CHƆN 11 - Yataa 'a Dɔbɛnɛ Nama

Chisɔsi dia nyɔɛ, kai Dasayɔsi fa‑a

¹ Mbɛ kaminɛ yen ko, min tɔ ni Dasayɔsi, a bea‑a gbandi a. A waa tɔ ni Bɛtani. An duu chɛ ɔ, a tensa musu fea nu, an ni wan nɔ, Mɛi an fea Mata a.

² Mɛi chɛ, an mbe na tena na‑a tu kunyɛ a diama fasi fasi‑a Chisɔsi chenɛ n ma, mbɛ a‑a an ma fian chɛndɛ chɛ, a kundi a. A tensa kai an nii nɛ Dasayɔsi chɛ a, min ni ka sa ɔ gbandi ɔ.

³ Mbɛ tensa musu fea chɛ nu, an‑na sakana a ta Mansa Chisɔsi tena, an dɔ, an ni a fɔ a ye, mbɛ a dia nyɔɛ Dasayɔsi gbandi‑a.

⁴ Chisɔsi‑a sakana chɛ a min kɛn, a ɔ, “Dasayɔsi 'a gbandi chɛ, a ee che‑a a ma‑a a ni fa kudai. Chɛ ɛ ma tena, min mbe a ma, mɔɛ n ni Yataa 'a gbasaya ɔ yen. A sin, ɛ ma tena to chia an na, n fan, Yataa 'a denɛ, mɔɛ n mbe n 'na kamaya ɔ yen‑da chia min na.”

⁵ Chisɔsi toen ni suun ma nyɔ n sawa chɛ n na, Mɛi, Mata, a basan an tensa Dasayɔsi a.

⁶ Chɛɛ chɛ gbɛɛ ɔ, a‑a Dasayɔsi gbandi koe chɛ a min kɛn, a nii ma a chen ma bɔ ni nɔ, aan tee fea benden gbakɔ.

⁷ Mbɛ chɛ gbakɔ, a‑a a fɔ gbɛ a fɛ denɛ n ye, a ɔ, “Mmɔ ɛ yɛ tena gbɛ Chudia chɛnyɛ ɔ wan.”

⁸ Mbɛ an dɔ, “Kan mɔ, mmɔ ka kundu chɛ ɔ nɔ, mɔɛ chɛ n toen ni an ni i ma bon bon senɛ a, i ni fa. I toen mu to, mmɔ ni yɛ nɔ wan ka to?”

⁹ Mbɛ Chisɔsi ɔ, “Awa tan kun ma fea an mbe tee ɔ, ae? Chɛ an fɛ mu, mɔ ɔ mɔ min mbe tachɛ chɛ‑a tee a den, a ee a chenɛ a tu, a ni bea. Koe min na mu, ɛ manɛ yen tena wan.

¹⁰ Chɛɛ ni a ma‑a tachɛ chɛ‑a pimbi pimbi ɔ, ɛ a chenɛ a tu wan, mbɛ a bea‑a. Koe min na mu, manɛ ee nɔ, kaina yen koe a.”

¹¹ Chisɔsi‑a chɛ fɔ kɛn, mbɛ a yɛ‑a to, a ɔ, “Mmɔ dia nyɔɛ Dasayɔsi, chinɔɛ ben‑da a a. Chɛɛ n mbe ta tena wan, a sin, n mbe a a kunɛ‑a wan.”

¹² Mbɛ a fɛ den chɛ n dɔ, “Mansa, ni gbandi mɔɛ chɛ chinɔ‑a, mbɛ ɛ baun tena wan.”

¹³ Chisɔsi ni ka a fɔ an na an ye, mbɛ Dasayɔsi fa‑a. Chɛɛ an tana, an‑na a ya, mbɛ ɛ chinɔɛ chɛndɛ chɛndɛ an dɔ.

¹⁴ Mbɛ Chisɔsi‑a bai gbu bu ka an ye, a ɔ, “Dasayɔsi fa‑a.

¹⁵ Chɛɛ wo ko a, n bu ɔ di, n nii nɔ a fa tima a, min mbe a ma, wo ni wo kai fa n na. Wo na, mmɔ ni ta a su tan.”

¹⁶ Mbɛ Tɔmɔsi, an ni min tɔɛ ma si, an dɔ, Fɛn Kai, a koɔ‑a a bɔɛ chɛ n tena, a ɔ, “Mmɔ gbɛɛ mmɔ bɛ mmɔ kan mɔ a, mmɔ ta, min mbe a ma, mmɔ ni fa dɔndɔ a.”

Chisɔsi‑a Dasayɔsi kɔɔ sɔ, a ka saya ɔ

¹⁷ Mbɛ Chisɔsi‑a a fo Bɛtani duu ɔ, an bɛ a fɛ den chɛ n na. A‑a a fo kɛn, a fɔ‑a a ye, mbɛ tee sawa ben‑da gbɛ, kɛn an‑na Dasayɔsi sa a kamba ɔ.

¹⁸ Bɛtani chɛ, an tɛ ɔ nii ma yansan Chuusaɛn na, a nii ma mai fea bɔ ni.

¹⁹ Chɛ na‑a a ma wan, mɔ sɛsɛ ka‑a Chudia, an na‑a Mata sɛbɔ‑a, an fea Mɛi a, a si an tensa kai a saya ma.

²⁰ Mata‑a a a min kɛn, mbɛ Chisɔsi ɛ chia a, ɛ na tena, mbɛ a ta‑a a ya ɔ. Chɛɛ Mɛi tana, a to‑a wan chenɛ a.

²¹ Mata‑a Chisɔsi tan kɛn, a ɔ, “Mansa, ni i ni nɛ wan, n tensa chɛ nii fa‑a.

²² Chɛɛ n‑na a ɔ sɔn fan, mbɛ sanche chɛ wɛɛ ɔ, ni i‑a Yataa ɔ tisa fen kɔ fen ko a, ɛ a be‑a wan i ma.”

²³ Mbɛ Chisɔsi ɔ te a ma, a ɔ, “I tensa ɛ a kɔɔ sɔ tena wan to, a ni yɛ fɔɛ ɔ.”

²⁴ Mbɛ a ɔ, “N‑na chɛ ɔ sɔn fan, mbɛ ɛ a kɔɔ sɔ‑a wan to saya ɔ, a ni yɛ fɔɛ ɔ. Chɛ ɛ ma‑a wan, tee dankama nɛnɛ ma, mɔɛ gbɛɛ ɛ ma‑a a kɔɔ sɔ‑a, a ka saya ɔ.”

²⁵ Mbɛ Chisɔsi ɔ te to a ma, “N fan mbe a ma, mɔɛ n mbe an kɔɔ sɔ, a ka saya ɔ, mbɛ n‑na a ma to, an‑na fɔɛ ma sɔn. An ni a fɔ mɔɛ ni fa wɛɛ, ɛ a tun fan ma koe a fɔɛ ɔ, ni a kai faen fan ni n na.

²⁶ A sin, mɔ ɔ mɔ miin mbe fɔɛ chɛ ɔ, an sin kai faen mu n na, an mbe kuɔ fɔ fɔɛ ma sɔn‑da wan n na. I danden fan mu chɛ a?”

²⁷ Mbɛ a ɔ, “A ɛ ka wan, mansa. N danden fan mu a a, mbɛ i wan mu kunka mansa a, Yataa 'a denɛ. Yataa na‑a i wan na koe fɔ dunya chɛ ɔ.”

²⁸ Bai chɛ n fɔenɛ gbakɔ, mbɛ Mata yɛ‑a, a‑a a dɔ Mɛi chee. Mbɛ an fea gbe tɛ ɔ, a ɔ, “Mmɔ 'a ticha na‑a, a sin, a toen mu a ni i yen.”

²⁹ Mɛi‑a bai chɛ a min kɛn dechee, a ma a ɔ si chɛ ni, a ta‑a a tan dɔndɔ gbe.

³⁰ Chisɔsi nii ma don nin bɛ konko chɛ gbu ɔ, chɛɛ a ni kaina chɛ wan tun, Mata na‑a a tan kaina min.

³¹ Mɔɛ miin na‑a na ka sɛbɔ chɛ tena, an na‑a Mɛi yen fan ɛ a kɔɔ sɔ‑a bui a. Mbɛ an‑na a yen kɛn ta‑a, an bea‑a wan a fɛ. A ni an yii ma, mbɛ a ni ta tena kamba ma wan, di chɛ koe a.

³² Mbɛ Mɛi‑a a fo Chisɔsi ni kaina. A sin‑na a yen kɛn dechee, a bea‑a dɔndɔ gbe a chenɛ a. A ɔ, “Mansa, ni i ni nɛ wan, n tensa chɛ nii fa‑a.”

³³ Mbɛ Chisɔsi‑a a yen Mɛi puyɛ‑a di a. Mɔɛ chɛ n bɛɛ, miin na‑a ka a san‑da, an bun‑da di chɛ‑a. Chɛ‑a Chisɔsi faa mɔnɛ wan, a ma a to ni ɛnden bɛɛ a.

³⁴ Mbɛ a ɔ, “Wo‑a a sa mende kamba ɔ?” Mbɛ an dɔ, “Mansa, na, i ni nɔ yen.”

³⁵ Mbɛ Chisɔsi ya yii yii‑a wuu.

³⁶ Mbɛ mɔɛ chɛ n dɔ an nyɔn ma, an dɔ, “Wo a ɔ yen gbɛ, a toen ni buɛ min dɔ Dasayɔsi a.”

³⁷ Chɛɛ an dɔ nu, an dɔ to, “A wan na‑a a ma fion tɔɛ chɛ‑a kaina yen. A ni a ma wan to Dasayɔsi nii fa.”

³⁸ A fean bɔɛ ɔ to, koe chɛ nii ma Chisɔsi to ni. Mbɛ an‑na a fo kamba chɛ tena. Kamba ni a a, fanɛ ni, sen dɛnfɛ bunden ni min da a.

³⁹ Mbɛ Chisɔsi ɔ an ma, a ɔ, “Wo sen chɛ ka a da a.” Chɛɛ Dasayɔsi tensa musu Mata, a ɔ, “Mansa, a tui kunyɛ yama an mbe bɔ‑a.” A ɔ, “Tee naaninɛ an nɛ ka gbɛ, kɛn a sa‑a a kamba chɛ ɔ.”

⁴⁰ Chɛɛ Chisɔsi wɛɛ ɔ, “N na‑a a fɔ wan i ye, mbɛ ni i‑a i kai fa n na, e a ɔ yen‑da wan, Yataa ɛ kamaya koe miin ma.”

⁴¹ Mbɛ an‑na senɛ chɛ bɔ kamba chɛ da a. Chisɔsi‑a a ya a si banda a, mbɛ a‑a a fɔ, a ɔ, “Fa, n ni i wai bɔ, a mu min na, i‑a n 'na samunɛ a min fan.

⁴² N gbu n‑na a ɔ sɔn fan, mbɛ e a a min fan tima ɔ tima. Chɛɛ n‑na chɛ fɔ dechee mɔɛ chɛ n fan ko a nɛ, min mbe a ma, an ni dan a a, mbɛ i wan gbu‑a n sɔ nɛ dunya chɛ ɔ.”

⁴³ Samunɛ chɛ chɛenɛ gbakɔ Chisɔsi boo ɔ, mbɛ a‑a chee chɛ gbankon, a ɔ, “Dasayɔsi, bɔ nɛ.”

⁴⁴ Mbɛ Dasayɔsi bɔ‑a kamba chɛ gbu ɔ. A bɔ‑a kamba chɛ ɔ, fen gbɛ mendemendeenɛ ɛ a a. A chenɛ n ni ma e, a boo nu, ni a kunɛ gbɛɛ dondenɛ ni fen gbɛ chɛ ɔ. Mbɛ Chisɔsi ɔ an ma, a ɔ, “Wo kasanche chɛ gbɛɛ bɔ a ma, a ni ben ben.”

An‑na kun puinɛ chɛ, a si Chisɔsi fa koe ma

⁴⁵ Mɔɛ chɛ n sɛsɛ, miin na‑a na ka Mɛi sɛbɔ‑a, an na‑a a ɔ yen fan Chisɔsi na‑a koe min ma ka, mbɛ an‑na an kai fa a a.

⁴⁶ Chɛɛ an dɔ nu, an yɛ‑a wan Fayisii dɔ n tena, mbɛ an‑na a ɔ yian an na, Chisɔsi‑a koe min ma.

⁴⁷ Chɛ ko a, Fayisii chɛ nu, an bɛ Chu n tɛ mɔɛ n na Yataa a, an 'na mansa n na, an‑na Chu kuti wa si kaina dɔndɔ. Mbɛ an dɔ, “Mmɔ ɛ fen ma tena gbɛ? Mmɔ a ɔ yen gbɛ sanche, kamin chɛ ɛ kamaya koe min gbɛɛ a tachɛ tena.

⁴⁸ Ni mmɔ‑a a to nɔ, a ni ma kamaya koe chɛ n ma‑a tun tun, mɔ ɔ mɔ ɛ na‑a wan an kai fa a a. A sin, kun ti nu Domi chɛnyɛ ɔ, an mbe ee na‑a mmɔ to‑a nɔ. An mbe na‑a wan, mbɛ an‑na Yataa 'a kata chɛ yɔn nɛ, a basan mmɔ 'a mɔɛ n bɛɛ a.”

⁴⁹ Chɛɛ an dɔndɔ ni wan nɔ, min tɔ ni Kayafasi. An ni tɛ mɔ wa a, Chu n tɛ Yataa a, an san chɛ a. Mbɛ a koɔ‑a, a ɔ, “Wo gbɛɛ, wo ma ko ɔ gbɛ nin bɛ.

⁵⁰ A nyin, wo gbu ni a ɔ sɔn, mbɛ a fisa mɔ dɔndɔ ni fa, mɔɛ gbɛɛ ko a. Chɛ ma che ni mɔɛ gbɛɛ faenɛ ɔ, chɛnyɛ chɛ ɔ.”

⁵¹ Tea gbu a, Kayafasi nii ma bai chɛ fɔ ni, a wandi kun ma gbasaya an na. A ni ka a kɔɔ fɔ an na an ye, Yataa ni na tena koe min ma‑a. A ni ka a fɔ tena wan, mbɛ Chisɔsi ni na tena wan fa‑a Chu mɔɛ n ko a. Chɛ ma‑a koe min na mu, a san chɛ a, a wan ni Chu n 'na tɛ mɔ wa Yataa tena.

⁵² A sin, Chisɔsi nii fa tena an dechee ko a, chɛɛ a ma koe ni to, a ni na Yataa 'a denɛ n na kaina dɔndɔɛ. Yataa 'a denɛ nu, miin gbɛɛ a fasandenɛ ni ben‑da, an ni ma mɔ dɔndɔɛ a.

⁵³ A ka a tee chɛ ma, aan a ta gbɛ, Chu n ya ɔ sɔɛ chɛ dɔ nu, an ni wan gbɛ dɔbɛnɛ ɔ, Chisɔsi fa koe a.

⁵⁴ Chɛ na‑a a ma wan, Chisɔsi nii ben ben to fanka ya kɔɔ Chudia chɛnyɛ ɔ. Chɛɛ a‑a min ma, a ka‑a wan nɔ, mbɛ a ta‑a kaina dɔndɔ, min ni fuinɛ baima. Mbɛ a si‑a nɔ duu dɔndɔ ɔ, min tɔ ni Ɛfan, an bɛ a fɛ denɛ n na.

⁵⁵ A tima chɛ a, tee kuunden fan na‑a to, Chu n 'na kun bɔ a ɔ bɛnɛ ko a. A sin, mɔ sɛsɛ na‑a sɛ wan Chuusaɛn duu ɔ, a ka duu tɔɛ chɛ n dɔ Chudia chɛnyɛ ɔ. An na‑a na, min mbe a ma, an ni an ko an 'na manda ɔ, bɛnɛ chɛ e na to che‑a.

⁵⁶ An ni wan an ya a kan‑da Chisɔsi a. A sin, an na ni kɛn sɔn‑da Yataa 'a kata chɛ ɔ, mbɛ an bun‑da an nyɔn dɔ tisa‑a, an dɔ, “Wo gbu danden fan mu a a, tea ko a, mbɛ ɛ na‑a wan bɛnɛ chɛ ɔ?”

⁵⁷ Mɔɛ miin ni Chu n tɛ ɔ Yataa a, an 'na mansa nu, an bɛ Fayisii n na, an na‑a sawa a ben fan. An na‑a a fɔ wan, an dɔ, ni mɔ ɔ mɔ na‑a a ɔ sɔn, Chisɔsi ni kaina min, an dɔ, an ni a fɔ an ye, an dɔ, min mbe a ma, an ni a bia.