CHISƆSI 'A SƆ MƆƐ NU 4 - Yataa 'a Dɔbɛnɛ Nama

An na‑a Pita a Chu kuti wa ɔ, an fea Chɔn na

¹ Pita ni tun koɔ tena wan, an fea Chɔn na, mbɛ mɔɛ dɔ n na‑a, an‑na an tan. An mɔɛ chɛ n ni Chu n tɛ mɔɛ n fan na Yataa a, ni mɔɛ min ni ka Yataa 'a kata kun ma fɛn poesi n ya ɔ, a basan mɔɛ n na, an ni miin chee, an dɔ Sadusii mɔɛ nu.

² An faa tɛ‑a wan Pita ma, an fea Chɔn na. Koe min na mu, an dɔ, an mbe mɔɛ n kan‑da, a si Chisɔsi kɔɔ sɔ koe ma, a ka saya ɔ. An dɔ, kan chɛ, ɛ a ɔ yian tena wan, mbɛ tea mu a a, mbɛ Yataa ɛ a ma wan mɔɛ ni a kɔɔ sɔ, a ka saya ɔ.

³ Chɛ‑a a ma wan, an‑na an bia, mbɛ an‑na an sa pimbi chenɛ a, aan banda ɔ ka‑a. Koe min na mu, an na‑a an bia tee bea ma wan.

⁴ Chɛɛ mɔɛ miin sɛsɛ na‑a Pita 'a sakana bai chɛ a min, a si Chisɔsi ma, an dan‑da wan a a. A sin, mɔ kaima miin gbɛɛ‑a an kai fa gbɛ Chisɔsi a, an danɛ ta‑a wan gbɛ wu duu ɔ.

⁵ Banda ɔ ka‑a kɛn, Chu n kun ti nu, ni Chu n 'na gbakoo nu, an bɛ Chu n 'na sawa kan mɔɛ n na, an gbɛɛ bɛn‑da Chuusaɛn duu chɛ ɔ.

⁶ An gbɛɛ bɛn‑da wan, an bɛ Chu n 'na tɛ mɔɛ wa a, Yataa tena. An tɛ mɔ wa chɛ tɔ ni Anasi. Kayafasi wɛɛ, Chɔn, ni Adɛsanda, a basan mɔɛ tɔɛ chɛ n na, miin bɛɛ na‑a bɔ an tɛ mɔ wa dambi chɛ ɔ, an bɛɛ ni wan nɔ, an bɛn dɔndɔ gbe chɛ ɔ.

⁷ An‑na a ma wan Chisɔsi 'a sɔ mɔɛ chɛ n sɔ‑a an chen kɔɔ. Mbɛ an‑na an dɔ tisa, an dɔ te, “Wo ma‑a ka ma namaa chɛ‑a tachɛ chɛ? Gbasaya minan dɔ mu, wo‑a ko bonda chɛ ma? Nyɔn 'na gbasaya ɔ mu, wo‑a koe chɛ ma?”

⁸ Yataa Nyina ni wan gbɛ Pita fɛ gban, min‑na a ma, a‑a a fɔ an ye, a ɔ, “Chɛnyɛ gbakoo n bɛ mansa n na, Isɔɛɛ mɔɛ n kun ma,

⁹ wo e ka nn gbɛmbo tena wan bi, a si ko chɛndɛ ma, min ma‑a namaa chɛ a. Wo e nn dɔ tisa‑a, ni a baun‑da buɛ min dɔ.

¹⁰ Nn mbe a ɔ yian‑da wan gbɛ wo a, a basan mɔɛ tɔɛ n gbɛɛ a Isɔɛɛ chɛnyɛ ɔ, kamin chɛ ɛ sɔ ɔ nɛ, mɔɛ min 'na gbasaya ɔ. Nasaɛti duu ɔ mɔɛ chɛ mu, Chisɔsi Chasi, wo‑a min gbangban kɔn gbengbandenɛ ma, mbɛ a fa‑a. Chɛɛ Yataa‑a Chisɔsi kɔɔ sɔ wan, a ka saya ɔ. An Chisɔsi Chasi chɛ 'a gbasaya ɔ mu kamin chɛ, wo e ka min yen tena, a‑a bauncha ma sɔn.

¹¹ Chisɔsi chɛ mu, Yataa 'a gboo‑a bai sa a si min ma, a ɔ, ‘Wo wan chen sɔ mɔɛ n na‑a ban senɛ min dɔ, wo ɔ, a ma nyin, an gbu ma‑a gbɛ senɛ kuu ba wandi a, chenɛ gbu ko a.’

¹² Yataa‑a gbasaya be Chisɔsi dɔndɔ gbe an ma, a ma koe a mɔ gbu gbɛɛ ni bauncha ma sɔn. Yataa ma tɔ dɔ mende a bɔ ni to dunya chɛ ɔ, mmɔ ɛ min chee bauncha ma sɔn koe a, a fɔ dechee Chisɔsi dɔndɔ gbe.”

¹³ Chu kuti wa chɛ a fii‑a wan, a ɔ yen koe a Pita an fea Chɔn na, an ni bai sa tena buɛ min dɔ yaagbɛa a. Kun ti chɛ n‑na a ɔ sɔn fan, mbɛ mɔ gbama gbama ni Pita n na, miin gbu nii ma gboo sɔn ba chɛ. A yɛ to, an‑na a ɔ sɔn fan to a tima chɛ a, mbɛ an ni wan tee Chisɔsi fɛ.

¹⁴ Chɛɛ an da ɔ gbaa‑a wan, min‑na a ma, bai ɔ bai ma bɔ ni an da a a fɔ koe a, min ni mabɔ bai a. Koe min na mu, an‑na kamin chɛ yen fan, min na‑a baun, ɛ sɔ ɔ Pita tɔnfɛ, an fea Chɔn n na.

¹⁵ Mbɛ Chu kuti wa chɛ, an‑na a fɔ, an dɔ, Pita ni an kafai, an fea Chɔn na. Mbɛ an‑na an nyɔn dɔ tisa, an dɔ te,

¹⁶ “Mmɔ ɛ fen ma‑a mɔɛ chɛ n na? Mɔ ɔ mɔ min mbe Chuusaɛn duu ɔ, an‑na a ɔ sɔn fan, mɔɛ chɛ n‑na kamaya ko wa min ma ka. Mmɔ ee che a fɔ‑a, mbɛ an fan ma a ma ni.

¹⁷ Chɛɛ min mbe a ma, an ma na a ma mɔ dɔ mende n ni a ɔ sɔn, mmɔ an na si gbau gbau. Mbɛ an ma bai kan kɔ kan sa to mɔɛ n tena, a si Chisɔsi chɛ ma.”

¹⁸ Mbɛ an‑na Pita chee, an fea Chɔn na. Mbɛ an‑na a fɔ an ye, an dɔ, an ma bai ɔ bai sa to mɔ ɔ mɔ tena, a si Chisɔsi wakoe ma. A yɛ to, an dɔ, an ma mɔ ɔ mɔ kan to, a si Chisɔsi 'a wai n ma.

¹⁹ Chɛɛ Pita an fea Chɔn na, an dɔ, “Wo wandi gbu, wo a fɔ wɛ, ni a ma bɛnden fan mu Yataa chen kɔɔ, nn ni nn too ma sɔ a ma, chɛ ma, ni nn mbe a ma sɔ wo wan ma.

²⁰ Koe min na mu, nn mbe ee che nn da a tɔn‑da koe n ma, nn fandi‑a koe miin dɔ yen, a yɛ to, nn too‑a miin na min.”

²¹ Chɛ gbakɔ, Chu kuti wa chɛ, an‑na Pita n na si wan to gbau gbau, mbɛ an‑na an boo ka. Koe min na mu, mɔɛ n gbɛɛ ni wan Yataa tando‑a, koe chɛ ko a, min ma‑a ka. An fandi gbu kuti ɔ, an kuiɛ nii ma bɛn ni kaina dɔndɔɛ, a si ni an mbe an tɔɔ buɛ min dɔ.

²² Kamin chɛ min baun‑da ka kamaya chia chɛ a, a suun sanɛ benden fan ni gbɛ san bi naanin ma.

Mɔɛ miin‑na an kai fa Chisɔsi a, an‑na samunɛ chɛ

²³ An‑na an boo ka kɛn dechee Pita a, an fea Chɔn na, an yɛ‑a wan an bɔɛ n tena. An‑na a ɔ yian fan an bɔɛ chɛ n na, Chu n tɛ mɔɛ nu Yataa a, an 'na mansa nu, an bɛ Chu gbakoo n na, an na‑a bai min fɔ an fan Pita n ye.

²⁴ Mɔɛ chɛ nu, miin na‑a an kai fa ka Chisɔsi a, an‑na bai chɛ n na min kɛn, mbɛ an gbɛɛ bun‑da samun‑da Yataa tena, kuiɛ a kanɛ ɔ. An dɔ, “Mansa Yataa, i wan‑na banda a dan, an fea duu gboo a, kɔ yii wɛɛ, a basan fen kɔ fen na, miin mbe an dɔ.

²⁵ I wan‑na a ma, nn bemba n ta bemba Defidi koɔ‑a. I 'a bɔi denɛ ni a a. Mbɛ a sin, Yataa Nyina na‑a bai don fan a da a, a fɔ koe a. A na‑a a fɔ wan i 'a gboo ɔ, a ɔ, ‘Mɔɛ tɔɛ n gbɛɛ dunya ɔ, miin ma Chu mɔ a, an faa ɛ tɛ‑a, an mbe dɔbɛn yama chɛ‑a, a si Mansa Wa ma, ko ee bɔ‑a min dɔ. Fen mu an mbe chɛ ma tena?

²⁶ Mbɛ dunya ɔ mansa n‑na an fandi ma bɛn, mbɛ kun ti n na kan‑da kaina dɔndɔ, butuin chɛ koe a Mansa Yataa a, an fea kunka mansa a, a‑a a boo sɔ min ma.’

²⁷ Tea gbu sin ko a, nɛ ni Chuusaɛn duu chɛ ɔ, an‑na an kun puin kaina, i 'a wai chɛ mɔɛ Chisɔsi Chasi ma, min mbe tenchen i ko a. I‑a i boo sɔ an ma kunka mansa a. Mansa Ɛdɔdi, ni Kɔfana Pɔnchɔsi Padeti, an bɛ an na‑a an kun puin chɛ chɛ, an bɛ mɔɛ chɛ n na miin ma Chu mɔ n na, a basan Isɔɛɛ mɔɛ n gbɛɛ a, ko yama ma koe a kunka mansa chɛ a.

²⁸ An na kan‑da wan kaina dɔndɔ, min mbe a ma, an ni koe chɛ n dɔ bɛn, miin dɔ bɛnden ni gbɛ i boo ɔ, yɔ i toen ni a a buɛ min dɔ.

²⁹ Sanche gbɛ Mansa Yataa, an 'na da chianɛ n ma fɛn, mbɛ i‑a gbasaya be nn ma. Nn fɛn mu i 'a wai chɛ mɔɛ n na, i ni a ma, nn ni faagbɛa ma sɔn. I 'a sakana bai chɛndɛ chɛ, a si Chisɔsi ma, nn ni kun a ɔ yian‑da mɔɛ n na.

³⁰ A ma mɔɛ n ni i 'a gbasaya ɔ yen, i 'a baun chɛ ɔ. Gbasaya be nn ma, nn ni kun a ma‑a, kamaya ko wa n ni ma, i 'a wai chɛ mɔɛ Chisɔsi tɔɛ ɔ, min mbe tenchen i ko a.”

³¹ An ban‑da kɛn samunɛ chɛ‑a, an na sɔnden ni ka kaina, Yataa‑a a ma wan, nɔ ɔ samba‑a gbigbi. A sin, Yataa Nyina ni wan gbɛ an gbɛɛ fɛ gban. Mbɛ an‑na a kuu sɔ Yataa 'a sakana bai sa‑a, faagbɛa a.

Mɔɛ miin na‑a an kai fa Chisɔsi a, an‑na an nyɔn deman, boo fenɛ n dɔ

³² Mɔɛ miin gbɛɛ na‑a an kai fa ka Chisɔsi a, an 'na yiinachii ni dɔndɔ gbe, an faa ma koe ni dɔndɔ gbe. Mɔ ɔ mɔ nii ma kankan ni a ta boo fenɛ kun ma, chɛɛ an boo fenɛ n ni boo fen dɔndɔɛ n fan na. An ni an boo fenɛ n be wan an nyɔn ma, yɔ an nyɔn ma gbɔsɔɛ ni ma buɛ min dɔ.

³³ Chisɔsi 'a sɔ mɔɛ chɛ n da a kuiɛ ni gbasa kaka, an ni koɔ wan mɔɛ n tena, a si Yataa‑a a ma buɛ min dɔ, Mansa Chisɔsi‑a a kɔɔ sɔ a ka saya ɔ. A sin, Yataa‑a mɔɛ chɛ n gbɛɛ dua wan, a sɛmbɛnden na, miin na‑a an kai fa Chisɔsi a.

³⁴ Fen kɔ fen ma gbɔsɔ ma mɔ ɔ mɔ bia ni an tɛ ɔ. Koe min na mu, duu gboo ni an fɛn gbɛɛ boo ɔ, a basan chenɛ n na, an ni an ma tachɛ wan, mbɛ an na‑a a kɔpɔɛ chɛ a,

³⁵ mbɛ an‑na a be Chisɔsi 'a sɔ mɔɛ chɛ n ma. An ni an kɔpɔɛ chɛ du wan mɔɛ chɛ n ma, miin na‑a an kai fa ka Chisɔsi a, yɔ mɔɛ ma gbɔsɔɛ ni ma buɛ min dɔ.

³⁶ A tɔmɔsi ni kamin dɔndɔ an na, min tɔ ni Chosɛfi. Chisɔsi 'a sɔ mɔɛ n ni an kamin chɛ chee, an dɔ, Banabasi, min fasaien ni, mɔɛ min mbe a bɔɛ n faa ma nande. A na‑a bɔ Difai dambi an dɔ. A sin na‑a suun Saipɔsi wan, yii tinɛ ɔ.

³⁷ A wɛɛ, a‑a a 'a duu gboo ma tachɛ wan. Mbɛ a na‑a an kɔpɔɛ chɛ a, mbɛ a‑a a konan Chisɔsi 'a sɔ mɔɛ chɛ n ma.