2 TIMOTI 3 - Yataa 'a Dɔbɛnɛ Nama

Pɔɔ ɛ dasi be‑a, a si tee dankama chɛ n ma

¹ Chɛ ni ma i yii ma, mbɛ tee dankama nɛnɛ chɛ n kɔɔ, Chisɔsi e na to na‑a, ko ɔ gbɛaya ɛ ma‑a wan nɔ.

² Koe min na mu, mɔɛ n mbe to‑a an fandi an na dechee, a basan kɔpɔɛ a. An mbe ma‑a dɔdia tɔɛ n fan na, an dɔ pandaenɛ ɛ, an mbe ee baa be mɔ ɔ mɔ ma, an mbe ee an woo mɔɛ n da a kuiɛ ma, an ma wai nyima sɔn, Yataa sɔn bai nu.

³ Mɔgbuya ee an dɔ, an faa a kɔɔen ba ɛ. An mbe koe ɔ fɔ kaka, an mbe ee an fandi boo ɔ, nimisa don mɔ wa nu, miin ma to ni fen chɛndɛ a.

⁴ Mɔ bun mɔɛ mu an na, mɔɛ miin mbe ee an yii na chii an mbe ma koe ma‑a, dɔ diaya faenɛ ɛ an gboo a gban. An ma to ni Yataa a, an toen mu dechee dunya ma buɔdia an na.

⁵ An 'na Yataa koe ɛ an da ɔ wan, chɛɛ a ee an faa ɔ. Ka a mɔ bonda chɛ n bai ma.

⁶ An dɔ n mbe ta mɔ n 'na chenɛ n fan na domɛɛ, an mbe ben‑da musu dɔ n yiima ɔ chɛ chɛ‑a, musu miin yiima ɔ dɔɔ. An musu chɛ n sin to, an 'na ko yama maenɛ tagbaenɛ an da ma, an mbe yɔncha ɔ an faa ma koe n boo ɔ.

⁷ An ma bɛnden fan mu tima ɔ tima ko nama kan koe a. Chɛɛ an mbe ee che an ni tea ɔ sɔn.

⁸ Yɔ Chanesi ni buɛ min dɔ, an fea Chambesi a, an ni Mosisi ma bɔ wan, kamin chɛ n bɛɛ, an mbe ka wan tea ma bɔ‑a. Mɔɛ n fan nɛ miin yiima ɔ chɛ chɛenɛ ɛ, an sin 'na danaya ban‑da an dɔ Chisɔsi ko a.

⁹ Chɛɛ an mbe ee ta‑a ya ɔ ma, koe min na mu, mɔ ɔ mɔ ɛ an 'na wooya ɔ yen‑da wan, yɔ mɔ fea chɛ n na‑a ma buɛ min dɔ.

Pɔɔ ɛ dasi dankama be‑a nɛ Timoti ma

¹⁰ Chɛɛ i tana gbɛ, i ban‑da n 'na kan chɛ buɛ ma mɛn‑da, ni n sɔnɛ, n yii ma koe fɔɛ ɔ, n 'na danaya Chisɔsi a, n 'na faabiaya, koadia n dɔ, a basan n 'na ko ɔ bia a.

¹¹ I‑a a ɔ sɔn fan, an‑na ko yawaenɛ min si n na, ni tɔɔya gbɛɛ n‑na miin dɔ bia. I‑a a ɔ sɔn fan, fen ko si‑a n na kɛn n ni Andiɔki duu ɔ, ni Ikoniɔn duu ɔ, a basan Diisa duu ɔ a, n tɔɔ‑a buɛ min dɔ duu chɛ n dɔ. Chɛɛ Mansa Chisɔsi‑a n kun bɔ wan an gbɛɛ ɔ.

¹² Tea ko a, ni mɔ ɔ mɔ‑a a wandi be Yataa chia ma, ni an ma‑a mɔ dɔndɔɛ a Chisɔsi Chasi a, ɛ ko yawaenɛ ɔ yen fan.

¹³ A sin, mɔ yama nu, ni kankancha tɔɛ nu, an kun ma ɛ chɛ‑a wan tun tun. An mbe mɔɛ n na bea‑a wan, a sin mbe ma‑a an fandi wɛɛ a da bea an na.

¹⁴ Chɛɛ i tana, a a tun dan koe a tea chɛ n na, nn‑na i kan miin na, an bia i boo fea a. I‑a a ɔ sɔn fan mɔɛ miin nyɔn sima an na i kan.

¹⁵ A sin, a ni ma i yii ma, mbɛ i‑a bai chɛ kan fan a ka i den mɛsɛ tɔɛ ma, bai chɛ min mbe Yataa 'a gboo ɔ. Chɛ ɛ kun fan a ni yiima be i ma, min mbe che i sɔ‑a chia ma bauncha ma sɔn koe a, min mbe ka danaya ɔ Chisɔsi Chasi a.

¹⁶ Bai ɔ bai min mbe Yataa 'a gboo ɔ, Yataa da a bai mu. Chɛ an fɛ mu, bai chɛ n kan kɔ kan, an mbe mmɔ kan fan ko sɛsɛ ma. A sin nyin fan mmɔ kan koe a tea ma, mmɔ ni mmɔ sɔn yama yen, mbɛ mmɔ sɔ‑a chia chɛndɛ ma, mmɔ ni a ɔ sɔn mmɔ ɛ tan buɛ min dɔ fɔɛ ɔ.

¹⁷ Chɛ ɛ a ma‑a wan, Yataa 'a mɔɛ ma bɛndenɛ ni ma chɛndɛ chɛ, a kandenɛ ɛ wai chɛndɛ kan kɔ kan chɛ koe a.