CHISƆSI 'A SƆ MƆƐ NU 11 - Yataa 'a Dɔbɛnɛ Nama

Pita yɛ‑a Chuusaɛn duu ɔ

¹ Bai ben‑da wan gbɛ a ɔ, Chudia chɛnyɛ gbɛɛ ɔ. A che‑a Chisɔsi 'a sɔ mɔɛ n ma, an bɛ suun ma nyɔɛ tɔɛ n na Chasi ɔ, a si mɔɛ chɛ n ma, miin ma ka Chu mɔ a. Mbɛ an bɛɛ, an‑na an boo si Yataa 'a bai kɔɔ.

² Chɛ‑a a ma wan, Pita yɛ‑a kɛn Chuusaɛn, Chu mɔɛ dɔ nu, miin‑na an kai fa Chisɔsi a, an bu ɔ nii ma di a wakoe a. An danden ni ka a a, mbɛ ni mɔɛ a ma kamincha ni, a ee che a kai fa‑a Chisɔsi a. Mbɛ an‑na Pita ma nyin fan,

³ an dɔ, “I ta‑a wan mɔɛ chɛ n 'na chenɛ a, mɔɛ miin na ma kamincha ni ka, mbɛ wo gbu sin yɛ‑a to, wo bɛ an na, wo‑a daunɛ chɛ kaina dɔndɔ. Fen ko a mu, i‑a chɛ ma?”

⁴ Mbɛ Pita wɛɛ si‑a ko ɔ ko ma, a‑a a gbɛɛ ɔ yian an na dɔndɔ dɔndɔɛ a.

⁵ A ɔ, “N ni tee dɔndɔ a samun chɛ‑a Chɔpa duu chɛ ɔ, n‑na koe ɔ yen fan, yɔ n ni cho ɔ wan. N‑na fenɛ yen fan yii‑a, a ka banda bu ɔ, yɔ koa wa, a biaenɛ ɛ a tɔnkɔn naaninɛ ma. Mbɛ a che‑a kɛn n baima, a sɛmbɛ‑a yii koe a.

⁶ N‑na koa chɛ bu ɔ fɛn fan chɛndɛ chɛ, a sin, n‑na soe sɛsɛ yen fan a ɔ, ka sɛsɛ nu, an bɛ konde sɛsɛ n na.

⁷ Mbɛ n‑na mɔɛ kuiɛ a min, a ɔ, ‘Pita, i kɔɔ sɔ, i ni min kɔ min fa, i ni a daun.’

⁸ Chɛɛ n‑na a fɔ wan, n dɔ, ‘Mansa, a ma ma ka. N ma fen kɔ fen daun nin bɛ, mabɔɛ ɛ min ma, nn 'na Chu sawa ta fɛ chia a, fenɛ min ma nyamuien mu Yataa tena.’

⁹ Mbɛ kuiɛ chɛ ɔ te to, a ɔ, ‘Yataa ɛ a fɔ fenɛ min ma, a nyin, i ma a fɔ, mbɛ a ma nyamuienɛ mu.’

¹⁰ Chɛ ma‑a si tena sawa, mbɛ koa chɛ basan fen chɛ n na, miin ni a ɔ, a tuin‑da, a yɛ banda bu ɔ.

¹¹ A tima dɔndɔ gbe chɛ kɔɔ, nn ni ka chenɛ min na, mɔ kaima sawa n na‑a wan nɔ. An na‑a an sɔ wan, a ka Sisayea duu ɔ, an na‑a n tena.

¹² A sin, Yataa Nyina‑a a fɔ wan n ye, mbɛ n ma sika, chɛɛ nn bɛ ni ta an na. Suun ma nyɔn wɔdɔɛ chɛ nu, Chasi ɔ, an bɛɛ‑a n ma sɔ wan. Nn ka‑a wan Chɔpa, nn ta‑a Sisayea duu ɔ, mbɛ nn don‑da kamin chɛ 'a chenɛ a.

¹³ Nn don‑da kɛn, a‑a a ɔ yian fan nn na, a na‑a Yataa 'a maeka yen buɛ min dɔ sɔ ɔ a 'a chenɛ a. Mbɛ maeka chɛ ɔ, ‘Mɔɛ a ta Chɔpa duu ɔ, kamin dɔndɔ tena min tɔ mu Saimɔn. A tɔɛ dɔndɔɛ an nɛ, Pita.

¹⁴ Ɛ sakana bai fɔ‑a wan i ye, min mbe na‑a bauncha a i tena, wo bɛ i 'a chen 'na mɔɛ n gbɛɛ a.’

¹⁵ Mbɛ n‑na a kuu sɔ kɛn koɔ‑a an tena, Yataa Nyina bea‑a wan an fɛ, yɔ a na‑a bea buɛ min dɔ nn bɛɛ fɛ, a saa a.

¹⁶ Chɛ‑a a ma wan, n yii puin‑da Mansa Chisɔsi 'a bai chɛ ma. A na‑a a fɔ wan, a ɔ, ‘Chɔn ni yii an chɛ wo kunɛ ɔ, Yataa chia a, chɛɛ Yataa ɛ a ma‑a wan, a Nyina ni bea wo fɛ.’

¹⁷ Yataa wandi‑a a Nyina dɔndɔ gbe chɛ an be an ma, a na‑a min be mmɔ wɛɛ ma, mmɔ‑a mmɔ kai fa kɛn Mansa Chisɔsi Chasi a. Ni a‑a chɛ ma, n mbe ee che n kun si‑a Yataa a. Nyɔn mu n na, chɛ ma koe a?”

¹⁸ An‑na bai chɛ a min kɛn, an sɛmbɛ‑a wan a ma nyin koe a. Mbɛ an‑na Yataa tando, an dɔ te, “Mbɛ Yataa deman‑da mɔɛ chɛ n bɛɛ ma, miin ma Chu mɔ a. A‑a chia sa wan an bɛɛ ye, an ni an kan kɔ sɔ an 'na ko yama a, mbɛ an‑na kuɔ fɔ fɔɛ ma sɔn.”

Mɔɛ miin kai faen ni Chisɔsi a, Andiɔki duu ɔ

¹⁹ An na‑a Sitibin fa tima min na, mɔɛ n‑na a a kuu sɔ wan ko ma gbaaenɛ sa‑a mɔɛ chɛ n ma, miin na‑a an kai fa Chisɔsi a. Chɛ na‑a a ma wan, mɔɛ miin na‑a an kai fa ka Chisɔsi a, an gbɛɛ fasan‑da a ɔ gbuu. An ta‑a wan aan a che Fonisia chɛnyɛ ɔ. Dɔ n sin ta‑a wan Saipɔsi yii tinɛ ɔ, ni Andiɔki duu wa chɛ ɔ. An nii bai ɔ yian mɔ dɔ gbɛɛ n na, a si Chisɔsi wakoe ma, mɔɔ dechee Chu mɔɛ nu.

²⁰ Chɛɛ an dɔ nu, miin na‑a an kai fa ka Chisɔsi a, a ka Saipɔsi ni Sayini duu wa ɔ, an ta‑a wan Andiɔki. Mbɛ sakana bai chɛ, a si Mansa Chisɔsi ma, an‑na a ɔ yian fan an bɛɛ a, miin nii ma ka Chu mɔ n na.

²¹ A sin, Mansa Yataa 'a gbasaya ni wan an kun ma. Mɔ sɛsɛ sin‑na an kai fa wan Mansa Chisɔsi a, mbɛ an‑na an ya a mun a ma.

²² Mbɛ an koe chɛ che‑a chɔchi mɔɛ n ma, Chuusaɛn duu ɔ. Mbɛ an‑na Banabasi a ta wan Andiɔki.

²³ A che‑a kɛn nɔ, mbɛ a‑a a ɔ yen, Yataa‑a koadia demanɛ chɛ buɛ min dɔ, an mɔɛ chɛ n na, a bu ɔ dia‑a wan kaka. A‑a an disa wan, min mbe a ma, an ni a tun an kai fa koe a Mansa Chisɔsi a, an faa gbɛɛ a.

²⁴ Banabasi chɛ ni mɔ chɛndɛ an na, min danayaen ni, a sin Yataa Nyina ni wan a fɛ gban. Mbɛ a‑a a ma wan, mɔ sɛsɛ sa‑a chɛ n kun ma, miin faa mun‑da Mansa Chisɔsi tena.

²⁵ Mbɛ Banabasi ta‑a Tasɔsi duu wa ɔ, ɛ a ya a kan‑da Sɔɔ a.

²⁶ A‑a a yen kɛn, a‑a a ma wan, mbɛ an fea yɛ‑a a a Andiɔki duu ɔ. An ni bɛn fan, an bɛ chɔchi mɔɛ chɛ n na, an mbe ta‑a an sɛsɛ kan‑da. An ni wan nɔ san dɔndɔ ko a. Andiɔki ni, tɔɛ chɛ si‑a an kun ma, an dɔ, Chisianɛ nu, an fɛn kai faen ni Chisɔsi a.

²⁷ A tima chɛ a ni gbɛ, Yataa 'a gbonka chɛ mɔɛ dɔ n yii‑a, a ka Chuusaɛn duu ɔ, mbɛ an na‑a Andiɔki.

²⁸ An tɛ ɔ, mɔ dɔndɔ ni wan nɔ, min tɔ ni Akabɔsi. Yataa Nyina‑a a ma wan, Akabɔsi chɛ sin, a‑a kɔnkɔ wa na koe kɔɔ fɔ wan dunya ɔ. An kɔnkɔɛ chɛ sin na‑a Mansa Kaudiyɔsi 'a tima an na, Domi chɛnyɛ ɔ.

²⁹ Chisian chɛ n‑na a ɔ bɛn fan, an sɔɛ gbɛɛ ɔ, an ni an boo fenɛ n na ta, basan koe a an suun ma nyɔɛ n ma Chasi ɔ, miin ni Chudia chɛnyɛ ɔ. An dɔ, an ni chɛ ma yɔ an 'na gbasaya ɛ kun min nyɔn sima ma.

³⁰ An sin‑na an boo fenɛ n na sɔn sɔn fan, mbɛ an‑na an be Banabasi ma, an fea Sɔɔ a. An bɛɛ‑a boo fen chɛ n na ta wan, chɔchi gbakoo n tena Chuusaɛn duu ɔ.