2 CHƆN 1 - Yataa 'a Dɔbɛnɛ Nama

¹ N fan chɔchi gbakoo, n fan mbe gboo chɛ nyɛn tena i tena, i wan musu chɛ, Yataa faa ma chɛ, wo bɛ i 'a denɛ n na. Wo e Yataa 'a chia an ma, an fɛ mu, wo ko a di n ye. N dɔndɔ gbe ma to ni wo a, chɛɛ mɔɛ chɛ n gbɛɛ, miin‑na Yataa 'a tea sɔn, an gbɛɛ toen fan mu wo a.

² Nn gbɛɛ, nn toen mu wo a, koe min na mu, tea chɛ ɛ gbɛ mmɔ faa n dɔ, a sin mbe ma‑a nɔ wan kuɔ fɔ ko a.

³ Mmɔ Fa Yataa, an fea Chisɔsi Chasi a, a 'a denɛ, an 'na dua ni ma mmɔ ma, an 'na chinchimaya ni ma mmɔ ma, a basan an 'na faachima a. Koe chɛ n mbe ma‑a wan tun tun mmɔ ta n na, koe min na mu, mmɔ danden mu Yataa 'a tea sakana a. A sin to, a toen fan mu mmɔ a.

Chɔn dɔ te, mmɔ ni mmɔ boo si tea kɔɔ, mbɛ mmɔ‑a fania a bea

⁴ A ma‑a wan n ma buɔdia chenama wa a, a ɔ sɔn koe a, mbɛ i 'a denɛ dɔ nu, an mbe wan tea chia ma, yɔ Fa Yataa‑a a fɔ buɛ min dɔ mmɔ ye.

⁵ Sanche gbɛ, bɔɔɛ, n mbe ee ka na tena sawa nama an nyɛn tena wo tena, chɛɛ sawa mu, min mbe mmɔ boo ɔ, a ka sakana bai chɛndɛ chɛ a min tima saa saa ma. An sawa chɛ ɔ, mmɔ ni to mmɔ nyɔn na.

⁶ Chɛ sin fan mu koadia a, bea koe a Yataa 'a sawa fɛ. A sin‑na a fɔ wan wo ye, a ka sakana bai chɛndɛ chɛ a min tima saa saa ma, mbɛ wo ni tachɛ chɛ koadia ɔ.

⁷ Fania fɔ mɔɛ sɛsɛ n mbe ben tena dunya ɔ. Mɔɛ nu, miin mbe ee dɔn a ma, mbɛ Chisɔsi Chasi na‑a wan dunya chɛ ɔ, mɔgbuya ɔ. An mɔ bonda chɛ nu, mɔ bun mɔɛ mu an na, Chasi chɛɛ ma nyɔɛ nu.

⁸ Chɛ an fɛ mu, wo wo kun ma fɛn, min mbe a ma, wo ee fo‑a fen chɛ a, wo‑a wai chɛ min ko a. Chɛɛ wo e wo 'a tɔnɔnɛ gbɛɛ ma sɔn‑da wan.

⁹ Mɔ ɔ mɔ min ma a too ma sɔ ni kan chɛ ma, Chasi‑a min chɛ, chɛɛ a‑a a ta sa a kun ma, a mɔɛ chɛ ma mɔ dɔndɔ a an fea Yataa a. Mɔ ɔ mɔ min mbe a too ma sɔ‑a kan chɛ ma, Chasi‑a min chɛ, a mɔɛ chɛ ma‑a mɔ dɔndɔɛ a, an fea Fa Yataa a, a basan a 'a denɛ Chisɔsi a.

¹⁰ Ni mɔ ɔ mɔ na‑a wo 'a chenɛ a, kan dɔ mende a min kaen mu Chasi ta ma, wo ma wo ya kɔɔɛ yian a mɔɛ chɛ a, wo gbu ma a kɔndɔn.

¹¹ Koe min na mu, mɔ ɔ mɔ i wɛn mbe i ya kɔɔɛ yian‑da a a, ɛ wan yɔ e ka i boo chɛ‑a a 'a ko yama ma an dɔ.

Chɔn ɛ kɔndɔnɛ dankama chɛ‑a an na

¹² Ko sɛsɛ ɛ wan n yii ma, a fɔ koe a wo ye. Chɛɛ n mbe ee a finɛ puin tena a gbɛ ɔ. N mbe min ma tena, n yiima ɛ a fɔ tena wan n ye, n ni na wo kɔndɔn, mmɔ ni chia ɔ bɔ dɔndɔ chɛ. Chɛ an mbe a ma‑a, mmɔ gbɛɛ, mmɔ 'a buɔdia da ni fa gban.

¹³ I suun ma nyɔɛ musu ma, Yataa faa ma chɛ, a 'a denɛ n‑na i kɔndɔn.