a nn ye, mbɛ an mbe Mɔ Gbu 'a Denɛ a sɛ‑a wan kɔn gbengbandenɛ ma, a ni fa. Nyɔn mu an Mɔ Gbu 'a Den chɛ a?”

³⁵ Mbɛ Chisɔsi ɔ an ma, a ɔ, “Manɛ chɛ ɛ ma‑a wan bɛ wo tɛ ɔ tima ɛnden ko a. Wo a a tun tachɛ chɛ koe a, manɛ ɛ wɛ nɔ tima min na, min mbe a ma, pimbi ee bun‑da wo ma. Ni mɔɛ a ma‑a tachɛ chɛ‑a pimbi pimbi ɔ, a ee a chen kɔɔ yen, a ta chia sɔn koe a.

³⁶ Chɛ an fɛ mu, wo wo kai fa man chɛ a, tima min na mu wɛ ɛ wo tɛ ɔ. Chɛ ɛ a ma‑a wan, wo ni ma mɔɛ n na, miin mbe manɛ ɔ tima ɔ tima ko a.” Bai chɛ fɔenɛ gbakɔ Chisɔsi boo ɔ, mbɛ a ta‑a, a‑a a wandi ya kɔɔɛ nun an mɔɛ chɛ n ma.

Mɔɛ n sɛsɛ nu, an ban‑da an kai fa koe a Chisɔsi a

³⁷ Chisɔsi na‑a kamaya koe chɛ n gbɛɛ ma boo ɔ boo an ya kɔɔ, chɛ gbɛɛ ɔ, an nii ma an kai fa ni a a.

³⁸ Chɛ ma‑a, min mbe a ma, Yataa 'a gbonka chɛ mɔɛ Aisaya na‑a bai min fɔ, a ni bɔ a a. A na‑a a fɔ wan, a ɔ, “Mansa, mɔ ɔ mɔ ma dan ni nn 'na sakana bai a, nn‑na min fɔ. I sin‑na a ɔ yian fan, i gbasayaen mu buɛ min dɔ.”

³⁹ An nii ma dan ni sakana bai chɛ a, koe min na mu, Aisaya na‑a a fɔ wan to, a ɔ, “Yataa na‑a a fɔ wan, a ɔ,

⁴⁰ “N‑na an ya n na pimbi, an ma na kaina yen. N‑na an yiima n bɛɛ a fa fa‑a, an ma na koe n dɔ gbɛ chɛndɛ chɛ. N‑na chɛ ma, min mbe a ma, an ma na an ya a mun n ma, an ni bauncha ma sɔn.”

⁴¹ Aisaya na‑a chɛ fɔ, koe min na mu, a na‑a a yen fan, Chisɔsi ni na tena ma‑a kamaya tɔɛ min na. A sin, chɛ an na‑a a ma, a na‑a a kɔɔ fɔ mɔɛ n ye.

⁴² Chu n ya ɔ sɔɛ n sɛsɛ nu, a tima chɛ a, an bɛɛ kai faen fan ni Chisɔsi a. Chɛɛ Fayisii n bakoe na‑a a ma wan, an nii an 'na danaya chɛ a bɔ ya a ma. Koe min na mu, an nii ma to ni an ni an gbain kuɔ fɔ an 'na samun chɛ chen chɛ a.

⁴³ An na‑a chɛ ma, koe min na mu, an toen ni mɔ gbu n ta tando an na, a ni ben Yataa ta ma.

Chisɔsi ɔ te, a 'a bai nu, an fan mbe kaa a tɛ‑a mɔɛ n ma

⁴⁴ Mbɛ Chisɔsi koɔ‑a gbankon, a ɔ, “Mɔ ɔ mɔ min mbe a kai fa‑a n na, a ma a kai fa ni n dɔndɔ gbe a, chɛɛ a‑a a kai fa Fa Yataa wɛɛ an na, min‑na n sɔ.

⁴⁵ Mɔ ɔ mɔ min‑na n yen, a‑a Fa an yen ka, min‑na n sɔ.

⁴⁶ N na‑a dunya chɛ ɔ, a ma koe a, mɔɛ n ni manɛ ma sɔn. Chɛ ɛ a ma‑a wan, mɔ ɔ mɔ min mbe a kai fa‑a n na, a ee ma‑a kaina ɔ pimbienɛ ɔ.

⁴⁷ Ni mɔ ɔ mɔ‑a a a min, n‑na bai miin fɔ, a sin, a ma a boo si ni an kɔɔ, n fan mbe ee na‑a kaa a tɛ‑a a mɔɛ chɛ ma, a ni tɔɔya. N na‑a dunya chɛ ɔ, mɔɛ n baun koe an na, chɛɛ an 'na tɔɔya koe ma.

⁴⁸ Mɔ ɔ mɔ min mbe ban‑da n dɔ, a ni a boo bɔ n 'na sakana bai kɔɔ, min mbe kaa a tɛ‑a a wakoe ma, ɛ nɔ. N‑na bai miin fɔ, an fan mbe kaa a tɛ‑a a wakoe ma, a ni tɔɔ. Chɛ ɛ ma‑a wan tee dankama ma, mɔɛ n mbe an kɔɔ sɔ‑a saya ɔ tee min ma.

⁴⁹ N mbe ee koɔ n fandi 'a gbasaya an kɔɔ. Chɛɛ Fa min‑na n sɔ, ɛ min fɔ n ye a fɔ koe a, n mbe an fɔ.

⁵⁰ A sin, n‑na a ɔ sɔn fan, mbɛ ɛ min sin fɔ n ye, an mbe a ma mɔɛ n ni kuɔ fɔ fɔɛ ma sɔn. Chɛ an fɛ mu, n mbe min fɔ, an nɛ dechee Fa‑a min fɔ n ye, a fɔ koe a.”