CHIMISI 5 - Yataa 'a Dɔbɛnɛ Nama

Chimisi ɛ nyan tɔɛ n na si‑a

¹ Wo wan nyan tɔɛ nu, wo chɛ a min. Wo di chɛ, wo ni wo nyinɛ a daun, faayɔnɛ a. Koe min na mu, ko yawaenɛ ɛ wo ya ɔ min koo.

² Wo 'a nyanɛ ɛ ban‑da wan tui‑a. Chisi n mbe wo 'a koa nyima n daun‑da wan.

³ Wo‑a sanu miin na sɔn ka, ni kain gbɛ nu, an mbe ee ma‑a fen fen na. Wo 'a nyan chɛ, wo na‑a wo fa min na, an mbe wo gboo kasaa‑a ta ɔ. Wo‑a an sa tena ɔ bɛn ka wo wandi ko a, tee chɛ ma kɔnɛ a, kaa a tɛ tee chɛ.

⁴ A yen ko, wo ni mɔɛ chɛ n pawa wan, miin‑na wai chɛ wo 'a yadi n dɔ. Chɛɛ wo‑a an 'na pawa bia kafaya ɔ. An di kuiɛ che‑a Yataa tena, Mansa Wa.

⁵ Wo 'a fɔɛ gbɛɛ ɔ nɛ dunya chɛ ɔ, wo e nyanɛ an dɔ, wo e wo faa ma koe kan kɔ kan ma‑a. Sanche gbɛ, wo bu ɔ di, wo sin tɔɔen mu. Kasaa chɛ tima an che‑a ka gbɛ.

⁶ Wo‑a kaa a tɛ, wo‑a mɔɛ chɛ n fa, miin ma ko ɔ ko ma ni. An sin nii ma sɔ ni wo a, wo ni an fa tena tima min na.

Chimisi ɔ te, Chisianɛ n ni an faa bia

⁷ N suun ma nyɔɛ nu Chasi ɔ, wo ma faabia ɔ, wo e ta‑a mmɔ 'a mansa Chisɔsi Chasi yɛ tima ma kɔn‑da dunya chɛ ɔ. Wo a ɔ yen bɛ sɛnɛ sa mɔɛ ɛ faabia min chɛ, sama ma kɔnɛ a, sona ni chɛ. Ɛ a faa bia wan aan, tima ma kɔnɛ a, a 'a chin fen nyima ni che a ya tena.

⁸ A nyin wo wɛɛ, wo ni wo faa bia. Wo faa n ma yɔn, a mu min na, mmɔ 'a mansa Chisɔsi Chasi na tima ɔ ma yansan to.

⁹ N suun ma nyɔɛ nu, wo ma gbonyɛ wo nyɔn na. Wo ma chɛ ma, Yataa wɛɛ ma na kaa a tɛ, a si wo ma. A yen ko, kaa a tɛ mɔɛ gbu ɛ sɔ ɔ chenɛ da a.

¹⁰ N suun ma nyɔɛ nu Chasi ɔ, faabia ko yawaen dɔ bia ɔ, a tɔmɔsi dɔndɔ yen ko. A mu Yataa 'a gbonka chɛ mɔɛ chɛ n fan na, miin ni bai sa, Mansa Yataa tɔɛ ɔ.

¹¹ Dua ɛ ma wan mɔɛ chɛ n ma, miin mbe faabia chɛ ko yawaenɛ ɔ. Kai Chobi mu an mɔɛ chɛ n dɔndɔ a. Wo‑a a a min fan, a na‑a a faa bia buɛ min dɔ. A sin, wo‑a a ɔ yen fan to, Mansa Yataa 'a dɔbɛnɛ na‑a bɔ buɛ min dɔ a gbee a. A mu min na, chinchimaya faa an mbe Yataa ɔ, a sin mbe chinchin.

¹² N suun ma nyɔɛ nu, bai chɛ an mbe chɛ gbɛɛ kun ma. Ni wo ma‑a ko ɔ ko ma‑a, wo ma wo gboo. Wo ma wo gboo duu gboo ɔ, wo ma wo gboo banda bu ɔ ɔ, wo ma wo gboo fen fen dɔ. Ni wo‑a a fɔ, wo ɔ, wo dɔn‑da koe ma, wo dɔn a ma. Ni wo ma dɔn ni min ma, wo ma dɔn a ma. Wo chɛ ma, Yataa ma na kaa a tɛ, a ni wo tɔɔ.

¹³ Ni mɔ ɔ mɔ ɛ wan wo tɛ ɔ, min mbe tɔɔya ɔ, a ni Yataa fai. Ni mɔ ɔ mɔ ɛ wan wo tɛ ɔ, min mbe buɔdia ɔ, a ni tando be Yataa ma si ɔ.

¹⁴ Ni mɔ ɔ mɔ sin mbe wan nɔ to, wo tɛ ɔ, min gbandien mu, a ni mɔɛ n chee, gbakoo nu chɔchi ɔ. An ni samunɛ chɛ a ko a. An ni yɛ, an ni tu chɛ a ma, Mansa Chisɔsi tɔɛ ɔ.

¹⁵ An mɔɛ chɛ n 'na samunɛ, danaya ɔ, ɛ a ma‑a wan, Mansa Yataa ni an mɔɛ chɛ baun, a ni a kɔɔ sɔ gbandi chɛ ɔ. Ni a sin na‑a ko yama kan kɔ kan ma, Yataa ɛ a boo bɔ‑a wan a ɔ. A mu min na, an‑na a ɔ yian, mbɛ an kai faen fan mu Yataa a.

¹⁶ Chɛ ko a, wo wo 'a ko yama n kɔɔ yian wo nyɔn na. Mbɛ wo‑a samunɛ chɛ wo nyɔn ko a. Chɛ ɛ na‑a wan bauncha a wo tena, wo 'a gbandi n dɔ. Mɔɛ min tanden mu Yataa tena, ɛ samunɛ min chɛ, a faa gbɛɛ a, gbasaya koo min mbe bɔ a ɔ.

¹⁷ Kai Idaicha ni mɔ gbu an na, yɔ mmɔ ɛ buɛ min dɔ. Chɛɛ a na‑a samunɛ chɛ wan pien, min mbe a ma, sona ma na na. Sona sin dɔndɔ wɛɛ nii ma na ni, san sawa ni a tɔɛ ko a.

¹⁸ Mbɛ a yɛ‑a, a‑a samunɛ chɛ sona ko a. Mbɛ sona bun‑da na‑a. A tima chɛ a gbɛ, chin fenɛ n‑na a kuu sɔ nyan‑da.

¹⁹ N suun ma nyɔɛ nu Chasi ɔ, ni wo dɔndɔ wɛɛ ka‑a Yataa 'a tea chia ma, a suun ma nyɔɛ dɔ mende ni a ma, a ni yɛ a ma.

²⁰ Mɔɛ miin mbe ko yama ma, a ni ma wo yii ma, mbɛ mɔɛ min mbe an dɔndɔɛ wɛɛ a yɛ‑a Yataa 'a chia ma, a‑a an mɔɛ chɛ baun fan ka. A‑a a ma, Yataa‑a a boo bɔ an mɔɛ chɛ a ko yama main sɛsɛ ɔ, a sin kunɛ bɔ‑a saya ɔ.