CHISƆSI 'A SƆ MƆƐ NU 23 - Yataa 'a Dɔbɛnɛ Nama

¹ Mbɛ Pɔɔ‑a kuti wa chɛ ma fɛn, mbɛ a‑a a fɔ, a ɔ, “N suun ma nyɔɛ nu, a ka n suun tima ma, aan a sɔ tee chɛ ma, n ma sika ni n fandi ɔ. A sin, n mbe tachɛ tena tea chia an na, Yataa chen kɔɔ.”

² Mbɛ Ananiyasi, min ni Chu mɔɛ n 'na tɛ mɔ wa a Yataa tena, a‑a a fɔ mɔɛ n ye, miin ni sɔ ɔ Pɔɔ baima, a ɔ, an ni a da ɔ gbasi.

³ Mbɛ Pɔɔ‑a a fɔ, a ɔ, “Yataa wɛɛ, ɛ i da ɔ gbasi‑a wan, i nɛnɛn fea ti chɛ. E si ɔ pan, kaa a tɛ koe an na, yɔ mmɔ 'a sawa, a‑a a fɔ buɛ min dɔ. Chɛɛ chɛ gbɛɛ ɔ, sawa chɛ ma min fɔ ni, e ka an ma‑a, a fɔ koe a, i ɔ, an ni n gbasi.”

⁴ Mbɛ mɔɛ miin ni ka sɔ ɔ Pɔɔ baima, an‑na a fɔ a ye, an dɔ, “E ka koɔ‑a mɔɛ min tena, an mu Chu n tɛ mɔ wa a Yataa tena. E chɛ main fan?”

⁵ Mbɛ Pɔɔ ɔ te, “N suun ma nyɔɛ nu, n nii ma a ɔ sɔn ka, mbɛ an mu mmɔ 'a tɛ mɔ wa a Yataa tena. Koe min na mu, Yataa 'a gboo ɔ te, a ɔ, ‘Mɔ ee bai yama sa, a si i 'a mɔɛ n 'na mansa ma.’ ”

⁶ Pɔɔ‑a a ɔ yen fan, mbɛ fanka chɛ tɛ ɔ, mɔɛ dɔ n ni Sadusii mɔɛ n fan na, mɔɛ dɔ n sin ni Fayisii n fan na. A‑a chɛ ɔ yen kɛn, mbɛ a koɔ‑a, a kuiɛ ma sɛenɛ a, Chu kuti wa chɛ tena, a ɔ te, “N suun ma nyɔɛ nu, n mbe dɔbɛn chɛ an dɔ, an mbe min chee Fayisii dɔbɛnɛ. N‑na n woo mɔɛ n tan an dɔ, n mbe e na to suun‑da. A sin, n mbe nɛ kuti chɛ ɔ, koe min na mu, n yii na tɛen fan mu, mbɛ ni mɔ gbu fa‑a, ɛ a kɔɔ sɔ wan to a ka saya ɔ.”

⁷ A‑a chɛ fɔ kɛn dechee, mbɛ Fayisii mɔɛ chɛ nu, nɔ kuti wa chɛ ɔ, koɛ bea‑a an tɛ ɔ, an bɛ Sadusii mɔɛ n na. Mbɛ an kuti wa chɛ, a gbu du‑a kaina fea a.

⁸ Koe min na mu, Sadusii mɔɛ n mbe a fɔ wan, mbɛ ni mɔ gbu fa‑a, a ee che to a kɔɔ sɔ‑a kamba ɔ. A yɛ to, an dɔ, maeka n mbe ee nɔ, nyina dɔ mende wɛɛ ee nɔ. Chɛɛ Fayisii n tana, an danden fan ni ko sawa chɛ n gbɛɛ a.

⁹ Mbɛ an gbɛɛ bun‑da sɔnkɔ sɔnkɔ wa chɛ‑a. Mbɛ Chu mɔɛ n 'na sawa kan mɔɛ dɔ nu, miin ni Fayisii gbee a, an sɔ‑a. Mbɛ an dɔ, “Nn ma bai yama kan kɔ kan yen ni, Pɔɔ‑a min fɔ. Mmɔ ma a ɔ sɔn, kɔkɔɛ maeka mu, min koɔ‑a a tena, chɛ ma, kɔkɔɛ nyina dɔ mende nu mu.”

¹⁰ An to‑a kɔɔsa chɛ an dɔ, mbɛ a ma‑a sɔnkɔ sɔnkɔ wa a. Chɛ‑a a ma wan, soya chɛ n kun ti chɛ chian‑da, mbɛ a‑a a yii na chii Pɔɔ bɔ koe a an tɛ ɔ, an ma na a a panda panda an boo a. Mbɛ a‑a a fɔ a 'a soya mɔɛ n ye, a ɔ, an ni ta, an ni Pɔɔ bɔ an tɛ ɔ gbasaya a, an ni na a a baachi ɔ.

¹¹ Mbɛ a yɛɛ dɔndɔ gbe chɛ ma, Mansa Chisɔsi na‑a, a sɔ‑a Pɔɔ baima. Mbɛ Chisɔsi gbu ɔ, “I ma chian. I‑a a ɔ yian buɛ min dɔ, mɔɛ n na Chuusaɛn duu ɔ, i‑a koe min dɔ sɔn, a si n ma, e an ma tena to pan bɛɛ Domi duu ɔ.”

Chu mɔɛ n‑na a ɔ bɛn, Pɔɔ fa koe a

¹² Banda ɔ ka‑a kɛn, mbɛ Chu mɔɛ dɔ nu, an bɛn‑da, an‑na dɔbɛnɛ chɛ, a si Pɔɔ ma. Mbɛ an‑na an gboo, an dɔ, an mbe ee fen kɔ fen daun, an sin mbe ee yii wɛɛ min, aan an ni Pɔɔ fa.

¹³ Mɔɛ miin‑na koe chɛ ɔ bɛn, an benden ni mɔ bi naaninɛ ma.

¹⁴ Mbɛ an‑na an kɔɔ sɔ, an ta‑a Chu n tɛ mɔɛ nu Yataa a, an 'na mansa n tena, an bɛ Chu gbakoo n na. Mbɛ an‑na a fɔ, an dɔ te, “Nn‑na nn gboo kaina dɔndɔ, mbɛ nn ma fen kɔ fen daun, aan nn ni Pɔɔ fa.

¹⁵ Nn toen mu min na sanche gbɛ, a ma wɛ, wo bɛ mmɔ 'a kuti wa chɛ a, wo ni sakana a ta Domi soya n kun ti chɛ tena, na koe a an Pɔɔ a, wo tena. Wo a ma, yɔ wo toen mu, wo ni a ɔ tisa wan chɛndɛ chɛ, a 'a bai ɔ gbɛ koe a. Chɛɛ a e na to a fo‑a wo tena, nn mbe ma‑a wan gbɛ a ma kɔn‑da, a fa koe a.”

¹⁶ Chɛɛ boo kɔɔ mɔnɛ chɛ, a puin‑da wan Pɔɔ bain denɛ too ɔ. Mbɛ a don‑da baachi chɛ ɔ, a‑a an yii ma koe ɔ yian Pɔɔ a.

¹⁷ Mbɛ soya gbakoo dɔndɔ, Pɔɔ‑a a chee. Mbɛ a‑a a fɔ a ye, a ɔ, “Ta n ye kamin tɔngbɔɛ chɛ a, wo kun ti chɛ tena. Bai chenama an mbe a da a, a ɔ yian koe a a a.”

¹⁸ Mbɛ soya gbakoo chɛ‑a kamin tɔngbɔɛ chɛ ya, a ta‑a a a, an kun ti chɛ tena. Mbɛ a ɔ, “Kamin chɛ mmɔ boo ɔ bia ɔ, min tɔ mu ka Pɔɔ, an‑na n chee, mbɛ a‑a n dɔ tisa, a ɔ, n ni na kamin tɔngbɔɛ chɛ a i tena. Koe min na mu, a ɔ, bai chenama an mbe a da a, a ɔ yian koe a i a.”

¹⁹ Mbɛ soya n kun ti chɛ, a‑a kamin tɔngbɔɛ chɛ bia a boo ma. Mbɛ an fea ta‑a, mɔ dɔ mende nii kaina min, mbɛ a‑a a ɔ tisa, a ɔ, “Fen mbe i da a, a fɔ koe a n ye?”

²⁰ Mbɛ kamin tɔngbɔɛ chɛ ɔ, “Chu gbakoo chɛ nu, an gbɛɛ‑a an kun puin kaina dɔndɔ, i ɔ tisa koe a, i ni Pɔɔ a ta Chu kuti wa chɛ ɔ. An mbe a ma tena wan, yɔ an toen mu, an ni a wakoe an kɔɔ gbɛngbɛn chɛndɛ chɛ.

²¹ Chɛɛ i ma i too ma sɔ an ma. Koe min na mu, mɔɛ n mbe wan nun dɔ, Pɔɔ ma kɔn tena. An mɔɛ nu, an benden mu mɔ bi naanin bɛɛ ma. An‑na an gboo wan, mbɛ an mbe ee daun chɛ, an sin mbe ee yii wɛɛ min, aan an ni Pɔɔ fa. An gbu sin ma bɛndenɛ mu gbɛ sanche, a ma koe a. An mbe gbɛ dechee i wan ma kɔn tena, an ni a a min, ni e bai min fɔ‑a.”

²² Mbɛ kun ti chɛ‑a a fɔ, a ɔ, “I ma a ɔ yian mɔ ɔ mɔ a, mbɛ i‑a koe chɛ kɔɔ fɔ wan n ye.” Mbɛ a‑a a ma, kamin tɔngbɔɛ ɛnden chɛ, a ta‑a a waa a.

An‑na Pɔɔ a ta, Kɔfana Fedisi tena

²³ Mbɛ soya n kun ti chɛ, a‑a soya gbakoo fea chee, mbɛ a‑a a fɔ an ye, a ɔ, “Wo wo ma bɛn soya mɔ chɛmɛ fea a, an ta koe a Sisayea duu ɔ, ni awa sawan bɔɛ ben‑da pimbi bundenɛ a. An bɛ ni ta soya mɔ bi wɔnfea a, miin mbe soo n kɔ, a basan an mɔ chɛmɛ fea a, miin mbe tamba a dɛ.

²⁴ A yɛ to, wo soo ɔ bɛn Pɔɔ ko a, a ni si a kɔ, mbɛ wo‑a a kun ma fɛn, aan a ni che Kɔfana Fedisi tena.”

²⁵ Mbɛ soya n kun ti chɛ, a‑a gboo sin nyɛn fan kɔfana chɛ tena, a si Pɔɔ ma.

²⁶ N fan, Kaudiyɔsi Disiyasi, n fan mbe gboo chɛ nyɛn tena kai wa chɛ tena, Kɔfana Fedisi. Fa, n ni i kɔndɔn.

²⁷ Chu mɔɛ chɛ n‑na kamin chɛ an bia. An toen ni, an ni a fa. N‑na a a min fan, mbɛ Domi mɔɛ an nɛ a a. Chɛ‑a a ma wan, nn bɛ ta‑a n 'na soya mɔɛ n na, mbɛ nn‑na a bɔ an boo ɔ.

²⁸ N toen fan ni, n ni a ɔ sɔn, ni an‑na a bia koe min ko a. Mbɛ n ta‑a an Pɔɔ a, an 'na kuti wa chɛ ɔ.

²⁹ N‑na a kɔɔ gbɛngbɛn fan, n‑na a ɔ yen, mbɛ a ma ko yama kan kɔ kan ma ni, ɛ saya ma sɔn min ko a. Chɛ ma, an ni a sa pimbi chenɛ a. An‑na a bia dechee, an ta sawa n fan ko a, an dɔ, a‑a an yɔn.

³⁰ Chɛ an fɛ mu, mɔɛ‑a a fɔ kɛn n ye, mbɛ Chu mɔɛ n mbe dɔbɛnɛ chɛ tena, a fa koe a, n ma tima yayi ni. N‑na a ma wan, an na‑a i tena. Mɔɛ chɛ n bɛɛ, miin‑na a bia, n‑na a fɔ wan an bɛɛ ye, mbɛ an ni ta an 'na bai a i tena.

³¹ Mbɛ soya chɛ n‑na a ma ka wan, yɔ an kun ti chɛ‑a a fɔ buɛ min dɔ an ye, a ma koe a. An ta‑a wan Pɔɔ a pimbi ɔ, Andipatisi duu ɔ.

³² Banda ɔ ka‑a kɛn, soya mɔɛ chɛ dɔ n yɛ‑a wan baachi ɔ, chɛɛ an‑na an bɔɛ dɔ n to wan nɔ, miin ni soo a bui, ta koe a Pɔɔ a.

³³ An che‑a kɛn Sisayea duu ɔ, an ta‑a wan Pɔɔ a kɔfana chɛ tena, mbɛ an‑na gboo nyɛndenɛ chɛ wɛɛ be a ma.

³⁴ Mbɛ kɔfana chɛ‑a gboo chɛ kan. Mbɛ a‑a Pɔɔ ɔ tisa, a ɔ, “I ka‑a kaka minan ma?” A‑a a ɔ sɔn kɛn, mbɛ Pɔɔ ka‑a Sidisia chɛnyɛ ɔ wan,

³⁵ mbɛ a‑a a fɔ a ye, a ɔ, “N mbe n too ma sɔ‑a wan i 'a bai chɛ ma, ni mɔɛ chɛ n na‑a, koɛ ɛ wo tɛ miin na.” A ɔ, an ni Pɔɔ a don kata chɛ ɔ, Mansa Ɛdɔdi Wa na‑a min sɔ.