CHƆN 1 - Yataa 'a Dɔbɛnɛ Nama

Yataa‑a a 'a Denɛ a na dunya ɔ

¹ Dunya e na to a kuu sɔ‑a, an mbe mɔɛ min chee, an dɔ, Bai, a ni wan gbɛ nɔ. An fea ni Yataa a, a wɛɛ ni Yataa an na.

² Bai chɛ ni wan gbɛ nɔ, an fea Yataa a, a ka a tima chɛ ma.

³ Bai chɛ an‑na fen kɔ fen na dan. Yataa ma a ma ni, fen kɔ fen min na dan‑da, a a ni dan a gbaa.

⁴ A wan mbe fɔɛ chɛndɛ be. An fɔɛ chɛ, an mu manɛ a mɔ gbu ko a.

⁵ Man chɛ ɛ manɛ be tena wan tun pimbi pimbi ɔ. A sin, pimbi ee che kuɔ fɔ a ma‑a, a ni sɛmbɛ man koe a.

⁶ Kaminɛ ni wan nɔ, min tɔ ni Chɔn. Yataa wandi, an na‑a a sɔ.

⁷ An Chɔn chɛ na‑a, a ni man chɛ wakoe ɔ yian mɔɛ n na, min mbe a ma, mɔ ɔ mɔ ni an sakana bai chɛ a min, an sin ni dan a a.

⁸ A wandi gbu, an nii ma man chɛ a. A na‑a dechee, a ni a wakoe fɔ mɔɛ n ye.

⁹ Mɔɛ min mu tea manɛ a, min mbe manɛ be mɔ ɔ mɔ ma, a ni na tena wan dunya ɔ.

¹⁰ Bai chɛ ni wan dunya ɔ, a‑a dunya min na dan ka. Chɛ gbɛɛ ɔ, mɔɛ n nii ma a sɔn ni a buɛ chɛ ɔ.

¹¹ A ta‑a wan a waa a, chɛɛ a ta mɔɛ chɛ nu, an ma an boo a si ni a kɔɔ.

¹² Chɛɛ mɔɛ n‑na an boo si wan a kɔɔ, miin‑na an kai fa a a. Chɛ ko a, an mɔɛ chɛ nu, a‑a gbasaya be wan an ma, ma koe a Yataa 'a denɛ n na.

¹³ An ma ma ni Yataa 'a denɛ n na mɔgbuya ta chia an na. Yataa wandi an‑na a ma, an ma‑a a 'a denɛ n na.

¹⁴ An ni a wɛn chee, an dɔ, Bai, a na‑a ma wan mɔ gbu a, koadia chinchimaya faenɛ ɛ a faa a, a basan danaya a Yataa tena. A ni wan nn tɛ ɔ. Nn na‑a a ɔ yen fan, a kamayaen ni buɛ min dɔ, kamaya min ni a ɔ, a wan Fa Yataa 'a Den dɔndɔ gbe.

¹⁵ Chɔn na‑a bai sa wan gbankon, a si a ma, a ɔ, “Mɔɛ chɛ mu, n‑na min na koe fɔ wo ye, n dɔ, ‘Mɔɛ min mbe na tena, n gbaa chia a, a gbasayaen mu a ni ben n ma.’ N dɔ, ‘Koe min na mu, a ni wan fɔɛ ɔ, n nii ma suun nin bɛ tima min na.’ ”

¹⁶ Koadia chinchimaya min faen mu a faa ɔ, an mbe a ma tena, ɛ mmɔ gbɛɛ dua tena tima sɛsɛ a.

¹⁷ Yataa na‑a a 'a sawa n na ben Mosisi an na, chɛɛ koadia chinchimaya tana, a basan danaya a, mmɔ‑a an ma sɔn Chisɔsi Chasi an na.

¹⁸ Mɔ ɔ mɔ ma Yataa yen nin bɛ. Chɛɛ a 'a Den dɔndɔ gbe, min fandi mu Yataa a, an fea an mbe min na tima ɔ tima, a‑a a ma, mɔɛ n‑na a Fa sɔn.

Chɔn‑na bai sa, a si a wandi ma

¹⁹ Mbɛ Chu mɔɛ nu Chuusaɛn duu ɔ, an ya ɔ sɔɛ nu, an‑na mɔɛ dɔ n sɔ wan Chɔn tena. An tɛ mɔɛ nu Yataa a, a basan mɔɛ n na, miin bɛɛ bɔ‑a Difai 'a dambi ɔ, an‑na an sɔ wan. An dɔ, an ni Chɔn dɔ tisa, ni mɔɛ minan sima mu a a. Chɔn na‑a chɛ an fɔ an ye.

²⁰ A ma ban ni koɔ koe a an tena, chɛɛ a‑a a fɔ wan an ye den, a boo kaenɛ a ma, a ɔ, “N fan ma a a, kunka mansa chɛ.”

²¹ Mbɛ an‑na a ɔ tisa to, an dɔ, “Nyɔn sin mu gbɛ i a?” An dɔ, “Idaicha an bɔ‑a ka to?” A ɔ, “N fan ma, Idaicha ma n na.” Mbɛ an dɔ te to, “Mosisi na‑a Yataa 'a gbonka chɛ mɔɛ dɔndɔ na koe fɔ wan. A mu i wan na?” A ɔ, “N fan ma.”

²² Mbɛ an dɔ te gbɛ, an dɔ, “Mbɛ a fɔ gbɛ nn ye, mɔɛ min mu i a.” An dɔ, “Ni nn yɛ‑a, mɔɛ miin‑na nn sɔ, an mbe to‑a wan i wakoe ɔ sɔn koe a.” An dɔ, “Fen mbe i da a, a si i wandi ma?”

²³ Mbɛ Chɔn dɔ, “Mɔɛ min ni gbonka chɛ tena, fuinɛ ma, n fan mu an mɔɛ chɛ a. N dɔ, wo chia ɔ bɛn chɛndɛ, Yataa Mansa tachɛ koe a, a ni na.” Yataa 'a gbonka chɛ mɔɛ chɛ suun, min tɔ ni Aisaya, a da a kuiɛ an nii nɛ, Chɔn yɛ‑a a ɔ.

²⁴ Chu mɔɛ chɛ dɔ nu, an na‑a miin sɔ, Fayisii n ni an na.

²⁵ Mbɛ an‑na a ɔ tisa to, an dɔ, “Ni kunka mansa chɛ ma i a, Idaicha ma i a, Yataa 'a gbonka chɛ mɔɛ chɛ wɛɛ a ma i a, tisa chɛ yen ko. Fen ko a mu, e yii chɛ mɔɛ n kunɛ ɔ, Yataa chia a?”

²⁶ A ɔ, “N mbe yii an chɛ dechee mɔɛ n kunɛ ɔ, Yataa chia a. Chɛɛ mɔɛ ɛ sɔ ɔ wo tɛ ɔ, wo ma min sɔn, a sɔn buɛ a.

²⁷ An mbe na tena sɔ‑a n chen gba ɔ. Chɛɛ a tɔɛ ɛ bɔ‑a wan gbeden, a sin gbu, n mbe ee che a 'a kɔɔwa yuu wɛɛ fuin koe a.”

²⁸ Chɛ gbɛɛ na‑a chɛ‑a a ɔ Bɛtani duu ɔ wan, Chɔdan yii kaka dɔndɔɛ ma, tee bɔ chia a. Chɔn ni nɔ wan, ɛ yii chɛ‑a mɔɛ n kunɛ ɔ, Yataa chia a.

Chɔn‑na bai sa, a si Chisɔsi ma, Yataa 'a sa tɔngbɔɛ

²⁹ Mbɛ banda ɔ ka‑a kɛn, tee dɔndɔɛ ma, Chɔn‑na Chisɔsi yen na‑a a tena. Mbɛ a wan Chɔn dɔ, “Yataa 'a sa tɔngbɔɛ yen ko a na‑a, mɔɛ n 'na ko yama n gbɛɛ dunya ma, an mbe si ɔ min kun ma.

³⁰ Mɔɛ chɛ mu, n‑na min na koe fɔ wo ye, n dɔ, ‘Mɔɛ min mbe na tena, n gbaa chia a, a gbasayaen mu a ni ben n ma.’ N dɔ, ‘Koe min na mu, a ni wan fɔɛ ɔ, n nii ma suun nin bɛ tima min na.’

³¹ N fandi gbu wɛɛ, n nii ma an mɔɛ chɛ sɔn, a sɔn buɛ a. Chɛɛ n na‑a, n mbe yii chɛ mɔɛ n kunɛ ɔ, Yataa chia a, a ma koe a Isɔɛɛ mɔɛ nu, an ni a sɔn, a sɔn buɛ a.”

^32-33 Chɔn na‑a a ɔ yian ka wan, koe min na‑a ma. A ɔ, “N nii ma a sɔn, a sɔn buɛ a. Chɛɛ Yataa min‑na n sɔ, yii chɛ koe a mɔɛ n kunɛ ɔ, a na‑a a fɔ wan n ye, a ɔ, n mbe a Nyina yen‑da wan, a ni yii, a ka banda bu ɔ, mbɛ a bea‑a mɔɛ fɛ gban. A ɔ, an mɔɛ chɛ, an mbe a ma‑a, Yataa Nyina chɛ, ɛ ma‑a mɔɛ n fɛ.” Chɔn dɔ, “A sin,” a ɔ, “n‑na Yataa Nyina chɛ yen fan, a yii‑a fɛɛ yɔ bugbɔɛ, mbɛ a bea‑a mɔɛ fɛ.”

³⁴ A ɔ, “N‑na chɛ ɔ yen fan, a ma‑a,” a ɔ, “n sin mbe a fɔ tena gbɛ, mbɛ mɔɛ chɛ mu Yataa 'a denɛ an na.”

Chisɔsi‑a mɔɛ saa n chee, ma koe a a fɛ

³⁵ Mbɛ banda ɔ ka‑a to, tee dɔndɔɛ ma, Chɔn sɔ‑a to nɔ, an bɛ a fɛ den fea an na.

³⁶ A‑a Chisɔsi yen kɛn ben‑da an baima, a ɔ, “Yataa 'a sa tɔngbɔɛ yen ko ben‑da.”

³⁷ A fɛ den fea chɛ nu, an‑na a da a bai chɛ a min fan, mbɛ an bea‑a Chisɔsi fɛ.

³⁸ Mbɛ Chisɔsi‑a a ya a mun, a‑a an yen, an beaenɛ ɛ a fɛ. Mbɛ a ɔ, “Wo wan, wo e fen yan tena?” Mbɛ an dɔ, “Kan mɔ, i yia tena ɛ mende?”

³⁹ Mbɛ a ɔ, “Wo na, wo ni nɔ yen.” A tima chɛ a, awa naanin bɔɛ ni gbɛ che an na, tee yiienɛ ma. Chɛ‑a a ma wan, an ta‑a kɛn an‑na a waa yen, an bɛ an na tee bea gbɛ nɔ.

⁴⁰ Mɔ fea chɛ dɔndɔ ni Anduu an na, Saimɔn Pita dɔ kaima.

⁴¹ Anduu‑a koe min pɛn pɛn ma, a‑a a kɔɔɛ Saimɔn yan fan. Mbɛ a‑a a fɔ a ye, a ɔ, “Nn‑na mɔɛ chɛ yen, min mu kunka mansa a.” (Kiisi mɔɛ n dɔ, Chasi).

⁴² Mbɛ a ta‑a Saimɔn na Chisɔsi tena. Mbɛ Chisɔsi‑a Saimɔn ma fɛn kɔdɛɛ, mbɛ a ɔ, “I tɔ mu Saimɔn, i fa sin tɔ mu Chɔn. Chɛɛ i tɔɛ ɛ ma tena Kefasi an na gbɛ.” (Tɔɛ chɛ, ni a a mun‑da, a mu Pita an na).

Chisɔsi‑a Fiipi chee, an fea Natanɛɛ a, ma koe a a fɛ

⁴³ A banda ka dɔndɔɛ ma, mbɛ Chisɔsi‑a a yii na chii, mbɛ a‑a Kadidi chɛnyɛ ɔ chia bia. Mbɛ a‑a Fiipi yan, mbɛ a ɔ te a ma, a ɔ, “Na, i ni ma n fɛ denɛ a.”

⁴⁴ Fiipi chɛ, a na‑a ka Besaida wan, duu chɛ, Anduu an fea Pita a, an baa a.

⁴⁵ Mbɛ Fiipi‑a a ya a kan Natanɛɛ a. Mbɛ a‑a a fɔ a ye, a ɔ, “Mɔɛ min, Mosisi na‑a a wakoe nyɛn, sawa gboo chɛ ɔ, nn‑na a yen. A yɛ to, Yataa 'a gbonka chɛ mɔɛ n bɛɛ, an na‑a fenɛ nyɛn to, a si an ma. A tɔ mu Chisɔsi, min ka‑a Nasaɛti duu ɔ, kai chɛ, Chosɛfi, a 'a denɛ.”

⁴⁶ Mbɛ Natanɛɛ ɔ, “Nasaɛti chɛ, fen kɔ fen mbe che wan bɔ‑a nɔ, min mbe ma tɔnɔnɛ a mɔ gbu tena?” Mbɛ Fiipi ɔ, “Na, i ni a yen.”

⁴⁷ Chisɔsi‑a Natanɛɛ yen kɛn na‑a a tena, a‑a chɛ an fɔ, a si a ma. A ɔ, “Isɔɛɛ mɔɛ chɛndɛ chɛndɛ a yen ko na‑a, tɔɛ chɛ bɛnden mu min kun ma. Mɔɛ mu a a, a ee mɔ ɔ mɔ bun.”

⁴⁸ Natanɛɛ‑a a ɔ tisa, a ɔ, “I ma‑a ka ma, i‑a n sɔn?” Chisɔsi ɔ, “Fiki kɔn chɛ kɔɔ, n‑na i yen nɔ wan, Fiipi e na to i chee‑a.”

⁴⁹ Natanɛɛ ɔ, “Kan mɔ,” a ɔ, “Yataa 'a denɛ chɛndɛ chɛndɛ mu i a,” a ɔ, “Isɔɛɛ mɔɛ n 'na mansa mu i a.”

⁵⁰ Chisɔsi ɔ, “N‑na a fɔ wan i ye, mbɛ n‑na i yen fan, i ni tima min na fiki kɔn chɛ kɔɔ. Chɛ an gbu‑a a ma ka, i dan‑da ka n na? E na tena wan koe sɛsɛ ɔ yen‑da ma‑a, miin benden mu chɛ ma kaka.”

⁵¹ Mbɛ a‑a a fɔ an ye, a ɔ, “Ka wɛ n ni chɛ ma din wo tena. Wo e a ɔ yen‑da wan, banda bu ɔ da a ni ka, mbɛ Yataa 'a maeka n yii‑a. An mbe sɛ‑a wan, an mbe yii, n na tindanɛ, n fan, Mɔ Gbu 'a Denɛ.”