CHISƆSI 'A SƆ MƆƐ NU 26 - Yataa 'a Dɔbɛnɛ Nama

¹ Mbɛ Mansa Akipa‑a a fɔ Pɔɔ ye, a ɔ, “Pɔɔ, n too ɛ wan gbɛ i ma, koɔ koe a i wandi ko a.” Mbɛ Pɔɔ‑a a boo ɔ fuin, a bun‑da koɔ‑a a wandi ko a.

² A ɔ, “Mansa Akipa, n‑na a ya wan, mbɛ n duaen mu bi, koɔ koe a n fandi ko a, i chen kɔɔ. N ni n fandi kun bɔ koe chɛ n gbɛɛ ɔ, Chu mɔɛ chɛ n‑na miin si n kun ma.

³ Tea gbu bɛɛ bɛɛ mu, mbɛ i‑a Chu manda n sɔn fan, a basan kɔɔsa chɛ n na, an mbe miin bia. Chɛ an fɛ mu, n mbe i disa tena, i ni i too be n ma chɛndɛ chɛ.

⁴ “Chu mɔɛ n gbɛɛ‑a a ɔ sɔn fan, n ni fɔɛ min nyɔn sima ɔ, n kamin tɔngbɔ tɔɛ a. An‑na a ɔ sɔn fan, a ka a tima chɛ ma, n tachɛ‑a buɛ min dɔ, n 'na fɔɛ gbɛɛ ɔ, n ta chɛnyɛ ɔ, a basan Chuusaɛn duu wɛɛ ɔ a.

⁵ Tima ɔ tima ko a, an‑na a ɔ sɔn fan, mbɛ a saa gbu a, n ni dɔbɛn chɛ an dɔ, min nii sai bɔ. An dɔbɛn chɛ, Yataa fai koe a, an ni min chee, an dɔ, Fayisii dɔbɛnɛ. Ni an mbe dɔn‑da wan, an mbe che wan siiya bɔ‑a chɛ ma.

⁶ Mbɛ sanche gbɛ, n mbe ka sɔ ɔ nɛ, n gbɛmbo koe a an ko a. Tooɔdia chɛ an ko a mu, n yii na tɛen mu min ma, Yataa na‑a min chɛ mmɔ bemba n ta bemba n na.

⁷ An tooɔdia dɔndɔ gbe chɛ, mmɔ 'a dambi tan kun ma fea chɛ n gbɛɛ, an yii na tɛen mu an ma sɔn koe a. A sin fan mbe a ma tena, an mbe Yataa fai tena, su ɔ tee a, an faa gbɛɛ a. Mansa Akipa, yiinatɛ chɛ an ko a mu ka, n mbe nɛ sɔ ɔ kuti chen kɔɔ.

⁸ Wo wan, wo e a ya tena wan, mbɛ a ee che ma‑a, wo ni dan chɛ a, mbɛ Yataa ɛ mɔɛ kɔɔ sɔ wan, a ka saya ɔ. Fen mu, wo e wo yii na chii tena ka?

⁹ “N fandi gbu wɛɛ, n ni n yii na chii wan, ko kan kɔ kan ma koe a, min ni a ma, Chisɔsi tɔɛ ni fa, Nasaɛti mɔɛ chɛ.

¹⁰ N‑na chɛ an ma Chuusaɛn duu ɔ. N‑na a ma wan, Chu mɔɛ n tɛ mɔɛ nu Yataa a, an 'na mansa, a‑a gbasaya be n ma, n‑na Yataa 'a mɔɛ n sa pimbi chenɛ a. Chɛ dechee nii ma, chɛɛ an ni kɛn kaa a tɛ‑a, an fa koe ma, n‑na toa si wan a kɔɔ.

¹¹ Tima sɛsɛ ko a, n‑na an na mɔnɛ wan, Chu n 'na samun chɛ chenɛ n na. A sin to, n‑na butuin chɛ wan, a ma koe a, an ni Yataa main. Mbɛ n yɛ‑a, faatɛ wa ɔ, n‑na ko yawaenɛ sa an ma. N ni ta wan duu wa dɔ mende n bɛɛ ɔ, chɛnyɛ dɔ mende n dɔ.

¹² “Chɛ ko a, n‑na chia bia wan, n bun‑da ta‑a Damasikɔsi duu ɔ. Chu n tɛ mɔɛ nu Yataa a, an 'na mansa nu, an fan‑na gbasaya be n ma, ta koe a nɔ, an da a kuiɛ kɔɔ.

¹³ Mansa Akipa, n ni Damasikɔsi chia chɛ ma wan, tee dɔndɔ a, mbɛ tee che‑a kɛn kun tɛ, n‑na man ba yen, a‑a n na tindan, nn bɛ mɔɛ chɛ n na, nn ni ta tena tachɛ chɛ ɔ miin na. Man chɛ ka‑a banda a wan, min ni man tena taun, a ben tee ma.

¹⁴ Nn gbɛɛ bea‑a kɛn duu ma, mbɛ n‑na mɔɛ kuiɛ a min, ɛ a fɔ‑a n ye, Ibu koɛ ɔ, a ɔ, ‘Sɔɔ, Sɔɔ, fen mu e ko ma gbaaenɛ sa tena ka n ma? E ka i wandi an tɔɔ tena fuu.’

¹⁵ “Mbɛ n‑na a fɔ, n dɔ te, ‘Nyɔn mu chɛ a?’ “Mbɛ mansa chɛ ɔ, ‘N fan mu, n fan Chisɔsi, e ko ma gbaaenɛ sa tena ka min ma.

¹⁶ Chɛɛ i kɔɔ sɔ, i ni sɔ. Koe min na mu, n‑na n fandi yian i a, n boo sɔ koe mu i ma, wai chɛ koe a n ye. I ni siiya bɔ mɔɛ tɔɛ n tena, a si koe chɛ n ma, i‑a miin dɔ yen bi, a yɛ to, n mbe a ma‑a, e min dɔ yen‑da ya ɔ ma.

¹⁷ N mbe ma‑a i kun bɔ‑a Chu mɔɛ n boo ɔ, an bɛ chɛ n na, miin ma Chu mɔ a. N mbe na tena i sɔ‑a miin tena,

¹⁸ i ni an ya a ka, i ni an bɔ pimbi ɔ, a na manɛ ɔ, i ni an bɔ Sitana boo ɔ, an ni ma Yataa 'a gbasaya kɔɔ. Chɛ ni a ma, Yataa ni a boo bɔ an 'na ko yama n dɔ, mbɛ an‑na an si tena ma sɔn, Yataa 'a mɔɛ n tɛ ɔ. Mɔɛ chɛ nu, Yataa ɛ a ma, miin mbe ma tenchen a ko a, koe min na mu, an‑na an kai fa n na.’

¹⁹ “Chɛ an fɛ mu, Mansa Akipa, n nii ma koe chɛ kɔɔsa bia ni, n‑na min dɔ yen, a ka banda bu ɔ, yɔ n ni cho ɔ wan.

²⁰ N‑na a ɔ yian Damasikɔsi pɛn, mbɛ n‑na a ɔ yian Chuusaɛn duu ɔ wɛɛ. A yɛ to, n‑na a ɔ yian Chudia chɛnyɛ gbɛɛ ɔ, ni mɔɛ chɛ n tena, miin nii ma Chu mɔɛ n na. N‑na a ɔ yian fan an gbɛɛ a, mbɛ an ni an kan kɔ sɔ an 'na ko yama n na, an ni an ya a mun Yataa ma. A sin, an ni koe n ma, yɔ mɔɛ nu, miin‑na an kan kɔ sɔ an 'na ko yama n na.

²¹ Wai chɛ an ko a mu, Chu mɔɛ chɛ n chɛ‑a n ma, n ni tima min na Yataa 'a kata ɔ, an sin toen ni, an ni n fa.

²² Chɛɛ a ka a tee chɛ ma, a sɔ bi ma, Yataa basan‑da wan n ma. A sin, n mbe bi nɛ sɔ ɔ, bai ɔ yian koe a wo gbɛɛ a, a ni ma mɔ chenama n na, chɛ ma, an ni ma chɛ n bɛɛ a, baa ee miin ma. N mbe ka min fɔ tena wo ye, Yataa 'a gbonka chɛ mɔɛ n bɛɛ, an‑na an ko dɔndɔ gbe chɛ an fɔ wo ye. Mosisi wɛɛ, a‑a an fɔ,

²³ mbɛ mmɔ kun ka mansa ɛ mɔnɛ ɔ bia wan. A yɛ to, a wan mbe ma‑a mɔɛ saa saa a, min mbe a kɔɔ sɔ‑a, a ka saya ɔ. A sin, a wan mbe manɛ yian‑da Chu mɔɛ n na, an bɛ chɛ n na, miin ma Chu mɔ a.”

²⁴ A sin koɔ‑a kɛn ka buɛ chɛ ɔ, a wandi kun bɔ koe a mɔɛ chɛ n boo ɔ, Kɔfana Fesɔsi dee‑a wan, a kuiɛ ma sɛenɛ a, a ɔ, “Pɔɔ, i wooen fan mu. Gboo kan ba chɛ, an mbe i yii bɔ tena i ɔ.”

²⁵ Mbɛ Pɔɔ ɔ te, “Kɔfana Fesɔsi, n ma woo ni. N mbe ka tea ma gbaaenɛ an fɔ tena.

²⁶ Koe min na mu, Mansa Akipa‑a koe chɛ n gbɛɛ ɔ sɔn fan. A sin fan tena mu, n mbe koɔ tena ka, ko ɔ ko boo ee n na. Koe min na mu, n yiima a koen fan mu, mbɛ a chen kɔɔ mu, koe chɛ n gbɛɛ ma‑a. Koe min na mu, an nii ma chɛ ni a ɔ nun dɔ.

²⁷ Mansa Akipa, i danden fan mu Yataa 'a gbonka chɛ mɔɛ n na, ae? N‑na a ɔ sɔn fan, mbɛ i danden fan mu an na.”

²⁸ Mbɛ Mansa Akipa‑a a fɔ Pɔɔ ye, a ɔ, “I toen mu gbɛ, i ni n ma Chisianɛ a, a ɔ wuuma wuuma chɛ a. Ae?”

²⁹ Mbɛ Pɔɔ‑a a fɔ, “A ɔ ni yansan fan, a ɔ ni wua wan, n ma to ni i dɔndɔ gbe a, chɛɛ mɔɛ tɔɛ gbɛɛ, miin mbe n kuiɛ a min tena ka bi, an ni ma Yataa tena, yɔ n mbe buɛ min dɔ. Yɔɔɛ chɛ dechee, n boo ma, an ma ma an ta ma.”

³⁰ Mbɛ mansa chɛ‑a a kɔɔ sɔ, an fea kɔfana a, ni Banisi, an bɛ chɛ n gbɛɛ a, an bɛ ni si ɔ miin na,

³¹ mbɛ an ta‑a pɔɔ, an sɔ‑a. An sɔ‑a kɛn, mbɛ an dɔ an nyɔn ma, an dɔ te, “Kamin chɛ ma ko yama kan kɔ kan ma ni, a ɛ saya ma sɔn min ko a, chɛ ma, ni a ee sa pimbi chenɛ a.”

³² Mbɛ Mansa Akipa‑a a fɔ Kɔfana Fesɔsi ye, a ɔ, “I ni i boo ka‑a wan kamin chɛ a, ni a nii ma a 'a bai a ta koe fɔ ni Domi kun ti wa tena.”