CHISƆSI 'A SƆ MƆƐ NU 14 - Yataa 'a Dɔbɛnɛ Nama

Pɔɔ an fea Banabasi a, an‑na Yataa bai sa Ikoniɔn duu ɔ

¹ Koe min si‑a Pɔɔ a, an fea Banabasi a, Andiɔki duu chɛ ɔ, an si‑a to an na Ikoniɔn duu wɛɛ ɔ. Pɔɔ an fea Banabasi a, an don‑da Chu n 'na samun chɛ chenɛ a. An sin koɔ buɛ ma kawa‑a wan aan, min‑na a ma, mɔ sɛsɛ n‑na an kai fa Chisɔsi a. Chu mɔɛ dɔ nu, an bɛ mɔɛ chɛ n na, miin nii ma Chu mɔ a, an gbɛɛ‑a an kai fa a a.

² Chɛɛ Chu mɔɛ tɔɛ chɛ nu, miin nii ma dɔn ni an kai fa koe a Chisɔsi a, an don‑da mɔɛ chɛ n dɔ, miin nii ma Chu mɔ a. A sin, an‑na an na sɛ wan Chisɔsi fɛ mɔɛ chɛ n ma.

³ Pɔɔ an fea Banabasi a, an ni wan nɔ an duu chɛ ɔ, tima ɔ yansama ko a. An ni bai sa wan faagbɛa a, a si Mansa Chisɔsi ma. Mansa Chisɔsi sin gbu‑a a ɔ yian fan, mbɛ sakana bai chɛ, an mbe min sa, a si a 'a koadia demanɛ ma, tea bai nu mu. Chisɔsi ni a ma wan, sɔ mɔɛ chɛ n ni kamaya ko wa sɛsɛ n ma, an kun ma a a.

⁴ Chɛɛ mɔɛ miin gbɛɛ ni an duu chɛ ɔ, an duen fan ni fea a. Dɔ n sɔ‑a wan Chu mɔɛ chɛ n kɔ, mbɛ dɔ n sin sɔ‑a Chisɔsi 'a sɔ mɔɛ chɛ n kɔ.

⁵ Mbɛ mɔɛ dɔ nu, miin nii ma ka Chu mɔ a, an bɛ Chu mɔɛ dɔ n na, an‑na a siman fan, maumaya koe sɛ koe a an ma, an ni an ma bon bon senɛ a, aan an ni fa.

⁶ Chɛɛ Chisɔsi 'a sɔ mɔ fea chɛ nu, an‑na an 'na yiinachii chɛ kɔɔ sɔn fan, mbɛ an bui‑a, an ta‑a Dikawonia chɛnyɛ ɔ. An ta‑a wan nɔ duu fea ɔ, Diisa an fea Dabi a, a basan nɔ tanda n na,

⁷ mbɛ an‑na sakana bai chɛndɛ chɛ ɔ yian nɔ gbɛɛ.

An‑na Pɔɔ an ma bon bon, Diisa duu ɔ

⁸ Kamin dɔndɔ ni wan nɔ si ɔ, Diisa duu chɛ ɔ, min nii che sɔ‑a a chen fea gbɛɛ a. A namaaenɛ ni, a ka a suun tima ma. Tee dɔndɔ wɛɛ, a nii ma tachɛ chɛ ni.

⁹ An kamin chɛ too ma sɔen fan ni, Pɔɔ ni kɛn koɔ‑a. A sin, Pɔɔ‑a a ya sɔ wan a a. Mbɛ a‑a a ɔ yen, mbɛ an kamin chɛ, danaya ɛ wan a ɔ, min mbe che a ma‑a, a ni baun,

¹⁰ mbɛ Pɔɔ kuiɛ ma sɛenɛ ɔ, a ɔ, “I kɔɔ sɔ, i ni sɔ den i chenɛ a.” Mbɛ kamin chɛ tin‑da kosa, a bun‑da tachɛ chɛ‑a.

¹¹ Mbɛ fanka fanka chɛ‑a a ɔ yen kɛn, Pɔɔ na‑a koe min ma, an bun‑da koɔ‑a an 'na Dikawonia chɛnyɛ koɛ chɛ ɔ. An dɔ te, “Mmɔ ɛ yataa miin fai ka, an fan mun‑da mɔ gbu n na, mbɛ an yii‑a mmɔ tɛ ɔ.”

¹² Mbɛ an‑na Banabasi chee, an dɔ, yataa min tɔ ni Suusi, mbɛ an‑na Pɔɔ sin chee, an dɔ, yataa min tɔ ni Amesi, koe min na mu, an ni koɔ pɛpɛ.

¹³ Chen dɔndɔ ni wan sɔ ɔ an duu sundu kunɛ a, yataa Suusi chɛ fai koe a. Mɔɛ min ni mɔɛ n tɛ ɔ yataa Suusi a, a na‑a ninchi kai n na, a basan kɔn fu chii a, yataa Suusi 'a chenɛ kata da a. Koe min na mu, a wan an bɛ mɔɛ chɛ n na, an toen ni an ni yasi bɔ Chisɔsi 'a sɔ mɔɛ chɛ n tena.

¹⁴ Chɛɛ Chisɔsi 'a sɔ mɔɛ chɛ nu, Banabasi an fea Pɔɔ a, an nii ma to ni, an ni chɛ a min. An‑na a ma, an‑na an ma koa a panda wan, mbɛ an‑na bui don a ɔ mɔ fanka chɛ n tɛ ɔ. Pɔɔ an fea Banabasi a, an ni wan yee te‑a, an dɔ,

¹⁵ “N bɔ nu, wo toen mu wo ni ko bonda chɛ ma, fen ko a? Nn bɛɛ, mɔ gbu mu nn na, yɔ wo e ka buɛ min dɔ. Nn mbe nɛ, sakana bai chɛndɛ chɛ ɔ yian koe a wo a, wo ni wo boo bɔ tataya ko bonda chɛ n dɔ. Wo ni wo ya a mun Yataa ma, min mbe ee fa kuɔ fɔ ko a. A wan‑na banda a dan, an fea duu gboo a, kɔ yii wɛɛ, a basan fen kɔ fen na, miin be an dɔ.

¹⁶ Suun tima a, a nii mɔ ɔ mɔ a gban, ta koe a a ta chia a.

¹⁷ Chɛɛ tima ɔ tima ko a, ɛ a ɔ yian tena wan gbɛ wo a, mbɛ ɛ wan wo tɛ ɔ. Koe min na mu, ɛ wan wai chɛndɛ chɛ‑a wo tɛ ɔ, tee ɔ tee a. Ɛ a ma tena wan, sona ɛ chɛ a ka banda a, mbɛ wo 'a chin fenɛ n nyan‑da a tima ma. Ɛ daun fenɛ be wan wo ma, mbɛ a‑a wo faa bu ɔ dia, a ɔ bendenɛ a.”

¹⁸ An koɔ‑a wɛɛ ka boo ɔ boo, an tena, an kun‑da wan kayiin, a ma koe a, mɔɛ chɛ n ni sɛmbɛ yasi chɛ bɔ koe a.

¹⁹ Chɛɛ Chu dɔ n ka‑a wan Andiɔki duu ɔ, Pisidia chɛnyɛ ɔ, dɔ n bɛɛ ka‑a Ikoniɔn duu ɔ. An‑na a ma wan, mɔ fanka chɛ n yiima mun‑da, an‑na Pɔɔ ma bon bon fan, mbɛ an‑na a konkon, a bɔ duu ɔ. A ni an yii ma, mbɛ a fa‑a.

²⁰ Chɛɛ Chisɔsi fɛ mɔɛ chɛ n na kan‑da kɛn a a tindanɛ, a‑a a kɔɔ sɔ wan, mbɛ a yɛ‑a duu chɛ gbu ɔ to. Tee dɔndɔɛ ma, an fea Banabasi a, an ta‑a wan Dabi duu ɔ.

Pɔɔ an fea Banabasi a, an yɛ‑a Andiɔki duu ɔ, Siyia chɛnyɛ ɔ

²¹ Sakana bai chɛndɛ chɛ, a si Chisɔsi ma, an‑na a sa wan an duu wa chɛ ɔ. An sin‑na a ma wan, mɔ sɛsɛ bea‑a Chisɔsi fɛ. Mbɛ an yɛ‑a Diisa duu ɔ, an ta‑a Ikoniɔn, aan a che Andiɔki, Pisidia chɛnyɛ ɔ.

²² Mbɛ an‑na a ma, mɔɛ chɛ n 'na danaya ɔ gbɛa‑a, miin ni ka Chisɔsi fɛ mɔɛ n na. An mbe ta‑a an faa n ma nande‑a, an ni to tun an kai fa‑a Chisɔsi a. Mbɛ an‑na an kan, an dɔ te, “Mɔ ɔ mɔ ɛ mɔnɛ sɛsɛ ɔ bia pɛn, a e na to don‑da Yataa 'a mansaya chɛ kɔɔ.”

²³ Mbɛ an‑na gbakoo n yian, an 'na chɔchi n gbɛɛ ɔ. Mbɛ an 'na sunɛ bia, an mbe ta‑a samunɛ chɛ‑a, mbɛ an‑na an konan Mansa Chisɔsi ma, an kai faen ni min na.

²⁴ Mbɛ an ben‑da Pisidia chɛnyɛ ɔ, an ta‑a Panfidia chɛnyɛ ɔ chia a.

²⁵ An ban‑da kɛn sakana bai chɛndɛ chɛ ɔ yian‑da mɔɛ n na Paaka duu ɔ, a si Chisɔsi ma, mbɛ an yii‑a Atadia duu ɔ.

²⁶ An ka‑a Atadia chɛ wan, mbɛ an si‑a dɛndɛ ɔ, a yɛ to Andiɔki duu ɔ. An duu chɛ ɔ ni, Chisɔsi fɛ mɔɛ na‑a an konan Yataa ma, koadia demanɛ ɔ, an 'na wai ko a, an‑na min na ban ka gbɛ.

²⁷ An sin, an che‑a kɛn Andiɔki duu ɔ, an‑na chɔchi mɔɛ chɛ n gbɛɛ a kan fan kaina dɔndɔ, mbɛ an si‑a ko ɔ ko ma, an‑na a ɔ yian, Yataa‑a miin chɛ an ye. A yɛ to, Yataa‑a chia sa buɛ min dɔ mɔɛ chɛ n ko a, miin ma Chu mɔ a, an kai fa koe a Chisɔsi a.

²⁸ Mbɛ an sin‑na tima ɔ yansama ya wan nɔ, an duu chɛ ɔ, an bɛ Chisɔsi fɛ mɔɛ n na.