CHIMISI 3 - Yataa 'a Dɔbɛnɛ Nama

Chimisi ɛ dasi be‑a, a si Chisianɛ koɔ buɛ ma

¹ N suun ma nyɔɛ nu Chasi ɔ, wo sɛsɛ ma ma ticha n na, mɔɛ n kan koe a chɔchi n dɔ. Koe min na mu, mmɔ wan kan chɛ mɔɛ chɛ nu, Yataa ɛ kaa a tɛ‑a wan, a si mmɔ ma, faaakɔɔɛ wandi gbu a, a ben mɔɛ tɔɛ n ma.

² Tima sɛsɛ ko a, mmɔ ɛ nyinamaya sɛsɛ bɔ wan, mmɔ gbɛɛ. Chɛɛ mɔɛ min mbe che tachɛ‑a fɔɛ ɔ, a ma nyinamaya bai sa ni, mabɔ ee an mɔɛ chɛ ma. A sin, ɛ kun fan tachɛ koe a a wandi gbu a.

³ Mmɔ a yen bɛ, mmɔ ɛ koe min ma. Mmɔ ɛ kun fan, mmɔ ni a ma sɔ fen chɛ, min mu soo a, a ni a mun, a ni ta chia kan kɔ kan na, mmɔ toen mu min na. Kundu ɛndenɛ, mmɔ ɛ min don a da a, an mbe a ma, mmɔ ɛ che a mun‑da mmɔ ta chia a.

⁴ Mmɔ dɛndɛ wa chɛ wɛɛ ya wɛ tɔmɔsi dɔndɔ a. Ni a wii mɔɛ toen mu, a ni a kun sɔ kaina min na, fia ni ma bɔ‑a a gbasayaen ba wɛɛ, fen denɛ an mbe a ma, a ni ta an chia chɛ a.

⁵ Mmɔ nɛnɛnɛ wɛɛ ɛ ka wan. A dɔɔ wɛɛ ka boo ɔ boo, chɛɛ ɛ bai wa wa n fan fɔ. Mmɔ mmɔ yii na chii wɛ, ta fuin fuinɛ ɛ woa wa minda buɛ min dɔ.

⁶ Nɛnɛnɛ nan gbu sin mu ta an na. Ko yama dechee an faenɛ ɛ a a, min mbe che wo gboo gbɛɛ a yɛ‑a kuu kɔ. Ɛ che wan a ma‑a, mmɔ 'a fɔɛ gbɛɛ ni mun, a ni chɛ ta ɔ, kasaa koe a. Koe min na mu, a 'a gbasaya kaen mu Sitana an tena.

⁷ Mɔ gbu ɛ kun fan, a ni fɔɛ fen yama kan kɔ kan ma man, yɔ a toen mu a a buɛ min dɔ. A ni konde n bɛɛ ma man, sawan fɛnɛ nu, an bɛ nyɛ n na.

⁸ Chɛɛ mɔ ɔ mɔ ee kun, a ni nɛnɛnɛ ma man. Mɔ gbu kaka dɔndɔ an nɛ, min kun ma fɛn koe gbɛ. Ɛ mɔ dɔ gbɛɛ n tɔɔ wan, yɔ ka kona.

⁹ Tima dɔ n na, mmɔ ɛ mmɔ Fa Yataa Mansa tando wan, mmɔ nɛnɛnɛ a. Dɔ n na, mmɔ ɛ bai yama n sa mɔɛ n ma. Mɔɛ chɛ n sin, an nyanden mu Yataa miinɛ an dɔ.

¹⁰ Mmɔ da dɔndɔ gbe chɛ, an mbe Yataa tando, mbɛ a yɛ‑a to, bai yama bɔ‑a a ɔ. N suun ma nyɔɛ nu Chasi ɔ, chɛ ma nyin ɛnden bɛɛ a.

¹¹ Mmɔ ma a ɔ yen nin bɛ, yii ni ma bɔ‑a duu gboo kɔɔ, a konama ɛ, a yɛ to, a nyima ɛ.

¹² N suun ma nyɔɛ nu Chasi ɔ, wo ee che yii chɛndɛ bɔ‑a sonɛ ɔ, kuiɛ ɛ min dɔ. A sin, kɔnɛ sɔnden mu gbɔɛ min ko a, ɛ an be. Chɛɛ kɔnɛ ee kɔn dɔ mende ta gbɔɛ be.

Chimisi ɔ te, Yataa an mbe yiimatɛ chɛndɛ be

¹³ Wo tɛ ɔ, ni mɔɛ min yiima tɛen mu, a‑a koe ɔ gbɛ, an mɔɛ chɛ ni chɛ ma. Mɔɛ n ni a ɔ yen, fɔɛ chɛndɛ ma, ɛ min dɔ. An ni a ɔ yen ko chɛndɛ ma, ɛ min ma, yonka ee a fɛ. Chɛ an mbe yiimatɛ ɔ yian.

¹⁴ Chɛɛ toomaya faenɛ ɛ mɔɛ min faa ɔ, a toenɛ ɛ dechee a faa ma koe n na, yiimatɛ tɔ ma a mɔɛ chɛ a. A yau ko yama tɔɛ gbɛɛ ma, a mɔɛ chɛ yii na chii koe a, mbɛ yiimatɛ tɔɛ mu a a.

¹⁵ Toomaya, ni mɔ gbu to koe a a wandi faa ma koe n na dechee, Yataa ta yiimatɛ ma an na. Dunya chɛ ma yiimatɛ an nɛ, Yataa Nyina ma to ni min na. Sitana an mbe dechee sɔ ɔ an yiimatɛ chɛ nyɔn sima kɔ.

¹⁶ Kan kɔ kan, toomaya ɛ kaina, a yɛ to, mɔɛ n toen mu kaina dechee an fan ni ta ya ɔ ma, ko yama kan kɔ kan mbe nɔ wan. An kaina chɛ, koe a fasandenɛ mu nɔ tima ɔ tima.

¹⁷ Chɛɛ koe saa saa mu min na, Yataa ta yiimatɛ, ko ɔ ko ee a ma. Sɔnkɔ sɔnkɔ ee a kɔ chia a, faachima an mbe a ɔ. A yɛ to, basamaya an be a ɔ, chinchimaya, ni ko chɛndɛ ma. Yiimatɛ an nɛ, min mbe ee mɔ ya bɔ, nɛnɛn feaya sin mbe ee a ɔ.

¹⁸ Mɔɛ miin tanden mu Yataa tena, an mbe a ma mɔ dɔ mende n mbe ma kuiɛ dɔndɔya ɔ, a nyin an ko a. Koe min na mu, ni an‑na koe n ma faachimaya ɔ, ɛ ma ko chɛndɛ n fan na.