CHISƆSI 'A SƆ MƆƐ NU 21 - Yataa 'a Dɔbɛnɛ Nama

Pɔɔ ta‑a Chuusaɛn duu ɔ

¹ Mbɛ nn tɛ du‑a kɛn, nn bɛ Ɛfisɔsi mɔɛ chɛ n na, nn si‑a wan dɛndɛ ɔ. Mbɛ nn ta‑a dɔndɔ gbe Kɔsi yii tin chɛ ɔ. Tee fean bɔɛ ma, nn bɔ‑a Kɔsi, mbɛ nn ta‑a Dɔdɛsi yii tinɛ ɔ, nn ka‑a kaina min, nn ta‑a Pataa duu wɛɛ ɔ.

² A sin, nn‑na dɛndɛ dɔ gbɛɛ tan fan Pataa, min ni ta tena Fonisia chɛnyɛ ɔ. Nn sɛ‑a wan a ɔ, mbɛ nn ta‑a Fonisia.

³ Nn che‑a kɛn kaina, nn ni Saipɔsi yii tinɛ yen kaina min, nn‑na a ma sangba wan. Mbɛ nn‑na boo nyima ɔ chia bia wan, nn‑na nn kun sɔ Saipɔsi a, mbɛ nn che‑a tindi ma Taya duu ɔ. Koe min na mu, nɔ ni feanka a ni yii, a bɔ dɛndɛ wa chɛ ɔ.

⁴ Nn‑na nn ya a kan fan Chisɔsi fɛ mɔɛ dɔ n na nɔ, nn sin bɛ ni wan an na tɛn sɔngbɔ dɔndɔ ko a. Yataa Nyina 'a gbasaya ɔ, fɛ mɔɛ chɛ n‑na a fɔ wan Pɔɔ ye, a ma tachɛ a tun, a ta Chuusaɛn duu ɔ.

⁵ Chɛɛ nn 'na tima ban‑da kɛn nɔ duu chɛ ɔ, nn‑na nn saa wan an na, ta koe a. An gbɛɛ, musu nu, kai nu, an bɛ an 'na denɛ n na, an‑na nn ma sɔ wan. Nn che‑a kɛn yii da a, nn gbɛɛ, nn‑na nn kumbai gbangban fan, nn‑na samunɛ chɛ Yataa tena.

⁶ Nn ban‑da kɛn nn saa nn nyɔn na, mbɛ nn sɛ‑a dɛndɛ gbu ɔ, an sin yɛ‑a an baa a.

⁷ Nn ban‑da kɛn nn 'na tachɛ ma Taya duu ɔ, mbɛ nn‑na a fo Tɔdɛmaisi duu ɔ. A sin, suun ma nyɔɛ chɛ nu nɔ Chasi ɔ, nn‑na an kɔndɔn fan tee dɔndɔ ko a.

⁸ Banda ɔ ka‑a kɛn, nn bɔ‑a wan nɔ, mbɛ nn na‑a Sisayea duu ɔ. Nn ta‑a wan kamin dɔndɔ 'a chenɛ a, sondaya a. A tɔ ni Fiipi, min ni ben ben sakana bai chɛndɛ chɛ ɔ yian‑da, a si Chisɔsi ma. A ni mɔ dɔndɔ an na to, mɔ wɔnfea chɛ n tɛ ɔ, Chuusaɛn mɔɛ n na‑a an boo sɔ miin ma.

⁹ Den musuma naanin fan ni a boo ɔ, miin nii wɛ kai boo ɔ. An ni Yataa 'a gbonka chɛ mɔɛ n fan na.

¹⁰ Nn ni ka nɔ tee kuunɛ min ko a, Yataa 'a gbonka chɛ mɔ dɔndɔ, min tɔ ni Akabɔsi, a yii‑a wan, a ka Chudia chɛnyɛ ɔ.

¹¹ Akabɔsi chɛ na‑a wan nn tena, mbɛ a‑a Pɔɔ 'a bu tɛ chii yuu ya, a‑a a wandi chenɛ ɔ chii, a basan a boo a. Mbɛ a‑a a fɔ, a ɔ, “Yataa Nyina ɔ te, a ɔ, mɔɛ min ta mu bu tɛ chii yuu chɛ a, Chu mɔɛ n mbe a chii‑a ka wan Chuusaɛn duu ɔ. A ɔ, an sin mbe a be‑a wan mɔɛ chɛ n ma, miin ma Chu mɔ a.”

¹² Nn‑na bai chɛ a min kɛn, nn fan, nn bɛ mɔɛ tɔɛ chɛ n na nɔ, nn‑na Pɔɔ disa wan, a ma na ta Chuusaɛn duu ɔ.

¹³ Chɛɛ Pɔɔ ɔ te, “Wo e di chɛ tena ka, n faa yɔn koe an na. Fen mu wo e chɛ ma tena? N ma ma bɛn ni, n sa koe dechee an ko a pimbi chenɛ a, chɛɛ n fa koe wɛɛ gbu a, Chuusaɛn duu ɔ, Mansa Chisɔsi ko a.”

¹⁴ Nn sin‑na a ɔ yen kɛn, mbɛ nn nii che a yiima mun‑da, nn bɛɛ sɛmbɛ‑a. Nn dɔ, Mansa Chisɔsi faa ma koe ni ma.

¹⁵ Nn‑na tima ɛnden ya kɛn nɔ, nn‑na nn 'na feanka n dɔ bɛn fan, mbɛ nn ta‑a Chuusaɛn duu ɔ.

¹⁶ Mbɛ Chisɔsi fɛ denɛ dɔ nu, a ka Sisayea, an bea‑a wan nn fɛ. An sin‑na nn ya wan, nn ta‑a kamin dɔndɔ 'a chenɛ a, nn ni ma tena min 'na sondaya a. A tɔ ni Nason. A ka‑a Saipɔsi yii tinɛ ɔ wan, a sin‑na a kai fa Chisɔsi a tima min na, a ɔ ni yansan.

Pɔɔ ta‑a Chimisi kɔndɔn‑da

¹⁷ Nn na‑a kɛn Chuusaɛn duu ɔ, nn suun ma nyɔɛ chɛ nu Chasi ɔ, an‑na an boo si wan nn kɔɔ, buɔdia wa a.

¹⁸ Banda ɔ ka dɔndɔɛ ma, nn bɛ ta‑a wan Pɔɔ a, Chimisi yen koe a. Nn che‑a kɛn Chimisi tena, chɔchi gbakoo n gbɛɛ a sɔnden fan ni nɔ.

¹⁹ Pɔɔ‑a an gbɛɛ kɔndɔn fan. Mbɛ a si‑a ko ɔ ko ma, a‑a a ɔ yian an na, dɔndɔ dɔndɔɛ a. A‑a a ɔ yian fan, Yataa na‑a koe miin chɛ mɔɛ chɛ n ye, miin nii ma ka Chu mɔ a. Chɛ sin bɔ‑a a wan Pɔɔ 'a wai an dɔ.

²⁰ An sin‑na Pɔɔ 'a bai chɛ n na min kɛn, an‑na tando be wan Yataa ma. Mbɛ an‑na a fɔ Pɔɔ ye, an dɔ, “Nn suun ma nyɔɛ Chasi ɔ, i wandi‑a a ɔ yen, mbɛ Chu mɔ wu sɛsɛ nu, an‑na an kai fa buɛ min dɔ Chisɔsi a. A yɛ to, an‑na a ma wan, an ma gbɔsɔɛ a, mmɔ 'a Chu sawa n bia koe a.

²¹ A sin, a fɔen fan mu an ye, mbɛ e ben tena Chu mɔɛ n gbɛɛ, miin mbe mɔɛ n 'na chɛnyɛ ɔ, miin ma Chu mɔ a, an kan‑da koe miin na. Mbɛ an ni an kan kɔ sɔ mmɔ 'a sawa chɛ n na, Yataa na‑a miin be Mosisi ma. An dɔ te to, i ɔ, an ma an 'na denɛ n na kamincha to, n mbe ee baa, Chu n 'na manda n na tachɛ koe a.

²² Mmɔ ɛ fen ma‑a gbɛ sanche? Koe min na mu, an mbe na‑a wan kɛn a a min‑da, mbɛ e nɛ duu chɛ ɔ.

²³ Chɛ an fɛ mu, nn toen mu i ni koe chɛ an ma. Chu mɔ kaima naanin mbe wan nɛ, miin‑na an kai Yataa tena.

²⁴ Wo bɛ ni ta an na, mbɛ wo bɛ‑a manda chɛ a tachɛ, min mbe a ɔ yian‑da, mbɛ wo ma ko‑a fion Yataa tena. Bɔnɔɛ gbɛɛ, an ko a, a chɛ, an ma ko koe chɛ a Yataa tena. Chɛ ɛ a ma‑a wan, an ni kun an kunɛ n sin koe ma. Ni i‑a chɛ ma, mɔɛ n mbe ee na‑a dan‑da bai chɛ n na to, an‑na miin gbɛɛ fɔ an ye, a si i ma. Chɛɛ an mbe a ɔ yen‑da wan, mbɛ i wɛɛ‑a koe chɛ n ma wan, miin mbe sawa chɛ ɔ, Yataa‑a sawa miin be Mosisi ma.

²⁵ Chɛɛ chɛ n tana, miin ma Chu mɔ a, chɛɛ an‑na an kai fa Chisɔsi a, nn‑na gboo nyɛndenɛ a ta wan an tena. Nn‑na a fɔ wan an ye, mbɛ nn ta yiima ɔ, an ma daun fen kan kɔ kan daun, mɔɛ n‑na min bɔ yasi a, fen chɛ n tena, miin ma Yataa a. A yɛ to, an ma wii daun, an gbu ma soe kan kɔ kan daun, min kanɛ a ma tɛ ni. A sin to, an ni an boo bɔ ko tɛ ɔ.”

²⁶ Mbɛ Pɔɔ‑a mɔɛ chɛ n ya, tee dɔndɔɛ ma, mbɛ an bɛ gbɛɛ an na, an‑na manda chɛ a tachɛ, an ma ko koe a Yataa tena. Mbɛ a don‑da Yataa 'a kata ɔ, a fɔ koe a, ni ɛ tima yuu ya‑a, aan an ma ko tima chɛ ni ban. A tima chɛ a mu, yasi ɛ bɔ‑a an gbɛɛ ko a, dɔndɔ dɔndɔɛ a.

An‑na Pɔɔ bia fɔin, Yataa 'a kata ɔ

²⁷ Chɛɛ tee wɔnfea chɛ, a ni gbɛ ban koe an na, mbɛ Chu mɔɛ dɔ nu, a ka Esia chɛnyɛ ɔ, an‑na Pɔɔ yen fan Yataa 'a kata ɔ. An‑na fanka a sɛ wan Pɔɔ ma, mbɛ an‑na a bia fɔin.

²⁸ An‑na yee tɛ wan, an dɔ te, “Nn bɔ Isɔɛɛ mɔɛ nu, wo na, wo ni basan nn ma. Kamin chɛ, an mbe ben tena bai yama sa‑a, a si mmɔ 'a mɔɛ n ma. An mbe a fɔ tena to mɔ ɔ mɔ ye, mbɛ an ma ma sawa chɛ n kɔɔ, Yataa‑a sawa miin be Mosisi ma. Ɛ bai yama n dechee an sa, a si mmɔ 'a Yataa 'a kata chɛ wɛɛ ma. A yɛ to, a‑a Yataa 'a kata chɛ tana yɔn, don koe a nɛ mɔɛ n na, miin ma Chu mɔ n na.”

²⁹ Koe min‑na a ma, an‑na chɛ fɔ, an na‑a a yen fan an duu chɛ ɔ, an fea Tɔfimɔsi a, min ka‑a Ɛfisɔsi duu ɔ. A ni wan an yii ma, mbɛ Pɔɔ na‑a don fan Tɔfimɔsi chɛ a, Yataa 'a kata ɔ.

³⁰ Mbɛ gbunɛ bea‑a an duu wa chɛ gbɛɛ ɔ ben‑da, mɔɛ n mbe ta‑a ben‑da bui chɛ‑a dɔndɔ a. Mbɛ an‑na Pɔɔ bia fɔin, an‑na a konkon, a bɔ Yataa 'a kata chɛ ɔ. A sin, a ya kɔɔɛ a, an‑na Yataa 'a kata chɛ da n na tɔn tɔn fan.

³¹ An toen ni kɛn an ni Pɔɔ fa, sakana na‑a wan kun ti chɛ tena, Domi mɔɛ n 'na soya n ko a. Mbɛ gbunɛ bea‑a Chuusaɛn duu wa chɛ gbɛɛ ɔ.

³² A ya kɔɔɛ a, a‑a soya gbakoo dɔ n ya, an bɛ soya n na, mbɛ an yii‑a butuin chɛ mɔɛ chɛ n kun ma. Mɔɛ chɛ n‑na a yen kɛn na‑a, an bɛ soya chɛ n na, an sɛmbɛ‑a wan Pɔɔ gbasi koe a.

³³ Mbɛ soya chɛ n kun ti chɛ, a ta‑a, mbɛ a‑a Pɔɔ bia. Mbɛ a‑a a fɔ, a ɔ, an ni yɔɔɛ fea chɛ a ma. Mbɛ a‑a dɔ tisa chɛ gbɛ, a ɔ, “Nyɔn mu kamin chɛ a, a yɛ to, a gbu sin‑na fen ma?”

³⁴ Mbɛ mɔɛ dɔ nu fanka chɛ ɔ, an ni bai dɔndɔɛ fɔ wan, dɔ n sin mbe ta‑a bai dɔ mende fɔ‑a. Sɔnkɔ sɔnkɔɛ da a ni koo aan, soya chɛ n kun ti, a nii ma che ni, a ni a ɔ sɔn, ni fen ko gbu na‑a ma. Mbɛ a wɛɛ‑a a fɔ soya chɛ n ye, a ɔ, an ni ta Pɔɔ a an tena, baachi chɛ ɔ.

³⁵ An sin che‑a kɛn sitɛpi ma, soya chɛ nu, an fan‑na Pɔɔ ya gba, an‑na a si an kanɛ ma. Koe min na mu, an nii ma to ni, fanka fanka chɛ ni koe ma a a.

³⁶ An gbɛɛ‑a a sɔ wan an fɛ, yee tɛ‑a, an dɔ te, “Mmɔ a fa.”

Pɔɔ koɔ‑a, a wandi bɔ koe a an boo ɔ

³⁷ Soya chɛ n toen ni kɛn an ni don Pɔɔ a baachi chɛ ɔ, a koɔ‑a wan soya chɛ n kun ti tena. Pɔɔ‑a a fɔ wan, a ɔ, “E dɔn fan, n ni koɔ i tena?” Mbɛ soya n kun ti chɛ, a ɔ, “Mbɛ e Kiisi koɛ fɔ wan ka?

³⁸ Chɛ‑a a ɔ yian, mbɛ Ichipi mɔɛ chɛ mu i wan na, min‑na butuinɛ si nɛ tee kɔmende a. A sin to, i wan na‑a a ma mɔ wu naaninɛ nu, miin wokoya‑a Domi kɔmende a, an bea‑a i fɛ, a ta fuinɛ ɔ. A e ka wan?”

³⁹ Mbɛ Pɔɔ ɔ te, “Chu mɔɛ mu n na. N suun‑da Tasɔsi duu ɔ wan, Sidisia chɛnyɛ ɔ. N suun‑da duu min dɔ, duu nɔmɛ nɔmɛ ma a a, Sidisia chɛnyɛ ɔ. I dimu, a ma n ni koɔ mɔɛ chɛ n tena.”

⁴⁰ Mbɛ soya n kun ti chɛ dɔn‑da a ye, a ni koɔ mɔɛ chɛ n tena. A dɔn‑da kɛn, mbɛ Pɔɔ sɔ‑a sitɛpi chɛ a. Mbɛ a‑a a boo a ben ben mɔɛ chɛ n tena, an too ma sɔ koe a. An‑na a ɔ maun kɛn, Pɔɔ‑a bai chɛ an sa an tena, Ibu koɛ ɔ.