CHISƆSI 'A SƆ MƆƐ NU 8 - Yataa 'a Dɔbɛnɛ Nama

¹ Sɔɔ‑a toa si, Sitibin fa koe kɔɔ. Sitibin fa‑a kɛn, mɔɛ n‑na a kuu sɔ wan ko ma gbaaenɛ sa‑a chɛ n ma Chuusaɛn, miin na‑a an kai fa Chisɔsi a. A ka Chisɔsi 'a sɔ mɔɛ chɛ n ma, mɔɛ tɔɛ chɛ n gbɛɛ miin na‑a an kai fa Chisɔsi a, an dɔ fasan‑da wan a ɔ ben‑da gbɛɛ Chudia chɛnyɛ ɔ, a basan Samayia a.

Sɔɔ‑a ko ma gbaaenɛ sa mɔɛ chɛ n ma, miin‑na an kai fa Chisɔsi a

² Mɔɛ dɔ nu, miin fɔɛ been ni ka Yataa fai koe a, an‑na Sitibin tɔn fan. An sin‑na chinchima di chɛ wan to, a si Sitibin fa koe ma.

³ Chɛɛ Sɔɔ bun‑da wan ta si‑a chɔchi mɔɛ n gbu kɔɔ. A ni don fan chen kan kɔ kan na, a ɛ ta‑a mɔɛ chɛ n bia‑a, miin‑na an kai fa Chisɔsi a. A‑a musu n konkon fan, an bɛ mɔ kaima n na, a‑a an da a tɔn pimbi chenɛ a.

Fiipi‑a Yataa 'a sakana bai sa, Samayia chɛnyɛ ɔ

⁴ Chisɔsi fɛ mɔɛ miin na fasan‑da ka a ɔ, an ben ben‑da wan, an‑na Yataa 'a sakana bai chɛndɛ chɛ ɔ yian mɔɛ n na.

⁵ Fiipi ni mɔ dɔndɔ an na mɔɛ chɛ n tɛ ɔ, miin na fasan‑da a ɔ. A yii‑a wan duu dɔndɔ ɔ, Samayia chɛnyɛ ɔ, mbɛ a‑a bai sa a si kunka mansa ma.

⁶ Fanka fanka wa chɛ‑a an too ma sɔ wan chɛndɛ chɛ, a da a bai ma. Koe min na mu, a‑a kamaya ko wa miin ma ka, an ni a ɔ yian tena wan, mbɛ a 'a sakana bai chɛ ka‑a Yataa tena wan.

⁷ Koe min na mu, Fiipi‑a a ma wan, mbɛ nyina yama n ka‑a mɔ sɛsɛ fɛ, an ni miin fɛ. A sin, an nyina yama chɛ n ni yee tɛ wan gbankon, an mbe e na to ka‑a mɔɛ chɛ n fɛ. A‑a namaa n sɛsɛ baun fan, an bɛ tamban tɔɛ n na.

⁸ Chɛ ko a, buɔdia wa dɛgbɛ ni wan an duu chɛ ɔ.

⁹ Chɛɛ kamin dɔndɔ ni wan nɔ, min tɔ ni Saimɔn. Tima ɔ yansama ko a, kamin chɛ na‑a Samayia mɔɛ n na fii wan a 'a nkofo koe n na, a ni miin ma. A na‑a a fɔ wan mɔɛ chɛ n ye, a ɔ, mɔ chenama mu a a.

¹⁰ Chɛ na‑a a ma wan, mbɛ mɔ ɔ mɔ kan kɔ kan duu chɛ ɔ, an‑na an too ma sɔ a da a bai chɛ ma. A ka mɔ chenama n ma, a ta mɔɛ tɔɛ n tena, an‑na a fɔ, an dɔ te, “Mɔna chɛ, Yataa 'a gbasaya an mbe a ɔ, an mbe min chee Gbasaya Wa.”

¹¹ An sin na‑a an too ma sɔ wan a ma. Koe min na mu, tima ɔ yansama ko a, an da ɔ gbaaen fan ni a wan Saimɔn 'na nkofoya a.

¹² Chɛɛ Fiipi‑a sakana bai chɛndɛ chɛ ɔ yian kɛn an na, a si Yataa 'a mansaya ma, a basan Chisɔsi Chasi tɔɛ a, mɔ sɛsɛ dan‑da wan a a. Mbɛ a‑a yii chɛ an kunɛ ɔ, Yataa chia a, musu nu, an bɛ kai n na.

¹³ Saimɔn wandi gbu wɛɛ, a tima chɛ a, a‑a a kai fa wan Chisɔsi a. Yii chɛ‑a wan a kunɛ ɔ, Yataa chia a, a sin, a nii ma ka ni to Fiipi fɛ. A da ɔ na‑a gbaa wan, a na‑a kamaya ko wa sɛsɛ chɛ n dɔ yen kɛn, Fiipi ni miin ma tena. An koe chɛ n sin ni a ɔ yian tena wan, mbɛ a 'a sakana bai chɛ ka‑a Yataa an tena.

¹⁴ Chisɔsi 'a sɔ mɔɛ miin ni gbɛ Chuusaɛn, an‑na a a min fan, mbɛ Samayia mɔɛ n‑na an boo si Yataa bai kɔɔ. An‑na chɛ a min kɛn, mbɛ an‑na Pita sɔ, an fea Chɔn n na, ta koe a an tena.

¹⁵ An sin yii‑a wan nɔ an tena, mbɛ an‑na samunɛ chɛ, min mbe a ma, mɔɛ miin‑na an kai fa Chisɔsi a, Yataa Nyina ni bea an fɛ.

¹⁶ Koe min na mu, Yataa Nyina nii ma bea nin bɛ an dɔndɔ wɛɛ fɛ. An na‑a yii an chɛ an kunɛ ɔ, Yataa chia a, Mansa Chisɔsi tɔɛ ɔ.

¹⁷ Mbɛ Pita an fea Chɔn na, an‑na an boo bun mɔɛ chɛ n ma, an‑na samunɛ chɛ, mbɛ Yataa Nyina bea‑a mɔɛ chɛ n fɛ.

¹⁸ Saimɔn‑na a ɔ yen fan, mbɛ Yataa Nyina bea‑a mɔɛ chɛ n fɛ, kɛn Chisɔsi 'a sɔ mɔɛ chɛ n‑na an boo bun an ma. Chɛ ma‑a kɛn, a toen ni a ni kɔpɔɛ be Pita ma, an fea Chɔn na, an gbasaya chɛ ko a.

¹⁹ Mbɛ a‑a a fɔ an ye, a ɔ, “Wo gbasaya chɛ be n ma, min mbe a ma, n bɛɛ, ni n‑na n boo bun mɔ ɔ mɔ ma, Yataa Nyina ni bea a mɔɛ chɛ fɛ.”

²⁰ Chɛɛ Pita ɔ, “Yataa ni i a ta ta ɔ, i 'a kɔpɔɛ chɛ a i boo ɔ. Koe min na mu, ɛ wan i yii ma, mbɛ e kun fan i ni kɔpɔɛ be, min mbe a ma, Yataa ni gbasaya chɛ be i ma.

²¹ E ee kun mmɔ bɛ ni wai chɛ chɛ, koe min na mu, i faa ɔ ma gbɛ ni Yataa chen kɔɔ.

²² Chɛ an fɛ mu, i kan kɔ sɔ i 'a yiinachii yama chɛ a, mbɛ i‑a samunɛ chɛ Mansa Chisɔsi tena. Kɔkɔɛ ɛ chinchin‑da wan i ma, yiinachii yama chɛ ko a.

²³ Koe min na mu, n‑na a ɔ sɔn fan, mbɛ faa yama an mbe i ɔ, a yɛ to, i ma‑a yɔnɛ a, ko yama boo a.”

²⁴ Mbɛ Saimɔn dɔ, “Wo dimu, wo Mansa Yataa fai n ko a, min mbe a ma, wo‑a koe miin gbɛɛ fɔ ka, an ma na ma n na.”

²⁵ Pita an fea Chɔn na, an ban‑da wan koe chɛ n gbɛɛ ɔ yian‑da mɔɛ n na, an‑na min dɔ sɔn a si Mansa Chisɔsi ma. Mbɛ an yɛ‑a Chuusaɛn, an mbe ta‑a sakana bai chɛndɛ chɛ ɔ yian‑da mɔɛ n na, duu sɛsɛ n dɔ Samayia chɛnyɛ ɔ.

Fiipi bɛn‑da mɔ chenama dɔndɔ a, min ka‑a Itiopia chɛnyɛ ɔ

²⁶ Mbɛ Mansa Yataa‑a maeka sɔ Fiipi tena. Mbɛ a‑a a fɔ Fiipi ye, a ɔ, “I ma bɛn, i ni yii denka ɔ, chia chɛ a, min kaen mu Chuusaɛn duu ɔ. Ta, aan a che Kasa fuinɛ ma. Chia chɛ mu fuinɛ ma chia an na.”

^27-28 Mbɛ Fiipi‑a a kɔɔ sɔ, mbɛ a ta‑a chia chɛ a. Mbɛ a yen ko, a tima dɔndɔ gbe chɛ a, kai dɔndɔ ni wan nɔ, min na‑a ka Itiopia chɛnyɛ ɔ. A ni ben tena wan a chia dɔndɔ gbe chɛ a, a yɛ a waa a. Mɔ chenama ni a a Itiopia chɛnyɛ ɔ, mansa de chɛ 'a kɔpɔɛ kun ma. A na‑a ka samun chɛ tena wan Chuusaɛn, a ɛ yɛ‑a Itiopia. A ni si ɔ mɔto gbingbi an dɔ, soo n mbe min sawan. A ni kɛn si ɔ mɔto gbingbi chɛ ɔ, a ni wan gboo kan‑da, Yataa 'a gbonka chɛ mɔɛ Aisaya na‑a min nyɛn.

²⁹ Mbɛ Yataa Nyina‑a a fɔ Fiipi ye, a ɔ, “I ma tundu gbɛdɛn mɔto gbingbi chɛ baima.”

³⁰ Fiipi wɛɛ‑a bui sa wan a a mɔto chɛ tena, mbɛ a‑a a a min, mɔɛ ɛ Aisaya 'a gboo chɛ kan‑da. Mbɛ Fiipi‑a kamin chɛ ɔ tisa, a ɔ, “E gboo chɛ ɔ gbɛ tena wan chɛndɛ chɛ, e ka min kan‑da?”

³¹ Mbɛ a ɔ, “N mbe ee che a ɔ gbɛ‑a, mɔɔ ni mɔɛ‑a n sɔ chia ma.” Mbɛ a gbu‑a a fɔ Fiipi ye, a ɔ, a ni sɛ mɔto gbingbi chɛ ɔ, a ni si a baima.

³² A ni ka kaina min kan‑da Yataa 'a gboo chɛ ɔ, an nii nɛ: “An ta‑a wan a a, a fa koe a yɔ sa, A yɛ to, bai ɔ bai ma bɔ ni a da a. yɔ sa tɔngbɔɛ ma maun buɛ, ni an ma‑a a ti tɛ‑a a a.

³³ An‑na baa bɔ wan a ma. A sin, mɔ ɔ mɔ ma dɔn ni, a 'a tea fɔ koe a. Mɔ ee che bai fɔ‑a, a si a 'a den ma, a mu min na, an‑na a wandi gbu ta fɔɛ ya wan banda kun ma.”

³⁴ Mbɛ mɔ chenama chɛ‑a a fɔ Fiipi ye, a ɔ, “A fɔ wɛ n ye, Yataa 'a gbonka chɛ mɔɛ chɛ ɛ bai chɛ sa tena ka a si mɔɛ min ma. Ɛ a sa tena, a si a wandi an ma, chɛ ma, a sien mu mɔ dɔ mende an ma?”

³⁵ Mbɛ Fiipi‑a an kaina chɛ fasai kamin chɛ ye, a ni ka kaina min kan tena. Mbɛ a‑a sakana bai chɛndɛ chɛ ɔ yian kamin chɛ a, a si Chisɔsi ma.

^36-37 Mbɛ an mbe kɛn ta‑a chia chɛ a, an che‑a wan kaina, yii ni kaina min. Mbɛ Itiopia mɔ chenama chɛ‑a a fɔ Fiipi ye, a ɔ, “Yii yen ko nɛ. Ko ɔ ko ɛ wan nɔ, min mbe i ka‑a to yii chɛ‑a n kunɛ ɔ, Yataa chia a?”

³⁸ Mbɛ kamin chɛ‑a a fɔ, a ɔ, soo chɛ ni sɔ, mbɛ a sɔ‑a. Mbɛ an fea Fiipi a, an puin‑da, an yii‑a yii chɛ ɔ. Mbɛ Fiipi‑a yii chɛ mɔ chenama chɛ kunɛ ɔ, Yataa chia a.

³⁹ An fea chɛ gbɛɛ bɔ‑a kɛn yii chɛ ɔ, mbɛ Yataa Nyina‑a Fiipi a tuin. Kai chɛ ma a yen ni to, mbɛ a wɛɛ‑a a 'a tachɛ a tun a ma. A bu ɔ diama wa ni gbɛ, ɛ ta‑a.

⁴⁰ Chɛɛ Fiipi‑a a wandi yen fan gbɛ duu dɔndɔ ɔ, an mbe min chee, an dɔ, Asotɔsi. A sin ben‑da wan nɔ ma, a ɛ ta‑a sakana bai chɛndɛ chɛ sa‑a duu kan kɔ kan dɔ, aan a che Sisayea duu ɔ.