2 PITA 3 - Yataa 'a Dɔbɛnɛ Nama

Pita ɔ te, Chisɔsi Chasi ɛ na tena wan to

¹ N dia nyɔɛ nu, gboo fean bɔɛ an nɛ, n‑na min nyɛn gbɛ wo tena. Gboo fea chɛ n dɔ, n mbe wo yiima a che tena wan koe chɛ n ma chɛndɛ chɛ, wo ni ma wo yii na chii‑a an ma.

² N toen mu wo ni wo yii na chii bai chɛ n ma, Yataa 'a gbonka chɛ mɔɛ n na‑a miin fɔ suun. Wo ni wo yii na chii to sawa chɛ ma, Mansa Chisɔsi‑a min be, mmɔ baun mɔɛ. A sin, a 'a sɔ mɔɛ n na‑a an sawa chɛ a ben fan wo tena.

³ Koe saa saa gbu, a nyin wo ni min dɔ sɔn an nɛ. Mbɛ tee dankama nɛnɛ chɛ n kɔɔ, Chisɔsi Chasi e na to na‑a, mɔɛ n mbe na‑a wan wo tɛ ɔ, miin mu yɔnɛ n na. An mu yɔnɛ n na, an 'na fɔɛ ɔ, an faa ma koe yama n boo ɔ. An mbe wo ma yɛn‑da wan.

⁴ An mbe a fɔ‑a wan, an dɔ, Chasi na koe min mbe a ɔ, an dɔ, an gbu ee a yen. An dɔ, chɛ an to‑a ka ɔ aan, an dɔ, an bemba n ta bemba n ka‑a banda kun ma. An dɔ, chɛɛ ko ɔ ko ma ka ni a gba kun ma, an dɔ, kɛn dunya a dan tima ma.

⁵ An mɔɛ chɛ n ma to ni dan koe a a a, mbɛ duu gboo fea banda chɛ a, Yataa da a bai an‑na a ma an na dan‑da suun. Mbɛ duu gboo bɔ‑a yii an dɔ, an nyanden mu yii an na.

⁶ A sin, mbɛ yii ni to, yii wa min na‑a dunya gbɛɛ ya, min na‑a dunya kɔma kasaa.

⁷ Chɛɛ mmɔ ta duu gboo chɛ wɛɛ, a fea banda chɛ a, Yataa da a bai dɔndɔ gbe chɛ an‑na a ma an mbe nɔ. A wan Yataa dɔndɔ gbe chɛ, ɛ an kun ma fɛn tena, min mbe a ma, ta ni danka an kasaa‑a. An mbe nɔ tee chɛ an ma kɔn koe a, Yataa sɔn bai chɛ nu, kaa a ɛ tɛ‑a an ma tee min na, an ni kasaa.

⁸ Chɛɛ n dia nyɔɛ nu, wo ma nyina ko dɔndɔɛ chɛ ma. Mbɛ tee tɛ bɔ ee Mansa Yataa tena. Tee dɔndɔɛ fea san wu dɔndɔ a, fen dɔndɔ gbe an nɛ a chen kɔɔ.

⁹ Ɛ mɔɛ dɔ n yii ma, mbɛ Mansa Yataa a nɛnchɛnden fan mu, a da a kuiɛ bɔ koe a a. Chɛɛ ɛ a faa bia wan dechee wo a, tima be koe a wo ma, wo ni wo kan kɔ sɔ wo 'a ko yama n na. Koe min na mu, a ma to ni wo dɔndɔ wɛɛ ni kasaa ma sɔn.

¹⁰ Chɛɛ Mansa Chisɔsi na tima, ɛ ma‑a wan tɛnɛ koe a, yɔ kanka ɛ na buɛ min dɔ. A tee chɛ ma, kuiɛ mau mau ɛ ka‑a wan banda a, mbɛ banda ee ma‑a to dunya ɔ. Ta ɛ tɛ‑a wan fen kɔ fen dɔ min mbe banda a, mbɛ an kasaa‑a. A sin duu gboo wɛɛ, ni fen kɔ fen min mbe a ma, an gbɛɛ ee ma‑a to dunya ɔ.

¹¹ Fen kɔ fen sin gbu, ɛ na tena kasaa‑a ka buɛ min dɔ, a nyin wo ni a ɔ sɔn, ni wo e ma‑a mɔɛ miin nyɔn sima n na. Wo ma tenchen Yataa ko a, wo ni wo fɔɛ gbɛɛ be a ma.

¹² Wo e ma‑a Yataa 'a tee chɛ ma kɔn‑da, wo a faa ma koe n ma, min mbe a ma, an tee ni fua che‑a. An tee chɛ ma, fenɛ miin gbɛɛ ɛ banda a, an mbe kasaa‑a wan, mbɛ an minda‑a. Win ba dɛgbɛ wɛɛ ɛ a ma‑a wan, an fen chɛ n ni kunɛ banda a yɔ tu.

¹³ Chɛɛ Yataa na‑a mmɔ too ɔ dia min chɛ, mmɔ ɛ an ma kɔn tena. A‑a tooɔdia chɛ wan dunya nama be koe ma. A sin, an dunya nama chɛ ɔ, mɔɛ n tandenɛ ɛ ma‑a wan nɔ Yataa tena.

¹⁴ N dia nyɔɛ nu, chɛ an fɛ mu, wo e ka an tee chɛ ma kɔnɛ min chɛ a, wo wo wandi bia chɛndɛ chɛ. Tɔmbɛ ma ma wo ma, wo sin ni ma faachima ɔ Yataa a.

¹⁵ Chɛ an fɛ mu, faabia chɛ, mmɔ 'a mansa‑a min chɛ, wo a ya ka buɛ chɛ ɔ. Mbɛ ɛ ka tima an be‑a mɔɛ n ma, bauncha ma sɔn koe a. Ɛ wan dechee yɔ mmɔ suun ma nyɔɛ Pɔɔ, min ko a di mmɔ ye, a na‑a min nyɛn wo tena. Yataa sin na‑a yiimatɛ min chɛ a ɔ, a na‑a an na wai ka.

¹⁶ A sin mbe bai fɔ tena, a si an ko dɔndɔ gbe chɛ ma, a 'a gboo n dɔ. Kaina dɔ n mbe wan a 'a gboo nyɛnden chɛ ɔ, miin dɔ gbɛɛ an dɔ gbɛ koe a. Ko sɔn bai nu, mɔɛ miin yiima ɔ basan basandenɛ ɛ, an mbe a ɔ yian fan fania chia a, yɔ an mbe a ma buɛ min dɔ Yataa bai dɔ gbɛɛ n bɛɛ a. Chɛ sin mbe a ma wan, an mbe an fandi kasaa‑a.

¹⁷ Chɛɛ n dia nyɔɛ nu, wo tana, wo‑a chɛ ɔ sɔn fan gbɛ. Chɛ an fɛ mu, wo wo kun ma fɛn, sawa sɔn bai chɛ n ma na a ma, wo ni saman, mbɛ wo ka‑a chia ma. An ni a ma, wo ni bea, a bɔ wo sɔ tena chɛndɛ chɛ ɔ.

¹⁸ Chɛɛ koadia demanɛ, a kun ma ni sa wo tena. A yɛ to, yiima min mbe wo ɔ, a si mmɔ 'a mansa Chisɔsi Chasi ma, mmɔ baun mɔɛ, a kun ma ni sa. Tando ni ma a tɔɛ ma sanche, ni kuɔ fɔ ko a. A ni ma ka.