GBOO FEAN BƆƐ TƐSADONIKA KO A 2 - Yataa 'a Dɔbɛnɛ Nama

Pɔɔ ɛ koɔ‑a, a si mɔɛ ma, min mbe ee sawa kɔɔ

¹ N mbe bai sa tena gbɛ, a si mmɔ 'a mansa Chisɔsi Chasi yɛ koe ma to dunya chɛ ɔ, a ni mmɔ a sɔn sɔn kaina dɔndɔɛ, a wandi tena. Nn suun ma nyɔɛ nu Chasi ɔ, nn mbe wo disa tena wan.

² Nn ma to ni wo 'a fiienɛ ni ma, a si a ma. Wo ma don faagbaa ɔ, ni mɔɛ dɔ n‑na a fɔ wo ye, mbɛ Mansa Chisɔsi na tee wa gbu che‑a. Kɔkɔɛ ɛ wan an mɔɛ chɛ n yii ma, mbɛ nn na‑a chɛ fɔ wo ye chia chɛ an na. A ni ma kɔɛ tima chɛ a, nn ni bai chɛ fɔ tena tima min na, Yataa na‑a min fɔ nn ye, a fɔ koe a mɔɛ n ye. Chɛ ma, tima chɛ a, da ɔ sakana gbama mu, nn‑na min na ben gboo nyɛndenɛ ɔ.

³ Wo ma dɔn mɔ ɔ mɔ ni wo bun ɛnden bɛɛ a. Koe min na mu, an tee chɛ ee na tena wɛ, aan tima ni che, mɔɛ sɛsɛ n mbe na‑a wan sɔ‑a Yataa a kan. Mbɛ mɔɛ min mbe ee sawa kɔɔ, a bɔ‑a ya a ma. A tana, ɛ gbɛ nɔ kasaa koe an na.

⁴ Ɛ Yataa ma bɔ‑a wan, a ni fen fen ma bɔ, an mbe miin fai an 'na Yataa a. Ɛ na‑a a wandi a sɛ‑a wan peche peche, a maenɛ ɛ mbɛ a kan nyɔ ee. Chɛ ɛ a ma‑a wan, a ni don Yataa 'a chenɛ a, a ni si nɔ. A ni a wandi yian nɔ mɔ ɔ mɔ a, mbɛ a wan gbu mu Yataa a.

⁵ N na‑a chɛ gbɛɛ fɔ wan wo ye, mmɔ bɛ ni tima min na. A gbu sin mbe wan wo yii ma gban.

⁶ Chɛɛ wo‑a a sɔn fan, koe min‑na a ma, a ma na nin bɛ. Wo‑a a ɔ sɔn fan, mbɛ tima chɛndɛ kɔɔ mu, ɛ a wandi yian‑da.

⁷ Mɔ sɛsɛ n gbu, an mbe gbɛ koe chɛ n ma‑a nun dɔ, Yataa ma dɔn ni mmɔ ni miin ma. Chɛɛ mɔɛ chɛ, min mbe a a gban tena, ɛ to‑a wan a a gban‑da, aan ɛ ka‑a chia a tima min na.

⁸ A tima chɛ a mu, mɔɛ min mbe ee sawa kɔɔ, ɛ yen‑da wan. Chɛɛ ni Mansa Chisɔsi na‑a to, fia min mbe bɔ‑a dechee a da ɔ, an mbe an mɔɛ chɛ fa‑a. Chisɔsi ɛ ma‑a man ba min dɔ, an mbe an mɔɛ chɛ kasaa‑a.

⁹ Mɔɛ chɛ, min mbe ee sawa kɔɔ, Sitana 'a gbasaya kan kɔ kan mbe ma‑a wan a boo ɔ. Ɛ na‑a kamaya ko wa sɛsɛ ma‑a wan, fania nu.

¹⁰ Ɛ chia yama sɛsɛ ya‑a wan, a ni mɔɛ n bun. Mɔɛ chɛ nu, miin mbe na‑a kasaa‑a. An mbe kasaa‑a koe min na, an ma an boo si ni tea bai kɔɔ, a si Chisɔsi ma. A ma to ni a 'a tea a, min mbe a ma, an ni bauncha ma sɔn.

¹¹ Chɛ an‑na a ma, Yataa‑a gbasaya be, an bun koe a. Chɛ ni a ma, an ni dan fania chɛ gbɛɛ a.

¹² Chɛ ɛ denɛ min suun‑da, an nɛ, Yataa ɛ kaa a tɛ‑a wan an gbɛɛ ma, an ni tɔɔ. An gbɛɛ, miin ma dan ni tea chɛ a, a si Chisɔsi ma. A yɛ to, an faa ma koe mu ko yama ma an na.

Pɔɔ ɔ te, Yataa‑a wo ya bauncha an ko a

¹³ Nn suun ma nyɔɛ nu Chasi ɔ, a dindenɛ mu nn ma, Yataa wai bɔ koe a wo ko a tima ɔ tima. Wo ko a di mmɔ 'a mansa Chisɔsi ye kaka. Yataa wɛɛ na‑a wo pɛn ya, bauncha ma sɔn koe a. A saa saa a, ɛ wo baun fan Yataa Nyina 'a gbasaya ɔ, min mbe a ma‑a, wo ni ma tenchen Yataa ko a. A yɛ to, wo dandenɛ min chɛen mu tea chɛ a, a si Chisɔsi ma, ɛ wo baun fan.

¹⁴ Nn ni sakana bai chɛndɛ min sa ka wo tena, Yataa na‑a wo chee an dɔ, bauncha chɛ ma sɔn koe a. A na‑a wo chee, min mbe a ma, a ni basɔmaya be wo ma, yɔ a na‑a min nyɔn sima be mmɔ 'a mansa Chisɔsi Chasi ma.

¹⁵ Nn suun ma nyɔɛ nu, chɛ an fɛ mu, wo sɔ chidi, wo ni wo boo a chii tea bai chɛ n ma, nn na‑a wo kan miin na, nn ni Yataa bai sa wo tena tima min na, a basan chɛ n na, nn na‑a miin nyɛn gboo ɔ.

¹⁶ Nn mbe samunɛ chɛ tena, Mansa Chisɔsi Chasi tena, an fea mmɔ Fa Yataa a, min toen mu mmɔ a. A sin, ɛ mmɔ faa ma nande tima ɔ tima ko a. Koe min na mu, a 'a koadia demanɛ, a ma mmɔ a bea ni kuɔ fɔ. A sin, a na‑a yiinatɛ be wan mmɔ ma chɛndɛ chɛ.

¹⁷ A ni wo faa ma nande, wo ɔ ni gbɛa. Chɛ ni a ma, tima ɔ tima ko a, wo ni bai sa min nyin, a yɛ to, wo ni koe ma min nyin.