GBOO FEAN BƆƐ TƐSADONIKA KO A 3 - Yataa 'a Dɔbɛnɛ Nama

Pɔɔ ɔ te, wo ni samunɛ chɛ an ko a

¹ A danka a gbɛ, nn suun ma nyɔɛ nu Chasi ɔ, wo samunɛ chɛ nn ko a. An mbe a ma, sakana bai chɛ, a si Mansa Chisɔsi ma, a tɛ ma tɛ, a ni fasan a ɔ ben‑da bui chɛ bui chɛ a. A sin to, mɔɛ n ni an boo a si a kɔɔ basɔmaya a, yɔ wo‑a a ma buɛ min dɔ.

² Wo samunɛ chɛ to nn ko a, Yataa ni nn kunɛ bɔ faa kɔɔen tɔɛ n boo ɔ, mɔ yama nu. Koe min na mu, mɔɛ gbɛɛ ma, min kai faen mu Chisɔsi a.

³ Chɛɛ Mansa Chisɔsi ee a da a kuiɛ yɔn. Ɛ a ma‑a wan wo faa ni sɔ, a ni wo kun ma fɛn Sitana boo ɔ.

⁴ Mansa Chisɔsi sin mbe a ma tena wan, nn mbe nn yii fa wo ma. Nn sin danden fan mu a a, mbɛ wo e wan koe chɛ n ma‑a, nn na‑a miin fɔ wo ye an ma koe a. Wo sin, wo e an fan na tun‑da an ma koe a.

⁵ Nn mbe samunɛ chɛ tena Mansa Chisɔsi tena, wo ni a ɔ sɔn chɛndɛ chɛ, Yataa toen mu wo a buɛ min dɔ. Wo ni a ɔ sɔn to, Chisɔsi na‑a ko yawaenɛ min nyɔn dɔ bia, a sin mbe a ma tena wo wɛɛ, wo e a ɔ bia.

Pɔɔ ɔ te, Chisianɛ n gbɛɛ ni wai chɛ

⁶ Nn suun ma nyɔɛ nu Chasi ɔ, nn mbe chɛ fɔ tena wo ye gbau gbau, mmɔ 'a mansa Chisɔsi Chasi tɔɛ ɔ. Wo ma gbɛn suun ma nyɔɛ chɛ n gbɛɛ ma, miin mbe gboo ɔ fa bɔ tena an 'na fɔɛ ɔ. A sin, an mbe ee bea tena koe chɛ n fɛ, nn na‑a min fɔ an ye.

⁷ Gboo ɔ fa tɔ nii ma nn na, tima min na mmɔ bɛ ni. Wo sin gbu‑a a ɔ sɔn fan chɛndɛ chɛ, mbɛ wo e bea nn chen gba chɛ an fɛ.

⁸ Nn nii ma dɔn ni, nn ni fen kɔ fen bia mɔ ɔ mɔ boo ɔ, gbama gbama a. Nn na‑a wai chɛ wan nn sɔɛ gbɛɛ a, su ɔ tee a, min mbe a ma, nn ma koe ma na si wo dɔndɔ wɛɛ kun ma.

⁹ Nn na‑a chɛ ma koe min na, an nii ma a fɔ ni, mbɛ tea nii nn boo ɔ, wo ɔ tisa koe a nn kɔ koe a. Chɛɛ nn na‑a chɛ ma, ma koe an na tɔmɔsi a, wo e che bea‑a min fɛ.

¹⁰ Nn ni chɛ an fɔ wo ye, mmɔ bɛ ni tima min na. Mbɛ mɔ ɔ mɔ, min ban‑da wai ma, wo ma a ma a ni daunɛ chɛ.

¹¹ Nn‑na a a min fan, mbɛ wo bɔɛ dɔ n mbe wan wo tɛ ɔ, miin gboo ɔ faen mu. An mbe ee wai ɔ wai chɛ, fɔ dechee an da chɛ koe a an bɔ n ta koe n dɔ.

¹² Nn mbe an mɔɛ chɛ n na si tena, mmɔ 'a mansa Chisɔsi Chasi tɔɛ ɔ, an ni ma fɔɛ chɛndɛ ɔ. An ni wai chɛ, an da a daun fenɛ ko a. An dimu, an ni chɛ ma.

¹³ Chɛɛ wo wan, nn suun ma nyɔɛ nu Chasi ɔ, wo gboo ɔ ma fa ko chɛndɛ ma koe a.

¹⁴ Mɔɛ ɛ ma‑a wan kɔɛ nɔ, min ban‑da koe chɛ n ma koe a, nn‑na koe miin nyɛn gboo chɛ ɔ wo tena. Ni ɛ ka wan, wo wo ya gba sa an mɔɛ chɛ ma. Wo sin gbu ma gbɛn a ma, min mbe a ma, a ni mau a wandi ma.

¹⁵ Chɛɛ wo ma a ya, wo chɛɛ ma nyɔɛ a. Wo e min ma, wo a a si, yɔ wo suun ma nyɔnɛ.

Pɔɔ ɛ a sa‑a Tɛsadonika mɔɛ n na

¹⁶ Nn mbe samunɛ chɛ tena, mmɔ 'a mansa Chisɔsi wandi, mmɔ 'a faachima ɛ ka min tena, a ni faachima be wo ma tima ɔ tima ko a. A ni a be wo ma, chia ɔ chia a. A ni ma wo gbɛɛ kɔ.

¹⁷ N fandi gbu, n fan Pɔɔ, n fan mbe ka gboo chɛ nyɛn‑da, n ni wo kɔndɔn. N mbe n tɔɛ nyɛn ka wan n 'na gboo nyɛndenɛ n gbɛɛ ɔ. N mbe n 'na gboo n nyɛn ka wan.

¹⁸ Mmɔ 'a mansa Chisɔsi Chasi ni wo gbɛɛ dua.