CHIMISI 2 - Yataa 'a Dɔbɛnɛ Nama

Chimisi ɛ dasi be‑a, a ɔ, wo ni mɔɛ n gbɛɛ ya mɔ dɔndɔɛ a

¹ N suun ma nyɔɛ nu Chasi ɔ, wo ma to mɔɛ dɔ n na, a ni ben dɔ n ma. Ni wo‑a chɛ ma, wo ee che a fɔ‑a, mbɛ wo kai faen fan mu mmɔ 'a mansa Chisɔsi Chasi a, min mbe si ɔ a 'a basɔmaya ɔ.

² Mmɔ a ya wɛ, mbɛ mɔ fea na‑a bɛnɛ ɔ. Mɔ dɔndɔɛ chɛ, a ma bɛndenɛ ɛ koa baa gbanden ba ɔ, yɔɔɛ basan chia baa gbandenɛ n na, an chɛenɛ ɛ a ma. Mbɛ dɔndɔɛ sin na‑a, min mu yɔn tɔɛ a, a ma bɛndenɛ ɛ koa taa wa ɔ.

³ Mbɛ wo sin ma samba‑a gbɛ, si tena chɛndɛ be koe a, mɔ ma bɛnden chɛ ma. Dɔndɔɛ chɛ sin, wo ɔ, ni a di a ye, a ee ka‑a sɔ‑a. Wo ɔ, ni chɛ ma, a ni si duu ma.

⁴ Wo ni a ɔ sɔn, mbɛ wo‑a wo boo don ka mɔɛ n tɛ an dɔ. Wo‑a wo yii na chii buɛ min dɔ, a ma nyin.

⁵ N suun ma nyɔɛ nu Chasi ɔ, wo ko a di n ye. Ka n mbe chɛ fɔ wo ye. Dunya chɛ na‑a miin ya yɔn tɔɛ n na, Yataa‑a a boo sɔ an mɔɛ chɛ n fan ma, an nyan‑da a ta chia a. An‑na an kai fa mmɔ 'a mansa Chisɔsi a. A sin, an mbe ma‑a wan a 'a mansaya kɔɔ banda bu ɔ. Mansaya chɛ, a na‑a mɔɛ chɛ n too ɔ dia min na, mɔɛ miin toen mu a a.

⁶ Chɛɛ chɛ gbɛɛ ɔ, wo e tɛndɔya koe n ma wan yɔn tɔɛ n na. Min mu ka, nyan tɔɛ chɛ nu, an fan mbe wo konkon, an mbe ta wo a kuti ɔ.

⁷ An fan mbe baa bɔ tena mɔɛ chɛ tɔɛ chɛndɛ ma, Chisɔsi Chasi, min ta mu wo a.

⁸ Ko chɛndɛ mu, tea ko a, ni wo‑a mmɔ 'a sawa chɛ bia, min mbe Yataa 'a gboo ɔ. An gbu mu sawa chenama a. Sawa chɛ ɔ, mɔɛ n ni to an 'na mɔɛ n na, yɔ an toen mu buɛ min dɔ an fandi gbu a.

⁹ Chɛɛ ni wo ma samba‑a nyan tɔɛ n dechee an ko a, wo e ma‑a ka ko yama an ma‑a. Koe min na mu, wo e ma‑a ka sawa chɛ an yɔn‑da.

¹⁰ Mɔ sin mbe ee sawa gbɛɛ bia, i ni dɔndɔ yɔn. Mɔɛ min mbe chɛ ma, e wan dechee yɔ mɔɛ min‑na sawa gbɛɛ yɔn.

¹¹ Koe min na mu, Yataa dɔndɔ gbe chɛ, an‑na a fɔ, a ɔ, mɔ ee waa ma basan mɔɛ a, wo ee fuu ɔ min na. An yɛ‑a to, a‑a a fɔ, a ɔ, mɔ ee mɔ fa, sawa ma min fɔ ni. Chɛ an fɛ mu, mɔɛ min mbe mɔɛ fa, a mɔɛ ban‑da sawa gbɛɛ yɔn‑da, an ni a fɔ a ma waa ma basan bɛɛ mɔɛ a, an mbe ee fuu ɔ min na.

¹² Chɛ ko a, ni wo ma‑a koɔ‑a tima ɔ tima, ni wo ma‑a koe ma‑a, a ni ma wo yii ma, mbɛ Yataa ɛ sawa chɛ an ya‑a, kaa a ni tɛ a si wo ma. Sawa chɛ, min mbe wo kun ka.

¹³ Koe min na mu, Yataa ɛ kaa a tɛ‑a wan chɛ n ma, miin nii chinchimaya yian, a ni an tɔɔ. Chinchimaya tɔɛ n sin, an mbe chinchimaya sɔn‑da wan.

Chimisi ɛ bai sa‑a, a si mmɔ kai fa koe ma Yataa a

¹⁴ N suun ma nyɔɛ nu Chasi ɔ, ni mmɔ‑a a fɔ, mbɛ mmɔ kai faen mu Yataa a, a ni yen mmɔ tachɛ buɛ ma fɔɛ ɔ. Ni mmɔ ma chɛ ma ni, mbɛ mmɔ kai fa buɛ chɛ Yataa a, a ee mɔ ɔ mɔ baun.

¹⁵ Wo gbu, wo a ya wɛ, mbɛ wo suun ma nyɔɛ Chasi ɔ, a yen ko. Wo‑a a yen, fai ɛ min ma, daun fen bɛɛ ee a boo ɔ.

¹⁶ Mbɛ wo dɔndɔ ni a fɔ a ma, a ɔ, Yataa ni a dua. A ɔ, a ni koa be a ma, a ɔ, a basan daun fenɛ a. A mɔɛ chɛ ma ko chɛndɛ ma ni ka, ni a ma a bɔɛ chɛ ma chii ni, a ni a da nyin.

¹⁷ Wo‑a yen gbɛ, mbɛ mɔ kai fa koe Chisɔsi Chasi a, a dechee ma koe a. Kai fa min, mɔɛ n mbe ee a ɔ yen ko chɛndɛ ma ɔ, ko ma a a. An kai fa chɛ ma fen kɔ fen na, a faenɛ mu.

¹⁸ Chɛɛ mɔɛ dɔ nu, an mbe a fɔ‑a gbɛ, an dɔ, Chisianɛ dɔ n yen ko, an kai faenɛ mu Chisɔsi a. An dɔ, Chisianɛ dɔ n sin, an mbe ko chɛndɛ an ma. Chɛɛ n ni chɛ fɔ gbɛ an mɔɛ chɛ n ye, mbɛ n mbe ee a ɔ yen, ni mɔɛ kai faen fan mu Chisɔsi a, ni n ma a 'a ko chɛndɛ ma gba yen ni. Chɛɛ n tana, n mbe a ɔ yian fan, mbɛ n kai faen fan mu Chisɔsi a, n 'na ko chɛndɛ ma an dɔ.

¹⁹ Wo dandenɛ mu a a, mbɛ Yataa ɛ dɔndɔ gbe. Chɛ ma a kun wo ko a. Nyina yama n bɛɛ, an danden fan mu chɛ a, an sin mbe samba wan, a ma chianɛ a.

²⁰ Wo wooen fan mu. Wo toen mu, wo ni a ɔ gbɛ, mbɛ ni wo kai faenɛ ma‑a tenchen Yataa a, wo ee ko chɛndɛ wɛɛ ma, mbɛ yiimatɛ ma.

²¹ Wo‑a a ɔ sɔn fan, mmɔ bemba n ta bemba, Ebeami, koe min na‑a a ma, Yataa na‑a a ya mɔ tandenɛ a. A 'a den dɔndɔ gbe, Aisaki, a ni an be tena yasi a, sen gbengbe ma.

²² Wo‑a a ɔ yen fan, mbɛ a kai faen ni buɛ min dɔ Yataa a, an fea a chɛ chɛ wai a, an na kanden fan ni. Koe min na mu, a chɛ chɛ wai na‑a a ɔ yian fan, a kai faen mu buɛ min dɔ Yataa a.

²³ Chɛ na‑a a ma wan, Yataa 'a gboo na‑a bai min fɔ, a bɔ‑a a a. A ɔ, “Ebeami‑a a kai fa wan Yataa a. A sin, Yataa wɛɛ‑a a ya mɔ tandenɛ a a chen kɔɔ.” A yɛ to, Ebeami gbu chee‑a wan Yataa dia nyɔɛ a.

²⁴ Chɛ‑a a ɔ yian wo a, mbɛ kaifa dechee Yataa a, a ma koe a. Chɛɛ mɔɛ ɛ ko chɛndɛ miin bɛɛ ma, an mbe wan nɔ, mɔ ya koe a mɔ tandenɛ a Yataa boo ɔ.

²⁵ Ko tɛ musu dɔndɔ wɛɛ, min tɔ ni Daabi, wo a yen bɛ. Mɔɛ ni a a, min na‑a sonda chɛ n nun, mbɛ a‑a chia dɔ mende yian an na, an ta‑a min na. Chɛ na‑a musu chɛ ma wan mɔ tandenɛ a Yataa tena.

²⁶ Mɔɛ min faen mu, a nyina ee ma to a fɛ. Ɛ ka wan dechee yɔ ni mɔɛ kai faenɛ ma‑a dechee Chisɔsi a, chɛɛ a ee ko chɛndɛ ma.