2 PITA 2 - Yataa 'a Dɔbɛnɛ Nama

Pita ɛ dasi be‑a, a si fania kan chɛ mɔɛ n ma

¹ Chɛɛ mɔ sɛsɛ n bɛɛ bɔ‑a wan suun, Isɔɛɛ mɔɛ n tɛ ɔ, an‑na fania fɔ, mbɛ Yataa 'a gbonka chɛ mɔɛ mu an na. A chia dɔndɔ gbe chɛ a mu, fania kan chɛ mɔɛ n mbe bɔ‑a wo wɛɛ tɛ ɔ. An mbe fania kanɛ chɛ‑a wan, min mbe na kasaa a. An mbe mansa chɛ kɔɔsa bia wan, a wɛn‑na an kun ka. Chɛ sin fan mbe a ma‑a, an ni na kasaa a an fandi kun ma.

² Chɛɛ chɛ gbɛɛ ɔ, mɔ sɛsɛ n mbe bea‑a wan an fɛ, an mbe ma‑a an 'na fɔɛ yama chɛ ɔ. An sɔn chɛ sin fan mbe a ma, mɔɛ n mbe bai yama sa chɛ n ma, miin mbe sɔ ɔ Yataa 'a tea chia ma.

³ Fania kan chɛ mɔɛ chɛ n fen ko yaen mu kaka. Chɛ an mbe a ma, an mbe tai n dɔ bɛn bɛn a fɔ koe a wo ye, min mbe na tɔnɔnɛ a an tena. Chɛɛ Yataa wɛn mbe kaa a tɛ tena an bakoe ma, a ni an tɔɔ, a ɔ mɛen mu gbɛ, a ma bɛndenɛ ɛ. A sin mbe an kasaa tena wan, a ee chinɔɛ ɔ ɛnden bɛɛ a.

⁴ Mmɔ‑a a ɔ sɔn fan, mbɛ Yataa nii ma maeka chɛ n boo ka ni, miin na‑a ko yama ma. Chɛɛ a na‑a an na dɛ wan ta ɔ. An chiienɛ ɛ wan nɔ yɔɔɛ a, kaina ɔ pimbienɛ ɔ, an mbe an gbɛmbo tee ma kɔnɛ a.

⁵ Mmɔ‑a a ɔ sɔn fan, mbɛ Yataa nii ma mɔɛ chɛ n bɛɛ to ni nɔ, miin ni suun. A na‑a an na mɔnɛ wan yii fa a, an fan Yataa sɔn bai chɛ nu. A na‑a mɔ wɔnfea an fan kunɛ bɔ a ɔ, a basan Nowa a, min ni mɔɛ n kan an ni tan Yataa tena.

⁶ Yataa na‑a kaa a tɛ wan mɔɛ chɛ n ba koe ma, a‑a an tɔɔya, mɔɛ miin ni Sɔdɔn an fea Komoa duu wa chɛ n dɔ. A na‑a an kasaa wan ta a. A na‑a an ma wan tɔmɔsi a, a si koe min mbe na‑a ma‑a mɔɛ chɛ n na, Yataa sɔn bai chɛ nu.

⁷ Yataa ni mɔ yama chɛ n kasaa tena tima min na, a na‑a kai Dɔti kun bɔ wan a ɔ suun. Dɔti chɛ ni mɔ chɛndɛ an na, a sin faa na‑a yɔn fan, tima min na an mɔɛ chɛ n ni ko yama yama chɛ n ma tena.

⁸ Kai chɛndɛ chɛ ni suun mɔ yama chɛ n tɛ ɔ wan, a sin nii a dia an sɔn yama an boo ɔ su ɔ tee a. A ni an sɔnɛ miin dɔ yen, a ni miin na min, faamɔnɛ wa ni a ma.

⁹ Chɛɛ Mansa Yataa an kosan kɛn gbɛ mɔɛ n kun bɔ‑a ko gbɛama n dɔ, mɔɛ miin mbe a ko a. A sin fan kosan to mɔɛ n chɛ‑a tɔɔya kɔɔ, aan gbɛmbo tee ma, mɔɛ miin sɔnɛ yau.

¹⁰ A gbu sin mbe ma‑a ka wan an na, miin boo chɛenɛ ɛ ko tɛ ɔ, an sin gbɔsɔ ma, mbɛ Yataa 'a gbasaya ɛ wan nɔ. Fania kan chɛ mɔɛ chɛ nu, chianɛ ee ka miin ya a, an toen mu koe min na, an mbe an ma. An mbe ee basɔmaya be an ma, gbasaya ɛ miin boo ɔ banda bu ɔ. Chɛɛ an mbe an main fan.

¹¹ Maeka n gbu wɛɛ, gbasaya wa ɛ miin boo ɔ, a ben fania kan chɛ mɔɛ chɛ n ma, an maeka chɛ n mbe ee main chɛ Mansa Yataa chen kɔɔ.

¹² Chɛɛ fania kan chɛ mɔɛ chɛ nu, koe min mbe na an yii ma, an mbe an ma. An maen mu yɔ fia ɔ soe nu, an bia koe a, mbɛ an fa‑a. An mbe mankan fan ko ɔ ko manyin koe a, ni an ma min dɔ gbɛ ni. An mbe kasaa‑a wan, yɔ fia ɔ soe nu.

¹³ An mbe mɔnɛ ɔ yen‑da wan, an na‑a a ma min chɛ mɔ dɔ mende n na mɔnɛ ɔ bia. Koe min na di an ye, an nɛ koe chɛ n ma koe a tee a den, koe miin mu an gboo faa ma koe a. An mu mau an na, a basan popoya a, wo bɛ ɛ ma daunɛ chɛ‑a an na. Koe min na mu, su ɔ tee a an boo ɛ ma an 'na da mau koe chɛ n fan dɔ.

¹⁴ An mbe ee musu ma fɛn gbama a, ni an ma an yii na chii ni ta koe ma a sofa a. An faa ee chima ko yama ma koe a. An mbe a ma wan mɔɛ chɛ n ni chɛɛ gbai a, mɔɛ miin yiima ɔ dɔɔ. An‑na an fandi kan fan to koe a fen kɔ fen na, an sin mbe ma‑a danka tɔɛ n fan na.

¹⁵ An ka‑a tea chia ma fion fion, an mbe gbɛ an kun fan ye. An beaen mu gbɛ Badaan na chia an fɛ, Yataa 'a gbonka chɛ mɔɛ chɛ, min ni kai Bɛɔ 'a denɛ a. Badaan nii ma a gbɔsɔ ni ko yama ma koe a, ni a‑a kɔpɔɛ an ma sɔn dechee.

¹⁶ Chɛɛ a 'a sofɛ na‑a a ma wan, a sɛmbɛ a wooya ko bonda chɛ ma koe a. Sofɛ chɛ na‑a koɔ wan a tena, mɔ gbu kuiɛ ɔ, mbɛ a‑a a ma tɔɔ an kun dɔ ban koe chɛ n ko a.

¹⁷ An mɔɛ chɛ nu, mɔ a tenden ma an na, yɔ yii mɛsɛ mɛsɛ nu, ni an gbaa‑a. An maenɛ ɛ to yɔ banda gbii, fia wa ɛ ben min na. Yataa‑a kaina ɔ bɛn an ko a, pimbi pimbi wa ɔ.

¹⁸ An mbe bai n fɔ wan, yiimatɛ ee miin dɔ, dɔpandaya bai nu. An mbe koe yama n ma to, miin na di an gboo n ye. An mbe chɛ n ma, mɔɛ chɛ n bia koe an na, mɔɛ chɛ miin‑na a kuu sɔ an kunɛ bɔ‑a an ko yama chɛ n dɔ.

¹⁹ An mbe mɔɛ n too ɔ dia, mbɛ an mbe yuu tɛ‑a wan an ma. Chɛɛ an fandi gbu mu yɔnɛ an na, sɔn yama n boo ɔ, min mbe an kasaa tena. Koe min na mu, fen kɔ fen min kun‑da gbɛ mɔɛ ma, a ma‑a yɔnɛ a an fen chɛ boo ɔ.

²⁰ Mɔɛ n‑na a ɔ sɔn, mbɛ mmɔ baun mɔɛ, mmɔ 'a mansa Chisɔsi Chasi an mbe mmɔ baun. Chɛ‑a a ma, an kun bɔ‑a an 'na ko yama n dɔ, dunya chɛ ɔ. Chɛɛ an ma yɛ to an 'na ko yama kun ma, a ni kun an ma dɔgbɔ. Ni chɛ ma‑a, ɛ yaua‑a wan an mɔ bonda chɛ n ko a tee dankama tee ma, a ni ben a kuu sɔ tena ma.

²¹ A ni nyan‑da wan an ko a, ni an nii ma chia sɔn ni, an mbe tan buɛ min dɔ Yataa tena. Chɛɛ ni an‑na a sɔn, mbɛ an‑na an kan kɔ sɔ Yataa 'a sawa duaenɛ a, a yau an ko a.

²² Koe chɛ min sin ma‑a ka an na, a ɔ yiandenɛ an nɛ, mbɛ tai min na‑a tɛ suun, tea mu. Tai gbu ɔ, mbɛ wuu an mbe yɛ a fɔnɔɛ daun‑da. A ɔ, kɔɛnya wɛɛ ɛ yɛ wan to a ma chemen chemen‑da, a koenɛ gbakɔ.