CHISƆSI 'A SƆ MƆƐ NU 27 - Yataa 'a Dɔbɛnɛ Nama

Soya n si‑a dɛndɛ ɔ, an bɛ Pɔɔ n na, an ta‑a Domi duu ɔ

¹ A tima che‑a, dɔbɛnɛ chɛ‑a wan nn si koe a dɛndɛ ɔ, a ta Itadi chɛnyɛ ɔ. An‑na Pɔɔ be wan, a basan pimbi chenɛ a sa mɔɛ dɔ mende n na, Chudiɔsi dɔndɔ ma. Chudiɔsi chɛ, a ni soya gbakoo an na, soya chɛmɛ dɔndɔ ko a, an ni miin chee, an dɔ, Domi Kun Ti Wa Soya nu.

² Nn sɛ‑a wan dɛndɛ ɔ, min ka‑a Adamitiɔn duu ɔ, min ni gbɛ ta koe a duu chɛ n dɔ, yii a sanɛ Esia chɛnyɛ ɔ. Mbɛ nn ta‑a, nn bɛ Ayisitakɔsi a, min ni Tɛsadonika duu ɔ mɔɛ a, a ka Masidonia chɛnyɛ ɔ.

³ Tee dɔndɔɛ ma, mbɛ nn che‑a Sidon duu ɔ. Chudiɔsi‑a Pɔɔ bia wan chɛndɛ chɛ, mbɛ a‑a a boo ka a ma. A ɔ, Pɔɔ ni ta, a ni a dia nyɔɛ n yen, basan koe a a ma, mbɛ a yɛ‑a.

⁴ Mbɛ nn ka‑a nɔ, nn bun‑da ta‑a. Chɛɛ nn‑na chia dɔ gbɛɛ bia wan, Saipɔsi yii tinɛ ɔ baima, fia nii nn ya kɔɔ tawa kaina min, koe min na mu, fia wa an ni bɔ tena.

⁵ Nn‑na kɔ yii gbu tɛ kɛn, nn ben‑da Sidisia a san‑da, an fea Panfidia chɛnyɛ a. Mbɛ nn ta‑a Miya duu ɔ, min ni Disia chɛnyɛ ɔ.

⁶ Nɔ ni soya gbakoo chɛ‑a dɛndɛ tan, a ka Adɛsandia duu ɔ, min ni ta tena Itadi chɛnyɛ ɔ. Mbɛ a‑a nn na sɛ an dɛndɛ gbu ɔ.

⁷ Nn ni dɛndɛ min dɔ, a ni ta tena wan yɛdɛn yɛdɛn, tee sɛsɛ ko a. Nn ya kɔɔ tawa‑a wan, nn mbe e na to che‑a Nidɔsi duu ɔ. Fia nii ma tima be ni nn ma, min‑na a ma, nn‑na dɛndɛ mun Keti yii tinɛ kaka dɔndɔɛ ma, fia nii nn ya kɔɔ tawa kaina. Mbɛ nn ben‑da Samone chia a, min ni yii chɛ sunɛ a den.

⁸ Nn tɔɔ‑a wan, ben koe a kɔ yii tindi a sanɛ. Mbɛ n che‑a kaina, an ni min chee, an dɔ, Yii Tɛnda Nyima. A tena ɔ nii ma yansan, an fea Dasiya duu a.

⁹ Nn na‑a tima ɔ yansama ya wan, nn 'na tachɛ chɛ ɔ. Chɛ‑a a ma wan, a nii ma nyin to ta koe a yii a, koe min na mu, sanɛ ma taen fan ni gbɛ. Chɛ ko a, Pɔɔ‑a dasi be wan mɔɛ chɛ n ma, miin ni dɛndɛ chɛ kun ma, a ɔ,

¹⁰ “N bɔ nu, n‑na a ɔ yen, mbɛ mmɔ 'a tachɛ a ka nɛ, a ee ma‑a tachɛ chɛndɛ a. Gbunɛ ɛ mmɔ tan‑da wan yii chɛ a. Fenɛ miin gbɛɛ n mbe dɛndɛ chɛ ɔ, an mbe to‑a wan a ɔ, mbɛ mɔ sɛsɛ fɔɛ ɛ to‑a wan a ɔ.”

¹¹ Chɛɛ soya gbakoo chɛ, a ma a too ma sɔ ni Pɔɔ ma, mɔɔ dɛndɛ wii mɔɛ chɛ, ni dɛndɛ ti n‑na min fɔ, a‑a a too ma sɔ an fan ma.

¹² An ni kaina, a nii ma nyin ma koe a nɔ, chima tima a. Chɛ ko a, mɔɛ miin sɛsɛ ni dɛndɛ chɛ ɔ, an toen ni an ni an tundun yii ɔ, min mbe a ma, an ni che Finisi duu ɔ, ni an mbe kun fan. Finisi ni duu an na, Keti yii tinɛ ɔ. Yii Tɛnda Nyima wɛɛ ni an yii tinɛ dɔndɔ gbe chɛ an dɔ. Chɛɛ tɛnda ni wan nɔ Finisi, min ya a munden ni tee bea boo nyima ɔ, ni a man dɔɛ. An toen ni an ni ma nɔ wan, aan tima chɛ ni ban, tima min na fia wa dɛgbɛ chɛ ɛ bɔ sanɛ ma.

Fia wa bɔ‑a kɔ yii a

¹³ Mbɛ a ɔ ma yansan ni, mbɛ fia‑a a kuu sɔ bɔ‑a tɛfɛɛ, tee bɔ boo nyima ɔ, mbɛ an‑na an yii na chii, mbɛ tee chɛndɛ an nii nɛ, an 'na tachɛ kuu sɔ koe a. Mbɛ an‑na yɔɔɛ chɛ fuin, min chiien ni dɛndɛ gbu ma, mbɛ an bun‑da ta‑a Keti yii tindi a sanɛ.

¹⁴ Chɛɛ a ɔ ma yansan ni to, mbɛ fia wa dɛgbɛ bɔ‑a, a ka yii tin chɛ ɔ. An ni fia wa chɛ sima chee, an dɔ, fia min ka‑a man dɔ chia a, tee bɔ.

¹⁵ A‑a dɛndɛ chɛ ɔ ma ma‑a wan a yama boo a, nn nii ma che ni min dɔ bia‑a, ta koe ya ɔ chia a. Nn bɛɛ, nn‑na nn boo ka dɛndɛ gbu a, an fia boo ɔ.

¹⁶ Fia chɛ sin‑na nn 'na dɛndɛ chɛ tundun fan, aan nn‑na kaina dɔndɔ a ben, yii tinɛ dɔɔma ɔ. An yii tinɛ chɛ tɔ ni Kauda, fia nii ma nn ya kɔɔ tawa ni kaina min. Nɔ ni, nn‑na nn ma chɛɛ chɛ, ya kɔɔ sisi a, dɛndɛ dɔɔma chɛ, nn ni min sawan nn gbaa, a ɔ bɛn koe a.

¹⁷ Nn‑na a bɔ wan yii ɔ, mbɛ nn‑na a a sɛ dɛndɛ wa chɛ bu ɔ. Mbɛ an‑na yuu chii gban dɛndɛ wa chɛ 'a tindanɛ, a ɔ gbɛa koe a. An chianden fan ni, min mbe a ma, dɛndɛ chɛ ma na si tɛɛ kuu ma yii kɔɔ, Dibia chɛnyɛ baima. Chɛ‑a a ma wan, an‑na koa chɛ a mɔndɔ mɔndɔ, min ni fia ya ka dɛndɛ chɛ a bui koe a, min mbe a ma, fia wandi ni ta dɛndɛ gbu a.

¹⁸ A sin, fia to‑a wan nn fichi fichi‑a aan, mbɛ tee dɔndɔɛ ma, an bun‑da feanka n na dɛ‑a yii ɔ, miin ni ka dɛndɛ wa chɛ gbu ɔ.

¹⁹ Mbɛ tee sawan bɔɛ ma, an‑na dɛndɛ gbu ma feanka n bɛɛ a dɛ wan yii ɔ, an fandi gbu boo a.

²⁰ Tee sɛsɛ ko a, nn nii tee yen, nn nii tɔmbuaka n bɛɛ yen. Fia fichi fichi chɛ ni bɔ tena wan tun gbasaya a. A danka a, nn‑na nn yii bɔ nn fɔɛ kɔ, a nii to nn yii ma, mbɛ nn kunɛ n mbe bɔ‑a wan a ɔ.

²¹ Tee sɛsɛ ben‑da ka buɛ min dɔ, mɔɛ chɛ n nii ma daun fen daun ni, Pɔɔ bɔ‑a wan gbɛ, a sɔ‑a an tɛ, mbɛ a ɔ, “N bɔ nu, a ni nyan‑da wan, ni wo na‑a wo too ma sɔ n ma, a saa a. Mmɔ nii bɔ‑a Keti, mmɔ ni fo feanka bonda chɛ n gbɛɛ a, a yɛ to, mmɔ nii kasaa bonda chɛ ɔ yen‑da.

²² Chɛɛ sanche gbɛ, n mbe wo disa tena, mbɛ wo ni wo faa bia. Koe min na mu, mmɔ wɛn gbɛɛ ɛ ka nɛ, mmɔ dɔndɔ wɛɛ kun mbe ee to tena koe chɛ ɔ, mmɔ 'a dɛndɛ an kun mbe to‑a a ɔ dechee.

²³ Koe min na mu, kunun yɛɛ ma, Yataa min ta mu n na, a yɛ to, n mbe min fai, a 'a maeka ni wan sɔ ɔ n baima,

²⁴ mbɛ a ɔ, ‘Pɔɔ, i ma chian. E sɔ‑a wan Domi kun ti wa chɛ chen kɔɔ. A sin yen ko, Yataa chinchin‑da i ma, a basan mɔɛ chɛ n gbɛɛ a, wo bɛ ɛ ka miin na dɛndɛ chɛ ɔ.’

²⁵ Chɛ an fɛ mu, n bɔ nu, wo wo faa bia. Koe min na mu, n kai faen fan mu Yataa a, mbɛ ɛ a ma‑a wan, yɔ a 'a maeka chɛ‑a a ɔ yian buɛ min dɔ n na.

²⁶ Chɛɛ dɛndɛ chɛ ɛ a fo tena wan mmɔ a, yii tinɛ dɔndɔ ɔ.”

²⁷ Tee tan kun ma naanin bɔɛ che‑a kɛn, yɛɛ ma, fia wa ni wan tun nn tundun‑da Mɛditeyenia kɔ yii chɛ a ta‑a faa. Su tɛ nyɔn sima a ɔ ni, mbɛ mɔɛ miin ni wai chɛ dɛndɛ chɛ ɔ, an yiima‑a an kɔ, mbɛ nn ni gbɛ gbaa gbaa baima wan.

²⁸ Mbɛ an‑na yuu a yii yii chɛ ɔ, fen fankama chiien ni min na. Mbɛ an‑na a ɔ sɔn, mbɛ a ka yii chɛ kun ma, a yii a kɔɔ, a ɔ yiien fan ni fiti chɛmɛ dɔndɔ ni fiti bi fea. An ta‑a to ɛnden na, mbɛ an‑na yuu chɛ a yii to, mbɛ an‑na a ɔ yen, mbɛ a ɔ yiien ni gbɛ fiti bi kɔnɔntɔ.

²⁹ An chianden fan ni, nn 'na dɛndɛ ma na bɛn senɛ n ma, min‑na a ma, mbɛ an‑na kundu wa naanin na yii yii ɔ, min chiien ni dɛndɛ chɛ ma, a gbaa chia a. Chɛ n fan mbe a ma, dɛndɛ ee bui, ni a sɔ‑a. Mbɛ an bun‑da Yataa fai‑a, banda ɔ ka koe a.

³⁰ Wai chɛ mɔɛ chɛ nu, dɛndɛ chɛ ɔ, an toen ni an ni bɔ dɛndɛ gbu ɔ, an ni an nun. An‑na dɛndɛ ɛnden chɛ, dɛndɛ wa chɛ bu ɔ, an‑na a fuin fan, mbɛ an‑na a a yii yii ɔ. An‑na a ma, yɔ an mbe ka ta tena kundu wa dɔ mende n fan na yii‑a, dɛndɛ wa chɛ ya ɔ.

³¹ Chɛɛ Pɔɔ‑a a fɔ wan soya gbakoo chɛ ye, an bɛ soya tɔɛ chɛ n na, a ɔ, “Ni wai chɛ mɔɛ tɔɛ chɛ nu, an ma to ni dɛndɛ chɛ ɔ, wo kun mbe ee bɔ‑a a ɔ.”

³² Chɛ ko a, soya chɛ n‑na dɛndɛ ɛnden chɛ yuu tɛ, dɛndɛ gbu ta koe a, a wandi ko a.

³³ Banda ɔ ni gbɛ ka tena wan, mbɛ Pɔɔ‑a a fɔ an gbɛɛ ye, a ɔ, an ni fen den daun. A ɔ te an ma, “Tee tan kun ma naanin ka gbɛ, wo e faagbaa ɔ tun, wo gbu sin ma daun fen kan kɔ kan daun ni ɛnden bɛɛ a.

³⁴ Chɛ an fɛ mu, n mbe wo disa tena, wo ni daun fen den daun. An mbe a ma‑a fanka ni yɛ wo ɔ. Koe min na mu, ko ɔ ko ee ma‑a wo kundi dɔndɔ gbe wɛɛ a, wo dɔndɔ wɛɛ kun ma.”

³⁵ A sin, Pɔɔ ban‑da kɛn chɛ fɔ‑a an ye, mbɛ a‑a biidi ya, a‑a tando be Yataa ma an gbɛɛ ya kɔɔ, a‑a a ɔ kai kai, mbɛ a bun‑da a daun‑da.

³⁶ Mbɛ chɛ‑a an gbɛɛ faa chima wan, mbɛ an gbɛɛ‑a daunɛ chɛ, a tima chɛ a.

³⁷ Nn fɛn gbɛɛ ni dɛndɛ chɛ ɔ, nn danɛ taen fan ni mɔ chɛmɛ fea, mɔ bi wɔnfea kun ma wɔdɔɛ ɔ.

³⁸ An gbɛɛ‑a an bu fa daunɛ chɛ kɛn, an‑na daun fen chɛ tɔɛ gbɛɛ a dɛ wan yii ɔ, dɛndɛ chɛ fanka bɔ koe a ɔ.

Fia wa dɛgbɛ chɛ, min ni bɔ tena, a‑a dɛndɛ wa chɛ yɔn

³⁹ Banda ɔ ka‑a kɛn, wai chɛ mɔɛ chɛ nu dɛndɛ chɛ ɔ, an‑na yii tinɛ yen fan, chɛɛ an nii ma ko ɔ ko ɔ sɔn, a si an kaina chɛ ma. Chɛɛ an‑na kaina yen fan an yii tin chɛ ɔ, min ni yii a, a doee taenɛ ɛ gbaa gbaa ɔ, tɛɛ kuu munyɛ nyima ni min ma. Mbɛ an‑na an yiima ɔ bɛn, ni an mbe kun fan, an ni ta dɛndɛ chɛ a nɔ tindi ma.

⁴⁰ Mbɛ an‑na yuu chɛ n tɛ kundu wa chɛ n ma, mbɛ an to‑a gbaa yii chɛ kɔɔ. Mbɛ an yɛ‑a to, an‑na yuu chɛ n fuin kɔn chɛ n ma, miin ni dɛndɛ chɛ mun a ta tena. Mbɛ an‑na koa chɛ a sɛ, kɔnɛ ma dɛndɛ chɛ ya ɔ, fia si koe a ɔ, dɛndɛ chɛ a ta koe ma ya ɔ. Mbɛ dɛndɛ gbu, a‑a a kuu sɔ ta‑a tindi ma.

⁴¹ Chɛɛ dɛndɛ chɛ ya ɔ chia gban‑da wan kaina chɛ, tɛɛ kuu‑a kɔnkɔɛ nyan kaina yii kɔɔ. A nii che ka‑a a gba ɔ. Mbɛ fia wa dɛgbɛ chɛ, a‑a a ma, yii gbugbu chɛ‑a dɛndɛ chɛ ɔ, a gbaa chia ɔ tɛka tɛka‑a gbɛɛ.

⁴² Mbɛ soya chɛ n‑na a ɔ bɛn, an ni mɔɛ n gbɛɛ fa, miin ni an boo ɔ bia ɔ. Koe min na mu, an nii ma to ni, an dɔndɔ wɛɛ ni nɔɔɛ chɛ, a ni yii tɛ, mbɛ a‑a a nun, an boo ɔ.

⁴³ Chɛɛ soya gbakoo chɛ, a nii ma to ni Pɔɔ ni fa. Mbɛ a‑a an na gban, an 'na dɔbɛn chɛ, a ta koe a ya ɔ ma. A‑a min ma dechee, a‑a a fɔ wan an gbɛɛ ye dɛndɛ chɛ ɔ, a ɔ, mɔɛ miin kosan nɔɔɛ chɛ‑a, an pɛn ni tin yii chɛ ɔ, an ni nɔɔɛ chɛ, a ta tindi ma.

⁴⁴ Mbɛ mɔɛ tɔɛ n sin, miin mbe ee nɔɔɛ chɛ, an‑na a sɔ an fɛ. Chɛɛ an tana, an mbe ma bun dɔ gbembe tɛnɛ n fan kɔ, chɛ ma, dɛndɛ gbu pɛnchɛnɛ n kɔ. Mbɛ a sin ma‑a ka wan, nn gbɛɛ‑a yii tɛ tindi ma, nn chɛndɛ a.