GBOO FEAN BƆƐ KƆYINDI KO A 8 - Yataa 'a Dɔbɛnɛ Nama

Pɔɔ ɛ dasi be‑a, a si fen be koe ma

¹ Nn suun ma nyɔɛ nu Chasi ɔ, nn toen mu wo ni koe ɔ sɔn, a si Yataa 'a koadia demanɛ ma. Wo ni a ɔ sɔn, ɛ koe miin ma tena chɔchi n dɔ Masidonia chɛnyɛ ɔ.

² An‑na ko gbɛama sɛsɛ ɔ bia wan, an sin ni wan to yɔnɛ wɛɛ ɔ, min ni koo. Chɛɛ chɛ gbɛɛ ɔ, buɔdia min ni an dɔ, a ni koo kaka an ma. Mɔ ni chɛ gbu sin yen fan an boo fen ba n dɔ, an ni miin be an faa gbɛɛ a.

³ N mbe che wan a fɔ‑a wo ye, tea ɔ, mbɛ an‑na an boo fenɛ be wan, an 'na gbasaya ni kun min ma. An gbu sin, an‑na a be wan, a ni ben an 'na gbasaya ni kun min ma. An‑na chɛ ma, an fandi gbu kun ma an na.

⁴ An ni ma chɛ ma‑a, an mbe disa chɛndɛ gbu chɛ‑a nn na. An dɔ deman ba mu, nn mbe min chɛ tena an na, a ma koe a, an ni kun basan‑da Yataa 'a mɔɛ n ma Chuusaɛn duu ɔ.

⁵ A sin, an‑na koe chɛ wan, nn yii nii min dɔ. An‑na koe saa min ma, an‑na an fandi be wan Mansa Chisɔsi ma. Mbɛ an yɛ‑a gbɛ, Yataa wandi dɔndenɛ ma, an‑na an fandi be nn bɛɛ ma.

⁶ Chɛ ko a, nn bɛɛ, nn‑na a din fan Taitɔsi ma, min‑na wai chɛ kuu sɔ, a ni a a tun. A ni basan wo ma, wo ni wai chɛ nɛnɛ a ban, min mu koadia wai a.

⁷ Wo nyanden mu gbɛ kaka, fenɛ gbɛɛ ɔ, miin mbe wo boo ɔ. Wo nyanden mu wo 'a kaifa ɔ, Chisɔsi a, wo nyandenɛ ɛ bai n dɔ, wo e miin sa. A yɛ to, yiimatɛ wɛɛ ɔ, teaya gbɛɛ ɔ, a basan koadia a, min mbe wo ɔ, n ko a. Chɛ ko a, wo e ka koadia wai min chɛ‑a, nn toen mu, wo nyandenɛ ni ma ko chɛndɛ ma wɛɛ ɔ.

⁸ N mbe ee ka sawa an sa tena, wo ko a. Chɛɛ ni n‑na a ɔ yian, mɔɛ n ma bɛnden ni buɛ min dɔ, deman chɛ koe a, n mbe ma‑a ka a ɔ gbɛ an na, wo 'a koadia nyin buɛ min dɔ.

⁹ Koe min na mu, wo‑a koadia deman chɛ ɔ sɔn fan, mmɔ 'a mansa Chisɔsi Chasi‑a min chɛ. Mbɛ a nyanden ni wɛɛ, chɛɛ chɛ gbɛɛ ɔ, wo ko a, a‑a a wandi ma yɔn tɔɛ a. A‑a chɛ ma, min mbe a ma, a 'a yɔncha chɛ ɔ, wo wɛɛ ni ma nyan tɔɛ n na.

¹⁰ A sin, n mbe dasi chɛ an be tena. A nyin fan gbɛ, wo‑a wai min kuu sɔ banun, wo ni a a ban. Wo wan nii ma dechee mɔɛ saa n na, a kuu sɔ koe a, chɛɛ wo wan ni mɔɛ saa a, a ma faa ni wo wɛn dɔ.

¹¹ Wo a a gbandia, mbɛ wo‑a a a ban. Wo ma bɛndenɛ ni buɛ min dɔ, a kuu sɔ koe a, wo ma bɛndenɛ ni ma ka, a a ban koe a. Wo sin, wo a chɛ wo boo fenɛ ɔ, min mbe wo boo ɔ.

¹² Koe min na mu, ni wo ma bɛnden mu fen be koe a, Yataa‑a a ɔ sɔn fan, wo e che min be‑a. A sin, ni wo‑a a be, ɛ a ya wan. A ee a fɔ, ɛ boo fenɛ ya wan, min mbe ee mɔɛ boo ɔ.

¹³ N mbe ee butuin chɛ tena, min mbe a ma, n ni feanka ka wo bɔ n kun ma, mbɛ n‑na a si wo sin kun ma. Chɛɛ wo gbɛɛ, wo a kanden fan mu n boo ɔ.

¹⁴ Chɛ an fɛ mu, ni boo fenɛ koa‑a wo boo ɔ, a nyin wo ni chɛ n kɔ, a ee miin boo ɔ. An mbe ma demanɛ a an ko a. Chɛ an mbe a ma, an bɛɛ, ni a ma‑a an boo ɔ kaka tima min na, a ee wo sin boo ɔ, an bɛɛ, an mbe wo deman‑da wan. Chɛ an mbe a ma‑a, wo ni wai chɛ kuiɛ dɔndɔɛ ɔ.

¹⁵ A ni ma yɔ Yataa 'a gboo‑a a fɔ buɛ min dɔ, a ɔ, “Mɔɛ min‑na daun fen sɛmbɛndenɛ a sɔn, a tɔɛ ma to ni a boo ɔ. Mɔɛ chɛ wɛɛ sin, min bɛɛ‑a ɛndenɛ a sɔn dechee, min to‑a a boo ɔ, a‑a a bɔ wan a ko a.”

Pɔɔ ɔ te, ɛ Taitɔsi sɔ‑a

¹⁶ Nn mbe Yataa wai bɔ wan, a ma koe a, wo wakoe chɛ‑a Taitɔsi faa ɔ, basan koe a wo ma, yɔ ɛ buɛ min dɔ n bɛɛ faa ɔ.

¹⁷ Koe min na mu, nn‑na a disa min chɛ, basan koe a wo ma, a nii ma a boo si ni a dechee an kɔɔ. Chɛɛ a wandi gbu, a ni wan a faa ɔ chɛndɛ chɛ, a na koe a wo tena.

¹⁸ Nn mbe Taitɔsi a na tena wo tena, an fea mmɔ suun ma nyɔɛ dɔndɔ a, Chasi ɔ. An suun ma nyɔɛ chɛ sin, mɔɛ n mbe a bai tena kaka chɔchi n gbɛɛ ɔ, a si Yataa 'a bai ma, ɛ min sa ben‑da gbɛɛ.

¹⁹ Chɛ an dechee ko a ma. Chɛɛ a gbu, chɔchi n gbɛɛ‑a an boo sɔ an ma, an‑na a yian, an 'na kɔpɔɛ ni ma a boo ɔ, a ni bea nn fɛ nn 'na tachɛ ɔ. Ni nn ma‑a wai chɛ chɛ‑a, nn bɛ ni ma. Nn gbɛɛ, nn ni wai chɛ, baa be koe a Mansa Chisɔsi tɔɛ ma. A yɛ to, min mbe a ma, nn ni a ɔ yian, mbɛ nn toen mu, nn ni basan mɔ dɔ mende n ma.

²⁰ Nn mbe nn fandi kun ma fɛn tena wan, mɔɛ n boo ɔ. An ma na gbonyɛ nn na, a si nn tachɛ buɛ ma, boo fen chɛ a, min mbe nn boo ɔ an ko a gbama gbama a.

²¹ Nn 'na yiinachii mu chɛ an na. Mbɛ nn ni koe ma, tea ɛ min dɔ, Mansa Yataa chen kɔɔ, ni mɔ gbu n bɛɛ ya a.

²² Chɛ an fɛ mu, mmɔ suun ma nyɔ dɔ mende, Chasi ɔ, nn mbe a bea tena an fɛ, na koe a wo tena. An suun ma nyɔɛ chɛ, a wakoe ɔ gbɛen mu nn boo ɔ, a sin, a ɔ yendenɛ mu, mbɛ mɔ chɛndɛ mu a a, chia sɛsɛ a. A 'a mɔ chɛndɛya gbu, a kun ma chɛ‑a gbɛ, a ben a kɔma ma. Koe min na mu, a yii na tɛen mu wo ma, a sin, ɛ a faa ɔ basan koe a wo ma.

²³ Taitɔsi nan tana, nn bɔɛ mu a a, nn fea, nn mbe wai chɛ tena min na, basan koe a wo ma. Mmɔ suun ma nyɔɛ tɔɛ chɛ n tana sin Chasi ɔ, chɔchi n 'na sɔ mɔɛ mu an na. An sin mbe na basɔmaya an na Chisɔsi Chasi tena.

²⁴ Nn‑na yonka tɛ wan, a si wo ma, mɔna chɛ n tena. Chɛ ko a, wo a ɔ yian mɔɛ chɛ n na, a basan chɔchi n gbɛɛ a, mbɛ nn‑na tea yonka an tɛ, a si koadia ma wo faa ɔ.